Read LAYIDUKURA LUKA 22 Bible Online

LUKA 22 - LAYIDUKURA bible

LUKA 22

¹Buru funubali nyanagwɛ, o min tɔgɔ ko Hɔrɔnya nyanagwɛ fana, o tun surunyana.

²Sarakalasebagaw ni sariya karamɔgɔw bɛna se ka Yezu faga cogo min na ni jama ma bɔ a kala ma, u tun b'o cogo nyinina bari u tun bɛ siran ko jama bɛna muruti.

³O tuma na, Zuda min bɛ wele Isikariyɔti n'o ye kalanden tan ni fila nunu dɔ ye, Sutana y'a daminɛ k'o hakili yɛlɛma.

⁴A taar'a fɔ sarakalasebagaw ni Alabatosoba kɔlɔsibagaw kuntigiw ye ko cogo b'ale fɛ ka Yezu don u bolo.

⁵O diyara u ye kosɛbɛ. U bɛnna a la k'u bɛna wari hakɛ dɔ d'a ma.

⁶Zuda sɔnna. A y'a daminɛ ka cogoyanyuman nyini waasa k'a don u bolo ni jama ma bɔ a kala ma.

⁷Buru funubali nyanagwɛ loon fɔlɔ nana se. Sagaden tun ka kan ka faga o loon ka kɛ Hɔrɔnya nyanagwɛ saraka ye.

⁸Yezu y'a fɔ Piyɛri ni Zan ye k'u ka taa Hɔrɔnya nyanagwɛ dumuni labɛn u ye.

⁹U y'a nyininga ko: “I b'a fɛ an k'o labɛn yɔrɔ jumɛn?”

¹⁰A y'u jaabi ko: “Aw dontɔ dugu kɔnɔ, aw ni cɛɛ dɔ bɛna nyɔgɔn kunbɛn, duun fanin bɛ jii la a kuun na. Aw ka tugu o cɛɛ nin nɔɔ fɛ. N'a donna luu min kɔnɔ, aw ye don yen,

¹¹k'a fɔ o lutigi ye ko karamɔgɔ ko a n'a ka kalandenw bɛna Hɔrɔnya nyanagwɛ dumuni kɛ boon min kɔnɔ, k'o bɛ min?

¹²A bɛna bonba dɔ yira aw la sangaso la. An mako bɛna se fɛɛn minw ma, o bɛɛ b'a kɔnɔ. Aw ka nyanagwɛ nin dumuni labɛn o yɔrɔ la.”

¹³Piyɛri ni Zan taara. Yezu tun y'a fɔ u ye cogo min na, a kɛra ten fana. U ye dumuni nin labɛn yen.

¹⁴Dumuni kɛtuma sera minkɛ, Yezu n'a ka ciden tan ni fila sigira dumuni na.

¹⁵A y'a fɔ u ye ko: “Ne tun b'a fɛ kosɛbɛ ka Hɔrɔnya nyanagwɛ nin ka dumuni kɛ n'aw ye sanni ne bɛ tɔɔrɔ,

¹⁶bari ne b'a fɔ aw ye ko ne tɛna Hɔrɔnya nyanagwɛ wɛrɛ ka dumuni kɛ tugu fɔɔ a dumukun ka dafa Ala ka mara kɔnɔ.”

¹⁷O tuma na, a ye duvɛn ta ka barika la Ala ye k'a fɔ ko: “Aw k'a minɛ k'a min,

¹⁸bari ne b'a fɔ aw ye ko ne tɛna duvɛn min tugu ni Ala ma na n'a ka masaya ye dugukolo kan.”

¹⁹O kɔ, Yezu ye buru ta ka barika la Ala ye. A y'a tilantilan k'a d'u ma k'a fɔ ko: “Nin ye ne fari ye [min bɛna kɛ saraka ye aw ka nafa kɔsɔn. Aw ye to ka nin kɛ k'aw hakili to ne la.”

²⁰Dumuni kɛnin kɔ, a ye duvɛn fana ta ka barika la Ala ye. A y'a di u ma k'a fɔ ko: “Nin ye ne joli ye, Ala bɛ jɛnnyɔgɔnyakura sigi n'o min ye. O joli nin bɛna bɔn aw ka nafa kɔsɔn.]

²¹“Mɔgɔ min bɛna ne don mɔgɔjuguw bolo, o tigi bɛ dumuni kɛra ni ne ye.

²²Tinyɛ lo, Mɔgɔ Dencɛ bɛna sa i n'a fɔ Ala y'a latigɛ cogo min na, nga min bɛn'a don u bolo, bɔnɛ bɛna o tigi sɔrɔ.”

²³Kalandenw y'a daminɛ ka nyɔgɔn nyininga k'o bɛna kɛ jon ye u cɛla.

²⁴Kalandenw y'a daminɛ ka nyɔgɔn sɔsɔ kosɛbɛ, bari u tun b'a fɛ k'a lɔn ni mɔgɔ min ye nyamɔgɔ ye u cɛma.

