Read LAYIDUKURA MARIKI 8 Bible Online

MARIKI 8 - LAYIDUKURA bible

MARIKI 8

¹Loon dɔ la, jamaba lajɛnnin tun bɛ Yezu kɔrɔ tugu. Foyi tun tɛ jama fɛ k'a dumu minkɛ, a y'a ka kalandenw wele k'a fɔ u ye ko:

²“Jama nin hinɛ bɛ ne la, sabu, bii ye u tile saba ye ne fɛ, foyi t'u fɛ k'a dumu tugu.

³Ni ne y'a to u taara soo ni kɔngɔ ye, u barika bɛna dɛsɛ sira la, bari u dɔw bɔyɔrɔ ka jan.”

⁴A ka kalandenw y'a jaabi ko: “An bɛna se ka dumuni sɔrɔ min kongo nin kɔnɔ ka mɔgɔ nunu bɛɛ fa?”

⁵Yezu y'u nyininga ko burukun joli b'u fɛ. U y'a jaabi ko burukun wolonwula.

⁶O tuma na, Yezu y'a fɔ jama ye k'u ka sigi duguma. A y'o burukunw ta ka barika la Ala ye. O kɔ, a y'o tilantilan k'u d'a ka kalandenw ma k'u k'a tilan. U y'a tilan jama cɛ.

⁷Jigɛmisɛn dɔ tun b'u fɛ fana. Yezu ye barika la Ala ye o koo la, k'a fɔ a ka kalandenw ye k'u k'o fana tilan jama cɛ.

⁸U ye dumuni kɛ fɔɔ ka fa. Dumuni tɔɔ min tora, kalandenw y'o cɛ ka segi wolonwula fa n'a ye.

⁹Mɔgɔ minw tun y'o dumuni kɛ, olu tun bɛ mɔgɔ waa naani nyɔgɔn bɔ. O kɔ, Yezu y'a fɔ u ye k'u ka taa soo.

¹⁰O yɔrɔnin kelen, Yezu n'a ka kalandenw donna kurun kɔnɔ ka taa Dalimanuta mara la.

¹¹Farizinyɛw taara Yezu sɛgɛrɛ ka sɔsɔli daminɛ n'a ye. U tun b'a fɛ ka Yezu kɔrɔbɔ minkɛ, u y'a nyini a fɛ ko a ka kabako dɔ kɛ k'a yira ko a ka sebagaya bɛ bɔ Ala fɛ.

¹²Yezu ninakilila ni fanga ye k'a fɔ ko: “Mun na bii mɔgɔ nunu b'a fɛ ne ka kabako dɔ kɛ? Tinyɛ na, ne b'a fɔ aw ye ko ne tɛna kabako si kɛ k'a yira u la ko ne ka sebagaya bɛ bɔ Ala fɛ.”

¹³O kɔ, Yezu bɔra u kɔrɔ ka taa don kurun kɔnɔ tugu ka taa baa kɔ.

¹⁴Kalandenw tun nyinɛna ka dumunifɛn ta. Foyi tun t'u fɛ kurun kɔnɔ fɔɔ burukun kelenpe.

¹⁵Yezu y'u ladi ko: “Aw k'aw yɛrɛw kɔlɔsi Farizinyɛw ka burufununan ni Erɔdi ta ma.”

¹⁶Kalandenw y'a fɔ nyɔgɔn ye ko: “Buru t'an fɛ minkɛ, o le y'a to Yezu bɛ kuma ten.”

¹⁷Yezu bɔra u ka kuma kala ma, a y'u nyininga ko: “Mun na aw b'a la k'a fɔ nyɔgɔn ye ko: ‘Buru t'an fɛ minkɛ,’ k'o le y'a to ne bɛ kuma ten? Aw tɛ koo faamu halibi wa? Aw hakili ka dɔgɔ wa?

¹⁸Nyaa b'aw fɛ, aw do tɛ yeli kɛ. Tulo b'aw fɛ, aw do tɛ mɛnni kɛ.

¹⁹Ne ye burukun duuru karikari k'a di cɛɛ waa duuru ma tuma min na, aw hakili t'o la wa? Aw ye segi joli fa n'a tɔɔ ye?” U y'a jaabi ko segi tan ni fila.

²⁰A y'u nyininga tugu ko: “Ne ye burukun wolonwula tilantilan k'u di mɔgɔ waa naani ma tuma min na, aw ye segi joli fa n'a tɔɔ ye?” U y'a jaabi ko segi wolonwula.

²¹Yezu y'a fɔ u ye ko: “Aw tɛ koo faamu halibi wa?”

