Read LAYIDUKURA MARIKI 2 Bible Online

MARIKI 2 - LAYIDUKURA bible

MARIKI 2

¹Tile dama tɛmɛnin kɔ, Yezu segira ka taa Kafaranamu. Mɔgɔw y'a mɛn ko a bɛ soo kɔnɔ minkɛ,

²jamaba taara lajɛn a fɛ fɔɔ lɔyɔrɔ dɛsɛra, hali kɛnɛma boon daa la. Yezu tun bɛ Ala ka kuma fɔra u ye.

³O tuma na, mɔgɔ naani taar'a fɛ ni muruku dɔ ye.

⁴U tun tɛ se ka gwɛrɛ Yezu la jama kɔsɔn minkɛ, Yezu tun bɛ boon kɔnɔ yɔrɔ min na, u yɛlɛla k'o yɔrɔ sanfɛla walaka ka muruku jigi ni juru ye o woo fɛ k'a lanin to dilan kan.

⁵Yezu y'a ye k'o mɔgɔw lara ale la minkɛ, a y'a fɔ muruku ye ko: “N teri, ne y'i ka kojuguw yafa.”

⁶O y'a sɔrɔ sariya karamɔgɔ dɔw siginin tun bɛ yen. U y'a daminɛ ka miiri ko

⁷mun na cɛɛ nin bɛ kuma ten, ko a bɛ Ala tɔgɔ cɛn, ko jon le bɛ se ka mɔgɔ ka kojuguw yafa ni Ala kelen tɛ?

⁸O yɔrɔnin kelen, Yezu y'u ka miiriya lɔn a yɛrɛ ma, a y'a fɔ u ye ko: “Mun y'a to aw b'a la ka miiri ten?

⁹K'a fɔ muruku ye ko: ‘Ne y'i ka kojuguw yafa’, walima k'a fɔ a ye ko: ‘Wili k'i ka dilan ta ka taama’, o kuma fila la, jumɛn fɔli ka nɔgɔ?

¹⁰Nga n b'a fɛ aw k'a lɔn ko see bɛ Mɔgɔ Dencɛ ye ka mɔgɔ ka kojuguw yafa ka n to dugukolo kan.” O kɔ, a y'a fɔ muruku ye ko:

¹¹“N b'a fɔ i ye, wili k'i ka dilan ta ka taa soo.”

¹²O yɔrɔnin bɛ, cɛɛ nin wilila k'a ka dilan ta ka bɔ u bɛɛ nyana. U bɛɛ kabakoyara fɔɔ u tun bɛ Ala tando n'u b'a fɔ ko: “An ma nin nyɔgɔn ye abada.”

¹³Yezu bɔra ka taa Galile bada la tugu. Jama bɛɛ taar'a fɛ yen. A y'u kalan.

¹⁴A tɛmɛtɔ, a ye Alife dencɛ Levi siginin ye wusuruminɛlaw ka baara kɛyɔrɔ la. Yezu y'a fɔ a ye ko: “Tugu ne kɔ.” Levi wilila ka tugu a kɔ.

¹⁵O kɔ, ka Yezu n'a ka kalandenw to dumuni na Levi ka soo, mɔgɔ caaman tun sigira u fɛ ka dumuni kɛ. Wusuruminɛlaw ani mɔgɔw tun bɛ mɔgɔ wɛrɛ minw fana jati kojugukɛlaw ye, olu tun lo, sabu o mɔgɔ sifa nunu le tun bɛ to ka tugu Yezu nɔɔ fɛ caaman.

¹⁶Sariya karamɔgɔ minw ye Farizinyɛw ye, olu dɔw y'a ye ko Yezu n'o mɔgɔw bɛ dumuni kɛra nyɔgɔn fɛ minkɛ, u y'a ka kalandenw nyininga ko: “Mun na a bɛ dumuni kɛ ni wusuruminɛlaw ani kojugukɛlaw ye?”

¹⁷Yezu y'u ka kuma mɛn minkɛ, a y'a fɔ u ye ko: “Mɔgɔ minw ka kɛnɛ, olu mako tɛ furakɛla la, banabagatɔw le mako b'a la. Mɔgɔ minw b'u yɛrɛw jati mɔgɔnyumanw ye, ne ma na olu wele, nga mɔgɔ minw b'a lɔn ko u ye kojugukɛlaw ye, ne nana olu le wele.”

¹⁸Loon dɔ, Zan ka kalandenw ni Farizinyɛw tun bɛ suun na. Mɔgɔ dɔw taara Yezu nyininga ko: “Mun na Farizinyɛw ka kalandenw ni Zan taw bɛ suun don k'a sɔrɔ e taw tɛ suun don?”

¹⁹Yezu ye talen la u ye a yɛrɛ koo la ko: “Kɔnyɔcɛ teriw bɛ se ka suun don k'u ni kɔnyɔcɛ to nyɔgɔn fɛ wa? K'u ni kɔnyɔcɛ to nyɔgɔn fɛ, u tɛ se ka suun don.

²⁰Nga waati dɔ bɛna se, kɔnyɔcɛ bɛna bɔsi u la, u bɛna suun don o tuma na.”

²¹A ye talen la u ye tugu a ka kalan koo la ko: “Mɔgɔ si tɛ fani kunkurunkura bari fani kɔrɔman na. N'o kɛra, fani kunkurunnin kuraman nin bɛna fani kɔrɔman sama k'a faran ka juguya ni fɔlɔta ye.

²²Mɔgɔ si tɛ duvɛnkɛnɛ kɛ foroko kɔrɔman kɔnɔ. N'o kɛra, duvɛn kɔgɔtɔ, a bɛna foroko faran, foroko bɛna cɛn, duvɛn bɛna bɔn. Nga duvɛnkɛnɛ ka kan ka kɛ forokokura le kɔnɔ.”

²³Lafinyɛlon dɔ la, Yezu n'a ka kalandenw tɛmɛtɔ foro dɔw furancɛ la, a ka kalandenw y'a daminɛ ka suman dɔw tigɛ.

²⁴Farizinyɛw ye Yezu nyininga ko: “A filɛ, koo min daganin tɛ lafinyɛlon na, mun na i ka kalandenw b'o kɛ?”

²⁵Yezu y'u jaabi ko: “Kɔngɔ ye Dawuda n'a kɔmɔgɔw minɛ tuma min na k'a sɔrɔ dumunifɛn tun t'u fɛ, a ye min kɛ, aw m'o kalan ka ye Ala ka kuma na wa?

²⁶A donna Ala ka soo kɔnɔ sarakalasebagaw kuntigiba Abiyatari ka tile la. Burukun minw tun bilanin bɛ Ala ye, a ye olu dɔ nyimi ka tila ka dɔ d'a kɔmɔgɔw ma, k'a sɔrɔ mɔgɔ si tun man kan k'olu nyimi fɔɔ sarakalasebagaw dɔrɔn.”

²⁷O kɔ, Yezu y'a fɔ u ye ko: “Ala ye lafinyɛlon sigi mɔgɔ nafa kɔsɔn, a ma mɔgɔ dan lafinyɛlon kɔsɔn.

²⁸O le y'a to Mɔgɔ Dencɛ ye lafinyɛlon fana kuntigi ye.”