Read LAYIDUKURA MARIKI 14 Bible Online

MARIKI 14 - LAYIDUKURA bible

MARIKI 14

¹A tun tora tile fila Hɔrɔnya nyanagwɛ ni Buru funubali nyanagwɛ ka se. O y'a sɔrɔ sarakalasebagaw ni sariya karamɔgɔw tun bɛna se ka Yezu minɛ dogo la cogo min na k'a faga, u tun b'o cogo le nyinina.

²U tun b'a fɔra k'u man kan k'a minɛ nyanagwɛ tuma na, ko n'o tɛ, mɔgɔw bɛna muruti.

³Ka Yezu to dumuni na kunatɔ Simɔn ka soo kɔnɔ Betani, muso dɔ donna ni daga cɛnyumannin dɔ ye. O daga nin tun dilannin bɛ ni kabakuru dɔ ye min bɛ wele alabatiri. A fanin tun bɛ tulu kasadiman dɔ la min sɔngɔ ka gwɛlɛ kosɛbɛ. A y'o dayɛlɛ ka tulu nin kɛ Yezu kuun na.

⁴Mɔgɔ minw tun bɛ yen, olu dɔw dimina k'a fɔ nyɔgɔn ye ko: “Mun na a ye tulu kasadiman nin cɛn ten?

⁵O tun bɛ se ka feere ka wari deniye kɛmɛ saba nyɔgɔn sɔrɔ k'o tilan faantanw cɛ.” U dimina muso nin kɔrɔ kosɛbɛ k'a kɔrɔfɔ.

⁶Nga Yezu y'a fɔ u ye ko: “Aw k'a to yen. Mun na aw b'a dusu kasi? A ye konyuman le kɛ ne ye ten.

⁷Aw bɛna to ni faantanw ye tuma bɛɛ. N'aw b'a fɛ ka konyuman kɛ u ye tuma o tuma, aw bɛ se k'a kɛ u ye. Nga ne tɛna to n'aw ye tuma bɛɛ.

⁸A y'a seko le kɛ. A kɔnna ka ne fari kasa diya ni tulu nin ye sanni ne ka sa u ka ne suu don.

⁹Tinyɛ na, ne b'a fɔ aw ye ko kibaru diman mana fɔ dinyɛ yɔrɔ o yɔrɔ, muso nin ye min kɛ, a tɔgɔ bɛna fɔ u hakili bɛ jigi a koo la.”

¹⁰Zuda Isikariyɔti, n'o tun ye kalanden tan ni fila dɔ ye, o taar'a fɔ sarakalasebagaw ye ko ale b'a fɛ ka Yezu don u bolo.

¹¹A ka kuma diyara u ye kosɛbɛ. U bɛnna a la k'u bɛna wari hakɛ dɔ d'a ma. Zuda bɛna cogonyuman min sɔrɔ ka Yezu don u bolo, a y'a daminɛ k'o nyini.

¹²Buru funubali nyanagwɛ loon fɔlɔ, sagaden tun bɛ faga loon min na ka kɛ Hɔrɔnya nyanagwɛ saraka ye, Yezu ka kalandenw y'a nyininga ko: “I b'a fɛ an ka taa Hɔrɔnya nyanagwɛ dumuni labɛn i ye yɔrɔ jumɛn?”

¹³O la, Yezu y'a ka kalandenw fila ci. A y'a fɔ u ye ko: “Aw ye taa Zeruzalɛmu. Aw ni cɛɛ dɔ bɛna nyɔgɔn kunbɛn, duun fanin bɛ jii la a kuun na, aw ye tugu a nɔɔ fɛ.

¹⁴O cɛɛ bɛna taa don luu min kɔnɔ, aw k'a fɔ o lutigi ye ko karamɔgɔ ko a n'a ka kalandenw bɛna Hɔrɔnya nyanagwɛ dumuni kɛ boon min kɔnɔ, k'o bɛ min?

¹⁵A bɛna bonba dɔ yira aw la sangaso la min labɛnnin lo. An mako bɛna se fɛɛn minw ma, o bɛɛ b'a kɔnɔ. Aw ka Hɔrɔnya nyanagwɛ dumuni labɛn an ye o yɔrɔ la.”

