Read LAYIDUKURA MARIKI 4 Bible Online

MARIKI 4 - LAYIDUKURA bible

MARIKI 4

¹Sinyɛ wɛrɛ, Yezu y'a daminɛ ka mɔgɔw kalan tugu bada la. Mɔgɔw taara lajɛn a kɔrɔ. Jama nana bonya fɔɔ a donna kurun dɔ kɔnɔ ka sigi. Jama bɛɛ lɔra bada la.

²A y'u kalan koo caaman na ni talenw ye. A y'a fɔ u ye a ka kalan na ko:

³“Aw ka lamɛnni kɛ. Sɛnɛkɛla dɔ bɔra ka taa sumansi seri a ka foro la.

⁴K'a to serili la, kisɛ dɔw taara ben sira daa la. Kɔnɔw nana olu kunu.

⁵Kisɛ dɔw fana taara ben fara yɔrɔ la, bɔgɔ bɛrɛ tun tɛ yen. U falenna joona, sabu u ma don duguma ka se yɔrɔjan.

⁶Nga tile fariyara tuma min na, u jara bari lili nyanaman tun t'u la.

⁷Kisɛ dɔw fana taara ben binjugu yɔrɔ la. Biin wilila k'u degun fɔɔ u ma nya hali dɔɔni.

⁸Nga kisɛ dɔw taara ben dugukolonyuman na. U falenna ka bonya ka nya kosɛbɛ. U dɔw ye deen bi saba kɛ, dɔw bi wɔɔrɔ, dɔw fana kɛmɛ.”

⁹O kɔ, Yezu y'a fɔ u ye ko: “Mɔgɔ min b'a fɛ ka mɛnni kɛ, o k'a tulo malɔ ka nya.”

¹⁰Yezu bɔra jama kɔrɔ tuma min na, a nɔfɛmɔgɔw n'a ka kalanden tan ni fila y'a nyininga o talen kɔrɔ la.

¹¹A y'u jaabi ko: “Mɔgɔw tun ma se ka fɛɛn min faamu Ala ka masaya koo la, Ala ye aw nyaa yɛlɛ k'o faamu. Nga tinyɛ bɛɛ bɛ fɔ mɔgɔ tɔw ye talen na.

¹²O cogo la, ‘U bɛna filɛli kɛ fɔɔ u nyaa ka ja, u tɛna foyi ye, u bɛna lamɛnni kɛ ka sɛgɛn, u tɛna foyi faamu. N'u tun b'a faamu, u tun bɛna tuubi Ala ye, Ala tun bɛna yafa u ma. Nga u tɛ miiri o la.’ ”

¹³Yezu taara nya ni kuma ye k'a fɔ u ye ko: “Aw ma talen nin faamu wa? Aw do bɛna talen tɔw bɛɛ faamu cogo di?

¹⁴Serilikɛla bɛ Ala ka kuma le seri.

¹⁵Kuma serituma na, mɔgɔ dɔw bɛ i n'a fɔ sira daa. N'u y'o kuma mɛn dɔrɔn, Sutana bɛ na k'o kuma bɔ u kɔnɔ.

¹⁶O cogo la, mɔgɔ dɔw fana bɔnin bɛ fara yɔrɔ fɛ. N'u y'o kuma mɛn, o yɔrɔnin bɛ, u bɛ sɔn a ma ni nisɔndiya ye.

¹⁷Nga u t'a to o kuma liliw ka dunya u kɔnɔ. U tɛ munyuli kɛ, ni gwɛlɛya nana, walima ni mɔgɔw b'u tɔɔrɔ o kuma kama dɔrɔn, o bɛ kɛ sababu ye u kunna bɛ cɛn.

¹⁸Mɔgɔ dɔw fana bɛ i n'a fɔ binjugu yɔrɔ. Ni olu b'o kuma mɛn,

¹⁹dinyɛ kɔnɔ hakilinyagamikow, ni nafoloko, ani fɛɛn wɛrɛw nigɛ bɛ kɛ sababu ye, u b'o kuma kɛ kuma fu ye fɔɔ nafa dɔɔni yɛrɛ tɛ sɔrɔ a la.

²⁰Mɔgɔ dɔw fana bɔnin bɛ dugukolonyuman fɛ. Ni olu b'o kuma mɛn, u bɛ sɔn a ma. U bɛ deen kɛ Ala ye. Dɔw b'u nyɔgɔn bi saba kɛ, dɔw bi wɔɔrɔ, dɔw kɛmɛ.”

