Read LAYIDUKURA LUKA 5 Bible Online

LUKA 5 - LAYIDUKURA bible

LUKA 5

¹Loon dɔ la, ka Yezu to Zenezarɛti baa daa la, jama tun y'a lamini n'u bɛ nyɔgɔn nyɔntinyɔntira waasa ka Ala ka kuma lamɛn.

²A ye kurun fila ye bada la. Mɔnikɛlaw tun bɔra u kɔnɔ, u tun bɛ u ka jɔɔw kora.

³Yezu donna o kurun nunu kelen kɔnɔ min tun ye Simɔn ta ye. A y'a nyini Simɔn fɛ ko a ka taa ni kurun ye jii cɛmancɛ la dɔɔni. O kɔ, k'a siginin to kurun kɔnɔ, a y'a daminɛ tugu ka mɔgɔw kalan.

⁴A tilara kuma na tuma min na, a y'a fɔ Simɔn ye ko: “Jii ka dun yɔrɔ min na, taa ni kurun ye o yɔrɔ la. Aw k'aw ka jɔɔ fili yen.”

⁵Simɔn y'a jaabi ko: “Karamɔgɔ, an ye baara kɛ ka dugu gwɛ, an ma foyi sɔrɔ. Nga i ka kuma kɔsɔn, ne bɛna jɔɔ fili jii la.”

⁶O la, u ye jɔɔ fili. U ka jɔɔ ye jigɛ caaman minɛ fɔɔ jɔɔw daminɛna ka faranfaran.

⁷U y'u bolo kɛ ka u tɔnyɔgɔnw wele kurun dɔ nin kɔnɔ ko u ka na u dɛmɛ. Olu taara, u ye kurun fila nunu bɛɛ fa jigɛ la fɔɔ kurunw tun bɛ nyini ka jigi jii jukɔrɔ.

⁸Simɔn Piyɛri y'o ye minkɛ, a y'a kunbiri gwan Yezu kɔrɔ k'a fɔ ko: “Matigi, i kana gwɛrɛ n na, bari ne ye kojugukɛla ye.”

⁹A y'o fɔ bari a tun siranna. Ale ni minw tun bɛ nyɔgɔn fɛ kurun kɔnɔ, u bɛɛ tun siranna bari u ye jigɛ caaman sɔrɔ.

¹⁰Zebede ka dencɛw, Zaki ni Zan tun ye Simɔn baarakɛnyɔgɔnw ye, olu fana tun siranna. Nga Yezu y'a fɔ Simɔn ye ko: “I kana siran. Kabini sisan, i tɛna kɛ mɔnikɛla ye tugu, nga i bɛna kɛ waajulikɛla ye, ka mɔgɔw sɔrɔ Ala ye.”

¹¹O tuma na, u segira ka na u ka kurunw bila bada la, k'u ka fɛɛnw bɛɛ to yen ka tugu Yezu kɔ.

¹²Loon dɔ, ka Yezu to dugu dɔ la, cɛɛ dɔ fana tun bɛ yen, kunatɔbana diginin tun b'o la. A ye Yezu ye tuma min na, a taara biri a kɔrɔ k'a dali ko: “Matigi, n'i sɔnna, i bɛ se ka ne kɛnɛya.”

¹³Yezu magara a la, k'a fɔ ko: “N sɔnna ko i ka kɛnɛya.” O yɔrɔnin bɛ, cɛɛ kɛnɛyara.

¹⁴O kɔ, Yezu y'a gwɛlɛya a ma kosɛbɛ ko: “I kan'a fɔ mɔgɔ si ye ko ne le y'i kɛnɛya dɛ. Nga taa i yɛrɛ yira sarakalasebaga la. Musa ye saraka min koo fɔ saniyali faan fɛ, i k'o bɔ k'a yira mɔgɔw la ko i kɛnɛyara.”

¹⁵O bɛɛ n'a ta, Yezu tɔgɔ bɔra ka taa nya fɔɔ mɔgɔ caaman tun bɛ to ka taa u lajɛn a kɔrɔ waasa k'a ka kuma lamɛn, walima a k'u kɛnɛya.

¹⁶Yezu tun bɛ to ka taa kongo kɔnɔ a kelen ka Ala dali yen.

¹⁷Loon dɔ, ka Yezu to mɔgɔw kalan na, Farizinyɛw ni sariya karamɔgɔ dɔw siginin tun bɛ yen. U tun nana ka bɔ Galile ni Zude mara dugudenninw bɛɛ la, ani Zeruzalɛmu. Matigi Ala ka sebagaya tun bɛ Yezu fɛ n'a bɛ banabagatɔw kɛnɛya.

¹⁸Cɛɛ dɔw taara ni muruku dɔ ye o yɔrɔ la. A lanin tun bɛ dilan kan. U tun bɛ cogo nyinina ka don n'o cɛɛ ye soo kɔnɔ k'a la Yezu nyakɔrɔ.

