Read LAYIDUKURA LUKA 18 Bible Online

LUKA 18 - LAYIDUKURA bible

LUKA 18

¹Yezu ye talen dɔ la kalandenw ye k'a yira u la ko mɔgɔ ka kan ka Ala dali tuma bɛɛ, a kan'a fari faga o la.

²A ko: “Kititigɛla dɔ tun bɛ dugu dɔ la. O kititigɛla nin tun tɛ siran Ala nya, a tun tɛ mɔgɔ si bonya.

³O dugu kelen nin kɔnɔ, firiyamuso dɔ tun bɛ yen min tun bɛ to ka ta'a fɔ a ye ko koo min bɛ ale n'a kɛlɛnyɔgɔn cɛ, ko a k'o nyanabɔ ale ye.

⁴Muso mɛnna o la. Kititigɛla nin tun t'a fɛ k'a nyanabɔ. A nana se waati dɔ la, a y'a fɔ a yɛrɛ kɔnɔ ko: ‘Ne tɛ siran Ala nya ani ne tɛ mɔgɔ si bonya, o ye tinyɛ ye.

⁵Nga ne bɛna firiyamuso nin ka koo nyanabɔ a ye, n'o tɛ, a bɛna to ka na ne nii tɔɔrɔ tuma bɛɛ.’ ”

⁶O la, Matigi ko: “Aw ka kititigɛla tinyɛfɔbali nin ka kuma lajɛ.

⁷Ayiwa, Ala ye minw woloma k'u kɛ a ta ye, ni olu bɛ dɛmɛ nyini a fɛ suu ni tile, yala a bɛna mɛn k'u dɛmɛ wa?

⁸Ne b'a fɔ aw ye ko a bɛna u ka koo nyanabɔ joona. Nga Mɔgɔ Dencɛ bɛna segi tuma min na, yala a bɛna na a sɔrɔ ni mɔgɔw bɛ la Ala la wa?”

⁹Mɔgɔ minw tun b'u yɛrɛ jati mɔgɔtilenninw ye, n'u bɛ tɔw lɔgɔbɔ, Yezu ye talen nin la olu koo la. A y'a fɔ ko:

¹⁰“Loon dɔ, cɛɛ fila taara Alabatosoba kɔnɔ ka Ala dali. Kelen tun ye Farizinyɛ ye, kelen tun ye wusuruminɛla ye.

¹¹“Farizinyɛ nin lɔra ka Ala dali a yɛrɛ kɔnɔ ko: ‘Ala, ne bɛ barika la i ye, bari ne tɛ i n'a fɔ mɔgɔ tɔw, olu minw bɛ benkanni kɛ, u bɛ tilenbalikow kɛ, ka kakalaya kɛ, ani n tɛ i n'a fɔ nin wusuruminɛla.

¹²Ne bɛ suun don sinyɛ fila lɔgɔkun o lɔgɔkun. Ne bɛ fɛɛn o fɛɛn sɔrɔ, ne b'o bɛɛ jaka bɔ.’

¹³“Wusuruminɛla nin lɔnin tun bɛ kɔfɛ yɔrɔjan. A ma sɔn k'a nyaa kɔrɔ ta sanfɛ yɛrɛ, nga a y'a disi gosigosi, o min b'a yira ko a nimisara. A y'a fɔ ko: ‘Ala, makari ne la, ne ye kojugukɛla ye.’ ”

¹⁴Yezu y'o kuma kuncɛ k'a fɔ ko: “Ne b'a fɔ aw ye ko Ala ye wusuruminɛla nin jati mɔgɔtilennin ye a ka sɔrɔ ka segi soo. Nga a ma Farizinyɛ nin jati mɔgɔtilennin ye, bari mɔgɔ o mɔgɔ b'a yɛrɛ bonya, o tigi bɛna dɔgɔya, min b'a yɛrɛ majigi, o bɛna bonya.”

¹⁵Mɔgɔw tun bɛ taa ni dennyɛninw fana ye Yezu fɛ waasa a k'a bolo la u kan ka duba kɛ u ye. A ka kalandenw y'o ye minkɛ, u y'a daminɛ ka sɔngɔ u kuun na.

¹⁶Yezu ye denmisɛnw wele k'a fɔ a ka kalandenw ye ko: “Aw k'a to denmisɛnw ka na ne fɛ, aw kana u bali, bari olu bɔnyɔgɔnkow le bɛ don arijana na.

¹⁷Tinyɛ na, ne b'a fɔ aw ye ko ni mɔgɔ min ma sɔn Ala ka koo ma i n'a fɔ denmisɛn bɛ sɔn a facɛ ka kuma ma cogo min na, o tigi tɛna don Ala ka mara kɔnɔ fewu.”

¹⁸Zuwifuw ka kuntigi dɔ ye Yezu nyininga ko: “Karamɔgɔnyuman ne ka kan ka mun kɛ ka hɛrɛ banbali sɔrɔ?”

