Read LAYIDUKURA LUKA 16 Bible Online

LUKA 16 - LAYIDUKURA bible

LUKA 16

¹Yezu y'a fɔ a ka kalandenw ye ko: “Cɛɛ nafolotigi dɔ tun bɛ yen. A tun ye mɔgɔ dɔ ta k'a bila a ka nafolo kunna. Mɔgɔw y'o kɔrɔfɔ a ka kuntigi ye ko a b'a ka nafolo cɛn.

²A ka kuntigi y'a wele k'a fɔ a ye ko: ‘Ne bɛ min mɛnna i koo la, o man di. I ye baara kɛ cogo min na, o nyafɔ ne ye, bari i tɛna se ka to ne ka nafolo kunna tugu.’

³O kuma mɛnnin kɔ, a y'a fɔ a yɛrɛ kɔnɔ ko: ‘Ne bɛna mun kɛ sa? Bari ne ka kuntigi bɛna ne bɔ a ka nafolo kunna. Ne tɛ se ka sɛnɛ kɛ. Ka dalili kɛ, o bɛna kɛ maloya ye ne ma.

⁴Ni ne gwɛnna ka bɔ baara nin na tuma min na, ne bɛna min kɛ mɔgɔ dɔw ka se ka ne dɛmɛ, ne y'o lɔn.’

⁵“O tuma na, mɔgɔ minw ye juru ta a ka kuntigi fɛ, a y'u wele kelen kelen. Min kɔnna ka na, a y'ale nyininga ko: ‘Ne ka kuntigi ka juru min b'i la, joli lo?’

⁶O y'a jaabi ko: ‘Tulu daga kɛmɛ.’ A y'a fɔ o ye ko: ‘I ka juru sɛbɛ filɛ nin ye, sigi ka tulu daga bi duuru sɛbɛn joona joona.’

⁷O kɔ, a y'a fɔ dɔ wɛrɛ ye ko: ‘E do, joli b'i la?’ O y'a jaabi ko: ‘Suman bɔɔrɔ kɛmɛ.’ A y'a fɔ o ye ko: ‘I ka juru sɛbɛ filɛ nin ye, suman bɔɔrɔ bi seegi sɛbɛn.’

⁸“Cɛɛ nanbarantɔ nin ka kuntigi y'a tando a ka cekuya kɔsɔn. Tinyɛ na, nin dinyɛ mɔgɔw bɛ koow kɛ ni cekuya ye u ni nyɔgɔn cɛ ka tɛmɛ Alalɔnbagaw kan.”

⁹Yezu taara nya ni kuma ye k'a fɔ ko: “Ne b'a fɔ aw ye ko aw ka teriw nyini ni dinyɛ nafolo ye, waasa n'o nana ban tuma min na, olu ka se k'aw kunbɛn arijana na.

¹⁰Mɔgɔ min ye mɔgɔsɛbɛ ye kofitiniw na, o ye mɔgɔsɛbɛ ye kobaw la fana. Min ye janfamɔgɔ ye kofitiniw na, o ye janfamɔgɔ ye kobaw la fana.

¹¹N'aw ma kɛ mɔgɔsɛbɛw ye nin dinyɛ nafolo koow la, jon le bɛna nafolosɛbɛ kalifa aw ma?

¹²N'aw ma kɛ mɔgɔsɛbɛw ye mɔgɔ wɛrɛ ka nafolo koo la, min bɛna kɛ aw ta ye, jon bɛn'a d'aw ma?

¹³“Mɔgɔ si tɛ se ka baara kɛ kuntigi fila ye, bari a bɛna kelen kɔniya ka kelen kanu, walima a bɛna kelen bonya ka tɔ kelen nin dɔgɔya. Aw tɛ se ka nafolo kɛ aw jigi ye, ka baara kɛ Ala ye fana.”

¹⁴Nafolo koo ka di Farizinyɛ ye minkɛ, u y'o kuma bɛɛ mɛn tuma min na, u tun bɛ yɛlɛla Yezu ma.

¹⁵A y'a fɔ u ye ko: “Mɔgɔw nyana, aw kɔni b'aw yɛrɛw kɛ mɔgɔtilenninw ye, nga min b'aw dusukun na, Ala b'o lɔn, bari adamadenw bɛ fɛɛn min jati fɛnba ye, o ye fɛɛn nafatan ye Ala nyana.