¹⁹U m'a cogo sɔrɔ ka don n'a ye jama kɔsɔn. O la, u yɛlɛla soo kunna k'o yɔrɔ dɔ walaka. Ka muruku nin to a ka dilan na, u y'a jigi o woo fɛ jama cɛma ni juru ye Yezu nyakɔrɔ.

²⁰Yezu y'a ye k'o mɔgɔw lara ale la minkɛ, a y'a fɔ muruku nin ye ko: “Cɛɛ, i ka kojuguw yafara i ma.”

²¹Sariya karamɔgɔw ni Farizinyɛw y'a daminɛ ka miiri u kɔnɔ ko: “Nin ye jon ye n'a bɛ Ala tɔgɔ cɛn ten? Jon le bɛ se ka mɔgɔ ka kojuguw yafa a ma ni Ala kelen tɛ?”

²²Nga Yezu y'u ka miiriya lɔn k'a fɔ u ye ko: “Mun y'a to aw b'a la ka miiri aw kɔnɔ ten?

²³K'a fɔ muruku ye ko: ‘I ka kojuguw yafara i ma,’ walima k'a fɔ a ye ko: ‘Wili ka taama,’ o kuma fila la, jumɛn fɔko ka nɔgɔ?

²⁴Nga ne b'a fɛ aw k'a lɔn ko see bɛ Mɔgɔ Dencɛ ye ka mɔgɔ ka kojuguw yafa a ma k'a to dugukolo kan. O la, cɛɛ, n b'a fɔ i ye, wili k'i ka dilan ta ka taa soo.”

²⁵O yɔrɔnin bɛ, cɛɛ nin wilila mɔgɔw nyana k'a ka dilan ta ka taa soo. A tun bɛ Ala tando n'a bɛ taa.

²⁶U bɛɛ kabakoyara. U ye Ala tando. U siranninba y'a fɔ ko: “An ye kabako ye bii dɛ!”

²⁷O kɔ, Yezu bɔra yen, a ye wusuruminɛla dɔ ye min tɔgɔ ko Levi, a siginin tun bɛ wusuruminɛlaw ka baarakɛyɔrɔ la. Yezu y'a fɔ a ye ko: “Tugu ne kɔ.”

²⁸Levi y'a ka baara to yen ka wili ka tugu a kɔ.

²⁹O kɔ, Levi ye dumuniba labɛn a ka soo Yezu ye. Wusuruminɛlaw ni mɔgɔ wɛrɛw tun bɛ yen caaman. U tun bɛ dumuni kɛra ni Yezu n'a kɔmɔgɔw ye.

³⁰Farizinyɛw n'u ka sariya karamɔgɔw tun bɛ ;nunu;nununa. U ye Yezu ka kalandenw nyininga ko: “Mun na aw bɛ dumuni kɛ ka minni kɛ ni wusuruminɛlaw ani kojugukɛlaw ye?”

³¹Yezu ye kuma ta k'u jaabi ko: “Mɔgɔ minw ka kɛnɛ, olu mako tɛ furakɛla la, banabagatɔw le mako b'a la.

³²Ne ma na mɔgɔtilenninw wele, nga ne nana kojugukɛlaw le wele waasa u ka nimisa ka faran u ka kojuguw la.”

³³Mɔgɔ dɔw y'a fɔ Yezu ye ko: “Zan ka kalandenw ni Farizinyɛw ka kalandenw bɛ suun don tuma caaman ka Ala dali, k'a sɔrɔ e taw bɛ dumuni kɛ ka minni kɛ.”

³⁴Yezu y'u jaabi ko: “Aw tɛ se ka kɔnyɔcɛ teriw wajibiya ka suun don k'u ni kɔnyɔcɛ to nyɔgɔn fɛ. Tinyɛ tɛ wa?

³⁵Nga waati dɔ bɛna se, kɔnyɔcɛ bɛna bɔsi u la, u bɛna suun don o tuma na.”

³⁶Yezu ye talen nin la u ye fana ko: “Mɔgɔ si tɛ fanikura faran ka fani kɔrɔman bari n'a ye. N'o kɛra, fanikura cɛnna, kunkurunnin nin fana tɛna bɛn ni fani kɔrɔman ye.

³⁷Mɔgɔ si tɛ duvɛnkɛnɛ kɛ foroko kɔrɔman kɔnɔ. N'o kɛra, duvɛnkɛnɛ bɛna foroko faran, foroko bɛna cɛn, duvɛn bɛna bɔn.

³⁸Nga duvɛnkɛnɛ ka kan ka kɛ forokokuraw le kɔnɔ.

³⁹Ni mɔgɔ min delila duvɛnkɔrɔ min na, o tigi tɛ duvɛnkɛnɛ fɛ, bari a b'a fɔ ko duvɛnkɔrɔ le ka di.”