Read LAYIDUKURA LUKA 19 Bible Online

LUKA 19 - LAYIDUKURA bible

LUKA 19

¹Yezu sera Zeriko. A tun bɛ o dugu cɛtigɛra tuma min na,

²wusuruminɛlaw ka kuntigi dɔ tun bɛ yen, a tɔgɔ ko Zase. Nafolobatigi tun lo.

³A tun b'a fɛ k'a nyaa la Yezu kan k'a lɔn, nga a tun tɛ se k'a ye jama kɔsɔn, bari ale Zase tun ka surun.

⁴A dɛsɛra ka boli ka taa yɛlɛ torosun dɔ kan nyafɛ waasa a ka se ka Yezu ye, bari a tun ka kan ka tɛmɛ yen.

⁵Yezu sera o yɔrɔ la tuma min na, a y'a nyaa kɔrɔ ta k'a fɔ a ye ko: “Zase, jigi joona joona. Wajibi lo ne ka jigi i ka soo kɔnɔ bii.”

⁶Zase jigira joona joona ka taa n'a ye a ka soo ni nisɔndiya ye.

⁷Mɔgɔ minw bɛɛ ye u taatɔ ye, u tun bɛ ;nunu;nunu ko: “Cɛɛ nin bɛ taara jigi mɔgɔjugu fɛ.”

⁸Nga Zase y'a fɔ Matigi ye ko: “Matigi, sisan ne bɛna n ka nafolo tilancɛ di faantanw ma, ni ne ye mɔgɔ min nanbaran, ne bɛna o nyɔgɔn naani segi o tigi ma.”

⁹Yezu y'a fɔ ko: “Cɛɛ nin ka soo kisira bii, bari ale fana ye Ibrayima ka deen dɔ ye.

¹⁰Mɔgɔ minw ni Ala cɛ bɛnnin tun tɛ, Mɔgɔ Dencɛ nana olu yaala, ka bɛɛn sigi u ni Ala cɛ.”

¹¹Mɔgɔ minw tun bɛ Yezu lamɛnna, olu kɔni tun bɛ miirila ko Ala tun bɛn'a ka masaya yira o waati yɛrɛ la. O y'a sɔrɔ, a tun surunyana Zeruzalɛmu na, o la, Yezu ye talen la u ye

¹²ko: “Masacɛ dɔ ka deen taara jamanajan dɔ la masacɛw bɛɛ ka kuntigi fɛ k'a fɔ a ye ko n'a ye sira di, ale b'a fɛ ka sigi a facɛ nɔɔ na masaya la. N'a ye sira sɔrɔ o yɔrɔ la, a bɛ kɔsegi a yɛrɛ ka dugu la ka sigi masaya la.

¹³Sanni a ka taa, a y'a ka baaradenw mɔgɔ tan wele ka sanukuru kelen kelen di u bɛɛ kelen kelen ma k'a fɔ u ye k'u ka jago kɛ n'o ye fɔɔ ale ka taa ka na.

¹⁴Nga a koo tun man di a ka jamana mɔgɔw ye. A taanin kɔ, olu ye mɔgɔw bila ka ta'a fɔ masacɛba ye k'olu t'a fɛ cɛɛ nin bɛ kɛ u ka masa ye.

¹⁵“O n'a ta bɛɛ, masacɛba sɔnna ko a ka kɛ masacɛ ye. O kɔ, a segira ka ta'a ka jamana na. A tun ye sanukuru di a ka baaraden minw ma, a ye mɔgɔ bila ka taa olu wele. U ye tɔnɔ minw sɔrɔ, a tun b'a fɛ k'o lɔn.

¹⁶Baaraden min kɔnna ka na, ale y'a fɔ masacɛ ye ko: ‘I ye sanukuru min di ne ma, ne y'a nyɔgɔn tan sɔrɔ tɔnɔ ye.’

¹⁷Masacɛ y'a fɔ a ye ko: ‘I ye baaradennyuman ye. I kɛra mɔgɔsɛbɛ ye kofitini na minkɛ, n b'i sigi dugu tan kunna.’

¹⁸Baaraden min tugura, ale y'a fɔ masacɛ ye ko: ‘I ye sanukuru min di ne ma, ne ye a nyɔgɔn duuru sɔrɔ tɔnɔ ye.’

¹⁹Masacɛ y'a fɔ o fana ye ko: ‘N b'i sigi dugu duuru kunna.’

²⁰“Dɔ wɛrɛ nana k'a fɔ masacɛ ye ko: ‘I ye sanukuru min di ne ma, o filɛ nin ye. Ne tun y'a don kɔɔrimugu la k'a mara ka nya.

²¹Ne tun bɛ siran i nya bari i ka koo ka gwɛlɛ. I ma fɛɛn min kalifa mɔgɔ ma, i b'o le koo nyininga a tigi fɛ. I ma danni kɛ foro min na, i b'a fɛ o suman ka kɛ i ta ye.’

²²Masacɛ y'a fɔ a ye ko: ‘Baaradenjugu, ne bɛna i kiti ka kɛnyɛ n'i yɛrɛ ka kuma ye. I tun y'a lɔn ko ne ka koo ka gwɛlɛ, ko ne ma fɛɛn min kalifa, n b'o koo nyininga, ko ne ma danni kɛ foro min na, ko n b'a fɛ o suman bɛ kɛ n ta ye.

