Read LAYIDUKURA MARIKI 6 Bible Online

MARIKI 6 - LAYIDUKURA bible

MARIKI 6

¹Yezu bɔra o yɔrɔ la ka ta'a ka dugu la. A ka kalandenw tugura a kɔ.

²Lafinyɛlon sera minkɛ, a donna Alabatoso kɔnɔ ka mɔgɔw kalan. A lamɛnbagaw bɛɛ kabakoyara kosɛbɛ. U tun b'a fɔra ko: “Haan! A bɔra ni nin ye min? Hakili min b'a fɛ, a y'o sɔrɔ min? A bɛ kabako minw kɛ, a b'o kɛ cogo di?

³Yirilɛsɛla tɛ wa? Mariyamu ka dencɛ nin tɛ wa? A dɔgɔcɛw tɛ Zaki ni Zoze ni Zude ani Simɔn ye wa? A dɔgɔmusow t'an fɛ yan wa”? O miiriya le y'a to u ma la a la.

⁴Nga Yezu y'a fɔ u ye ko: “Kira bɛ bonya sɔrɔ yɔrɔ bɛɛ, fɔɔ a ka dugumɔgɔw n'a balimaw an'a ka somɔgɔw cɛma.”

⁵Yezu y'a bolo la banabagatɔ dɔw kan k'u kɛnɛya. A ma se ka kabako si kɛ yen ka fara o kan.

⁶U ma la Yezu la minkɛ, o y'a kabakoya. O kɔ, a taara u lamini duguw la ka mɔgɔw kalan.

⁷Yezu y'a ka kalanden tan ni fila wele k'u ci fila fila. A ye see d'u ma ka jinaw gwɛn ka bɔ mɔgɔw la.

⁸A y'a fɔ u ye ko: “Aw kana fɛɛn si ta bere dama kɔ. Dumuni wo, dugutaaminan wo, wari wo, aw kana taa n'o si ye.

⁹Aw ka sanbara don nga aw kana duloki fila don.”

¹⁰A y'a fɔ u ye fana ko: “N'aw sera dugu o dugu la, n'aw jigira mɔgɔ min fɛ, aw ka to o tigi fɛ fɔɔ aw ka bɔ o dugu nin kɔnɔ.

¹¹Ni yɔrɔ dɔ ka mɔgɔw ma sɔn aw ka jigi u fɛ, n'u ma sɔn k'aw ka kuma lamɛn, n'aw bɛ bɔ yen tuma min na, aw k'aw sennabuguri furanfuran ka bɔ aw seen na. O bɛna kɛ taamasinyɛ ye k'a yira u la ko a bɛna bɔ u nyaa na.”

¹²Kalanden tan ni fila taara mɔgɔw waaju k'u ka nimisa ka faran u ka kojuguw la.

¹³U ye jina caaman gwɛn ka bɔ mɔgɔw la ka tulu mɔ banabagatɔ caaman na k'u kɛnɛya.

¹⁴O waati la, masacɛ Erɔdi fana ye Yezu koo mɛn, bari Yezu tɔgɔ tun bɔra yɔrɔ bɛɛ la. Mɔgɔ dɔw tun b'a fɔ ko: “Zan batizelikɛla le kununna a sanin kɔ. O le y'a to a bɛ se ka kabakow kɛ.”

¹⁵Dɔw tun ko kira Eli lo. Dɔw fana tun ko fɔlɔfɔlɔ kiraw nyɔgɔn lo.

¹⁶Nga Erɔdi y'o mɛn tuma min na, a y'a fɔ ko: “Ne tun ye Zan min kuun tigɛ, ale le kununna.”

¹⁷Fɛɛn min y'a to Erɔdi tun ye Zan kuun tigɛ, o filɛ nin ye: Erɔdi yɛrɛ tun ye mɔgɔ bila ka taa Zan minɛ k'a don kaso la a dɔgɔcɛ Filipi ka muso kama. Muso nin tɔgɔ tun ko Erodiyadi. Erɔdi tun y'o furu.

¹⁸Zan tun y'a fɔ Erɔdi ye o tuma na ko: “I man kan k'i dɔgɔcɛ ka muso bɔsi a la k'a furu.”

