Read LAYIDUKURA MARIKI 7 Bible Online

MARIKI 7 - LAYIDUKURA bible

MARIKI 7

¹Farizinyɛw ni sariya karamɔgɔ dɔw bɔra Zeruzalɛmu ka taa lajɛn Yezu kɔrɔ.

²U y'a ye ko a ka kalanden dɔw bɛ dumuni kɛra n'u tigɛnɔgɔninw ye, bari u tun m'u tigɛw ko ka kɛnyɛ ni Farizinyɛw ka landa ye.

³Tinyɛ na, Farizinyɛw ni Zuwifu tɔw si tun tɛ dumuni kɛ n'u m'u tigɛw ko ka nya ka kɛnyɛ n'u faaw ka landa ye.

⁴Hali n'u kɔsegira ka bɔ lɔgɔ la, u tun tɛ dumuni kɛ n'u ma ko fɔlɔ. U tun bɛ landa caaman labato fana i n'a fɔ jifilenw kocogo, ani duunw ni nigɛdagaw kocogo.

⁵O le y'a to Farizinyɛw ni sariya karamɔgɔw ye Yezu nyininga ko mun na a ka kalandenw tɛ u faaw ka landa labato, ko mun na u bɛ dumuni kɛ n'u tigɛnɔgɔninw ye.

⁶Yezu y'u jaabi ko: “Ezayi ye kiraya kuma min fɔ aw filankafɔw koo la, o bɛnna kosɛbɛ. A y'a sɛbɛn ko Ala y'a fɔ ko: ‘Mɔgɔ nunu bɛ ne bonya n'u daa dɔrɔn ye nga u dusukun yɔrɔ ka jan ne la.

⁷U bɛ ne bato gwansan, bari u bɛ nyɔgɔn kalan koo minw na, o ye mɔgɔw ka sariya ye, ne ta tɛ.’ ”

⁸Yezu y'a fɔ u ye k'u bɛ Ala ka sariyaw to yen ka mɔgɔw ka landaw labato.

⁹A y'a fɔ u ye tugu ko: “Aw bɛ sababu sɔrɔ ka ban Ala ka sariyaw la k'aw yɛrɛw ka landa kɛ.

¹⁰Musa y'a fɔ ko mɔgɔ k'a faa n'a baa bonya, ko ni mɔgɔ min y'a faa walima a baa dɔgɔya, k'o tigi ka kan ka faga.

¹¹Aw do b'a fɔ ko ni mɔgɔ dɔ y'a fɔ a faa walima a baa ye ko a tun bɛ se k'a dɛmɛ n'a bololafɛn min ye, ko ale y'o di Ala ma,

¹²aw t'a to o tigi k'a faa walima a baa dɛmɛ n'a bololafɛn si ye tugu.

¹³O cogo la, aw bɛ Ala ka kuma jati kuma fu ye. Aw bɛ nyɔgɔn kalan landako minw na, aw b'olu fisaya ni Ala ka kuma ye. Aw b'o bɔnyɔgɔnko caaman kɛ.”

¹⁴Yezu ye jama wele tugu k'a fɔ u ye ko: “Aw bɛɛ k'aw tulo malɔ ka n ka kuma faamu:

¹⁵Mɔgɔ bɛ fɛɛn o fɛɛn don a daa la, o tɛ se k'a nɔgɔ, nga min bɛ bɔ a dusu la, o le b'a nɔgɔ. [

¹⁶Tulo b'aw fɛ ka mɛnni kɛ. O la, aw ye aw tulo malɔ ka nya.]”

¹⁷Yezu bɔra jama kɔrɔ ka taa don soo kɔnɔ tuma min na, a ka kalandenw y'a nyininga o kuma kɔrɔ la.

¹⁸A y'u jaabi ko: “Aw fana ye hakilitanw ye wa? Aw m'a faamu ko mɔgɔ bɛ fɛɛn o fɛɛn don a daa la, k'o tɛ se k'a nɔgɔ wa?

¹⁹O t'a nɔgɔ, bari o tɛ don a dusu la, nga o bɛ don a kɔnɔbara la, o kɔ, a bɛ taa banakɔ.” (O cogo la, Yezu y'a yira a ka kuma fɛ ko dumunifɛn bɛɛ bɛ se ka dumu.)

