Read LAYIDUKURA LUKA 17 Bible Online

LUKA 17 - LAYIDUKURA bible

LUKA 17

¹Yezu y'a fɔ a ka kalandenw ye ko: “Sababu bɛna sɔrɔ min b'a to mɔgɔw bɛ kojugu kɛ tuma o tuma, nga mɔgɔ min bɛna kɛ o sababu nin ye, bɔnɛ bɛ o tigi ye.

²Mɔgɔ minw lara ne la a ma mɛn, ni mɔgɔ dɔ kɛra sababu ye k'olu dɔ kunna cɛn, yan ni a tigi k'o kɛ, ni kabakuru belebeleba tun sirila a kaan na k'a fili kɔgɔji la, o bɛna fisaya a ma.

³Aw k'aw yɛrɛw kɔlɔsi o koow ma. “N'i balima y'i hakɛ ta, i k'a filiyɔrɔ fɔ a ye. N'a nimisara, yafa a ma.

⁴N'a y'i hakɛ ta sinyɛ wolonwula tile kelen kɔnɔ, n'a segira i fɛ a sinyɛ wolonwula bɛɛ la ko i ka yafa ale ma, i ka yafa a ma.”

⁵Cidenw y'a fɔ Matigi ye ko: “Matigi, a to an ka la i la kosɛbɛ.”

⁶Matigi y'u jaabi ko: “N'aw tun bɛ la ne la dɔɔni dɔrɔn, hali n'o lanaya tun bɛ fonikisɛ bɔ, aw tun bɛna se k'a fɔ yiriba nin ye ko a ka bɔn ka bɔ yan ka ta'a yɛrɛ tutu kɔgɔji la. A tun bɛna sɔn aw ta ma.

⁷“Ni baaraden b'aw dɔ fɛ, n'a bɛ sɛnɛ kɛ walima n'a bɛ begɛnw le kɔlɔsi, n'a segira ka bɔ kongo la tuma min na, a tigi bɛn'a fɔ a ye ko a ka teliya ka na aw bɛ dumuni kɛ wa?

⁸Ayi. Nga a bɛn'a fɔ o baaraden ye ko a k'a cɛɛ siri ka dumuni labɛn k'a d'a ma. Ko ni ale tilara dumuni na tuma min na, o kɔ a fana bɛ sɔrɔ ka dumuni kɛ ka minni kɛ.

⁹Yala a bɛna barika la o baaraden ye bari a y'a ka baara kɛta kɛ wa? N ma la o la.

¹⁰O cogo la, baara min kalifara aw fana ma, n'aw y'o dama kɛ, aw k'a fɔ aw yɛrɛ ye ko aw tɛ foyi nya.”

¹¹Yezu tun bɛ taara Zeruzalɛmu, a ye Galile ni Samari mara cɛɛ tigɛ.

¹²A tun bɛ nyini ka don dugu dɔ kɔnɔ, kunatɔ mɔgɔ tan taar'a kunbɛn. U lɔra yɔrɔjan ka furancɛ dɔɔni to u ni Yezu cɛ. U y'u kaan kɔrɔ ta k'a fɔ ko:

¹³“Karamɔgɔ Yezu, makari an na.”

¹⁴Yezu y'u ye, a y'a fɔ u ye k'u ka taa u yɛrɛw yira sarakalasebagaw la. K'u to sira kan ka taa, u bɛɛ kɛnɛyara.

¹⁵U dɔ y'a ye ko a kɛnɛyara minkɛ, a segitɔ ka taa Yezu fɛ, a tora ka Ala tando kosɛbɛ.

¹⁶A sera Yezu fɛ, a y'a kunbiri gwan a kɔrɔ k'a nyaa biri duguma ka barika la a ye, k'a sɔrɔ o cɛɛ tun ye Samarika ye.

¹⁷O tuma na, Yezu y'a fɔ ko: “O mɔgɔ tan bɛɛ ma kɛnɛya wa? U tɔɔ kɔnɔntɔn nunu bɛ min?

