Read LAYIDUKURA MARIKI 12 Bible Online

MARIKI 12 - LAYIDUKURA bible

MARIKI 12

¹O kɔ, Yezu y'a daminɛ ka talen la Zuwifuw ka nyamɔgɔw ye ko: “Cɛɛ dɔ ye foro bɔ ka ɛrɛzɛnyiriw tutu yen. A ye kogo lɔ k'a koori, ka dingɛ sogi ka ɛrɛzɛn nin jii bɔyɔrɔ dilan, ka sangaso lɔ a kɔlɔsibagaw ye. A y'a don baarakɛla dɔw bolo. O kɔ, a taara jamana wɛrɛ la.

²Ɛrɛzɛn mɔna tuma min na, a y'a ka jɔɔn dɔ ci baarakɛla nunu fɛ ko a ka taa ale niyɔrɔ minɛ.

³U y'o jɔɔn nin minɛ k'a bugɔ k'a bolo lakolon bila ka segi.

⁴Forotigi ye jɔɔn wɛrɛ ci u fɛ. U y'o fana bugɔ a kuun na k'a nɛni.

⁵Forotigi ye jɔɔn wɛrɛ bila ka taa, u y'o faga. O kɔ, a ye jɔɔn caaman ci u fɛ tugu, u ye dɔw bugɔ ka dɔw faga.

⁶Mɔgɔ kelen min tora forotigi fɛ sisan, o y'a dencɛ ye. A tun b'o kanu kosɛbɛ. A y'o fana ci u fɛ a laban na. A tun y'a fɔ a yɛrɛ kɔnɔ ko: ‘U bɛna ale bonya bari n dencɛ lo.’

⁷Nga baarakɛlaw y'a fɔ nyɔgɔn ye ko: ‘Nin le ye cɛntala ye, aw ka na an k'a faga, a faa cɛɛn bɛna kɛ an ta ye.’

⁸U y'a minɛ k'a faga k'a suu fili waga kɔnɔ.

⁹“Forotigi bɛna mun kɛ sa? A bɛna segi ka taa o baarakɛlaw faga ka baarakɛla dɔ wɛrɛw ta k'u bila foro kɔnɔ.

¹⁰Siga t'a la, aw ye yɔrɔ dɔ kalan Ala ka kuma na min b'a fɔ ko: ‘Bonlɔlaw tun banna kabakuru min na, o nana kɛ boon nɔnkɔn lɔ kabakuru ye.

¹¹Matigi le y'o kɛ. O ye kabako ye an nyana.’ ”

¹²Zuwifuw ka nyamɔgɔw y'a faamu ko Yezu ka talen nin nyaa sinna olu yɛrɛ ma. U tun b'a fɛ ka Yezu minɛ, nga u tun bɛ siran jama nya minkɛ, u taara k'a to yen.

¹³Zuwifuw ka nyamɔgɔw ye Farizinyɛ dɔw ni Erɔdi kɔmɔgɔ dɔw ci Yezu fɛ, janko u ka se k'a minɛ a yɛrɛ dalakuma fɛ.

¹⁴U taar'a fɔ a ye ko: “Karamɔgɔ, an y'a lɔn ko i bɛ tinyɛ fɔ, ko i tɛ siran mɔgɔ si nya fana, bari i tɛ mɔgɔ bɔ mɔgɔ la. I bɛ mɔgɔw kalan Ala sira la ni kuma minw ye, o bɛɛ ye tinyɛ ye. An b'i nyininga yala n'a daganin bɛ an ka nisɔngɔ sara Ɔrɔmu masacɛ ye. An ka kan k'a sara wa, walima an man kan k'a sara?”

¹⁵Yezu y'a lɔn ko koo wɛrɛw b'u kɔnɔ. O la, a y'a fɔ u ye ko: “Mun na aw bɛ ne darabɔ? Aw ka na ni deniye wari dɔ ye, n b'a filɛ.”