²³Mun na i ma ne ka sanu di jagokɛla ma? N'i tun y'o kɛ, ne tun bɛna segi ka na ne ka sanu n'a tɔnɔ sɔrɔ.’

²⁴“O kɔ, minw tun bɛ yen, masacɛ y'a fɔ olu ye k'u ka sanukuru nin bɔsi a la, k'a di tan tigi ma.

²⁵U y'a fɔ masacɛ ye ko: ‘O sanukuru nin nyɔgɔn tan b'ale bolo ka ban!’

²⁶Masacɛ y'u jaabi ko: ‘Ne b'a fɔ aw ye ko fɛɛn bɛ mɔgɔ min fɛ, dɔ bɛna d'o tigi ma k'a fara a ta kan, nga fɛɛn tɛ min bolo, hali dɔɔni min b'a bolo, o bɛna bɔsi a la.

²⁷Sisan, ne jugu minw tun t'a fɛ ne ka kɛ u ka masacɛ ye, aw ka na ni olu ye yan k'u faga ne nyana.’ ”

²⁸Yezu kumana ten ka ban tuma min na, a tɛmɛna u nya, u ye sira minɛ ka taa Zeruzalɛmu.

²⁹Yezu n'a nɔfɛmɔgɔw sera Olivuyirikulu gɛrɛfɛ Bɛtifaze ni Betani masurun na. A y'a ka kalandenw mɔgɔ fila ci k'a fɔ u ye ko:

³⁰“Dugu min bɛ aw nyafɛ, aw ye taa yen. Aw dontɔ o dugu kɔnɔ, aw bɛna faliden dɔ sirinin ye, mɔgɔ si ma deli ka yɛlɛ min kan fɔlɔ. Aw k'a foni ka na n'a ye.

³¹Ni mɔgɔ dɔ y'aw nyininga ko mun na aw b'a foni, aw k'o tigi jaabi ko Matigi mako le b'a la.”

³²Ciraden nunu taara faliden sɔrɔ i n'a fɔ Yezu tun y'a fɔ u ye cogo min na.

³³U k'u b'a foni, nga falitigiw y'u nyininga ko mun na u b'a foni.

³⁴U y'u jaabi ko Matigi mako le b'a la.

³⁵O kɔ, u taara ni faliden ye Yezu fɛ. U y'u ka faniw la a kɔɔ la, Yezu ka sɔrɔ ka yɛlɛ a kan.

³⁶Yezu taatɔ, mɔgɔw tun b'u ka faniw lala sira kan k'a bonya.

³⁷K'u to kulu nin kan, u surunyana a jigijigi la tuma min na, a ka kalandenw bɛɛ lajɛnnin nisɔn diyara k'a daminɛ ka Ala tando kosɛbɛ a ka kabakokɛninw bɛɛ kɔsɔn.

³⁸U tun b'a fɔ ko: “Masacɛ min natɔ filɛ nin ye Matigi tɔgɔ la, Ala ka barika don o la. Hɛrɛ ka kɛ sankolo la, tandoli ka kɛ Ala ye fɔɔ ka se sankolo la.”

³⁹Farizinyɛ dɔw tora jama cɛma k'a fɔ Yezu ye ko: “Karamɔgɔ, a fɔ i ka kalandenw ye, k'u ka mankan dabila.”

⁴⁰Yezu y'u jaabi ko: “Ne b'a fɔ aw ye ko hali n'u jera, kabakuruw bɛna mankan kɛ.”

⁴¹Yezu surunyana kosɛbɛ ka Zeruzalɛmu ye tuma min na, a kasira.

⁴²A y'a fɔ ko: “Zeruzalɛmukaw, koo min bɛ se ka hɛrɛ d'aw ma, n'aw fana tun b'o lɔn bii yɛrɛ, o tun bɛna nya. Nga, aw tɛ foyi lɔnna o la.

⁴³Loon dɔ bɛna se, aw juguw bɛna dogoyɔrɔw lalaga k'aw lamini, k'aw dɛrɛ faan bɛɛ la.

⁴⁴U bɛna aw ka dugu n'aw yɛrɛ bɛɛ halaki, u bɛna boonw bɛɛ ci. O koow bɛɛ bɛna aw sɔrɔ, bari Ala tun b'a fɛ k'aw dɛmɛ waati min na, aw ma sɔn.”

⁴⁵Yezu taara don Alabatosoba kɔnɔ, a y'a daminɛ ka jagokɛlaw gwɛn ka bɔ yen.

⁴⁶A y'a fɔ u ye ko: “A fɔra Ala ka kuma na ko: ‘Ne Ala ka soo bɛna kɛ dalili kɛ yɔrɔ ye.’ Nga, aw kɔni y'a kɛ nanbarankɛlaw ka yɔrɔ ye.”

⁴⁷Yezu tun bɛ mɔgɔw kalan loon o loon Alabatosoba kɔnɔ. Sarakalasebagaw ni sariya karamɔgɔw ani Zuwifuw ka mɔgɔbabaw tun b'a faga cogo nyinina.

⁴⁸Nga, u tun bɛn'a kɛ cogo min na, u m'o lɔn, bari a ka kuma tun ka di jama bɛɛ ye.