²⁵Yezu y'a fɔ u ye ko: “Dinyɛ ka masacɛw bɛ kuntigiya koow kɛ tɔw la, ani fanga bɛ minw bolo, olu b'a fɛ u k'u tɔgɔnyuman fɔ.

²⁶Nga aw ta man kan ka kɛ ten. Mɔgɔ min ye nyamɔgɔ ye aw cɛma, o tigi ka kan ka kɛ aw bɛɛ makonyala ye i n'a fɔ aw ka dɔgɔnin. Fanga bɛ min bolo aw cɛma, o tigi ka kan ka kɛ aw bɛɛ ka jɔɔn ye.

²⁷Mɔgɔ min bɛ dumuni labɛnna an'a bɛ di min ma wo, jon le ye mɔgɔba ye u fila cɛla? Dumuni bɛ di min ma, o tɛ wa? Ayiwa, ne bɛ aw cɛma i n'a fɔ jɔɔn.

²⁸“Aw kɔni munyuna ka to ne fɛ n ka sɛgɛnw waati la.

²⁹O le y'a to, ne Faa ye masaya di ne ma cogo min na, ne fana b'a di aw ma o cogo la,

³⁰janko aw ka dumuni kɛ ka minni kɛ ne ka masaso kɔnɔ ani aw ka kɛ masaw ye ka sigi Isirayɛli jama kunna.”

³¹Yezu y'a fɔ ko: “Simɔn, Simɔn, Sutana ye sira nyini waasa k'i yuguyugu i n'a fɔ mɔgɔ bɛ mugu tɛntɛn cogo min na,

³²nga, ne ye Ala dali i ye waasa i kana tigɛ ne la. N'i segira ka kɛ ne ta ye tuma min na, i k'i tɔnyɔgɔnw dɛmɛ.”

³³Piyɛri y'a fɔ a ye ko: “Matigi, hali ni ne ka kan ka fara i kan u k'an don kaso la, walima u k'an faga, ne bɛ sɔn.”

³⁴Nga Yezu y'a fɔ a ye ko: “Piyɛri, ne b'a fɔ i ye ko dondo tɛna kasi bii n'i m'a fɔ ko i tɛ ne lɔn fɔɔ sinyɛ saba.”

³⁵O kɔ, Yezu y'a fɔ a ka kalandenw ye ko: “Ne y'aw ci tuma min na k'a fɔ aw ye ko aw kana taa ni wari ni dugutaaminan ani sanbara ye, fɛɛn dɔ ye aw dɛsɛ wa?” U y'a jaabi ko foyi m'u dɛsɛ.

³⁶A y'a fɔ u ye tugu ko: “Nga sisan, ni wari bɛ min fɛ, o k'a ta. O cogo la fana, ni dugutaaminan bɛ min fɛ, o k'a ta. Ni murujan tɛ min fɛ, o k'a ka nɛnɛ duloki feere ka dɔ san.

³⁷Ne b'a fɔ aw ye, Ala ka kuma ye min fɔ ne koo la ko: ‘U y'a jati kojugukɛlaw dɔ ye,’ wajibi lo o ka kɛ. Ayiwa, o kɛ tuma surunyana.”

³⁸Kalandenw y'a fɔ a ye ko: “Matigi, murujan fila filɛ.” A y'u jaabi ko o ka nyi ten.

³⁹Yezu bɔra ka taa Olivuyirikulu kan i n'a fɔ a tun bɛ deli ka taa cogo min na. A ka kalandenw tugura a kɔ.

⁴⁰A sera o yɔrɔ la tuma min na, a y'a fɔ u ye ko: “Aw ka Ala dali waasa Sutana kana aw nigɛ ka don koo la.”

⁴¹O kɔ, a bɔra u kɔrɔ dɔɔni ka se bɛrɛ fili koo kelen janya ma. A y'a kunbiri gwan k'a daminɛ ka Ala dali ko:

⁴²“Ne Faa, n'i b'a fɛ, i ka ne kisi tɔɔrɔ nin ma, nga ne sago kana kɛ fɔɔ e sago.” [

⁴³O tuma na, mɛlɛkɛ dɔ bɔra sankolo la k'a yɛrɛ yira a la, ka barika don a la.

⁴⁴Yezu nii tɔɔrɔnin tun bɛ. A ye dɔ fara Ala dalili kan. A wasiji nyaa kɛra i n'a fɔ joli n'o bɛ tɔnitɔni duguma.]

⁴⁵A ye Ala dali ka ban tuma min na, a wilila ka taa kalandenw sɛgɛrɛ. A taara u sɔrɔ sinɔgɔ la nyanafinkojugu bolo.

⁴⁶A y'a fɔ u ye ko: “Mun na aw bɛ sinɔgɔ? Aw ye wili ka Ala dali janko Sutana kana aw nigɛ k'aw don koo la.”

