Read LAYIDUKURA LUKA 15 Bible Online

LUKA 15 - LAYIDUKURA bible

LUKA 15

¹Wusuruminɛlaw ni kojugukɛlaw bɛɛ tun bɛ to ka gwɛrɛ Yezu la k'a ka kuma lamɛn.

²Farizinyɛw ni sariya karamɔgɔw tun bɛ to ka ;nunu;nunu. U tun b'a fɔ ko: “Cɛɛ nin bɛ kojugukɛlaw minɛ ka nya ka dumuni yɛrɛ kɛ n'u ye.”

³O la, Yezu ye talen nin la u ye ko:

⁴“Ni saga kɛmɛ bɛ aw dɔ fɛ, ni kelen tununa, a tɛna a tɔɔ bi kɔnɔntɔn ni kɔnɔntɔn nunu to kongo kɔnɔ ka taa kelen nin yaala fɔɔ k'a ye wa?

⁵N'a y'a ye tuma min na, a b'a ta k'a bila a kaan kan ni dusudiya ye.

⁶N'a kɔsegira ka see soo tuma min na, a b'a teriw n'a siginyɔgɔnw wele k'a fɔ u ye k'u ka nisɔndiya nyɔgɔn fɛ, bari ko ale y'a ka sagatununin ye.

⁷O cogo la, ne b'a fɔ aw ye ko ni kojugukɛla kelen nimisara ka faran a ka kojuguw la, mɛlɛkɛw bɛna nisɔndiya sankolo la o tigi kɔsɔn. Mɔgɔtilennin bi kɔnɔntɔn ni kɔnɔntɔn minw mako tɛ nimisali la, nisɔndiya min bɛ kɛ olu kɔsɔn, o tɛ se mɔgɔ kelen nin ta ma.

⁸“Ni darakimu wari tan bɛ muso dɔ fɛ, ni kelen tununa, a tɛna lanpan mana ka soo furan k'a yaala ka nya fɔɔ k'a ye wa?

⁹N'a y'a ye tuma min na, a b'a teriw n'a siginyɔgɔnw wele k'a fɔ u ye k'u ka nisɔndiya nyɔgɔn fɛ, bari ko ale ka darakimu wari kelen min tun tununa, k'a y'a ye.

¹⁰O cogo la, ne b'a fɔ aw ye ko ni kojugukɛla kelen nimisara ka faran a ka kojuguw la, nisɔndiya bɛ kɛ Ala ka mɛlɛkɛw fɛ o tigi kɔsɔn.”

¹¹Yezu y'a fɔ tugu ko: “Dencɛ fila tun bɛ cɛɛ dɔ fɛ.

¹²Dɔgɔcɛman y'a fɔ a facɛ ye ko: ‘N Faa, ne bɛna min sɔrɔ i cɛɛn na, o di ne ma.’ O tuma na, facɛman y'a ka nafolo tilan u cɛ.

¹³Tile dama tɛmɛnin kɔ, dɔgɔcɛman nin ye fɛɛn minw sɔrɔ cɛɛn na, a y'u feere ka taa n'a wari ye jamanajan dɔ la, k'o bɛɛ cɛn kakalaya la.

¹⁴A ka wari bɛɛ banna tuma min na, kɔngɔba donna o jamana na, a ka dumuni dɛsɛra.

¹⁵A taara don baara la dugulen dɔ fɛ, ale y'a bila ka taa lɛɛw dɛndɛ a ka forow la.

¹⁶A tun b'a fɛ ka lɛɛw ka dumuni dumu kɔngɔ kɔsɔn, nga mɔgɔ si tun t'o d'a ma.

¹⁷A miirila o tuma na k'a fɔ a yɛrɛ kɔnɔ ko: ‘Baaraden caaman bɛ ne faa fɛ, u bɛ dumuni kɛ fɔɔ k'a tɔɔ to, ne do bɛ halakira kɔngɔ bolo yan.’

¹⁸Ne bɛna wili ka taa ne faa fɛ k'a fɔ a ye ko: ‘N faa, ne ye Ala hakɛ ta, k'i fana hakɛ ta.

¹⁹Ne man kan ka wele ko i deen tugu. I ka ne minɛ i n'a fɔ i ka baaraden.’

²⁰A wilila k'a faso sira ta. “K'a to yɔrɔjan, a faa y'a ye, a hinɛ donna a la. A bolila ka ta'a bolow meleke a dencɛ kaan na.

²¹Deen y'a fɔ a faa ye ko: ‘N faa, ne ye Ala hakɛ ta k'i fana hakɛ ta. Ne man kan ka wele ko i deen tugu.’

²²Nga a faa y'a fɔ a ka baaradenw ye ko: ‘Aw ka teliya ka na ni foroca ye, min ka nyi tɔw bɛɛ ye, a b'o don. Aw ka bololanigɛ don a bolo la ka sanbara d'a ma, a b'o don.

²³Aw ka na ni misiden tulɔnin ye k'a faga ka dumuni tobi. An b'o dumu ka nyanagwɛ,

²⁴bari ne deen min filɛ nin ye, a tun tununa, a yera. A kɛra i n'a fɔ a sara ka kunun.’ U ye nyanagwɛ daminɛ.

²⁵“O waati la, cɛɛ nin ka dencɛ kɔrɔba tun bɛ foro la. Ale segitɔ, a surunyana soo la tuma min na, a ye fɔlifɛnw ni dɔnsen mankan mɛn.

²⁶A ye baaradenw kelen wele k'a nyininga ko mun le kɛra soo.

²⁷Baaraden nin y'a jaabi ko: ‘I dɔgɔcɛ segira ka na, i faa ye misidentulɔnin faga, bari a segira kɛnɛya la.’

²⁸“O la, dencɛ kɔrɔba dimina, a tun t'a fɛ ka don soo. A faa bɔra ka ta'a dali ko a ka don.

²⁹O tuma na, a y'a fɔ a faa ye ko: ‘A filɛ, ne saan caaman ye nin ye, ne bɛ baara kɛra i ye. Ne ma ban i ta ma tuma si. O n'a ta bɛɛ, i ma deli ka hali baden yɛrɛ di ne ma waasa ne ni n teriw ka nyanagwɛ nyɔgɔn fɛ.

³⁰Nga i deen min filɛ nin ye, a y'i ka nafolo bɛɛ cɛn sungurubaw la. A segira ka na tuma min na, i ye misidentulɔnin faga a ye.’

³¹Nga a faa y'a fɔ a ye ko: ‘Ne deen, i bɛ ne fɛ tuma bɛɛ, fɛɛn minw bɛɛ bɛ ne fɛ, o bɛɛ ye i ta ye.

³²Nga an ka kan ka nisɔndiya ka nyanagwɛ, bari i dɔgɔnin min filɛ nin ye, a kɛra i n'a fɔ a sara ka kunun, a tun tununa, nga a yera.’ ”