Read LAYIDUKURA MARIKI 13 Bible Online

MARIKI 13 - LAYIDUKURA bible

MARIKI 13

¹Yezu bɔtɔ Alabatosoba kɔnɔ, a ka kalandenw kelen y'a fɔ a ye ko: “Karamɔgɔ, soba nin lɔcogo filɛ ni kabakurubabaw ye dɛ!”

²Yezu y'a fɔ a ye ko: “I nyaa bɛ sobaba nunu na kɛ? Kabakuru si tɛna to a tɔnyɔgɔn kan, u bɛɛ bɛna ben.”

³Yezu taara sigi Olivuyirikulu kan k'a nyaa sin Alabatosoba ma. K'a to yen, Piyɛri ni Zaki ni Zan ani Andere taar'a nyininga u danna ko:

⁴“Koo nunu bɛna kɛ tuma jumɛn? Mun ni mun bɛna kɛ fɔlɔ k'a yira k'o koow kɛ tuma sera?”

⁵Yezu ye kuma ta k'a fɔ u ye ko: “Aw k'aw yɛrɛw kɔlɔsi janko mɔgɔ si kana aw lafili.

⁶Mɔgɔ caaman bɛna na ne tɔgɔ la u yɛrɛ kan k'a fɔ ko ye Ala ka mɔgɔwolomanin nin ye. U bɛna mɔgɔ caaman lafili.

⁷N'aw ye yɔrɔjan kɛlɛw kibaru mɛn, ka yɔrɔsurun taw mankan mɛn tuma min na, aw hakili kana nyagami. Wajibi lo o koow ka kɛ, nga o tɛna kɛ a laban ye fɔlɔ.

⁸Siya dɔ bɛna wili siya dɔ wɛrɛ kama. Jamana dɔ bɛna wili jamana dɔ wɛrɛ kama. Dugukolo bɛna yɛrɛyɛrɛ yɔrɔ caaman na, kɔngɔ fana bɛna don. Olu bɛna kɛ tɔɔrɔ daminɛ ye fɔlɔ.

⁹“Aw k'aw yɛrɛw kɔlɔsi, sabu, u bɛna aw don kititigɛlaw bolo. U bɛna aw bugɔ Alabatosow kɔnɔ. U bɛna taa n'aw ye jamanatigiw ni masacɛw fɛ ne kɔsɔn. O bɛna kɛ sababu ye aw bɛ ne koo fɔ u ye.

¹⁰Sanni laban tuma ka se, wajibi lo kibaru diman ka fɔ siyaw bɛɛ ye fɔlɔ.

¹¹N'u y'aw minɛ ka taa aw don kititigɛlaw bolo tuma o tuma, aw kɔnɔ kana gwan ko aw bɛna mun fɔ. Kuma min bɛna bila aw hakili la o waati yɛrɛ la, aw k'o fɔ. Bari aw tɛna kuma aw yɛrɛw ma, nga aw bɛna kuma Nii Senuman barika la.

¹²Faa kelen deenw bɛna kɛ sababu ye u b'u dɔ faga. Faaw bɛna o nyɔgɔn kɛ u deenw na. Deenw bɛna kɛ sababu ye u b'u wolobagaw faga.

¹³Mɔgɔ bɛɛ bɛna aw kɔniya ne kɔsɔn, nga mɔgɔ min bɛna o koow munyu fɔɔ a laban na, o tigi bɛna kisi.

¹⁴“Fɛnjugu cɛnnikɛla man kan ka to yɔrɔ min na, aw bɛna o siginin ye o yɔrɔ la. (Mɔgɔ min bɛ nin kalan, o ka kan k'a faamu dɛ!) O tuma na, kuluw bɛ yɔrɔ min na, Zude mara mɔgɔw ka boli ka taa yen.

¹⁵N'o y'a sɔrɔ mɔgɔ min bɛ boon kunna, n'o tigi jigira, a kana don soo kɔnɔ k'a bololafɛn dɔ ta.

¹⁶Ni min bɛ foro la, o kana segi soo ka ta'a ka nɛnɛ duloki ta.

¹⁷O waati la, muso kɔnɔmanw, ani minw ka deen bɛ siin min, olu bɛna tɔɔrɔ kosɛbɛ.

