Read LAYIDUKURA LUKA 21 Bible Online

LUKA 21 - LAYIDUKURA bible

LUKA 21

¹Ka Yezu to Alabatosoba kɔnɔ, a ye nafolotigiw ye n'u bɛ wari donna Alabatosoba kɛsu kɔnɔ.

²A ye firiyamuso dɛsɛbagatɔ dɔ fana ye n'a bɛ tama fila donna yen.

³O tuma na, Yezu y'a fɔ ko: “Tinyɛ na, ne b'a fɔ aw ye ko firiyamuso dɛsɛbagatɔ nin ye wari min don kɛsu kɔnɔ, o ka ca ni tɔw bɛɛ ta ye,

⁴bari olu mako tɛ se u ka nafolo min ma, u ye dɔ bɔ o le la k'o don, nga ale kɔni n'a ka faantanya bɛɛ, min tun b'a kun ka kɛ dumuni sɔngɔ ye, a y'o bɛɛ don.”

⁵O kɔ, mɔgɔ dɔw tun bɛ kumana Alabatosoba koo la, ko a lɔra ni dakamana kabakuruw ye, ko a masirinin bɛ ni fɛnnyumanw ye, mɔgɔw tun y'o minw di ka Ala bonya n'o ye. O la, Yezu ko:

⁶“Aw nyaa bɛ o fɛɛn minw na dɛ, loon dɔ bɛna se, o si tɛna to nyɔgɔn kan yan, u bɛɛ bɛna walaka.”

⁷U ye Yezu nyininga ko: “Karamɔgɔ, i ye kuma min fɔ sisan wo, o koow bɛna kɛ tuma jumɛn? Mun bɛna kɛ taamasinyɛ ye k'a yira k'o koow kɛtuma sera?”

⁸Yezu y'u jaabi ko: “Aw k'aw yɛrɛw kɔlɔsi janko mɔgɔ si kana aw lafili, bari mɔgɔ caaman bɛna na ne tɔgɔ la u yɛrɛ kan k'a fɔ k'olu ye Ala ka Mɔgɔwolomanin nin ye, ko dinyɛ labantuma surunyana. Aw kana la u la.

⁹N'aw ye kɛlɛw ni jama muruti koo mɛn tuma min na, aw kana siran. Wajibi lo o koow ka kɛ fɔlɔ, nga o t'a yira ko dinyɛ bɛna ban o yɔrɔnin kelen.”

¹⁰O kɔ, a y'a fɔ u ye ko: “Siya dɔ bɛna wili siya dɔ wɛrɛ kama. Masacɛ dɔ bɛna wili masacɛ dɔ wɛrɛ kama.

¹¹Dugukolo bɛna yɛrɛyɛrɛ kosɛbɛ yɔrɔ dɔw la. Fɔnyɔbanaw ni kɔngɔ bɛna don yɔrɔ dɔw la fana. Jatigɛkow ni taamasinyɛbaw bɛna ye sankolo la.

¹²“Nga sanni o koow bɛɛ ka kɛ, mɔgɔw bɛna aw minɛ k'aw tɔɔrɔ kosɛbɛ. U bɛna aw don Alabatoso kuntigiw bolo k'aw don kaso la. U bɛna taa n'aw ye masacɛw ni jamanatigiw fɛ ne kɔsɔn.

¹³O bɛna kɛ sababu ye, aw bɛ ne koo fɔ u ye.

¹⁴Aw k'aw hakili to a la ko aw man kan ka jɔɔrɔ aw ka fɔta la u nyakɔrɔ,

¹⁵bari ne yɛrɛ bɛna hakilitigiya kuma don aw daa la fɔɔ aw jugu si tɛna se k'aw sɔsɔ, walima k'aw ka kuma kɔɔ kari.

¹⁶Hali aw wolobagaw, ni aw badenw, n'aw balimaw, an'aw teriw yɛrɛ, olu bɛna aw don aw juguw bolo k'aw dɔw faga.

¹⁷Mɔgɔ bɛɛ bɛna aw kɔniya ne kɔsɔn.

¹⁸Nga hali aw kunsigiden kelen tɛna tunu.

¹⁹Aw ka munyuli bɛn'a to aw bɛna hɛrɛ sɔrɔ Ala fɛ sini.