¹⁹Yezu y'a fɔ a ye ko: “Mun na i bɛ ne wele karamɔgɔnyuman? Mɔgɔnyuman si tɛ yen ni Ala kelen tɛ.

²⁰Ala ye min fɔ a ka sariya kɔnɔ, i b'o lɔn kɛ, ko: ‘I kana kakalaya kɛ, i kana mɔgɔ faga, i kana sonyali kɛ, i kana galon tigɛ, i faa n'i baa bonya.’ ”

²¹A ye Yezu jaabi ko: “Ne y'o sariyaw bɛɛ labato kabini ne denmisɛnman.”

²²A y'a jaabi ten minkɛ, o la, Yezu y'a fɔ a ye ko: “Fɛɛn kelen b'i jɛn halibi. Taa i bololafɛn bɛɛ feere k'o wari tilan faantanw cɛ, o cogo la, i bɛna nafoloba sɔrɔ sankolo la. O kɔ, i ka na tugu ne kɔ.”

²³Nga o kuma ma cɛɛ dusu minɛna, a nyaa sisira kosɛbɛ, bari nafolobatigi tun lo.

²⁴Yezu y'a ye ko a nyaa sisira minkɛ, a y'a fɔ ko: “A ka gwɛlɛ kosɛbɛ nafolotigi ma ka don Ala ka mara kɔnɔ.

²⁵Nyɔgɔmɛ donko ka nɔgɔ miseli woo fɛ ka tɛmɛ nafolotigi donko kan Ala ka mara kɔnɔ.”

²⁶Yezu lamɛnbagaw y'a fɔ ko: “O tuma na, jon le bɛ se ka kisi?”

²⁷A y'u jaabi ko: “Mɔgɔw tɛ se k'u yɛrɛ kisi, nga Ala bɛ se k'u kisi.”

²⁸Piyɛri y'a fɔ o tuma na ko: “A filɛ, an jɛnna an bololafɛn bɛɛ kɔ ka tugu i la.”

²⁹Yezu y'a fɔ u ye ko: “Tinyɛ na, ne b'a fɔ aw ye ko ni mɔgɔ o mɔgɔ y'a ka soo to, walima a muso, walima a balimaw, walima a wolobagaw, walima a deenw Ala ka baara kɔsɔn,

³⁰o tigi bɛna olu nyɔgɔn caaman sɔrɔ dinyɛ nin na. A bɛna hɛrɛ banbali fana sɔrɔ sini.”

³¹Yezu taara n'a ka kalanden tan ni fila ye u danna k'a fɔ u ye ko: “Ayiwa, an bɛ taara Zeruzalɛmu. O yɔrɔ la, kiraw tun ye minw sɛbɛn Mɔgɔ Dencɛ koo la, o bɛɛ bɛna kɛ i n'a fɔ u y'a fɔ cogo min na.

³²U bɛn'a don siya wɛrɛ bolo, olu bɛna yɛlɛ a ma, k'a tɔɔrɔ, k'u daji tu a kan,

³³k'a bugɔ ni busan ye ka sɔrɔ k'a faga. Nga tile saba a faganin kɔ, a bɛna kunun.”

³⁴Nga, a ka kalandenw m'o kuma faamu. O kɔrɔ tun dogonin bɛ u ma. O la, u ma se k'o lɔn.

³⁵Yezu surunyana Zeriko la tuma min na, o y'a sɔrɔ finyɛntɔ dɔ tun siginin bɛ sira daa la n'a bɛ dalili kɛ.

³⁶O finyɛntɔ nin ye jama mankan mɛn n'u bɛ tɛmɛna minkɛ, a ye dɔw nyininga ko: “Mun le kɛra?”

³⁷U y'a fɔ a ye ko Nazarɛti Yezu le bɛ tɛmɛna.

³⁸O tuma na, a pɛrɛnna ko: “Dawuda dencɛ Yezu, makari ne la.”

³⁹Minw tun bɛ nyafɛ, olu y'a sɔngɔ ko a k'a daje, nga a tun bɛ dɔ fara a ka pɛrɛn kan n'a b'a fɔra ko: “Dawuda dencɛ, makari ne la.”

⁴⁰Yezu lɔra k'a fɔ k'u k'a minɛ ka na n'a ye. Finyɛntɔ gwɛrɛla Yezu la tuma min na, Yezu y'a nyininga ko:

⁴¹“I b'a fɛ ne ka mun kɛ i ye?” A y'a jaabi ko: “Matigi, ne nyaa ka yɛlɛ.”

⁴²Yezu y'a fɔ a ye ko: “I lara ne la minkɛ, i kisira. Ayiwa, i nyaa ka yɛlɛ.”

⁴³O yɔrɔnin kelen, a nyaa yɛlɛla, a tugura Yezu nɔɔ fɛ n'a bɛ Ala tando. Jama bɛɛ y'o ye minkɛ, u ye Ala tando.