Read LAYIDUKURA MARIKI 5 Bible Online

MARIKI 5 - LAYIDUKURA bible

MARIKI 5

¹Yezu n'a ka kalandenw sera baa kɔ Gadarekaw ka mara la.

²Yezu jigira ka bɔ kurun kɔnɔ dɔrɔn, cɛɛ jinatɔ dɔ bɔra kaburutu la ka ta'a kunbɛn.

³Kaburutu tun kɛra o cɛɛ sigiyɔrɔ ye. Mɔgɔ si tun tɛ se k'a minɛ k'a siri tugu, hali n'u y'a siri ni jɔrɔkɔ ye, a b'o tigɛ.

⁴Sinyɛ caaman u y'a seenw n'a bolow siri ni jɔrɔkɔ ye, nga a tora k'o tigɛtigɛ. Mɔgɔ si ma se k'a kolo.

⁵A tun bɛ yaalayaala kaburutu la ani kuluw kan suu ni tile ka to ka kule ani k'a yɛrɛ mandimi ni kabakuruw ye.

⁶A ye Yezu ye k'a to yɔrɔjan minkɛ, a bolila ka ta'a kunbiri gwan a kɔrɔ.

⁷A pɛrɛnna ko: “Mun b'an cɛ, Ala kɔrɔtaninba Dencɛ Yezu? N b'i dali Ala kama, i kana n tɔɔrɔ.”

⁸A y'o kuma fɔ, bari Yezu tun b'a fɔra jina ye ko a ka bɔ cɛɛ la.

⁹O tuma na, Yezu y'a nyininga ko: “I tɔgɔ bɛ di?” A y'a jaabi ko: “Jamaba, bari an ka ca.”

¹⁰A ye Yezu dali kosɛbɛ ko a kana u gwɛn ka bɔ o mara kɔnɔ.

¹¹O y'a sɔrɔ, lɛkuluba dɔ tun bɛ dumuni kɛra kulu gɛrɛfɛ.

¹²O la, jina nunu ye Yezu dali ko: “Sabali k'an bila ka taa don lɛɛ nunu na.”

¹³Yezu sɔnna. Jinaw bɔra cɛɛ la ka taa don lɛɛw la. Lɛkulu bɛɛ girinna ka jigi kulu jigijigijugu fɛ ka taa don baji la. O lɛɛw tun bɛ waa fila nyɔgɔn bɔ, u bɛɛ sara jii la.

¹⁴Lɛɛ nunu dɛndɛbagaw bolila ka taa o kibaru fɔ dugu kɔnɔ ni dafɛ duguw la. Koo min kɛra, mɔgɔw bɔra ka taa o filɛ.

¹⁵Jina caaman tun bɛ cɛɛ min na, mɔgɔw sera Yezu fɛ k'o jinatɔkɔrɔ siginin ye. Sisan fani b'a kaan na, a nyamalɔnin lo. U siranna.

¹⁶Koo min kɛra jinatɔkɔrɔ ye, ani min kɛra lɛɛw la, mɔgɔ minw y'o ye, u y'o lakali tɔw ye.

¹⁷O koow mɛnnin kɔ, mɔgɔw y'a nyini Yezu fɛ ko a ka taa ka bɔ u ka mara la.

¹⁸Yezu dontɔ kurun kɔnɔ, jinatɔkɔrɔ nin y'a dali ko a ka sɔn ale ka ta'a fɛ.

¹⁹Yezu ma sɔn, nga a y'a fɔ a ye ko: “Taa soo. Matigi Ala hinɛna i la ka koba min kɛ i ye, i ka taa o lakali i ka somɔgɔw ye.”

²⁰Yezu ye koba min kɛ a ye, a taara o kibaru jɛnsɛn Dugu Tan mara la. O koo mɛnbagaw bɛɛ kabakoyara.

²¹Yezu kɔsegira kurun kɔnɔ ka taa baa kɔ. Mɔgɔ caaman taara lajɛn a kɔrɔ bada la.

²²Alabatoso dɔ kuntigi taara yen. A tɔgɔ tun ko Zayirisi. A ye Yezu ye tuma min na, a y'a kunbiri gwan Yezu kɔrɔ,

²³k'a dali kosɛbɛ ko: “N denmuso bɛ nyini ka sa. Sabali ka na i bolo la a kan janko a ka kɛnɛya ka to nii na.”