¹⁹O kuma kɔsɔn, Erodiyadi tun dimina Zan kɔrɔ kosɛbɛ. A tun b'a fɛ Erɔdi ka Zan faga nga a tun dɛsɛra Erɔdi kɔrɔ,

²⁰bari Erɔdi tun bɛ siran Zan nya. Erɔdi tun y'a lɔn ko Zan ye mɔgɔnyuman ni mɔgɔsɛbɛ ye. A tun bɛ Zan tanga kojugu ma. N'a ye Zan ka kuma lamɛn tuma o tuma, a hakili bɛ nyagami. O n'a ta bɛɛ, a tun ka d'a ye k'a lamɛn.

²¹Erɔdi y'a wololon sanyɛlɛma nyanagwɛ kɛ loon min na, o kɛra Erodiyadi ka lonnyuman ye. O loon nin na, Erɔdi y'a kɔfɛ mɔgɔw ni sɔlidasi kuntigiw ani Galile mara mɔgɔbabaw wele ka dumuniba d'u ma.

²²K'u to dumuni na, Erodiyadi denmuso donna u fɛ ka dɔɔn kɛ. O diyara Erɔdi n'a ka mɔgɔ weleninw ye, Erɔdi y'a fɔ sunguru nin ye ko: “I bɛ fɛɛn min fɛ, o fɔ ne ye, ne bɛna o d'i ma.”

²³Erɔdi y'i kali a ye ko: “I mana fɛɛn o fɛɛn dali ne fɛ, ne bɛna o d'i ma, hali ne ka jamana tilancɛ.”

²⁴Sunguru bɔra ka ta'a baa nyininga ko: “I b'a fɛ ne ka mun dali?” A y'a jaabi ko: “Zan batizelikɛla kungolo.”

²⁵O yɔrɔnin bɛ, sunguru teliyara ka kɔsegi ka taa masacɛ fɛ k'a fɔ a ye ko: “N b'a fɛ i ka Zan batizelikɛla kuun di n ma minan dɔ kɔnɔ sisan sisan.”

²⁶Masacɛ nyaa sisira nga a y'i kali minkɛ mɔgɔ weleninw nyana, a tun tɛ se ka ban.

²⁷O yɔrɔnin kelen sɔlidasi minw ka baara ye mɔgɔfaga ye, a y'o dɔ ci ko a ka taa Zan kuun tigɛ ka na n'a ye. Sɔlidasi nin taara Zan kuun tigɛ kasobon na,

²⁸k'a bila minan dɔ kɔnɔ, ka n'a di sunguru nin ma. O fana taar'a d'a bamuso ma.

²⁹Zan ka kalandenw y'o mɛn tuma min na, u taar'a suu ta k'a don.

³⁰Yezu tun ye mɔgɔ minw ci, olu kɔsegira ka taa lajɛn a kɔrɔ. U ye mɔgɔw kalan fɛɛn minw na ka koo minw kɛ, u y'o bɛɛ lakali a ye.

³¹A y'a fɔ u ye ko: “Aw ye na an ka taa an danna yɔrɔ dɔ la janko aw ka lafinyɛ yen dɔɔni.” A y'o fɔ bari mɔgɔ caaman tun bɛ taa u fɛ, dɔw bɛ taa ni dɔw bɛ segi fɔɔ Yezu n'a ka kalandenw tun tɛ waati yɛrɛ sɔrɔ ka dumuni kɛ.

³²U donna kurun kɔnɔ k'u bɛ taa u danna yɔrɔ dɔ la.

³³Mɔgɔ caaman y'u taatɔ ye k'u lɔn. Mɔgɔw bɔra dafɛ duguw bɛɛ la ka boli ka kɔn u nya u taayɔrɔ la.

³⁴Yezu n'a ka kalandenw sera yen tuma min na, a bɔtɔ kurun kɔnɔ, a ye jamaba ye. U hinɛ donna a la, bari o mɔgɔw tun bɛ a nyana i n'a fɔ dɛndɛbaga tɛ saga minw na. A y'a daminɛ k'u kalan fɛɛn caaman na.

³⁵A ka kalandenw gwɛrɛla a la wuladafɛ k'a fɔ a ye ko: “Tile bɛ nyini ka ban, yan do ye kongo ye.

