Read LAYIDUKURA LUKA 11 Bible Online

LUKA 11 - LAYIDUKURA bible

LUKA 11

¹Loon dɔ, Yezu tun bɛ Ala dali la yɔrɔ dɔ. A tilara tuma min na, a ka kalandenw kelen y'a fɔ a ye ko: “Matigi, an dege Ala dali la i n'a fɔ Zan y'a taw dege cogo min na.”

²A y'a fɔ u ye ko: “N'aw bɛ Ala dali tuma min na, aw k'a fɔ ko: ‘An Faa, i sago ka kɛ. I ka kɛ an ka masa ye.

³An sɔn n'an ka makoya dumuni ye loon o loon.

⁴I ka hakɛ to an ye, bari an fana bɛ hakɛ to an hakɛ tabagaw ye. An kisi kojugu ma.’ ”

⁵Yezu y'a fɔ u ye tugu ko: “Ni aw dɔ taar'a tericɛ fɛ dugutilama k'a fɔ a ye ko: ‘N teri, nya ne ma ni burukun saba ye,

⁶bari ne tericɛ dɔ bɔra dugu la ka na n fɛ, dumunifɛn foyi tɛ n fɛ k'a d'a ma,’

⁷n'a teri nin tora soo kɔnɔ k'a jaabi ko: ‘Kana n tɔɔrɔ, daa sɔgɔra ka ban, ne ni n deenw lara fana, ne tɛ se ka wili ka buru d'i ma,’

⁸ne b'a fɔ aw ye ko n'a ma wili k'a d'a ma teriya kɔsɔn, a bɛna wili k'a makoyafɛn bɛɛ d'a ma, bari a tericɛ b'a la k'a tɔɔrɔ.

⁹“Ayiwa, ne b'a fɔ aw ye ko aw k'aw ka makoyafɛn dali Ala fɛ, a bɛna o d'aw ma. Aw mako bɛ fɛɛn min na, aw k'o nyini, aw bɛn'o sɔrɔ. Aw ka daa kɔkɔ, daa bɛna yɛlɛ aw ye,

¹⁰bari mɔgɔ o mɔgɔ mana a makoyafɛn dali Ala fɛ, Ala bɛna o di o tigi ma, min mana a makoyafɛn nyini, o tigi bɛn'o sɔrɔ. Daa bɛna yɛlɛ daa kɔkɔbaga ye.

¹¹Denfa jumɛn bɛ sɔn ka saa di a deen ma, k'a sɔrɔ deen ye jigɛ dali a fɛ?

¹²Walima denfa jumɛn bɛ sɔn ka bunteni di a deen ma, k'a sɔrɔ deen ye sisɛfan le dali a fɛ?

¹³Aw minw ka jugu, n'aw bɛ sɔn ka fɛnnyuman di aw ka deenw ma, aw Faa min bɛ arijana na, ale tɛna Nii Senuman di a dalibagaw ma ka tɛmɛ aw ka fɛɛn ditaw kan wa?”

¹⁴Yezu ye cɛɛ dɔ kɛnɛya jina tun y'o min kɛ bobo ye. O jina bɔra cɛɛ la tuma min na, a y'a daminɛ ka kuma fɔɔ jama kabakoyara.

¹⁵Nga u dɔw y'a fɔ ko Yezu bɛ jinaw gwɛnna jinaw ka kuntigi Belezebuli le barika la.

¹⁶Dɔw tun b'a fɛ ka Yezu kɔrɔbɔ, o la, u y'a fɔ a ye ko a ka kabako dɔ kɛ min bɛna kɛ taamasinyɛ ye k'a yira ko a ka sebagaya bɛ bɔ Ala fɛ.

¹⁷Yezu y'u ka miiriya lɔn minkɛ, a y'a fɔ u ye ko: “Ni jamana min mɔgɔw bɛ nyɔgɔn kɛlɛ, o jamana nin tɛ se ka nya. U ka soow bɛna ci.

¹⁸O tuma na, ni Sutana wilila a yɛrɛ kama, a ka masaya bɛna se ka taa nya cogo di? Bari aw b'a fɔra ko jinaw ka kuntigi Belezebuli le bɛ see dira ne ma ka se ka jinaw gwɛn.

¹⁹Aw ko ne bɛ jinaw gwɛn Belezebuli barika la, o tuma na, aw ka kalandenw bɛ u gwɛn jon barika la? Olu yɛrɛ bɛna aw jalaki aw ka kuma nunu kɔsɔn.

