Read LAYIDUKURA LUKA 24 Bible Online

LUKA 24 - LAYIDUKURA bible

LUKA 24

¹Lɔgɔkun loon fɔlɔ sɔgɔma joona, muso nunu tun ye wusulan min labɛn, u wilila ka taa n'o ye kaburu la.

²Kabakurubelebeleba min tun kɛra ka kaburu datugu, u taar'a sɔrɔ kabakuru nin tɛ kaburu daa la.

³U donna kaburu kɔnɔ, u ma Matigi Yezu suu ye.

⁴K'u hakili nyagaminin to o koo la, u barila ka cɛɛ fila dɔ ye. U ka faniw tun bɛ manamana haali.

⁵Muso nunu siranna k'u nyaa biri duguma minkɛ, cɛɛ nunu y'a fɔ u ye ko: “Mɔgɔ min bɛ nii na, aw do b'o tigi yaala suuw cɛma mun na?

⁶A tɛ yan, a kununna ka ban. A tun ye kuma min fɔ aw ye k'a to Galile mara la, aw ka aw hakili jigi o la kɛ.

⁷A tun y'a fɔ ko wajibi lo Mɔgɔ Dencɛ ka don mɔgɔjuguw bolo, u k'a gwengwen lɔgɔ kan, ko tile saba a faganin kɔ, ko a bɛna kunun.”

⁸O tuma na, muso nunu hakili jigira Yezu ka kuma na.

⁹U bɔra kaburu la ka taa o koow bɛɛ lakali kalanden tan ni kelen nunu ye, ani k'a lakali tɔw bɛɛ ye fana.

¹⁰O koo nunu lakalibagaw tun ye Zaki bamuso Mariyamu ye, ni Zaani, ani Mariyamu ka bɔ Magidala. Muso wɛrɛ minw tun bɛ n'u ye, olu fana ye koo nunu lakali kalandenw ye ten.

¹¹Kalandenw ma la muso nunu ka kuma na, u tun b'o jati nalomanya kuma ye.

¹²O n'a ta bɛɛ, Piyɛri wilila ka boli ka taa kaburu la. A sera, a ye filɛli kɛ kaburu kɔnɔ, a ye bagi gwɛman dɔrɔn lanin ye duguma. Koo minw tun kɛra, olu y'a kabakoya, a segira ka taa soo.

¹³O loon na yɛrɛ, Yezu ka kalandenw mɔgɔ fila tun bɛ taara dugu dɔ la min tɔgɔ ko Emayusi. O dugu ni Zeruzalɛmu cɛ tun ye kilo tan ni kelen nyɔgɔn ye.

¹⁴Koo minw bɛɛ tun kɛra, u tun bɛ olu baro la nyɔgɔn fɛ.

¹⁵K'u to baro ni sɔsɔli la, Yezu yɛrɛ nana fara u kan ka taama n'u ye,

¹⁶nga a kɛra i n'a fɔ u nyaa tun sirinin bɛ, u ma se ka Yezu lɔn.

¹⁷Yezu y'u nyininga ko: “Aw bɛ mun baro la nyɔgɔn fɛ?” O tuma na, u lɔra. U nyaa sisinin tun bɛ.

¹⁸Mɔgɔ kelen tɔgɔ ko Kilewopasi, ale y'a jaabi ko: “Koo minw kɛra tile fila nin na, mɔgɔ si tɛ Zeruzalɛmu min tɛ o koow kala ma fɔɔ e dɔrɔn kɛ?”

¹⁹Yezu y'u nyininga ko: “O ye mun koow ye?” U y'a jaabi ko: “Yezu Nazarɛtika ka koo kɛ! A tun kɛra kira ye, a ye kabakow kɛ, ani ka setigiya kumaw fɔ Ala ni mɔgɔw bɛɛ nyakɔrɔ.

²⁰Nga an ka sarakalasebagaw n'an ka dugu nyamɔgɔw y'a don mɔgɔjuguw bolo waasa u k'a faga. Olu y'a gwengwen lɔgɔ kan.

²¹An kɔni jigi tun b'a kan ko mɔgɔ min ka kan ka Isirayɛli deenw kunmabɔ, ko ale tun lo. Nga, koo nunu kɛra, a tile saba ye bii ye.

²²An kalandenw cɛma, musow bɛ yen. Olu dɔw tun taara sɔgɔma joona kaburu la, ka segi ka na an kabakoya

²³ko u m'a suu ye. U y'a fɔ an ye ko mɛlɛkɛ dɔw y'u yɛrɛw yira u la k'a fɔ u ye ko a bɛ nii na.

²⁴An tɔnyɔgɔn dɔw taara kaburu la k'a lajɛ fana. Musow tun y'a fɔ cogo min na, u taar'a sɔrɔ o cogo la, nga u ma a yɛrɛ ye.”

²⁵O tuma na, Yezu y'a fɔ u ye ko: “Aw ye hakilitanw ye dɛ! Aw tɛ la kiraw ka kuma fɔnin na joona fana.

²⁶Wajibi tun lo Ala ka Mɔgɔwolomanin nin tun ka tɔɔrɔ ten ka sɔrɔ ka bonya sɔrɔ Ala fɛ.”