¹⁶“Kabini fɔlɔfɔlɔ, u tun bɛ mɔgɔw kalan ni Ala ka sariya, ni kiraw ka kuma ye fɔɔ ka na se Zan batizelikɛla ka waati ma. K'a ta o ma, Ala ka masaya kibaru diman bɛ fɔra mɔgɔw ye. Bɛɛ bɛ jijara fana ka kɛ o masaden ye.

¹⁷“Sankolo ni dugukolo ka tunu, ka nɔgɔ ni sariya ka kuma fɔnin dakuru nyaa kelen cɛnni ye.

¹⁸“Mɔgɔ o mɔgɔ y'a muso bila ka dɔ wɛrɛ ta, o tigi bɛ kakalaya kɛ. Ni mɔgɔ o mɔgɔ ye muso furusanin furu, o tigi bɛ kakalaya kɛ fana.

¹⁹“Nafolotigi dɔ tun bɛ yen, a tun bɛ dakamana fani don ka faama dumuni kɛ ka nyanagwɛ kɛ loon o loon.

²⁰Faantan dɔ fana tun bɛ yen min tɔgɔ ko Lazari. A fari yɔrɔ bɛɛ tun ye joli ye. A tun bɛ la nafolotigi ka soo daa la.

²¹Dumuni murumuru minw tun bɛ ben nafolotigi fɛ, a tun b'a fɛ ka olu dumu, nga a tun t'o sɔrɔ. Ka fara o kan, wuluw tun bɛ na k'a ka jolidaw nɛɛmu.

²²“O faantan nana sa, mɛlɛkɛw y'a ta ka taa sigiyɔrɔ d'a ma Ibrayima gɛrɛfɛ arijana na. Nafolotigi fana nana sa, u y'a suu don.

²³A tun bɛ tɔɔrɔba la jahanama na, a y'a nyaa kɔrɔ ta ka Ibrayima ye yɔrɔjan ni Lazari fana b'a gɛrɛfɛ.

²⁴O tuma na, a pɛrɛnna ko: ‘Ne faa Ibrayima, makari ne la. A fɔ Lazari ye ko a ka ta'a bolokɔni sun jii la ka na ne kaan nyigi n'a ye, bari ne tɔɔrɔnin bɛ kojugu tasuma nin kɔnɔ.’

²⁵“Nga Ibrayima y'a fɔ a ye ko: ‘N deen, e yɛrɛ y'a lɔn ko k'i to dinyɛ na, i tun bɛ nyasuma na, ni Lazari bɛ sɛgɛn na. Sisan, Lazari fana bɛ nyasuma na, e bɛ sɛgɛn na.

²⁶Hali n'o tɛ, dingɛbelebeleba bɛ an ni aw cɛ. O cogo la, ni mɔgɔ min b'a fɛ ka bɔ yan ka taa aw fɛ, a kana se, ani mɔgɔ fana kana se ka bɔ aw fɛ ka na yan.’

²⁷Nafolotigi y'a fɔ ko: ‘O tuma, ne faa, ne b'i dali, i ka Lazari bila ka taa ne ka somɔgɔw fɛ,

²⁸bari dɔgɔcɛ duuru bɛ ne fɛ. A ka taa u lasɔmi waasa olu fana kana na nin tɔɔrɔ yɔrɔ la.’

²⁹“Ibrayima y'a jaabi ko: ‘Ala ka sariya ni kiraw ka sɛbɛw bɛ u bolo, u ka olu kɔnɔnakuma labato.’

³⁰Nafolotigi ko: ‘Ayi, o tɛ labɔli kɛ ne faa Ibrayima, nga ni mɔgɔ min sara ka ban, n'ale kununna ka taa kuma u fɛ, u bɛna nimisa ka faran u ka kojuguw la.’

³¹Ibrayima tilara k'a fɔ a ye ko: ‘N'u ma Ala ka sariya ni kiraw ka sɛbɛw kɔnɔnakuma labato, hali ni mɔgɔ sanin dɔ kununna ka taa kuma u fɛ, u tɛna la o la.’ ”