²⁰Nga ni ne bɛ jinaw gwɛn Ala barika la, o b'a yira ko Ala sera aw ma n'a ka masaya ye.

²¹“Ni maramanfɛn bɛ cɛɛ barikaman bolo n'a b'a ka soo kɔlɔsira, a ka soo kɔnɔ fɛɛnw bɛɛ bɛ sutara la.

²²Nga ni cɛɛ wɛrɛ cunna ale kan min fanga ka bon n'a ta ye, o b'a ka maramanfɛn bɔsi a la, a jigi lanin tun bɛ o min kan. O la, a b'a ka soo kɔnɔ fɛɛnw bɛɛ cɛ k'u di mɔgɔ wɛrɛw ma.

²³“Mɔgɔ min tɛ ne nyiin ye, o ye ne jugu le ye. Mɔgɔ min tɛ ne dɛmɛ ka nyani kɛ, o tigi bɛ cɛnni le kɛ.

²⁴“Ni jina gwɛnna ka bɔ cɛɛ dɔ la, a bɛ taa yaalayaala kongo kɔnɔ, janko ka lafinyɛyɔrɔ nyini yen. N'a m'o sɔrɔ, a b'a fɔ ko ale bɛna segi a bɔyɔrɔkɔrɔ la.

²⁵N'a segira tuma min na, a bɛ taa o yɔrɔ sɔrɔ a labɛnnin lo i n'a fɔ mɔgɔ ye boon furan ka kɛ cogo min na.

²⁶O la, a bɛ taa jina wolonwula wele, o minw ka fari n'ale ye. U bɛ na don cɛɛ la. Cɛɛ ka koow bɛna juguya ka tɛmɛ a ka fɔlɔtaw kan.”

²⁷Yezu y'o kuma nunu fɔ ka ban minkɛ, muso dɔ y'a kaan kɔrɔ ta jama cɛma k'a fɔ a ye ko: “Muso min y'i wolo, o ye dubaden ye.”

²⁸Nga Yezu y'a jaabi ko: “Mɔgɔ min bɛ Ala ka kuma lamɛn, k'a labato, o le ye dubaden ye.”

²⁹Jama tun bɛ cayara Yezu kɔrɔ minkɛ, a y'a fɔ u ye ko: “Bii mɔgɔw ka jugu. U bɛ kabako le fɛ. Nga foyi tɛna kɛ ka yira u la ni kira Zonasi ta dɔrɔn tɛ.

³⁰Zonasi kɛra taamasinyɛ ye Ninivukaw fɛ cogo min na, Mɔgɔ Dencɛ fana bɛna kɛ taamasinyɛ ye bii mɔgɔw fɛ ten.

³¹Kiti tigɛlon na, worodugu nyafan fɛ masamuso bɛna bii mɔgɔw jalaki, bari a bɔra fɔɔ dugukolo daan na ka na Solomani ka hakilitigiya kumaw lamɛn. Ayiwa, mɔgɔ bɛ yan min hakili ka bon ni Solomani ta ye.

³²Kiti tigɛlon na, Ninivukaw bɛna bii mɔgɔw jalaki, bari Zonasi ye waajuli min kɛ Ninivu dugu kɔnɔ, Ninivukaw sɔnna o ma. U nimisara ka faran u ka kojuguw la. Ayiwa, mɔgɔ bɛ yan min ka bon ni Zonasi ye.

³³“Mɔgɔ si tɛ lanpan mana k'a bila yɔrɔdogonin na walima gongo jukɔrɔ, nga a b'a bila sanfɛ le janko mɔgɔ minw bɛ don soo kɔnɔ, u ka yeli kɛ.

³⁴“Mɔgɔ nyaa kɛra i n'a fɔ a fari ka lanpan. N'i nyaa ma cɛn, i bɛ yeli kɛ. Nga n'i nyaa cɛnna, i tɛ yeli kɛ.

³⁵O cogo la, i ka kɔlɔsili kɛ n'o y'a sɔrɔ n'i kɔnɔ gwɛnin lo walima n'a finnin lo.

³⁶N'a gwɛnin lo, ni dibi yɔrɔ t'a la, i kɛra yeelen ye i n'a fɔ lanpan bɛ yeelen bɔ mɔgɔ ye cogo min na.”