¹⁶U ye wari deniye dɔ yira a la. A y'u nyininga ko: “Jon jaa n'a tɔgɔ ye nin ye a kan?” U y'a jaabi ko: “Ɔrɔmu masacɛ ta lo.”

¹⁷O tuma na, Yezu y'a fɔ u ye ko: “Fɛɛn min ye masacɛ ta ye, aw k'o di masacɛ ma, ka Ala ta di Ala ma.” O kuma nin y'u kabakoya kosɛbɛ.

¹⁸Sadusenyɛw le tun b'a fɔ ko suuw tɛna kunun. U dɔw taara Yezu fɛ k'a fɔ a ye ko:

¹⁹“Karamɔgɔ, Musa ye sariya min sigi an Zuwifuw ye, o filɛ nin ye: A ko ni cɛɛ dɔ sara k'a ka muso to k'a sɔrɔ a muso ma deen sɔrɔ, a dɔgɔcɛ ka kan k'o muso nin ta, janko ka deen sɔrɔ muso nin ma ka kɛ a kɔrɔcɛ sii ye.

²⁰Ayiwa, dencɛ wolonwula tun bɛ cɛɛ dɔ fɛ. Kɔrɔcɛman ye muso furu. A sara k'a muso to yen n'a ma deen sɔrɔ.

²¹Filanan y'o muso kelen nin ta. O fana sara ka to a ma deen sɔrɔ ni muso nin ye. A sabanan fana kɛra ten.

²²U wolonwula la, mɔgɔ si ma deen sɔrɔ ni muso nin ye. U bɛɛ sanin kɔ, muso fana sara.

²³Suuw bɛna kunun loon min na, n'o mɔgɔw kununna, muso nin bɛna kɛ u jumɛn ta ye, bari u mɔgɔ wolonwula bɛɛ y'a furu ka ye.”

²⁴Yezu y'u jaabi ko: “Aw m'a lɔn ko aw filila wa? Aw filila, bari aw tɛ Ala ka kuma faamu, aw tɛ Ala ka sebagaya lɔn fana.

²⁵N'o tɛ, suuw bɛna kunun waati min na, furu tɛna kɛ. Mɔgɔw bɛɛ bɛna kɛ i n'a fɔ mɛlɛkɛw sankolo la.

²⁶Aw b'a fɛ k'a lɔn ni suuw bɛna kunun. Taadi? Tasuma tun wilila tufitini min na, Musa y'o koo sɛbɛn a ka kitabu yɔrɔ dɔ la, aw m'o yɔrɔ kalan wa? A sɛbɛnnin b'o yɔrɔ la ko Ala y'a fɔ Musa ye ko: ‘Ne ye Ibrayima ni Isiyaka ani Yakuba ka Ala ye.’

²⁷O mɔgɔ minw tun sara ka kɔrɔ, n'a fɔra ko Ala ye olu ka Ala ye, o b'a yira k'o mɔgɔw bɛ nii na, bari Ala tɛ suuw ka Ala ye. Aw filila kojugu bari aw ko suuw tɛna kunun.”

²⁸Sariya karamɔgɔ dɔ tun y'a tulo malɔ Yezu ni Sadusenyɛw ka kuma na. A y'a ye ko Yezu y'u jaabi ka nya minkɛ, a gwɛrɛla Yezu la k'a nyininga ko: “Ala ka sariya jumɛn koo ka gwɛlɛ a ma ka tɛmɛ tɔw bɛɛ kan?”

²⁹Yezu y'a jaabi ko: “Sariya min koo ka gwɛlɛ Ala ma ka tɛmɛ tɔw bɛɛ kan, o filɛ nin ye: ‘Isirayɛlidenw, aw ka mɛnni kɛ. Matigi an ka Ala ye Matigi kelenpe le ye.

³⁰I k'i Matigi Ala kanu i dusu la, i kɔnɔ na, i hakili la n'i barika bɛɛ ye.’

³¹Min bɛ tugu o la, o filɛ nin ye: ‘I k'i mɔgɔnyɔgɔn kanu i n'a fɔ i b'i yɛrɛ kanu cogo min na.’ Sariya wɛrɛ si koo man gwɛlɛ Ala ma ka olu fila bɔ.”

