Read LAYIDUKURA MARIKI 9 Bible Online

MARIKI 9 - LAYIDUKURA bible

MARIKI 9

¹A y'a fɔ u ye tugu ko: “Tinyɛ na, ne b'a fɔ aw ye ko Masa Ala bɛna setigiya baara min kɛ, mɔgɔ minw bɛ yan, u dɔw tɛna sa n'u m'o ye.”

²Tile wɔɔrɔ o kɔ, Yezu taara ni Piyɛri ni Zaki ani Zan ye kulu jamanjan dɔ kan u danna. A cogo yɛlɛmana u nyana.

³A ka faniw gwɛra ka manamana cogo dɔ la fɔɔ mɔgɔ si tɛ dugukolo kan min bɛ se ka fani ko, a ka gwɛ k'o bɔ.

⁴Kalanden saba nunu ye Eli ni Musa ye. U fila tun bɛ baro kɛra ni Yezu ye.

⁵O la, Piyɛri ye kuma ta k'a fɔ Yezu ye ko: “Karamɔgɔ, a ka nyi an ka to yan. Anw bɛna bugu saba lɔ, e ta kelen, Musa ta kelen, Eli ta kelen.”

⁶Piyɛri tun ka kan ka min fɔ, a m'o lɔn bari olu kalandenw tun siranna kosɛbɛ.

⁷Sankaba dɔ bɔra ka suma kɛ u kan. Kumakan dɔ bɔra o sankaba la k'a fɔ ko: “Nin ye ne Dencɛ kanunin ye, aw ka mɛnni kɛ a fɛ.”

⁸O yɔrɔnin bɛ, kalanden nunu y'u gɛrɛfɛlaw filɛ, nga u ma mɔgɔ si ye tugu ni Yezu kelen tɛ.

⁹U jigitɔ ka bɔ kulu kan, Yezu y'a fɔ u ye k'a gwɛlɛya k'u ye koo min ye, k'u kana o lakali mɔgɔ si ye, fɔɔ Mɔgɔ Dencɛ ka kunun a sanin kɔ.

¹⁰U y'o kuma nin labato, nga u tora ka nyɔgɔn nyininga ko ka kunun i sanin kɔ, k'o kɔrɔ ye mun ye?

¹¹U ye Yezu nyininga ko: “Mun na sariya karamɔgɔw ko Eli ka kan ka na kisibaga nya?”

¹²A y'u jaabi ko: “Tinyɛ lo. Eli ka kan ka na fɛɛn bɛɛ labɛn fɔlɔ, nga mun na a fɔra Ala ka kuma na ko Mɔgɔ Dencɛ ka kan ka tɔɔrɔ kosɛbɛ, ko mɔgɔw bɛna ban a la?

¹³Ayiwa, ne b'a fɔ aw ye ko Eli nana ka ban, ko mɔgɔ dɔw y'u yɛrɛ sago kɛ a la i n'a fɔ a fɔra Ala ka kuma na a koo la cogo min na.”

¹⁴Yezu ni Piyɛri ni Zaki ani Zan kɔsegira kalanden tɔw fɛ tuma min na, u taar'a sɔrɔ jamaba y'u lamini. Sariya karamɔgɔ dɔw tun bɛ sɔsɔli kɛra ni kalandenw ye.

¹⁵Yezu taara bari jama na. Mɔgɔw y'a ye dɔrɔn, u girinna ka ta'a fo.

¹⁶Yezu y'a ka kalandenw nyininga ko: “Aw ni sariya karamɔgɔw bɛ nyɔgɔn sɔsɔra mun koo la?”

¹⁷Cɛɛ dɔ tora jama cɛma k'a jaabi ko: “Karamɔgɔ, jina bɛ n dencɛ la. A y'a kɛ bobo ye, o le y'a to, n nana n'a ye i fɛ.