³⁶Sira di jama ma u ka taa dafɛ duguw la ka dumuni san u yɛrɛ ye.”

³⁷A y'u jaabi ko: “Aw yɛrɛw ka dumuni d'u ma.” U y'a nyininga ko: “O tuma na, i b'a fɛ an ka taa buru san ni wari deniye kɛmɛ fila ye ka na a d'u ma wa?”

³⁸Yezu y'a fɔ u ye ko: “Burukun joli b'aw fɛ? Aw ka ta'a lajɛ.” U taar'a filɛ minkɛ, u segira ka ta'a fɔ a ye ko burukun duuru ni jigɛ fila.

³⁹A y'a fɔ u ye ko: “Aw ka mɔgɔw tilantilan k'u ka sigi duguma, binkɛnɛ kan.”

⁴⁰U dɔw sigira mɔgɔ kɛmɛ kɛmɛ, u dɔw bi duduuru.

⁴¹Yezu ye burukun duuru ni jigɛ fila nunu ta, k'a nyaa kɔrɔ ta sanfɛ ka barika la Ala ye. A sɔrɔla ka burukunw tilantilan k'u di a ka kalandenw ma, k'u k'a tilan mɔgɔw cɛ. A ye jigɛ fila fana tilan u bɛɛ cɛ.

⁴²U bɛɛ ye dumuni kɛ fɔɔ ka fa.

⁴³Buru ni jigɛ tɔɔ min tora, kalandenw y'o cɛ ka segi tan ni fila fa n'o ye.

⁴⁴Mɔgɔ minw tun y'o dumuni kɛ, cɛɛw tun ye mɔgɔ waa duuru ye u cɛma.

⁴⁵O yɔrɔnin bɛ, Yezu y'a fɔ a ka kalandenw ye k'u ka don kurun kɔnɔ ka taa ale nya baa kɔ Bɛtisayida faan fɛ, sanni ale bɛ jama labila.

⁴⁶Yezu y'a fɔ jama ye k'u ka taa soo. O kɔ, a taara yɛlɛ kulu dɔ kan ka Ala dali.

⁴⁷Suu kora ka kalandenw to kurun kɔnɔ baji cɛmancɛ la. O waati la, Yezu kelenpe tun bɛ duguma.

⁴⁸Yezu y'a ye ko a ka kalandenw tɔɔrɔnin bɛ kurun boli fɛ, bari fɔnyɔba tun b'u kunbɛnna. A taamana baji kan ka taa u faan fɛ dondo kasi filanan waati la. A tun bɛ nyini ka tɛmɛ u kan.

⁴⁹U y'a taamatɔ ye baji kan minkɛ, u y'a miiri ko suja lo. U kulera,

⁵⁰bari u bɛɛ tun y'a ye, ani u jaa tun wilila. O yɔrɔnin bɛ, Yezu kumana u fɛ k'a fɔ u ye ko: “Aw k'aw jaa gwɛlɛya, ne lo, aw kana siran.”

⁵¹A sɔrɔla ka don u fɛ kurun kɔnɔ. Fɔnyɔ lɔra. U kabakoyara ka dama tɛmɛ,

⁵²bari Yezu tun ye kabako min kɛ ni burukunw ye, u tun m'o faamu, u hakili tun ka dɔgɔ o faamuli ma.

⁵³Yezu n'a ka kalandenw ye baa tigɛ ka se Zenezarɛti mara la. U y'u ka kurun lɔ bada la.

⁵⁴U bɔra kurun kɔnɔ dɔrɔn, mɔgɔw ye Yezu lɔn.

⁵⁵U bolila ka ta'a fɔ yɔrɔ bɛɛ. Ni mɔgɔw y'a mɛn ko Yezu bɛ yɔrɔ o yɔrɔ, u bɛ banabagatɔw ta lafɛn dɔw kan ka ta'a fɛ yen.

⁵⁶Yezu mana taa yɔrɔ o yɔrɔ, dugubaw la wo, dugudenninw na wo, walima togodaw la, mɔgɔw tun bɛ taa ni banabagatɔw ye kɛnɛgwɛ yɔrɔw la k'a dali ko a ka sɔn u ka maga a ka fani dakun dama na. Banabagatɔ minw bɛɛ magara a la, olu kɛnɛyara.