³⁷Yezu tilara a ka kuma na tuma min na, Farizinyɛ dɔ y'a nyini a fɛ ko a ka taa dumuni kɛ ale ka soo. A taara se, a sigira dumuni na.

³⁸Farizinyɛ nin y'a kɔlɔsi k'a ye ko Yezu m'a tigɛ ko ka kɛnyɛ n'u ka landa ye ka sɔrɔ ka sigi dumuni na, o y'a kabakoya.

³⁹Matigi y'a fɔ a ye ko: “Aw Farizinyɛw kɔni bɛ ten. Aw bɛ jifilenw ni tasaw kɔɔ ko k'u saniya, k'a sɔrɔ benkanni ani juguya le fanin bɛ aw kɔnɔ.

⁴⁰Naloman nunu! Ala min ye kɛnɛmala dilan, o tuma na ale ma kɔnɔna fana dilan wa?

⁴¹Aw k'aw bololafɛnw di saraka ye faantanw ma, o la, aw ka koo bɛɛ saniyanin bɛna to.

⁴²“Aw, Farizinyɛw, bɔnɛ ye aw ta ye, bari aw bɛ jija ka nanaye ni nanfuraburu sifa bɛɛ jaka bɔ. Ala bɛ tilenninya ni kanuya minw fɛ, aw b'olu to yen, o minw koo ka gwɛlɛ a ma kosɛbɛ, aw ka kan ka olu le sira taama fɔlɔ ka sɔrɔ ka tɔw kɛ.

⁴³“Aw, Farizinyɛw, bɔnɛ ye aw ta ye, bari aw bɛ sigiyɔrɔnyumanw le fɛ Alabatosow kɔnɔ, aw b'a fɛ mɔgɔw k'aw fo forobayɔrɔw la i n'a fɔ u bɛ mɔgɔba fo cogo min na.

⁴⁴Bɔnɛ ye aw ta ye, bari aw kɛra i n'a fɔ kaburuw, mɔgɔw bɛ taama minw kan n'u nyaa tɛ se k'u ye.”

⁴⁵O la, sariya karamɔgɔ dɔ y'a fɔ Yezu ye ko: “Karamɔgɔ, n'i kumana ten, i bɛ don anw fana gasi la.”

⁴⁶A y'a jaabi ko: “Bɔnɛ ye aw sariya karamɔgɔw fana ta ye, bari aw bɛ mɔgɔw bila doni gwiliman nyun na, k'a sɔrɔ aw t'u dɛmɛ hali dɔɔni yɛrɛ a nyunni na.

⁴⁷Aw faaw ye kira minw faga, aw minw bɛ olu kaburuw lalaga k'u lɔ sisan, bɔnɛ ye aw ta ye.

⁴⁸Aw b'a yira o cogo la ko aw faaw tun ye min kɛ, k'olu bɛnna aw ma, bari, olu ye kiraw faga, aw bɛ u kaburuw lɔ.

⁴⁹O le y'a to Ala tun y'a fɔ ko ale bɛna kiraw ni cidenw ci aw ma. Ko aw bɛna u dɔw faga, k'u dɔw bila tɔɔrɔ la.

⁵⁰O seen fɛ, bii mɔgɔw bɛna kiti kiraw ka jolibɔnninw kama, olu joli min bɔnna kabini dinyɛ daminɛtuma na,

⁵¹k'a daminɛ Abɛli ka jolibɔnnin ma fɔɔ ka n'a bila Zakari ta ma, u ye ale min faga Alabatosoba yɔrɔ senuman ni sarakabɔlan furancɛ la. Tinyɛ na, n b'a fɔ aw ye ko bii mɔgɔw bɛna nyininga o bɛɛ la.

⁵²“Aw sariya karamɔgɔw, bɔnɛ ye aw ta ye, bari aw b'aw yɛrɛ jati tinyɛlɔnbagaw ye k'a sɔrɔ aw t'a lɔn. Minw b'a fɛ ka tinyɛ lɔn, aw t'a to olu fana k'a lɔn.”

⁵³Yezu bɔra o yɔrɔ la tuma min na, sariya karamɔgɔw ni Farizinyɛw dimina a kɔrɔ kosɛbɛ. U tun b'a nyinina ni dabari sifa bɛɛ ye. O la, u tun b'a nyininga koo caaman na,

⁵⁴janko n'a ka jaabili ma nya, u k'a sɔrɔ.