²²Yezu n'a ka kalandenw taara Bɛtisayida. Mɔgɔ dɔw taara Yezu sɛgɛrɛ ni finyɛntɔ dɔ ye. U ye Yezu dali ko a ka sabali ka maga o finyɛntɔ nin na k'a kɛnɛya.

²³A y'a bolo minɛ ka bɔ n'a ye dugu kɔnɔ. O kɔ, a y'a daji mɔ finyɛntɔ nin nyaa na k'a bolo la a kan k'a nyininga ko: “I nyaa bɛ fɛɛn dɔ la wa?”

²⁴Finyɛntɔ y'a nyaa yɛlɛ k'a fɔ ko: “Ne nyaa bɛ mɔgɔw la, u bɛ i n'a fɔ yiriw nga u bɛ taamana.”

²⁵Yezu y'a bolo la cɛɛ nyaa kan tugu. O kɔ, cɛɛ y'a nyaa yɛlɛ, a ye fɛɛn bɛɛ ye ka nya.

²⁶O tuma na, Yezu y'a fɔ a ye ko: “Tilen ka taa soo, i kana taa bɔ dugu nin kɔnɔ yɛrɛ.”

²⁷Yezu n'a ka kalandenw taara Sezare Filipi dafɛ duguw la. K'u to sira kan, a y'a ka kalandenw nyininga ko: “Mɔgɔw b'a fɔ ko ne ye jon ye?”

²⁸U y'a jaabi ko: “Dɔw ko i ye Zan batizelikɛla ye, dɔw ko i ye kira Eli ye, dɔw fana ko i ye fɔlɔfɔlɔ kiraw dɔ ye.”

²⁹Yezu y'u nyininga tugu ko: “Aw ka miiri la do, ne ye jon ye?” Piyɛri y'a jaabi ko: “I ye Ala ka Mɔgɔwolomanin nin ye.”

³⁰O la, Yezu y'a gwɛlɛya u ma k'u kana o fɔ mɔgɔ si ye.

³¹O kɔ, Yezu ye kuma ta k'a ka kalandenw kalan. A y'a fɔ u ye ko: “Wajibi lo Mɔgɔ Dencɛ ka tɔɔrɔ kosɛbɛ. Cɛkɔrɔbaw ni sarakalasebagaw ani sariya karamɔgɔw bɛna ban a la, u bɛn'a faga, nga tile saba a faganin kɔ, a bɛna kunun.”

³²A y'o kuma nin fɔ u ye k'a gwɛ. O la, Piyɛri taara n'a ye gɛrɛn na k'a daminɛ k'a jalaki.

³³Nga Yezu y'a nyaa yɛlɛma k'a ka kalanden tɔw filɛ k'a fɔ Piyɛri ye ko: “I Sutana nin, taa ka bɔ n kɔrɔ, bari i ka miiriya ni Ala ta tɛ kelen ye, i bɛ miiri i n'a fɔ adamaden tɔw.”

³⁴O kɔ, Yezu y'a ka kalandenw ni jama wele k'a fɔ u ye ko: “Ni mɔgɔ min b'a fɛ ka tugu ne kɔ, o tigi kana miiri a yɛrɛ ka nafa koo la. A ka tɔɔrɔ bɛɛ munyu ne kɔsɔn ka tugu ne kɔ, hali n'a ka kan ka sa ne kɔsɔn gwengwenlɔgɔ kan i n'a fɔ ne bɛna sa gwengwenlɔgɔ kan cogo min na.

³⁵Mɔgɔ o mɔgɔ b'a ka dinyɛlatigɛ nyako dɔrɔn fɛ, o tigi tɛna sini hɛrɛ sɔrɔ. Nga ni mɔgɔ min ka dinyɛlatigɛ cɛnna ne ni kibaru diman kɔsɔn, o tigi bɛna sini hɛrɛ sɔrɔ.

³⁶A bɛ mun nya mɔgɔ ye ka dinyɛ fɛɛn bɛɛ sɔrɔ n'a tɛna sini sɔrɔ?

³⁷Mɔgɔ bɛ se ka mun di Ala ma k'a kɛ a nii kunmabɔ sara ye?

³⁸Bii mɔgɔw banna Ala la, u bɛ kojugu kɛ. Ni mɔgɔ min maloyara olu nyana ka ne koo fɔ, ne bɛna na ni n Faa nɔɔrɔ ye tuma min na ni mɛlɛkɛ senumanw ye, Mɔgɔ Dencɛ fana bɛna maloya k'a fɔ k'o tigi ye a ka kalanden ye.”