Read LAYIDUKURA LUKA 13 Bible Online

LUKA 13 - LAYIDUKURA bible

LUKA 13

¹O waati la, Pilati tun ye Galileka dɔw nii bɔ k'u to begɛnw faga la Ala ye. Mɔgɔ dɔw nana o lakali Yezu ye.

²Yezu y'a fɔ u ye ko: “Aw bɛ miiri k'o Galileka nunu sara ten bari u tun bɛ kojugu kɛ ka tɛmɛ Galileka tɔw bɛɛ kan wa?

³Ne b'a fɔ aw ye ko tinyɛ t'o ye. Ni aw ma nimisa ka faran aw ka kojuguw la, aw bɛɛ bɛna halaki fana.

⁴Silowe ciin sangaso benna mɔgɔ tan ni seegi minw kan k'u faga, aw bɛ miiri ko olu tun ye kojugukɛlaw ye ka tɛmɛ Zeruzalɛmuka tɔw bɛɛ kan wa?

⁵Ne b'a fɔ aw ye ko tinyɛ t'o ye. Ni aw ma nimisa ka faran aw ka kojuguw la, aw bɛɛ bɛna halaki fana.”

⁶O kɔ, Yezu ye talen nin la u ye ko: “Torosun tun bɛ cɛɛ dɔ fɛ a ka foro la. Loon dɔ, a taara toro nyini a la, nga a ma foyi sɔrɔ.

⁷O loon nin na, a y'a fɔ a ka baaraden ye ko: ‘Ne saan saba filɛ nin ye, ne bɛ na toro nyini torosun nin na, ne tɛ foyi sɔrɔ a la. A tigɛ. Kuun t'a la a ka to foro kɔnɔ gwansan.’

⁸Nga baaraden y'a jaabi ko: ‘A to nyinan tugu. Ne bɛna dingɛ sogi k'a lamini ka nɔgɔ kɛ a kɔrɔ.

⁹Ni o kɛra, n'a sɔrɔ a bɛna deen kɛ saan wɛrɛ. N'a ma deen kɛ, i bɛn'a tigɛ.’ ”

¹⁰Lafinyɛlon dɔ la, Yezu tun bɛ mɔgɔw kalanna Alabatoso dɔ kɔnɔ.

¹¹Muso dɔ tun bɛ o yɔrɔ la, jinabana tun b'a la kabini saan tan ni seegi. Bana nin tun y'a kɔɔ kuru, a tun tɛ se ka tilen ka lɔ.

¹²Yezu y'a ye tuma min na, a y'a wele k'a fɔ a ye ko: “Muso, i kɛnɛyatɔ filɛ nin ye.”

¹³Yezu y'a bolo la muso kan. O yɔrɔnin bɛ, a kɔɔ tilenna, a y'a daminɛ ka Ala tando.

¹⁴Nga Alabatoso kuntigi dimina bari Yezu ye mɔgɔ kɛnɛya lafinyɛlon na. A ye kuma ta k'a fɔ jama ye ko: “An ka kan ka baara kɛ tile wɔɔrɔ kɔnɔ. Aw ka na o loonw na, a k'aw kɛnɛya. Aw kana na lafinyɛlon na.”

¹⁵Matigi y'a fɔ ko: “Aw ye nanbaranmɔgɔw le ye! Lafinyɛlon na, aw bɛɛ kelen kelen tɛ aw ka misi, walima aw ka fali foni ka taa u sɔn jii la wa?

¹⁶Muso nin min buruju bɔra Ibrayima na, ni Sutana tun y'a siri ni bana ye kabini saan tan ni seegi, a tun ma daga k'o muso kɛnɛya lafinyɛlon na wa?”

¹⁷Yezu ye kuma nin fɔ tuma min na, a juguw bɛɛ maloyara. Jama bɛɛ nisɔn tun ka di Yezu ka kabakokɛninw kɔsɔn.

¹⁸Yezu y'a fɔ tugu ko: “Ala ka masaya bɔnin bɛ mun fɛ? Ne bɛn'a kɛnyɛ ni mun ye?