²⁰“N'aw y'a ye ko Zeruzalɛmukaw juguw ka kɛlɛbolo ye dugu lamini tuma min na, aw k'a lɔn ko a halakituma sera.

²¹O tuma na, Zude mara mɔgɔw ka boli ka taa dogo kulu yɔrɔw la. N'o ye minw sɔrɔ Zeruzalɛmu kɔnɔ, olu ka boli ka bɔ. Minw bɛ kɛ kongo kɔnɔ, u kan'a fɔ k'u bɛna u yɛrɛ sutara Zeruzalɛmu kɔnɔ,

²²bari a waati bɛna kɛ kojuguw juru sara waati ye. Kiraw tun ye minw fɔ, o bɛɛ bɛna kɛ, hali foyi tɛna u jɛn.

²³O waati la, muso kɔnɔmanw, ani dennyɛnintigiw bɛna tɔɔrɔ kosɛbɛ, o tɔɔrɔ nin bɛna se Isirayɛli jamana mɔgɔw bɛɛ ma, bari Ala bɛn'a yira u la ko a dimina u kɔrɔ.

²⁴U bɛna dɔw faga ni murujan ye, ka dɔw minɛ ka taa u kɛ jɔɔnw ye siya wɛrɛ cɛma. Siya minw tɛ siran Ala nya, olu bɛna Zeruzalɛmu halaki pewu fɔɔ sarati min tun dira u ma, fɔɔ o ka dafa.

²⁵“Tile, ni kalo, ani lolow bɛna kɛ cogo dɔ la. Kɔgɔji bɛna mankanba kɛ, adamadenw kɔnɔ bɛna gwan, u dabari bɛna ban.

²⁶Mɔgɔ caaman bɛna sa jatigɛkojugu bolo, kabako minw bɛ nana kɛ dugukolo kan olu miiri kɔsɔn. Sankolofɛnw bɛɛ bɛna nyagami nyɔgɔn na.

²⁷O tuma na, mɔgɔw bɛna Mɔgɔ Dencɛ natɔ ye sankabaw cɛma ni sebagaya, ni nɔɔrɔ ye.

²⁸N'o koow daminɛna ka kɛ tuma min na, aw ka dɔ fara aw jigi n'aw ka jagwɛlɛya kan, bari aw ka hɔrɔnyali waati sera.”

²⁹O kɔ, Yezu ye talen dɔ la u ye ko: “Aw ka torosun ni yiri tɔw bɛɛ filɛ.

³⁰N'aw y'a ye u bolow daminɛna ka nugu tuma min na, aw b'a lɔn ko saminya surunyana kelen.

³¹O cogo la, aw mana o koow kɛtɔ ye tuma min na, aw k'a lɔn ko Ala ka masaya waati surunyana.

³²“Tinyɛ na, ne b'a fɔ aw ye ko bii mɔgɔw bɛɛ tɛna sa ni o koow bɛɛ ma kɛ.

³³Sankolo ni dugukolo bɛna wili ka bɔ u nɔɔ na, nga ne ka kuma tɛna bɔ a nɔɔ na abada.

³⁴“Aw k'aw yɛrɛw kɔlɔsi, aw kan'a to nugubatɔya, ni dɔrɔtɔya, ani dinyɛ hamikow k'aw hakili nagasi, n'o tɛ, laban loon bɛna bari aw la,

³⁵bari o loon bɛna cun dinyɛ mɔgɔw bɛɛ kan i n'a fɔ jaan bɛ fɛɛn minɛ cogo min na.

³⁶Aw ye jija ka Ala dali tuma bɛɛ, ka kɛ mɔgɔ timinadiyaninw ye, waasa aw ka se ka kisi o koo nataw bɛɛ ma, ani aw ka se ka lɔ Mɔgɔ Dencɛ nyakɔrɔ.”

³⁷Loon o loon tile kɔnɔ, Yezu tun bɛ mɔgɔw kalan Alabatosoba kɔnɔ. Ni suu kora, a tun bɛ bɔ ka taa si Olivuyirikulu yɔrɔ la.

³⁸Sɔgɔmada joona, mɔgɔ bɛɛ tun bɛ ta'a sɛgɛrɛ Alabatosoba kɔnɔ k'a lamɛn.