¹⁸U si ma kɔsegi ka na Ala tando ni lonancɛ nin kelen tɛ!”

¹⁹O kɔ, a y'a fɔ o Samarika nin ye ko: “I lara ne la, o le y'a to i kɛnɛyara. Wili ka taa.”

²⁰Farizinyɛw ye Yezu nyininga ko Ala bɛna na sigi masaya la u cɛma tuma jumɛn. A y'u jaabi ko: “Aw tɛn'a ye i n'a fɔ mɔgɔw ta bɛ ye cogo min na.

²¹U tɛn'a fɔ fana ko: ‘A filɛ yan’ walima ‘A filɛ yen fɛ’, bari Ala sigira a ka masaya la aw cɛma ka ban.”

²²O kɔ, a y'a fɔ kalandenw ye ko: “Loon dɔ bɛna se, a bɛna diya aw ye ka Mɔgɔ Dencɛ ye, nga aw tɛn'a ye.

²³“Mɔgɔw bɛn'a fɔ aw ye ko: ‘A bɛ yan,’ walima ko: ‘A bɛ yen fɛ.’ Aw kana tugu u kɔ dɛ!

²⁴Saan bɛ manamana ka kɛnɛ bɔ sankolo faan kelen na ka ye a faan dɔ la cogo min na, Mɔgɔ Dencɛ fana bɛna kɛ ten a nalon na.

²⁵Nga sanni o loon ka se, wajibi lo ne ka tɔɔrɔ kosɛbɛ ani bii mɔgɔw ka ban ne la.

²⁶“Koo min tun kɛra Nuhun ka tile la, o nyɔgɔn bɛna kɛ fana Mɔgɔ Dencɛ natuma na.

²⁷Mɔgɔw tun bɛ dumunibabaw kɛ ka minni kɛ, ka furu kɛ, fɔɔ ka taa se Nuhun donlon ma kurunba kɔnɔ. O tuma na, sanjiba nana k'u bɛɛ halaki.

²⁸A bɛna kɛ o cogo kelen na i n'a fɔ Lɔti ka waati la. Mɔgɔw tun bɛ dumunibabaw kɛ, ka minni kɛ, ka sanni ni feereli kɛ, ka sɛnɛ kɛ, ka soow lɔ.

²⁹Nga Lɔti bɔra Sodɔmu dugu kɔnɔ loon min na, Ala y'u bɛɛ halaki ni tasuma ni kiribi ye ka bɔ sankolo la.

³⁰Mɔgɔ Dencɛ bɛna segi loon min na, a bɛna kɛ ten o loon.

³¹“O loon na, n'a ye mɔgɔ min sɔrɔ a ka boon kuun na, o tigi kan'a fɔ ko a bɛ jigi ka don boon kɔnɔ k'a bololafɛnw ta. N'a ye mɔgɔ min sɔrɔ foro la, o fana kana kɔsegi soo.

³²Koo min kɛra Lɔti ka muso la, aw k'aw hakili jigi o la.

³³Mɔgɔ min bɛ fɛɛrɛ nyini janko a kana sa, o tigi bɛna sa. Nga ni min sara, o tigi bɛna sini hɛrɛ sɔrɔ.

³⁴Ne b'a fɔ aw ye k'o loon sufɛ, ni mɔgɔ fila bɛ dilan kelen kan, u bɛna kelen ta ka kelen to yen.

³⁵Ni muso fila bɛ sinni kɛ yɔrɔ kelen na, u bɛna kelen ta ka kelen to yen. [

³⁶Ni cɛɛ fila bɛ foro kɔnɔ, u bɛna kelen ta ka kelen to yen.]”

³⁷Kalandenw y'a nyininga ko: “O bɛna kɛ yɔrɔ jumɛn, Matigi?” A y'u jaabi ko: “Ni fɛnsu bɛ yɔrɔ min na, dugaw bɛ lajɛn o yɔrɔ la.”