¹⁸N'a wilila a fɛ yɔrɔ o yɔrɔ, a b'a ta k'a ben duguma, a daa bɛ kanga, a b'a nyiinw nyimi, a bɛ ja kankan. Ne y'i ka kalandenw dali k'u ka jina gwɛn ka bɔ a la, nga u ma se.”

¹⁹Yezu y'a fɔ u ye ko: “Aw bii mɔgɔ minw tɛ la Ala la, ne bɛna to aw fɛ fɔɔ tuma jumɛn? Aw ka na n'a ye.”

²⁰U taara n'a ye Yezu fɛ. Jina ye Yezu ye dɔrɔn, a ye kanbelennin yuguyugu kosɛbɛ. Kanbelennin benna duguma ka kolonkolon. A daa kangara.

²¹Yezu ye kanbelennin faa nyininga ko: “Kabini tuma jumɛn jina nin b'a tɔɔrɔ ten?” A y'a jaabi ko: “Kabini a denmisɛn tuma.

²²Sinyɛ caaman, jina y'a ta k'a ben tasuma na ani jii la janko a ka faga. Nga n'i bɛ se ka fɛɛn dɔ kɛ, hinɛ an na k'an dɛmɛ.”

²³Yezu y'a fɔ a ye ko: “Mun na i ko: ‘N'i bɛ se’? Ni mɔgɔ min lara Ala la, Ala bɛ se ka fɛɛn bɛɛ kɛ o tigi ye.”

²⁴O yɔrɔnin kelen, kanbelennin faa pɛrɛnna ko: “Ne lara Ala la. Ne dɛmɛ janko ne kana sigasiga.”

²⁵Yezu y'a ye ko jama bɛ girinna ka na u kɔrɔ minkɛ, a sɔngɔra jina kuun na k'a fɔ a ye ko: “E min bɛ mɔgɔ kɛ bobo ni tulogweren ye, n b'a fɔ i ye, bɔ kanbelennin nin na, i kana don a la tugu.”

²⁶Jina kulera ka kanbelennin yuguyugu kosɛbɛ ka bɔ a la. Kanbelennin benna ka kirin ka kɛ i n'a fɔ suu fɔɔ mɔgɔ bɛɛ tun ko a sara.

²⁷Nga Yezu ye kanbelennin bolo minɛ k'a wili. A wilila ka lɔ.

²⁸Yezu taara soo tuma min na, k'a to n'a ka kalandenw ye nyɔgɔn fɛ, u y'a nyininga ko: “Mun na anw ma se ka jina nin gwɛn?”

²⁹A y'u jaabi ko: “Mɔgɔ tɛ se ka jina nin nyɔgɔn gwɛn cogo si la n'a ma Ala dali.”

³⁰Yezu n'a ka kalandenw wilila ka bɔ o yɔrɔ la ka taa tɛmɛ Galile mara la. Yezu tun t'a fɛ mɔgɔw ka bɔ u tɛmɛtɔ kala ma,

³¹bari a tun b'a ka kalandenw kalanna. A tun b'a fɔra ko: “U bɛna Mɔgɔ Dencɛ don mɔgɔjuguw bolo, u bɛn'a faga, tile saba a faganin kɔ, a bɛna kunun.”

³²Nga kalandenw tun t'o kuma faamu, u tun bɛ siran k'a nyininga o kuma kɔrɔ la fana.

³³Yezu n'a ka kalandenw sera Kafaranamu. U donna soo kɔnɔ tuma min na, a y'u nyininga ko: “Aw tun bɛ mun sɔsɔli la sira kan?”

³⁴Nga u jera, bari u tun bɛ nyɔgɔn sɔsɔra sira kan ko jon le ye kuntigi ye u cɛma.

³⁵O tuma na, Yezu sigira k'a fɔ u mɔgɔ tan ni fila bɛɛ ye ko: “Ni mɔgɔ dɔ b'a fɛ ka kɛ nyamɔgɔ ye, o tigi ka kan ka kɛ bɛɛ kɔmɔgɔ ye ani bɛɛ ka baaraden ye.”