²¹O kɔ, Yezu y'a fɔ u ye ko: “Mɔgɔ si tɛ lanpan mana k'a bila gongo jukɔrɔ walima kalaka jukɔrɔ. Tinyɛ tɛ wa? A t'a sigi fɛɛn dɔ kan wa?

²²Koo o koo dogonin bɛɛ, Ala bɛna o yira. Gundo si tɛ yen ni Ala tɛn'a bɔ kɛnɛ kan.

²³Tulo b'aw fɛ ka mɛnni kɛ. O la, aw ka aw tulo malɔ ka nya.”

²⁴Yezu y'a fɔ u ye tuguni ko: “Aw bɛ kuma min mɛn, aw k'aw janto o la kosɛbɛ. Ala bɛna aw sɔn ka kɛnyɛ n'aw ka lamɛnni kɛcogo ye. A bɛna dɔ fara aw ta kan yɛrɛ,

²⁵bari fɛɛn bɛ min bolo, dɔ bɛna d'o ma ka fara a ta kan, nga fɛɛn tɛ min bolo, hali dɔɔni min b'a bolo, o bɛna bɔsi a la.”

²⁶Yezu y'a fɔ tuguni ko: “Ala ka masaya barika bɛ bonya cogo min na, o filɛ nin ye. A bɛ kɛ i n'a fɔ cɛɛ dɔ min ye sumansi seri a ka foro la.

²⁷O kɔ, cɛɛ bɛ to ka sinɔgɔ sufɛ ka kunun sɔgɔma. O waati la, kisɛ bɛ falen ka bonya k'a sɔrɔ cɛɛ m'a falen n'a bonyacogo lɔn.

²⁸Kisɛ bɛ falen a yɛrɛ ma ka bɔ dugukolo la. A bɛ wili dɔɔni dɔɔni fɔɔ ka na kuun bɔ, o kɔ, a bɛ fa ni kisɛ ye.

²⁹Ni kisɛw kɔgɔra dɔrɔn, cɛɛ b'a tigɛ ni wɔrɔsɔ ye, bari suman tigɛtuma sera.”

³⁰Yezu y'a fɔ tugu ko: “Masa Ala ka baara bɛ taa nya cogo min na, an bɛna o gwɛya cogo di?

³¹A bɔnin bɛ mutaridikisɛ fɛ. O kisɛ ka dɔgɔ ni dinyɛ kɔnɔ dannifɛnw bɛɛ ye.

³²Nga n'a serila ka ban, a bɛ falen ka bonya ka tɛmɛ nankɔ fɛɛn sɛnɛta tɔw bɛɛ kan. A bolow bɛ bonya fɔɔ kɔnɔw bɛ se k'u ka nyagaw la u kan.”

³³Yezu tun bɛ mɔgɔw kalan n'o bɔnyɔgɔnko talen caaman ye ka kɛnyɛ n'a lamɛnbagaw ka faamuli danyɔrɔ ye.

³⁴A tun tɛ kuma mɔgɔw fɛ n'a ma talen la u ye. Nga ni Yezu n'a ka kalandenw b'u danna, a b'o talenw bɛɛ kɔrɔ fɔ olu ye.

³⁵O loon yɛrɛ wulafɛ, Yezu y'a fɔ a ka kalandenw ye ko: “An ka taa baa kɔ.”

³⁶U taara ka jama to yen. Yezu tun bɛ kurun min kɔnɔ, a ka kalandenw taara n'a ye o kɔnɔ. Kurun dɔ wɛrɛw tun b'u kɔ.

³⁷U taatɔ, fɔnyɔba wilila. Jikuruw tun bɛ ben kurun kɔnɔ fɔɔ kurun tun bɛ nyini ka fa jii la.

³⁸Yezu tun bɛ sinɔgɔra kurun kɔfɛla la, a kuun lanin tun bɛ piti kan. A ka kalandenw y'a kunun k'a fɔ a ye ko: “Karamɔgɔ, an bɛna halaki jii la, i tɛ hami o la wa?”

³⁹Yezu kununna ka sɔngɔ fɔnyɔ kunna, k'a fɔ a ye ko a ka lɔ. Fɔnyɔ lɔra. A y'a fɔ baji ye ko a ka mankan dabila. Jii ye mankan dabila.

⁴⁰O kɔ, a y'a fɔ a ka kalandenw ye ko: “Mun na aw bɛ siran ten? Aw ma la ne la halibi wa?”

⁴¹U siranna kosɛbɛ fɔɔ u ye nyɔgɔn nyininga ko: “Cɛɛ nin ye jon ye ni fɔnyɔ ni baji yɛrɛ bɛ sɔn a ta ma?”