¹⁶O kalanden nunu taara ka don Zeruzalɛmu. Yezu tun y'a fɔ u ye cogo min na, a kɛra ten fana. U ye Hɔrɔnya nyanagwɛ dumuni labɛn yen.

¹⁷Tilekun donnin kɔ, Yezu n'a ka kalanden tan ni fila taara don o boon kɔnɔ.

¹⁸K'u siginin to dumuni na, Yezu y'a fɔ u ye ko: “Tinyɛ na, ne b'a fɔ aw ye ko aw minw bɛ dumuni kɛra ni ne ye, aw dɔ bɛna ne don mɔgɔw bolo.”

¹⁹Kalandenw dusu kasira. U y'a nyininga kelen kelen ko: “Ne lo wa?”

²⁰A y'u jaabi ko: “Aw mɔgɔ tan ni fila nunu dɔ lo. A tigi b'a bolo donna minan kelen kɔnɔ ni ne ye.

²¹Mɔgɔ Dencɛ bɛna sa i n'a fɔ a fɔra Ala ka kuma na a koo la cogo min na, nga min bɛn'a don mɔgɔw bolo, bɔnɛ bɛna o tigi sɔrɔ. N'o tigi tun ma wolo yɛrɛ, o tun ka fisa a ma.”

²²Ka Yezu n'a ka kalandenw to dumuni na, a ye buru ta ka barika la Ala ye. O kɔ, a y'a tilantilan k'a di a ka kalandenw ma, k'a fɔ u ye ko: “Aw k'a minɛ, nin ye ne fari ye.”

²³O kɔ, a ye duvɛn ta ka barika la Ala ye, k'a d'u ma. U bɛɛ ye dɔ min.

²⁴A y'a fɔ u ye ko: “Nin ye ne joli ye, joli min bɛ Ala ka layidu dafa, o min bɛna bɔn mɔgɔ bɛɛ ka kojugu yafa kɔsɔn.

²⁵Tinyɛ na, ne b'a fɔ aw ye ko ne tɛna duvɛn min tugu, fɔɔ ne ka se Ala ka masaya yɔrɔ la ka sɔrɔ k'a min cogo wɛrɛ la.”

²⁶U ye Ala tando ni dɔnkiliw ye ka ban tuma min na, u bɔra ka taa Olivuyirikulu kan.

²⁷Yezu y'a fɔ a ka kalandenw ye ko: “Aw bɛɛ bɛna boli ka ne to, bari a fɔra Ala ka kuma na ko: ‘Ne Ala bɛna sagadɛndɛbaga bugɔ ka faga, sagaw bɛna boli ka jɛnsɛn.’ ”

²⁸Yezu taara nya ni kuma ye k'a fɔ ko: “Ni ne kununna n sanin kɔ tuma min na, ne bɛna bila aw nya Galile mara la.”

²⁹Piyɛri y'a fɔ a ye ko: “Hali ni tɔw bɛɛ bolila k'i to, ne kɔni tɛna o kɛ fewu.”

³⁰Yezu y'a fɔ a ye ko: “Tinyɛ na, ne b'a fɔ i ye ko bii suu nin na yɛrɛ, sanni dondo ka kasi sinyɛ fila, i bɛn'a fɔ sinyɛ saba ko i tɛ ne lɔn.”

³¹Nga, Piyɛri y'a daa gwɛlɛya k'a fɔ Yezu ye ko: “Hali n'an fila ka kan ka faga nyɔgɔn fɛ, ne tɛn'a fɔ ko n t'i lɔn abada.” Tɔw bɛɛ fana y'a fɔ ten.

³²Yezu n'a ka kalandenw taara dugu banakɔ yɔrɔ dɔ la min tɔgɔ ko Zɛtisemane. A y'a fɔ a ka kalandenw ye ko: “Aw ka sigi yan, ne bɛ taa Ala dali ka na.”

³³A taara nyafɛ dɔɔni ni Piyɛri ni Zaki ani Zan ye. A hakili daminɛna ka nyagami. Siranya y'a minɛ.

³⁴A y'a fɔ u ye ko: “Dusukasi bɛna n faga. Aw ye to yan yɔrɔ la, aw kana sinɔgɔ.”

³⁵A taara nyafɛ dɔɔni k'a kunbiri gwan ka Ala dali k'o waati tɔɔrɔ kana ale sɔrɔ n'a ma kɛ wajibi ye.