¹⁸Aw ka Ala dali k'o boli kana kɛ saminya tuma na,

¹⁹bari o loon tɔɔrɔ bɛna bonya kojugu. O tɔɔrɔ nyɔgɔn ma sɔrɔ fɔlɔ kabini Ala ye dinyɛ dan fɔɔ ka na se bii ma. O bɔnyɔgɔnko tɔɔrɔ tɛna mɔgɔw sɔrɔ tugu abada.

²⁰Ni Matigi tun m'a latigɛ ko a bɛna dɔ bɔ o tɔɔrɔ waati la, mɔgɔ si tun tɛna se ka kisi. Nga, a ye mɔgɔ minw woloma k'u kɛ a yɛrɛ taw ye, olu kɔsɔn a bɛna dɔ bɔ a la.

²¹“Ni mɔgɔ dɔ y'a fɔ aw ye o tuma na ko: ‘A filɛ, Ala ka Mɔgɔ wolomanin nin bɛ yan’, walima n'a ko: ‘A bɛ yen fɛ’, aw kana la a la.

²²Mɔgɔ dɔw bɛna galon tigɛ ko olu ye Ala ka Mɔgɔ wolomanin nin ye. Dɔw fana bɛna galon tigɛ ko olu ye kira ye. U bɛna kabakow kɛ ka mɔgɔw lafili n'o ye. Ala ye mɔgɔ minw woloma k'u kɛ a yɛrɛ taw ye, n'u tun bɛ se, u tun bɛna olu fana lafili.

²³O la, aw k'aw yɛrɛw kɔlɔsi dɛ! Koo minw bɛna kɛ, ne y'o bɛɛ fɔ aw ye ka ban.

²⁴“Tɔɔrɔba waati tɛmɛnin kɔ, tile bɛna fin, kalo tɛna yeelen bɔ tugu.

²⁵Lolow bɛna bɔ sankolo la ka ben, sankolo bɛna yɛrɛyɛrɛ.

²⁶O tuma na, mɔgɔw bɛna Mɔgɔ Dencɛ natɔ ye sankabaw cɛma ni sebagaya ni nɔɔrɔ ye.

²⁷A ye mɔgɔ minw woloma k'u kɛ a yɛrɛ taw ye, a bɛna mɛlɛkɛw ci dinyɛ faan naani bɛɛ la ka taa olu lajɛn, k'a daminɛ sankolo ni dugukolo daan na kɔrɔn fɛ, fɔɔ ka ta'a bila sankolo ni dugukolo daan na tileben fɛ.

²⁸“Mɔgɔw bɛ fɛɛn min lɔn torosun fɛ, o filɛ nin ye: N'a bolow nugura ka ban tuma min na, aw b'a lɔn ko saminya surunyana.

²⁹O cogo kelen na, n'aw y'a ye o koow bɛ kɛ tuma min na, aw k'a lɔn ko Mɔgɔ Dencɛ natuma sera ka ban, a bɛ sira la.

³⁰Tinyɛ na, ne b'a fɔ aw ye ko bii mɔgɔw bɛɛ tɛna sa ka ban ni koo nunu bɛɛ ma kɛ.

³¹Sankolo ni dugukolo bɛna wili ka bɔ u nɔɔ na, nga ne ka kuma tɛna bɔ a nɔɔ na abada.

³²“Mɔgɔ si tɛ ne nalon n'a waati lɔn, hali mɛlɛkɛw t'a loon lɔn. Ne min ye Ala Dencɛ ye, ne yɛrɛ fana t'a lɔn fɔɔ n Faa Ala kelenpe.

³³Aw k'aw yɛrɛw kɔlɔsi, aw kana nyina, bari aw t'a waati lɔn.

³⁴Ayiwa, a bɛna kɛ i n'a fɔ cɛɛ dɔ ta. A taara taama na. Sanni a ka taa, a y'a ka soo kalifa a ka jɔɔnw ma, ka baara di u bɛɛ kelen kelen ma. A y'a fɔ soda kɔlɔsibaga ye ko a ka to ka daa kɔlɔsi ka nya.

³⁵O la, aw ye to aw nyana, bari sotigi bɛna segi ka na wulafɛ wa, walima dugutilama wa, walima dondo kasituma wa, walima sɔgɔma wa, aw t'o lɔn.

³⁶Aw ye to aw nyana janko a kana na bari aw la k'aw sɔrɔ sinɔgɔ la.

³⁷Ne bɛ min fɔra aw ye, mɔgɔ bɛɛ seen b'a la: Aw ye to aw nyana.”