³⁶A ye denmisɛn dɔ minɛ ka na n'a ye u cɛma. O kɔ, a y'a ta a disi la k'a fɔ u ye ko:

³⁷“Ni mɔgɔ o mɔgɔ mana denmisɛn nin nyɔgɔn minɛ ka nya ne kɔsɔn, o b'a yira k'o tigi sɔnna ne ma. Ni mɔgɔ o mɔgɔ sɔnna ne ma, o tigi ma sɔn ne dɔrɔn ma, nga o b'a yira ko a sɔnna ne cibaga fana ma.”

³⁸Zan y'a fɔ Yezu ye ko: “Karamɔgɔ, an ye cɛɛ dɔ ye, a bɛ jinaw gwɛn ka bɔ mɔgɔw la i tɔgɔ la. An y'a bali k'o kɛ, bari an dɔ tɛ.”

³⁹Yezu y'a jaabi ko: “Aw kan'a bali, sabu, mɔgɔ si tɛ se ka kabako kɛ ne tɔgɔ la ka tila ka ne tɔgɔjugu fɔ o yɔrɔnin bɛ.

⁴⁰Mɔgɔ min tɛ an jugu ye, o ye an nyiin ye.

⁴¹Mɔgɔ o mɔgɔ mana filen nyaa kelen jii minta d'aw ma bari aw ye ne ta ye, tinyɛ na, ne b'a fɔ aw ye k'o tigi bɛna o tɔnɔ sɔrɔ.

⁴²“Mɔgɔ minw lara ne la, a ma mɛn, ni mɔgɔ dɔ kɛra sababu ye k'olu dɔ kunna cɛn, yan ni a tigi k'o kɛ, ni kabakuru belebeleba tun sirila a kaan na k'a ta k'a fili kɔgɔji la, o tun ka fisa a ma.

⁴³N'i bolo bɛ kɛ sababu ye k'i don kojugu la, a tigɛ k'a bɔ i la. I ka don arijana na n'i bolo kelen ye, o ka fisa bolo fila ka to i fɛ, i ka taa jahanama tasuma fagabali la. [

⁴⁴Tumu minw bɛ mɔgɔ tɔɔrɔ o yɔrɔ la, olu tɛ sa. O yɔrɔ tasuma fana tɛ faga fewu.]

⁴⁵N'i seen bɛ kɛ sababu ye k'i don kojugu la, a tigɛ k'a bɔ i la. I ka don arijana na n'i seen kelen ye, o ka fisa seen fila ka to i fɛ, i ka fili jahanama na. [

⁴⁶Tumu minw bɛ mɔgɔ tɔɔrɔ o yɔrɔ la, olu tɛ sa. O yɔrɔ tasuma fana tɛ faga fewu.]

⁴⁷N'i nyaa bɛ kɛ sababu ye k'i don kojugu la, a wɔgɔbɛ k'a bɔ yen. I ka don Ala ka mara kɔnɔ n'i nyaa kelen ye, o ka fisa nyaa fila ka to i fɛ, i ka fili jahanama na.

⁴⁸Tumu minw bɛ mɔgɔ tɔɔrɔ o yɔrɔ la, olu tɛ sa. O yɔrɔ tasuma fana tɛ faga fewu.

⁴⁹U tun bɛ kɔgɔ kɛ sarakafɛn dɔw la cogo min na k'u mara, u tɛ cɛn, tɔɔrɔ bɛna kɛ tasuma ye mɔgɔ bɛɛ ma k'u dusu saniya, k'u mara Ala ye ten.

⁵⁰“Kɔgɔ ye fɛnnyuman ye, nga ni kɔgɔ ka timiya bɔra a la, mun bɛn'a timiya tugu? Kɔgɔ ye fɛnnyuman ye cogo min na, aw fana ka kɛ mɔgɔnyumanw ye ten. Hɛrɛ ka to aw ni nyɔgɔn cɛ.”