²⁷O kɔ, Ala ka kuma ye min fɔ a koo la, a ye olu bɛɛ fɔ k'a gwɛya u ye, k'a ta Musa ye kuma min sɛbɛn ma, fɔɔ ka n'a bila kiraw bɛɛ ka sɛbɛnninw ma.

²⁸U tun bɛ taara dugu min na, u surunyana o la tuma min na, Yezu y'a kɛ i n'a fɔ a b'a fɛ ka taa k'u to yen.

²⁹Nga u y'a dali ko a ka to u fɛ yen, bari ko tile bɛ nyini ka ban. O la, a tora u fɛ u ka jatigiso kɔnɔ.

³⁰Dumunikɛtuma, Yezu sigira n'u ye dumuni na, a ye buru ta ka barika la Ala ye, k'a tilantilan k'a d'u ma.

³¹O tuma na, u nyaa yɛlɛla, u y'a lɔn, nga a tununa ka bɔ u nyakɔrɔ.

³²U y'a fɔ nyɔgɔn ye ko: “A tun bɛ kumana an fɛ sira kan tuma min na ka to ka Ala ka kuma nyafɔ an ye ka gwɛ, an dusukun ma diya wa?”

³³O yɔrɔnin bɛ, u wilila ka segi ka taa Zeruzalɛmu. U taara ciden tan ni kelen ni kalanden tɔw lajɛnnin sɔrɔ yen.

³⁴Olu y'a fɔ mɔgɔ fila nunu ye ko Matigi kununna tinyɛ na, u ko a y'a yɛrɛ yira Simɔn na.

³⁵O tuma na, olu fila ye Yezu ye sira kan cogo min na, ani k'a lɔn cogo min na dumunikɛtuma na, u y'o lakali kalanden tɔw ye.

³⁶Ka kalanden fila nunu to o kuma na dɔrɔn, u barila ka Yezu ye u cɛma. A y'a fɔ u ye ko: “Ala ka hɛrɛ kɛ aw ye.”

³⁷U siranna kosɛbɛ bari u tun bɛ miiri ko suja dɔ lo.

³⁸Nga Yezu y'a fɔ u ye ko: “Mun na aw bɛ siran? Mun y'a to aw bɛ sigasiga ten?

³⁹Aw ka ne tigɛ ni ne seenw filɛ, ne yɛrɛ lo tigitigi. Aw ye maga ne la k'a filɛ, aw bɛn'a ye ko farisogo ni kolo bɛ ne la k'a sɔrɔ olu tɛ suja la.”

⁴⁰O fɔnin kɔ, a y'a tigɛ n'a seenw yira u la.

⁴¹U nisɔn diyara kosɛbɛ, ka kabakoya, o le y'a to u ma la a la ko Yezu lo. O la, Yezu y'u nyininga ko: “N bɛ dumunifɛn dɔ sɔrɔ aw fɛ yan wa?”

⁴²U ye jigɛwusunin kunkurun dɔ d'a ma.

⁴³A y'a minɛ k'a nyimi u nyana.

⁴⁴O kɔ, a y'a fɔ u ye ko: “Tuma min na ne tun ma sa ban, koo minw fɔra Ala ka kuma na, Musa y'o min sɛbɛn ni kiraw ye minw sɛbɛn, ani Ala tandoli dɔnkili kɔnɔnakumaw ne koo la, ne tun y'a fɔ aw ye ko wajibi lo o bɛɛ ka kɛ.”

⁴⁵O tuma na, a ye hakili d'u ma waasa u ka se ka Ala ka kuma faamu.

⁴⁶A y'a fɔ u ye ko: “A fɔra Ala ka kuma na ko mɔgɔw bɛna Ala ka Mɔgɔwolomanin tɔɔrɔ, k'a faga, a bɛna kunun a tile sabanan loon.

⁴⁷A ka kibaru ka kan ka fɔ siyaw bɛɛ ye waasa u ka nimisa ka faran u ka kojuguw la, Ala ka yafa u ma. O ka kan ka daminɛ Zeruzalɛmu.

⁴⁸Aw ka kan ka kɛ o koow lakalibagaw ye, bari aw y'a bɛɛ ye.

⁴⁹Ne Faa y'a daa di ko a bɛna fɛɛn min d'aw ma, ne yɛrɛ bɛna o ci aw ma. Aw kɔni ka to dugu nin kɔnɔ fɔɔ aw ka sebagaya sɔrɔ ka bɔ Ala fɛ.”

⁵⁰O kɔ, Yezu taara ni kalandenw ye fɔɔ Betani faan fɛ. A y'a bolow kɔrɔ ta ka duba kɛ u ye.

⁵¹K'a to duba kɛli la u ye, a bɔra u kɔrɔ, ka yɛlɛ sankolo la.

⁵²Kalandenw birila k'a bato. O kɔ, u segira Zeruzalɛmu ni nisɔndiyaba ye.

⁵³O yɔrɔ la, u tun bɛ to ka taa Alabatosoba kɔnɔ tuma bɛɛ ka Ala tando.