⁴⁷Ka Yezu to kuma na, Zuda min tun kɛra kalanden tan ni fila nunu dɔ ye, ale bilara jama nya ka na, a gwɛrɛla Yezu la ko a b'a fo.

⁴⁸Nga Yezu y'a fɔ a ye ko: “Zuda, i bɛ Mɔgɔ Dencɛ don mɔgɔjuguw bolo ni foli le ye wa?”

⁴⁹Mɔgɔ minw tun bɛ ni Yezu ye, koo min bɛna kɛ, olu y'o faamu minkɛ, u ye Yezu nyininga ko: “Matigi, an ka murujanw ta u kama wa?”

⁵⁰U dɔ ye sarakalasebagaw kuntigiba ka jɔncɛ kinibolo tulo caron.

⁵¹Nga Yezu y'u jaabi ko: “Aw k'a dan nin ma.” A magara o jɔncɛ tulo la k'a kɛnɛya.

⁵²O kɔ, sarakalasebagaw ni Alabatosoba kɔlɔsibagaw kuntigiw ani cɛkɔrɔba minw tun taara k'u b'a minɛ, a y'a fɔ olu ye ko: “Mun na aw nana ne kama ni murujanw ani berew ye i n'a fɔ ko ne kɛra benkannikɛla ye?

⁵³K'a sɔrɔ ne tun bɛ n'aw ye tile o tile Alabatosoba kɔnɔ, aw ma ne minɛ, nga nin ye aw ka waati ye ani Sutana, ale min bɛ baara kɛ dibi la.”

⁵⁴U ye Yezu minɛ ka taa n'a ye sarakalasebagaw kuntigi ka luu kɔnɔ. Piyɛri tugura u nɔɔ fɛ ka furancɛba to u ni nyɔgɔn cɛ.

⁵⁵Mɔgɔw tun ye tasuma mana luu cɛmancɛ la ka sigi a daa la. Piyɛri taara sigi olu cɛma.

⁵⁶Ka Piyɛri siginin to tasuma daa la, jɔnmuso dɔ y'a ye, a y'a nyaa basa a la k'a fɔ ko: “Cɛɛ nin fana tun bɛ ni Yezu ye.”

⁵⁷Piyɛri y'o muso sɔsɔ k'a fɔ ko: “Ne t'a lɔn.”

⁵⁸Waati dɔɔni o kɔ, cɛɛ dɔ fana y'a ye k'a fɔ a ye ko: “Ele fana ye u dɔ ye.” Nga Piyɛri ye o cɛɛ jaabi ko: “Ne tɛ u dɔ ye.”

⁵⁹Lɛrɛ kelen nyɔgɔn tɛmɛnin kɔ, cɛɛ dɔ wɛrɛ segira k'a fɔ ko: “Siga t'a la, cɛɛ nin tun bɛ n'a ye bari Galileka lo.”

⁶⁰Nga Piyɛri y'a jaabi ko: “E bɛ min fɔra, ne t'o faamu.” K'a to o kuma na, o yɔrɔnin bɛ dondo kasira.

⁶¹Matigi y'a nyaa yɛlɛma ka Piyɛri filɛ. Piyɛri hakili jigira Matigi ka kuma na, a tun ye min fɔ a ye ko: “Sanni dondo bɛ kasi bii, i bɛn'a fɔ fɔɔ sinyɛ saba ko i tɛ ne lɔn.”

⁶²Piyɛri bɔra kɛnɛma ka kasi kosɛbɛ.

⁶³Yezu kɔlɔsibagaw tun bɛ yɛlɛ a ma n'u b'a bugɔ.

⁶⁴U tun y'a nyaa siri ka sɔrɔ ka to k'a bugɔ, ani ka tugu k'a nyininga ko: “Jon le y'i bugɔ?”

⁶⁵U ye kumajugujugu wɛrɛw fɔ a ma.

⁶⁶Dugu gwɛra tuma min na, dugu cɛkɔrɔbaw, ni sariya karamɔgɔw ani sarakalasebagaw y'u lajɛn. U taara ni Yezu ye u ka kiti tigɛyɔrɔ la waasa k'a kiti.

⁶⁷U y'a fɔ a ye ko: “N'i ye Ala ka Mɔgɔwolomanin nin ye, a fɔ an ye.” Yezu y'u jaabi ko: “Ni ne y'a fɔ aw ye, aw tɛna la a la.

⁶⁸Ni ne y'aw nyininga fana, aw tɛna ne jaabi.

⁶⁹Nga, kabini sisan, Mɔgɔ Dencɛ bɛna sigi Setigi Ala kinibolo fɛ.”

⁷⁰U bɛɛ y'a fɔ ko: “O tuma na, e ye Ala Dencɛ ye wa?” A y'a fɔ u ye ko: “Aw yɛrɛ y'a fɔ ka ban do, ne lo.”

⁷¹U y'a fɔ nyɔgɔn ye ko: “An mako tɛ mɔgɔ ka fɔta la tugu ka sɔrɔ k'a jalaki, bari an yɛrɛw y'a dalakuma mɛn.”