Read LAYIDUKURA LUKA 2 Bible Online

LUKA 2 - LAYIDUKURA bible

LUKA 2

¹O waati la, Ɔrɔmu masacɛ Ogusiti tun b'a fɛ k'a ka mɔgɔw daa lɔn. O la, a ye cii bila ko a ka jamana mɔgɔw bɛɛ tɔgɔ ka sɛbɛn.

²O tɔgɔsɛbɛn fɔlɔ kɛra ka Kiriniyusi sɔrɔ Siri mara kuun na.

³Mɔgɔw bɛɛ taara u ka dugu la waasa u tɔgɔ ka sɛbɛn yen.

⁴Yusufu fana bɔra Nazarɛti, Galile mara la, ka taa Zude mara dugu dɔ la min tɔgɔ ko Bɛtilehɛmu, n'o ye masacɛ Dawuda ka dugu ye, bari a buruju tun bɔra Dawuda la.

⁵A taara yen n'a maminɛmuso Mariyamu ye, waasa u tɔgɔ ka sɛbɛn yen. Mariyamu kɔnɔman tun lo.

⁶Ka u to Bɛtilehɛmu, Mariyamu jigi loon nana se.

⁷A jigira dencɛ la, o tun y'a deen fɔlɔ ye. A ye fani meleke a la k'a la kolokolo kɔnɔ, bari u tun ma yɔrɔ sɔrɔ lonanw jigiso kɔnɔ.

⁸Sagadɛndɛbaga dɔw tun bɛ o mara la, u tun bɛ si nyana kongo kɔnɔ k'u ka sagaw kɔlɔsi.

⁹Matigi ka mɛlɛkɛ dɔ y'a yɛrɛ yira u la. O yɔrɔnin bɛ, Matigi nɔɔrɔ manamanana ka u lamini. U siranna kosɛbɛ.

¹⁰Nga mɛlɛkɛ y'a fɔ u ye ko: “Aw kana siran, bari ne nana kibaru diman dɔ fɔ aw ye min bɛna aw ka jamana mɔgɔw bɛɛ nisɔn diya.

¹¹A filɛ, bii suu nin na, Kisibaga wolola aw ye Dawuda ka dugu la, ale lo ye Ala ka Mɔgɔwolomanin nin ye, an Matigi lo.

¹²Aw bɛn'a lɔn taamasinyɛ min fɛ, o filɛ: Aw bɛna dennyɛnin dɔ lanin ye kolokolo dɔ kɔnɔ, fani melekenin b'a la.”

¹³O yɔrɔnin bɛ, mɛlɛkɛ caaman dɔ bɔra sankolo la ka na fara mɛlɛkɛ dɔ nin kan. U tun bɛ Ala tando ko:

¹⁴“Ala ka tando sanfɛ yɔrɔjan na, hɛrɛ ka to dugukolo kan a diyana mɔgɔw fɛ.”

¹⁵O mɛlɛkɛw segira ka taa sankolo la tuma min na, sagadɛndɛbagaw y'a fɔ nyɔgɔn ye ko: “An ka taa fɔɔ Bɛtilehɛmu, mɛlɛkɛ ye ko min kibaru fɔ an ye ka bɔ Matigi fɛ, an ka taa o filɛ.”

¹⁶U teliyara ka taa. U taara Mariyamu ni Yusufu ani dennyɛnin sɔrɔ yen. Dennyɛnin lanin tun bɛ kolokolo dɔ kɔnɔ.

¹⁷Dennyɛnin yenin kɔ, kuma min tun fɔra u ye o deen nin koo la, u y'o lakali.

¹⁸Minw bɛɛ ye sagadɛndɛbagaw ka kuma mɛn, u bɛɛ kabakoyara.

¹⁹Nga Mariyamu tun b'o koow bɛɛ mara a hakili la ka miiri u la.

²⁰O kɔ, sagadɛndɛbagaw kɔsegitɔ u ka yɔrɔ la, u tun ye koo minw bɛɛ mɛn ka koo minw bɛɛ ye, u tun bɛ Ala bonya k'a tando o bɛɛ kɔsɔn, bari a bɛɛ kɛra i n'a fɔ a tun fɔra u ye cogo min na.

²¹Deen wolola, a tile seeginan, a kɛnɛkɛnɛlon sera minkɛ, a tɔgɔ lara ko Yezu i n'a fɔ mɛlɛkɛ tun y'a fɔ cogo min na sanni a baa k'a kɔnɔ ta.

²²Saniyali min ka kan ka kɛ ka kɛnyɛ ni Musa ka sariya ye, o loon dafara minkɛ, Yusufu ni Mariyamu taara ni Yezu ye Zeruzalɛmu k'a kalifa Ala ma,

²³bari a fɔra Matigi ka sariya la ko ni deen fɔlɔ min kɛra cɛɛ ye, k'o ka kan k'a kalifa Matigi ma,

²⁴ani ka tubanin fila, walima jɛnɛtugan fila bɔ saraka ye i n'a fɔ Matigi y'a nyini cogo min na.

²⁵O y'a sɔrɔ cɛɛ dɔ tun bɛ Zeruzalɛmu min tɔgɔ ko Simiyɔn. O cɛɛ tun ye mɔgɔnyuman ye, a tun bɛ Ala ka sariyaw bɛɛ labato. A tun bɛ Isirayɛli ka kunmabɔbaga nali kɔnɔna. Nii Senuman tun b'a fɛ.