¹⁹A bɛ i n'a fɔ mutaridikisɛ cɛɛ dɔ ye min ta k'a dan a ka nankɔ la. A falenna ka bonya ka kɛ yiri ye. Kɔnɔw ye u ka nyagaw la a bolow kan.”

²⁰Yezu taara nya ni kuma ye k'a fɔ ko: “Ne bɛna Ala ka masaya ni mun kɛnyɛ tugu?

²¹A bɔnin bɛ burufununan fɛ muso dɔ ye min ta k'a kɛ farinimugu fiyɛ nyaa kelen na k'a nɔɔni. Tuma dɔɔni o kɔ, a bɛɛ fununa.”

²²Yezu taatɔ Zeruzalɛmu, a tun bɛ duguba ni dugudenninw cɛɛ tigɛ, an'a bɛ mɔgɔw kalanna.

²³Mɔgɔ dɔ y'a nyininga ko: “Matigi, mɔgɔ caaman tɛna kisi wa?” A y'a jaabi ko:

²⁴“Aw ye jija ka don ni dafitini ye bari ne b'a fɔ aw ye ko mɔgɔ caaman bɛna cogo nyini ka don, nga u tɛna se.

²⁵“Ni sotigi wilila ka daa sɔgɔ tuma min na k'aw to kɛnɛma, aw bɛn'a daminɛ ka daa kɔkɔ k'a fɔ ko: ‘Matigi, daa yɛlɛ an ye.’ A bɛna aw jaabi ko a t'aw bɔyɔrɔ lɔn.

²⁶“O tuma na, aw bɛn'a fɔ a ye ko aw ye dumuni kɛ n'a ye, ko a y'aw kalan aw ka dugu forobayɔrɔw la.

²⁷A bɛn'a fɔ aw ye tugu ko ale t'aw bɔyɔrɔ lɔn, ko aw ka taa ka bɔ yan, kojugukɛla nunu.

²⁸“O yɔrɔ la, n'aw ye Ibrayima, ni Isiyaka, ani Yakuba ani kiraw bɛɛ ye arijana na tuma min na, k'a sɔrɔ aw tonin bɛ kɛnɛma, o tuma na, aw bɛna kasi k'a fɔ ko ni aw tun y'a lɔn.

²⁹Mɔgɔ dɔw bɛna na ka bɔ kɔrɔn, ni tileben, ani kɔgɔdugu nyafan, ni worodugu fɛ. U bɛna sigi dumuni na masa Ala ka soo.

³⁰“O tuma na, kɔmɔgɔ dɔw bɛna kɛ nyamɔgɔw ye, nyamɔgɔ dɔw bɛna kɛ kɔmɔgɔw ye.”

³¹O tuma na, Farizinyɛ dɔw gwɛrɛla Yezu la k'a fɔ a ye ko: “Taa yɔrɔ wɛrɛ ka yan bila, bari Erɔdi b'a fɛ k'i faga.”

³²Yezu y'u jaabi ko: “Aw ka ta'a fɔ o nanbaranmɔgɔ nin ye ko ne bɛ jinaw gwɛn ka bɔ mɔgɔw la, ka banabagatɔw kɛnɛya bii ni sini, ani a tile sabanan loon, ne bɛna tila n ka baara la.

³³Nga wajibi lo ne ka taa ni n ka sira ye bii ni sini ani sinikɛnɛ, bari a bɛnnin tɛ kira ka faga yɔrɔ wɛrɛ Zeruzalɛmu kɔ.

³⁴“Zeruzalɛmukaw, Zeruzalɛmukaw, aw minw bɛ kiraw faga, ka Ala ka cidenw bon ni kabakuruw ye k'u faga, sinyɛ joli ne tun b'a fɛ k'aw lajɛn n kɔrɔ i n'a fɔ sisɛ b'a deenw lajɛn a gamanw kɔrɔ cogo min na, nga aw ma sɔn!

³⁵Ayiwa, aw ka dugu bɛna to aw ye. Ne b'a fɔ aw ye ko aw tɛna ne ye tugu fɔɔ loon min na aw bɛn'a fɔ ko: ‘Min natɔ filɛ Matigi tɔgɔ la, Ala ka barika don a la.’ ”