Read LAYIDUKURA LUKA 14 Bible Online

LUKA 14 - LAYIDUKURA bible

LUKA 14

¹Lafinyɛlon dɔ la, Yezu taara Farizinyɛw ka kuntigi dɔ ka soo ka dumuni kɛ yen. Mɔgɔ minw tun bɛ yen, olu tun b'a kɔlɔsira.

²Cɛɛ dɔ tun bɛ Yezu nyafɛ, funubana tun b'a la.

³Yezu ye kuma ta ka sariya karamɔgɔw ni Farizinyɛw nyininga ko: “A daganin bɛ ka banabagatɔ kɛnɛya lafinyɛlon na wa, walima a daganin tɛ?”

⁴Nga u m'a jaabi. O tuma na, Yezu magara banabagatɔ nin na k'a kɛnɛya. O kɔ, a y'a fɔ a ye ko a bɛ se ka taa.

⁵A sɔrɔla k'a fɔ u ye ko: “Jon le bɛ yan aw cɛma n'a dencɛ, walima a ka misi benna kɔlɔn na lafinyɛlon na, n'a tɛna o bɔ joona?”

⁶U ma se ka o nyiningali jaabi.

⁷Ka Yezu to o dumunikɛyɔrɔ nin na, mɔgɔ minw tun welela yen fana, a ye ladili di olu ma, bari a tun y'a kɔlɔsi k'a ye ko mɔgɔ nunu bɛ sigiyɔrɔnyuman le nyinina. O la, a y'a fɔ u ye ko:

⁸“Ni mɔgɔ dɔ y'i wele kɔnyɔ dumuni na, i kana taa sigi sigiyɔrɔnyuman na. E bɛ ta'a sɔrɔ tuma dɔ ko mɔgɔ wɛrɛ welela min ka fisa i ye.

⁹Mɔgɔ min y'aw fila bɛɛ wele, ni ale nana k'a fɔ i ye ko i ka wili ka sigiyɔrɔ nin d'a ma, o tuma na, i bɛna wili ni maloya ye, ka taa sigi mɔgɔ bɛɛ kɔfɛ.

¹⁰Nga n'i welela o nyɔgɔn na, taa sigi kɔfɛ sigiyɔrɔ la, waasa n'i welebaga nana tuma min na, a k'a fɔ i ye ko: ‘Ne teri, na sigi nyafɛ.’ O cogo la, i bɛna kunkɔrɔta sɔrɔ i dumunikɛnyɔgɔnw nyana.

¹¹Mɔgɔ o mɔgɔ b'a yɛrɛ bonya, o bɛna dɔgɔya. Mɔgɔ o mɔgɔ b'a yɛrɛ majigi, o bɛna bonya.”

¹²Min tun ye Yezu wele dumuni na, a y'a fɔ o fana ye ko: “N'i ye dumuniba labɛn mɔgɔw ye, i kana i teriw wele, walima i badenw, walima i balimaw walima i siginyɔgɔn nafolotigiw. Bari u fana bɛ se k'i wele dumuni na k'i ta juru sara.

¹³Nga, n'i bɛna dumuniba di mɔgɔw ma, i ka faantanw ni senkelenninw ni nanbaranw ani finyɛntɔw le wele.

¹⁴N'i y'o kɛ, i bɛna duba sɔrɔ, bari olu tɛ se k'i ta juru sara, nga Ala bɛna i sara sini.”[6]

¹⁵Dumunikɛlaw kelen ye kuma nin mɛn minkɛ, a y'a fɔ Yezu ye ko: “Mɔgɔ minw bɛna dumuni kɛ masa Ala ka soo, olu dusu bɛna diya dɛ!”

¹⁶Yezu y'a jaabi ko: “Cɛɛ dɔ tun ye dumuniba labɛn ka mɔgɔ caaman wele.

¹⁷Dumunikɛwaati sera tuma min na, a y'a ka baaraden ci ka ta'a fɔ mɔgɔweleninw ye ko: ‘Aw ka na bari dumuni bɛɛ labɛnna ka ban.’