²⁶Nii Senuman tun y'a yira a la ko a tɛna sa n'a nyaa ma la Matigi ka Mɔgɔwolomanin kan.

²⁷A ka sebagaya y'a to Simiyɔn taara Alabatosoba kɔnɔ. Yezu wolobagaw taara ni Yezu ye o yɔrɔ la waasa k'a kalifa Ala ma, ani k'o sarakaw bɔ ka kɛnyɛ ni sariya ye.

²⁸Simiyɔn y'a ta a bolo la ka Ala tando k'a fɔ ko:

²⁹“Matigi, i ye min fɔ, o kɛra. I bɛ se k'i ka kalifa minɛ ne la sisan, ne ka taa hɛrɛ la,

³⁰bari i ye kisibaga min ci, ne nyaa lara o kan,

³¹i y'o min labɛn mɔgɔw bɛɛ ye.

³²A bɛna yeelen bɔ dinyɛ mɔgɔw bɛɛ ye k'i yira u la. A bɛna bonya la an Isirayɛli deenw kan, an minw ye i ka mɔgɔw ye.”

³³Simiyɔn ye kuma minw fɔ Yezu koo la, deen facɛ n'a bamuso kabakoyara olu la.

³⁴Simiyɔn ye duba kɛ u ye. O kɔ, a y'a fɔ a bamuso Mariyamu ye ko: “A filɛ, deen nin bɛna kɛ sababu ye Ala bɛna Isirayɛliden caaman jalaki, ka sɔn caaman fana ma. A bɛna kɛ taamasinyɛ ye, mɔgɔw bɛna nyɔgɔn sɔsɔ min koo la.

³⁵O cogo la, mɔgɔ caaman kɔnɔna koo bɛna bɔ kɛnɛ kan. E kɔni, i nii bɛna tɔɔrɔ i n'a fɔ u y'i sɔgɔ ni muru ye.”

³⁶Muso dɔ fana tun bɛ Zeruzalɛmu, a tɔgɔ ko Anɛ, kira tun lo. A facɛ Fanuwɛli buruju bɔra Azɛri la. Anɛ tun kɔrɔla kosɛbɛ. A sunguruman furunin kɔ, saan wolonwula, a cɛɛ ye dinyɛ to.

³⁷A tora firiya la fɔɔ a sii nana se saan bi seegi ni naani ma. Tuma o tuma a tun bɛ to ka taa Alabatosoba kɔnɔ. A tun bɛ suun don ka Ala dali tuma bɛɛ. O cogo la, a tun bɛ Ala bato suu ni tile.

³⁸Yezu kalifatuma Ala ma, o waati yɛrɛ la Anɛ fana donna Alabatosoba kɔnɔ. A y'a daminɛ ka barika la Ala ye. Mɔgɔ minw tun bɛ Zeruzalɛmu kunmabɔbaga nali kɔnɔna, a ye Yezu koo fɔ olu bɛɛ ye.

³⁹Yezu wolobagaw ye Matigi ka sariya labato ka ban tuma min na, u segira n'a ye Nazarɛti, Galile mara la, bari u siginin tun bɛ yen.

⁴⁰Dɔ tora ka fara deen kundama n'a barika kan ka taa. Hakilitigi tun lo, a koo tun ka di Ala ye.

⁴¹Yezu wolobagaw tun bɛ to ka taa Hɔrɔnya nyanagwɛ la Zeruzalɛmu saan o saan.

⁴²Yezu ye saan tan ni fila sɔrɔ saan min na, u bɛɛ taara nyɔgɔn fɛ Zeruzalɛmu ka kɛnyɛ ni nyanagwɛ ka landa ye.

⁴³Nyanagwɛ banna loon min na, mɔgɔw ye soo siraw ta. Nga Yezu tora Zeruzalɛmu, a wolobagaw ma bɔ a kala ma.

⁴⁴U tun y'a miiri ko Yezu bɛ u taamanyɔgɔnw fɛ sira kan. U ye tile kelen taama kɛ, u sɔrɔla k'a daminɛ k'a yaala u balimaw ni u lɔnbagaw cɛma.

⁴⁵U ma Yezu ye yɔrɔ si fɔɔ u segira ka ta'a yaala Zeruzalɛmu.

⁴⁶Tile saba, nyanagwɛ bannin kɔ, u taar'a sɔrɔ Alabatosoba kɔnɔ. A siginin tun bɛ sariya karamɔgɔw fɛ k'u lamɛn ani k'u nyininga koo dɔw la.

⁴⁷A lamɛnbagaw bɛɛ kabakoyara a ka hakilitigiya n'a ka jaabili cogo la.

⁴⁸A wolobagaw y'a ye tuma min na, u kabakoyara. A bamuso y'a nyininga ko: “Ne deen, mun y'a to i ye nin kɛ an na ten? A filɛ, ne n'i facɛ hakili nyagaminin tun b'i yɔrɔ nyinina.”

⁴⁹A y'u jaabi ko: “Mun na aw tun bɛ ne yɔrɔ nyini? Aw tun m'a lɔn ko ne ka kan ka sɔrɔ n Faa ka soo kɔnɔ wa?”

⁵⁰Nga a ye kuma min fɔ u ye, u m'o faamu.

⁵¹O kɔ, u segira ka taa nyɔgɔn fɛ ni Yezu ye Nazarɛti. A tun b'u bonya kosɛbɛ. A bamuso tun b'o koow bɛɛ mara a hakili la.

⁵²Dɔ tora ka fara Yezu kundama n'a hakili kan. A koo diyara Ala ni mɔgɔw ye.