Read LAYIDUKURA LUKA 10 Bible Online

LUKA 10 - LAYIDUKURA bible

LUKA 10

¹O kɔ, Matigi ye kalanden bi wolonwula ni fila wɛrɛ woloma. A yɛrɛ tun ka kan ka taa duguba ni dugudennin minw na, a y'u ci ka taa o yɔrɔw la a yɛrɛ nya mɔgɔ fila fila.

²A y'a fɔ u ye ko: “Suman tigɛta ka ca, nga baarakɛlaw man ca. Aw ka forotigi dali a ka baarakɛla caaman ci ka ta'a ka suman tigɛ.

³Ayiwa, aw ka taa! Ne bɛ aw ci, aw kɛra i n'a fɔ sagaw, waraw cɛma.

⁴Aw kana wari ta, ni dugutaaminan, ni sanbara. Aw kana lɔ mɔgɔ si fɛ sira kan foli kama.

⁵N'aw sera dugu min na ka don luu min kɔnɔ, aw ka kɔn k'a fɔ ko hɛrɛ ka kɛ luu nin kɔnɔ mɔgɔw ye.

⁶N'o y'a sɔrɔ ni mɔgɔ dɔ bɛ o luu nin kɔnɔ n'a bɛ hɛrɛ nyinina, o tigi bɛna aw ka hɛrɛ foli duba sɔrɔ. N'o tɛ, aw ka hɛrɛ foli n'a duba bɛna segi aw ma.

⁷Aw ka to o luu kɔnɔ, u mana fɛɛn o fɛɛn d'aw ma, aw k'o dumu, bari baarakɛla ka kan n'a ka sara ye. Aw kana bɔ jatigiso dɔ la ka yɛlɛma dɔ wɛrɛ la.

⁸N'aw donna dugu min na, n'u y'aw ladon ka nya, u mana dumunifɛn min d'aw ma, aw k'o dumu.

⁹Aw k'o dugu banabagatɔw kɛnɛya, k'a fɔ dugu mɔgɔw ye ko: ‘Ala bɛna aw mara tuma min na, o waati sera.’

¹⁰N'aw donna dugu min na, n'u m'aw ladon ka nya, aw ka bɔ ka lɔ u ka forobayɔrɔ la k'a fɔ u ye ko:

¹¹‘Hali aw ka dugu buguri min nɔrɔla an seen na, an b'o yuguyugu ka bɔ an seen na k'a to aw ye. Nga aw k'a lɔn ko Ala ka masaya waati sera.’

¹²“Ne b'a fɔ aw ye ko Sodɔmukaw n'u ka juguya bɛɛ, olu ka tɔɔrɔ bɛna nɔgɔya ka tɛmɛ o dugu mɔgɔw ta kan kiti tigɛlon na.”

¹³“Aw Korazɛnkaw, ni Bɛtisayidakaw, bɔnɛ bɛna kɛ aw ta ye, bari ne ye kabako minw kɛ aw fɛ, ni olu tun kɛra Tirikaw ni Sidɔnkaw fɛ, bii tun y'a sɔrɔ u ye dusukasifani don u kaan na, ka bugurigwɛ mɔn u yɛrɛ la k'u bɛ nimisara ka faran u ka kojuguw la.

¹⁴O kama, Tirikaw ni Sidɔnkaw ka tɔɔrɔ bɛna nɔgɔya ka tɛmɛ aw ta kan kiti tigɛlon na.

¹⁵Aw Kafaranamukaw, aw bɛ miirila ko aw ka dugu bɛna taa nya wa? Abada! A bɛna halaki pewu.”

¹⁶O kɔ, a y'a fɔ a ka kalandenw ye ko: “Mɔgɔ minw mana aw lamɛn, o tigiw bɛ ne yɛrɛ le lamɛn. Mɔgɔ minw mana ban k'aw ladon, a bɛ kɛ i n'a fɔ u banna ka ne yɛrɛ le ladon. Ni mɔgɔ minw do banna ka ne ladon, olu bɛ banna ne cibaga le la.”

¹⁷Kalanden bi wolonwula ni fila nunu segira ni nisɔndiya ye ka n'a fɔ Yezu ye ko: “Matigi, i tɔgɔ barika la, hali jinaw tun tɛ se ka ban an ka fɔta ma.”

¹⁸A y'a fɔ u ye ko: “Ne nyaa tun bɛ Sutana porokototɔ la ka bɔ sankolo la ka ben duguma.

¹⁹N kɔni ye see d'aw ma ka taama saaw ni bunteniw kan, ani ka see d'aw ma k'aw jugu Sutana ka sebagaya nagasi. Fɛnjugu si ka dabari tɛna se aw kɔrɔ.

²⁰Aw kana nisɔndiya bari jinaw tun tɛ se ka ban aw ka fɔta ma. Nga aw ka nisɔndiya bari Ala y'aw tɔgɔ sɛbɛn a fɛ sankolo la.”

²¹O waati yɛrɛ la, Yezu nisɔndiyara kosɛbɛ Nii Senuman barika la k'a fɔ ko: “N bɛ barika la i ye n Faa, sankolo ni dugukolo ka masa, bari, i ye koo minw dogo lɔnnikɛlaw ni hakilitigiw la, i ye olu yira kolɔnbaliw la. I y'o kɛ ten, bari a diyara i ye tinyɛ na.”