¹⁸Nga u bɛɛ ye yafa dali a fɛ kelen kelen. Mɔgɔwelenin fɔlɔ y'a fɔ baaraden ye ko: ‘Ne ye foro dɔ san, ne ka kan ka taa o filɛ. Ne b'i dali, ta'a fɔ a ye ko a ka yafa ne ma.’

¹⁹Mɔgɔ wɛrɛ y'a fɔ a ye ko: ‘Ne ye sɛnɛkɛmisi tan san, ne bɛ taara baara kɛ n'u ye k'a filɛ. Ne b'i dali, ta'a fɔ a ye ko a ka yafa ne ma.’

²⁰Dɔ wɛrɛ fana y'a fɔ a ye ko: ‘Ne ye muso furu sisan, o le y'a to ne tɛ se ka na yen.’

²¹“Baaraden kɔsegira ka taa o koow bɛɛ nyafɔ a ka kuntigi ye. A ka kuntigi dimina k'a fɔ a ye ko: ‘I ka teliya ka taa dugu forobayɔrɔw la, ani siradaw la, ka faantanw ni nanbaranw ni finyɛntɔw ani senkelenninw wele ka na n'u ye yan.’

²²Baaraden nin y'o kɛ ka ban tuma min na, a taar'a fɔ a ka kuntigi ye ko: ‘I ye min fɔ, ne y'o kɛ, nga soo ma fa halibi.’

²³O la, a ka kuntigi y'a fɔ a ye ko: ‘Bɔ ka taa dugu dafɛ nankɔw la, i mana mɔgɔ minw sɔrɔ yen, i ka koo bɛɛ kɛ u ka na, waasa ne ka soo ka fa.

²⁴Ne b'a fɔ aw ye ko mɔgɔ minw tun welela, olu si tɛna ne ka dumuni nin nɛnɛ tugu.’ ”

²⁵O kɔ, Yezu taatɔ dugu dɔ la, jamaba tun tugunin b'a nɔɔ fɛ. A lɔra k'a fɔ u ye ko:

²⁶“Mɔgɔ o mɔgɔ bɛ na ne nɔɔ fɛ, n'a ma ne fisaya n'a faa ye, n'a baa, n'a muso, n'a deenw, n'a balimacɛw, n'a balimamusow an'a yɛrɛ fana ye, o tigi tɛ se ka kɛ ne ka kalanden ye.

²⁷Ni mɔgɔ min ma sɔn tɔɔrɔ ma k'a yɛrɛ saraka ka tugu ne nɔɔ fɛ, o tigi tɛ se ka kɛ ne ka kalanden ye.

²⁸“Aw cɛma ni mɔgɔ dɔ b'a fɛ ka sangaso jamanjan lɔ, a tɛ sigi fɔlɔ k'a lɔ sɔngɔ jati k'a filɛ yala n'a ka wari bɛna se k'o baara laban wa?

²⁹N'o tɛ, n'a y'o sangaso juu sigi, n'a ma se k'a laban, mɔgɔ minw bɛɛ bɛna o ye, u bɛna yɛlɛ a ma,

³⁰k'a fɔ ko: ‘Cɛɛ nin ye soo lɔli daminɛ, nga a ma se k'a laban.’

³¹“Ni masacɛ dɔ b'a fɛ ka taa masacɛ dɔ wɛrɛ kɛlɛ, a bɛ sigi fɔlɔ ka miiri k'a filɛ n'a bɛ se ni mɔgɔ waa tan ye k'a jugu mɔgɔ waa mugan tigi kunbɛn.

³²N'a tɛ se, a bɛ lasigidenw ci ka taa kɛlɛ bancogo nyini a jugu nin fɛ k'a to yɔrɔjan.

³³O cogo la, n'aw dɔ b'a fɛ ka kɛ ne ka kalanden ye, fɔɔ a k'a ka bololafɛn bɛɛ ye k'a to yen.

³⁴“Bɛɛ b'a lɔn ko kɔgɔ ye fɛnnyuman ye, nga ni kɔgɔ ka timiya bɔra a la, mun bɛna se k'a timiya tugu?

³⁵O tuma na, a tɛ se ka kɛ nɔgɔ ye ka foyi nya dugukolo ye. A bɛ fili le. Mɔgɔ min b'a fɛ ka mɛnni kɛ, o ka jija k'a tulo malɔ.”