³²Sariya karamɔgɔ nin y'a fɔ Yezu ye ko: “Cɔ! Karamɔgɔ, i ye tinyɛ fɔ. Ala kelenpe le bɛ yen, dɔ wɛrɛ si tɛ yen n'ale tɛ.

³³Ka Ala kanu i dusu la, i hakili la n'i barika bɛɛ ye, ani k'i mɔgɔnyɔgɔn kanu i n'a fɔ i b'i yɛrɛ kanu cogo min na, o ka fisa ni saraka sifa bɛɛ ye, saraka jɛnitaw fara jɛnibaliw kan.”

³⁴Yezu y'a ye ko a kumana ni hakilitigiya ye minkɛ, a y'a fɔ a ye ko: “Fɛɛn bɛrɛ m'i jɛn ka don Ala ka masaya yɔrɔ la.” O kɔ, mɔgɔ si m'a jaa gwɛlɛya ka Yezu nyininga foyi la tugu.

³⁵Ka Yezu to mɔgɔw kalan na Alabatosoba kɔnɔ, a y'u nyininga ko: “Sariya karamɔgɔw bɛ se k'a fɔ cogo di ko Ala bɛna mɔgɔ min woloma k'a ci, k'o ye Dawuda ka deen dama ye?

³⁶Dawuda yɛrɛ y'a fɔ Nii Senuman barika la ko: ‘Matigi Ala y'a fɔ ne Matigi ye ko: Sigi ne kinibolo fɛ fɔɔ ne k'i juguw cɔnkɔn i seen kɔrɔ.’

³⁷Dawuda yɛrɛ b'a wele ko ale Matigi, a do bɛ se ka kɛ Dawuda ka deen dama ye cogo di?” Jamaba tun b'a lamɛnna ni nisɔndiya ye.

³⁸Ka Yezu to mɔgɔw kalan na, a y'a fɔ u ye ko: “Aw k'aw yɛrɛ kɔlɔsi sariya karamɔgɔw la. A ka d'u ye ka forocaw don ka yaala. U b'a fɛ mɔgɔw k'u bonya ni foli ye jama yɔrɔ la.

³⁹A ka d'u ye fana ka sigi nyafɛ, mɔgɔbaw ka sigiyɔrɔ la, Alabatosow kɔnɔ ani jama dumuni kɛyɔrɔw la.

⁴⁰Olu le bɛ firiyamusow bololafɛn bɛɛ bɔsi. O kɔ, u bɛ mɛn Ala dali la janko mɔgɔw k'u filɛ mɔgɔnyumanw ye. Olu ka jalaki tɔɔrɔ bɛna juguya ka tɛmɛ tɔw ta kan.”

⁴¹Wari tun bɛ don kɛsu min na Alabatosoba kɔnɔ, Yezu sigira k'a nyaa sin o ma. A tun bɛ mɔgɔw ka wari doncogo filɛ. Nafolotigi caaman ye wari caaman don o kɛsu kɔnɔ.

⁴²Firiyamuso dɛsɛbagatɔ dɔ nana ka warimisɛn deen fila don yen. O wari hakɛ tun tɛ tɛmɛ tama kelen nyɔgɔn kan.

⁴³O tuma na, Yezu ye muso nin yira kalandenw na k'a fɔ u ye ko: “Tinyɛ na, ne b'a fɔ aw ye ko firiyamuso dɛsɛbagatɔ nin ye wari min don kɛsu kɔnɔ, o ka ca ni mɔgɔ tɔw bɛɛ ta ye.

⁴⁴Mɔgɔ tɔw ye dɔɔni dɔrɔn bɔ u ka nafolo la k'a di, nga ale kɔni n'a ka faantanya bɛɛ, a y'a cɛɛn bɛɛ di. A ma foyi to a kun ka kɛ dumuni sɔngɔ ye k'a sɔrɔ dumunifɛn si t'a fɛ.”