²⁴U ye Zayirisi ka soo sira ta. Jamaba tugura Yezu nɔɔ fɛ k'a degun.

²⁵O y'a sɔrɔ muso dɔ tun bɛ jama cɛma min ka koli tun b'a sɛgɛnna kabini saan tan ni fila, joli tɛ lɔ ka ye.

²⁶A tun tɔɔrɔla kosɛbɛ furakɛla caaman bolo. A bololafɛn bɛɛ banna. O n'a ta bɛɛ, a ka bana ma nɔgɔya, nga a tun bɛ juguya ka taa.

²⁷A ye Yezu kibaru mɛn minkɛ, a donna jama cɛma Yezu kɔfɛ ka maga a ka fani na.

²⁸A tun y'a fɔ a yɛrɛ kɔnɔ ko: “Ni n sera ka maga a ka fani dɔrɔn na, n bɛna kɛnɛya.”

²⁹A magara Yezu ka fani na tuma min na, o yɔrɔnin bɛ, joli lɔra, a y'a lɔn ko a ka bana banna.

³⁰O yɔrɔnin kelen, Yezu y'a lɔn a yɛrɛ ma ko sebagaya dɔ bɔra ale la. A y'a nyaa yɛlɛma jama cɛma k'a fɔ ko: “Jon le magara n ka fani na?”

³¹A ka kalandenw y'a jaabi ko: “I nyaa b'a la jama y'i degun, i bɛ tila k'a fɔ tugu ko jon magara i la.”

³²Yezu y'a daminɛ k'a gɛrɛfɛ mɔgɔw filɛ janko a k'o kɛbaga ye.

³³O muso tun bɛ yɛrɛyɛrɛla siranya bolo, bari koo min kɛra a yɛrɛ la, a y'o lɔn. A taar'a kunbiri gwan Yezu kɔrɔ ka tinyɛ bɛɛ fɔ a ye.

³⁴Nga Yezu y'a fɔ a ye ko: “N dɔgɔmuso, i kɛnɛyara bari i lara ne la, taa hɛrɛ la, i kɛnɛyanin ka to.”

³⁵Ka Yezu to o kuma na, mɔgɔ dɔw bɔra kuntigi Zayirisi ka soo ka n'a fɔ a ye ko: “I denmuso banna. Mun na i bɛ karamɔgɔ sɛgɛn tugu?”

³⁶Nga Yezu ma u ka kuma jati, a y'a fɔ Zayirisi ye ko: “I kana siran, la ne la dɔrɔn.”

³⁷O kɔ, a ma sɔn mɔgɔ si ka ta'a fɛ Zayirisi ka soo, fɔɔ Piyɛri ni Zaki ani Zaki dɔgɔcɛ Zan.

³⁸U sera Alabatoso kuntigi nin ka soo tuma min na, Yezu y'a ye ko mankanba bɛ yen. Mɔgɔw tun bɛ kasira ka kule.

³⁹Yezu donna soo kɔnɔ k'a fɔ u ye ko: “Nin ye mun mankan ye? Mun na aw bɛ kasi? Deen ma sa, a bɛ sinɔgɔra le.”

⁴⁰Mɔgɔw yɛlɛla Yezu ma. O tuma na, a ye mɔgɔ bɛɛ bɔ kɛnɛma. Deen suu lanin tun bɛ boon min kɔnɔ, a donna yen ni deen faa n'a baa an'a yɛrɛ ka kalanden saba ye.

⁴¹A y'a bolo minɛ k'a fɔ a ye u ka kaan na ko: “Talita kumi,” (o kɔrɔ ko: “Sungurunin, n b'a fɔ i ye, wili!”)

⁴²O yɔrɔnin bɛ, sungurunin wilila ka taama. (A sii tun ye saan tan ni fila ye.) U kabakoyara ka dama tɛmɛ.

⁴³Yezu y'a fɔ u ye k'a gwɛlɛya k'u kan'a fɔ mɔgɔ si ye. O kɔ, a y'a fɔ u ye k'u ka dumuni d'a ma.