³⁶A ko: “Ne Faa, i bɛ se fɛɛn bɛɛ la. I ka ne kisi tɔɔrɔ nin ma. O n'a ta bɛɛ, ne sago kana kɛ, fɔɔ e sago.”

³⁷O kɔ, a segira ka na kalanden saba nunu fɛ ka u sɔrɔ sinɔgɔ la. A y'a fɔ Piyɛri ye ko: “Simɔn, i bɛ sinɔgɔ wa? I ma se ka to nyaa na ka hali waati dɔɔni yɛrɛ kɛ wa?

³⁸Aw ye to nyaa na ka Ala dali janko ni Sutana y'aw nigɛ, a kana se aw kɔrɔ. Konyuman kɛ miiriya bɛ mɔgɔw kɔnɔ, nga a kɛ see t'u ye.”

³⁹A bɔra u kɔrɔ tugu ka taa Ala dali fɔlɔta cogo la.

⁴⁰O kɔ, a segira u fɛ tugu ka taa u sɔrɔ sinɔgɔ la, bari sinɔgɔ tun b'u la kojugu. U kununna, u m'a lɔn u bɛna kuma min fɔ Yezu ye.

⁴¹A sinyɛ sabanan, Yezu segira u fɛ tuma min na, a y'a fɔ u ye ko: “Aw bɛ sinɔgɔra halibi wa? Aw bɛ lafinyɛna kɛ! A banna. Waati sera. A filɛ, u bɛna Mɔgɔ Dencɛ don kojugukɛlaw bolo sisan sisan.

⁴²Aw ye wili, min bɛ ne don u bolo, o natɔ filɛ, an ka ta'a kunbɛn.”

⁴³Ka Yezu to kuma na, Zuda min tun y'a ka kalanden tan ni fila dɔ ye, ale sera o yɔrɔnin bɛ ni jama ye. Murujan ni berew tun b'u bolo. Sarakalasebagaw ni sariya karamɔgɔw ani cɛkɔrɔbaw le tun y'u ci.

⁴⁴Yezu janfabaga Zuda tun y'a fɔ jama ye ko: “Ne bɛna cɛɛ min fo ka n bolo meleke a kaan na, o le ye Yezu ye. Aw k'a minɛ ka taa n'a ye. Aw taatɔ, aw b'a kɔlɔsi ka nya.”

⁴⁵Zuda sera dɔrɔn, a sinna Yezu ma k'a fɔ a ye ko: “Karamɔgɔ!” O kɔ, a y'a bolo meleke Yezu kaan na.

⁴⁶O tuma na, mɔgɔ nunu tonna Yezu kan k'a minɛ.

⁴⁷Yezu ka kalanden dɔ y'a ka murujan bɔ ka sarakalasebagaw kuntigiba ka baaraden tulo caron.

⁴⁸Yezu ye kuma ta k'a fɔ jama ye ko: “Aw nana ni murujanw ni berew ye aw bolo ka ne minɛ, i n'a fɔ ne ye benkannikɛla ye.

⁴⁹Ne tun b'aw cɛma loon o loon Alabatosoba kɔnɔ ka mɔgɔw kalan, aw do ma ne minɛ. Nga a kɛra ten janko min fɔra ne koo la Ala ka kuma na, o ka kɛ.”

⁵⁰O waati la, kalandenw bɛɛ bolila ka Yezu to yen.

⁵¹Kanbelen dɔ tun bɛ Yezu nɔɔ fɛ, a tun ye birifani dɔrɔn meleke a yɛrɛ la. Mɔgɔ dɔw bɔra jama cɛma k'a minɛ.

⁵²Nga, a y'a yɛrɛ fosi ka birifani to u bolo ka boli ka tunu n'a fari lakolon ye.

⁵³Mɔgɔ minw tun ye Yezu minɛ, u taara n'a ye sarakalasebagaw kuntigiba ka soo. Sarakalasebagaw ni cɛkɔrɔbaw ani sariya karamɔgɔw bɛɛ taara lajɛn yen.

⁵⁴Piyɛri tun tugura Yezu ni jama nɔɔ fɛ ka furancɛba to u ni nyɔgɔn cɛ, fɔɔ ka taa don sarakalasebagaw kuntigiba ka luu kɔnɔ. A sigira ni Alabatosoba kɔlɔsibagaw ye tasuma gɛrɛfɛ k'a fari ja.