²²O kɔ, a y'a fɔ mɔgɔw ye ko: “N Faa ye fɛɛn bɛɛ sebagaya di ne ma. Mɔgɔ si tɛ Dencɛ lɔn n'a Faa dɔrɔn tɛ, mɔgɔ si tɛ Faa fana lɔn, fɔɔ Dencɛ kelenpe. Ni ne b'a fɛ mɔgɔ min k'a lɔn, o tigi bɛn'a lɔn.”

²³O kɔ, a y'a nyaa yɛlɛma ka sin a ka kalandenw ma k'a fɔ u dɔrɔn ye ko: “Koo minw bɛ kɛra nin ye, aw minw bɛ olu yera, aw ye dubadenw ye.

²⁴Bari aw bɛ koo minw yera, ne b'a fɔ aw ye ko kira caaman ni masacɛ caaman tun b'a fɛ k'o ye, nga u ma se k'o ye. Aw bɛ minw mɛnna, u tun b'a fɛ k'o mɛn, nga u ma se k'o mɛn.”

²⁵Sariya karamɔgɔ dɔ tun b'a fɛ ka Yezu kɔrɔbɔ. O la, a wilila k'a nyininga ko: “Karamɔgɔ, ne ka kan ka mun kɛ ka hɛrɛ banbali sɔrɔ?”

²⁶Yezu fana y'ale nyininga ko: “Mun fɔra sariya sɛbɛ kɔnɔ? N'i b'a kalan, i b'o faamu cogo di?”

²⁷A y'a jaabi ko: “I ka i Matigi Ala kanu n'i dusukun bɛɛ ye, ani e nii bɛɛ ye, n'i fanga bɛɛ ye, ani e hakili bɛɛ ye. I ka i mɔgɔnyɔgɔn kanu i n'a fɔ i b'i yɛrɛ kanu cogo min na.”

²⁸Yezu y'a fɔ a ye ko: “I ka jaabili nyana. A kɛ o cogo la, i bɛna hɛrɛ banbali sɔrɔ.”

²⁹Nga sariya karamɔgɔ nin tun b'a fɛ ka joo di a yɛrɛ ma. O la, a ye Yezu nyininga ko: “Jon le ye ne mɔgɔnyɔgɔn ye?”

³⁰Yezu y'a jaabi ko: “Cɛɛ dɔ tun bɔra Zeruzalɛmu n'a bɛ taara Zeriko. K'a to sira kan, benkannikɛlaw girinn'a kan, k'a ka faniw n'a bololafɛnw bɛɛ bɔsi a la, ka tila k'a bugɔ fɔɔ k'a kirin. U sɔrɔla ka taa k'a to yen sira kan.

³¹O y'a sɔrɔ sarakalasebaga dɔ tun b'o sira kelen kan ka na. A ye cɛɛ mandiminin ye tuma min na, a faranna ka tɛmɛ sira faan dɔ fɛ.

³²Levi kɔmɔgɔw dɔ fana nana se o cɛɛ ma, a y'a ye ka tɛmɛ sira faan dɔ fɛ.

³³Nga Samarika dɔ dugutaatɔ nana se cɛɛ nin ma, a y'a ye minkɛ, a hinɛ donn'a la kosɛbɛ.

³⁴A gwɛrɛl'a la k'a ka jolidaw ko, ka fura kɛ u la, k'u siri. O kɔ, a y'a ta k'a la a ka fali kan ka taa n'a ye lonan jigiyɔrɔ dɔ la, k'a janto a la yen.

³⁵O dugusagwɛ, a ye deniye wari fila di jatigicɛ ma k'a fɔ a ye ko a k'a janto a la. Ko n'a ye musaka minw kɛ ka tɛmɛ wari hakɛ nin kan, ko n'ale kɔsegira tuma min na, ko ale bɛna o sara a ye.”

³⁶Yezu sɔrɔla ka sariya karamɔgɔ nin nyininga ko: “Benkannikɛlaw ye cɛɛ min mandimi wo, e ka miiri la, mɔgɔ saba nunu jumɛn y'o cɛɛ mɔgɔnyɔgɔn ye?”

³⁷A y'a jaabi ko: “A hinɛ donna min na, o le y'a mɔgɔnyɔgɔn ye.” Yezu ko a ma: “I fana ka taa o nyɔgɔn kɛ.”

³⁸K'u to taama na, Yezu sera dugu dɔ kɔnɔ n'a ka kalandenw ye. U jigira muso dɔ fɛ min tɔgɔ ko Marita.

³⁹Marita ka dɔgɔmuso tun bɛ yen n'o tɔgɔ ko Mariyamu. Ale taara sigi Matigi gɛrɛfɛ ka to k'a ka kalan lamɛn.

⁴⁰Gwabaaraw kɛnin tun bɛ ka Marita degun. A nan'a fɔ Yezu ye ko: “Matigi, n dɔgɔmuso bɛ sigi ka ne kelen to baara la, o ka nyi wa? I t'a fɔ a ye ko a ka wili ka na n dɛmɛ wa?”

⁴¹Nga Matigi y'a jaabi ko: “Marita, Marita, i bɛ boliboli k'i hakili nyagami koo caaman na gwansan,

⁴²k'a sɔrɔ mɔgɔ mako bɛ fɛɛn kelen dama le la. Mariyamu y'o le ta, mɔgɔ si tɛna se ka min bɔsi a la.”