²⁰A y'a fɔ u ye fana ko: “Fɛɛn minw bɛ bɔ mɔgɔ dusu la, olu le b'a nɔgɔ.

²¹Miiriyajuguw bɛ bɔ mɔgɔ dusu le la. Olu le b'a to mɔgɔ bɛ kakalaya kɛ, a bɛ sonyali kɛ, a bɛ mɔgɔ faga.

²²Olu le b'a to fana a bɛ nyamɔgɔya kɛ, a tɛ wasa, a ka jugu, a bɛ mɔgɔ nigɛ ka don koo la, a bɛ mɔgɔkolonya kɛ, a nyaa bɛ bɔ mɔgɔ ka fɛɛn fɛ, a bɛ mɔgɔ tɔgɔ cɛn, a b'a yɛrɛ bonya, a tɛ miiri.

²³Kojugu nunu bɛɛ bɛ bɔ mɔgɔ dusu la, olu le b'a nɔgɔ.”

²⁴O kɔ, Yezu bɔra Zuwifuw ka mara la ka taa Tiri gɛrɛfɛ dugu dɔ la. A jigira mɔgɔ dɔ ka soo. A tun t'a fɛ mɔgɔ si k'a lɔn ko ale b'o soo kɔnɔ, nga mɔgɔw nana bɔ a kala ma.

²⁵Muso dɔ tun bɛ yen, jina tun b'a denmuso la. A ye Yezu kibaru mɛn dɔrɔn, a taar'a kunbiri gwan Yezu kɔrɔ.

²⁶O muso tun tɛ Zuwifu ye. A wolola Siri gɛrɛfɛ jamana dɔ la min tɔgɔ ko Fenisi. A ye Yezu dali ko a ka jina gwɛn ka bɔ a denmuso la.

²⁷Nga Yezu ye talen la a ye ko: “A to n ka Zuwifuw dɛmɛ ban, bari mɔgɔ man kan ka denmisɛnw ka dumuni ta, k'a di wuluw ma.”

²⁸A ye Yezu jaabi ko: “Matigi, o ye tinyɛ ye, nga ka denmisɛnw to dumuni na, dumuni murumuru minw bɛ ben duguma, wuluw b'o dumu.”

²⁹O tuma na, Yezu y'a fɔ a ye ko: “I ka kuma nin kɔsɔn, jina bɔra i denmuso la ka ban. Segi ka taa soo.”

³⁰Muso segira ka taa soo. A taara deen lanin sɔrɔ kalaka kan. Jina tun bɔra a la ka ban.

³¹Yezu bɔra Tiri mara la ka taa tɛmɛ Sidɔn, ka Dugu Tan mara cɛɛ tigɛ ka sɔrɔ ka taa Galile baa faan fɛ.

³²Mɔgɔ dɔw taara Yezu sɛgɛrɛ ni cɛɛ tulogweren dɔ ye. A tun tɛ se ka kuma ka nya fana. U ye Yezu dali ko a k'a bolo la o cɛɛ kan k'a kɛnɛya.

³³O la, Yezu taara n'a ye a danna. A y'a bolokunandenw don cɛɛ tulo la k'a daji mɔ a nɛnkun na.

³⁴O kɔ, Yezu y'a nyaa kɔrɔ ta sanfɛ ka ninakili ni fanga ye k'a fɔ a ye u ka kaan na ko: “Efata!” (o kɔrɔ ko i tulo ka yɛlɛ.)

³⁵O yɔrɔnin bɛ, cɛɛ tulo yɛlɛla, a nɛnjuru fonina, a y'a daminɛ ka kuma ka nya.

³⁶Yezu y'a fɔ u ye k'a gwɛlɛya k'u kan'a fɔ mɔgɔ si ye. Nga a tora k'a gwɛlɛya u ma cogo min na, u tora ka koo nin kibaru jɛnsɛn ten.

³⁷Mɔgɔw kabakoyaninba tun b'a fɔra ko: “A bɛ koo minw kɛ, o bɛɛ ka nyi kosɛbɛ! A bɛ tulogwerenw yɛrɛ tulo yɛlɛ, ka bobow nɛnjuru foni.”