⁵⁵O y'a sɔrɔ, sarakalasebagaw ni Zuwifuw ka kititigɛlaw bɛɛ tun bɛ Yezu jalakiyɔrɔ nyinina janko ka se k'a faga. Nga u ma jalakiyɔrɔ sɔrɔ a la.

⁵⁶Mɔgɔ caaman ye galon tigɛ ka la a kan, nga, u kaan ma kɛ kelen ye.

⁵⁷Dɔw wilila ka galon tigɛ ka la a kan ko:

⁵⁸“An y'a mɛn a daa la ko mɔgɔw ye nin Alabatosoba min lɔ, ko ale bɛna o ci ka dɔ wɛrɛ lɔ tile saba kɔnɔ, ko mɔgɔw tɛna o lɔ.”

⁵⁹Nga, hali o kuma nin faan fɛ, u kaan ma kɛ kelen ye.

⁶⁰O tuma na, sarakalasebagaw kuntigiba wilila ka taa lɔ jama cɛma ka Yezu nyininga ko: “Mɔgɔ nunu bɛ kuma min fɔra i koo la, i tɛ foyi fɔ o la wa?”

⁶¹Nga Yezu y'a daje, a ma foyi fɔ. Sarakalasebagaw kuntigiba y'a nyininga tugu ko: “Ele lo ye Ala ka Mɔgɔ wolomanin nin ye wa? Ala Dencɛ?”

⁶²Yezu y'a jaabi ko: “Ɔnhɔn. Ne y'o ye. Aw bɛna Mɔgɔ Dencɛ siginin ye Setigi Ala kinibolo fɛ. O kɔ, aw bɛn'a natɔ ye fana sankabaw cɛma ka bɔ sankolo la.”

⁶³Yezu y'o fɔ dɔrɔn, sarakalasebagaw kuntigiba dimina, fɔɔ a y'a yɛrɛ kannaduloki minɛ k'a faran k'a fɔ ko: “An mako tɛ mɔgɔ la tugu k'a jalaki.

⁶⁴Aw ye Ala tɔgɔcɛn kuma mɛn a daa la kɛ! Aw bɛ mun miiri?” U bɛɛ y'a fɔ ko a ka kan ka faga.

⁶⁵Dɔw y'a daminɛ k'u daji tu Yezu kan. U y'a nyaa siri ka sɔrɔ k'a bugɔ ni bolokuruw ye k'a nyininga ko: “Jon y'i bugɔ?” O kɔ, Alabatosoba kɔlɔsibagaw y'a minɛ k'a tulo fata, k'a fata.

⁶⁶Ka Piyɛri to luu kɛnɛ la duguma, muso dɔ sera. O muso nin tun bɛ baara kɛ sarakalasebagaw kuntigiba fɛ.

⁶⁷A ye Piyɛri ye n'a b'a fari jara tasuma na. A ye Piyɛri nyada filɛ ka nya k'a fɔ a ye ko: “I fana tun bɛ ni Nazarɛti Yezu ye.”

⁶⁸Piyɛri y'a sɔsɔ. A ko: “N t'a lɔn. Ne m'i ka kuma faamu.” Piyɛri bɔra ka taa lɔ luu daa la. Dondo kasira.

⁶⁹O kɔ, o muso kelen nin ye Piyɛri ye tugu k'a fɔ o yɔrɔ mɔgɔw ye ko: “Cɛɛ nin ye u dɔ ye.”

⁷⁰Piyɛri y'a sɔsɔ tugu. Waati dɔɔni o kɔ, o yɔrɔ mɔgɔw y'a fɔ Piyɛri ye tugu ko: “Siga t'a la, i ye u dɔ ye, bari i fana ye Galileka ye.”

⁷¹O tuma na, Piyɛri kalila ko: “Ni ne ye galon tigɛ aw ye, Ala kana n to. Aw bɛ kuma cɛɛ min koo la, ne t'o lɔn.”

⁷²O yɔrɔnin kelen, dondo kasira a sinyɛ filanan. Yezu tun y'a fɔ Piyɛri ye ko: “Sanni dondo ka kasi sinyɛ fila, i bɛn'a fɔ sinyɛ saba ko i tɛ ne lɔn.” Piyɛri hakili jigira o kuma na. A y'a daminɛ ka kasi.