Read LAYIDUKURA LUKA 7 Bible Online

LUKA 7 - LAYIDUKURA bible

LUKA 7

¹Yezu kumana jama fɛ ka ban minkɛ, a taara Kafaranamu.

²O yɔrɔ la, sɔlidasi kuntigi dɔ tun bɛ yen min ka jɔncɛ tun man kɛnɛ, fɔɔ a tun bɛ nyini ka sa. O jɔɔn koo tun ka di a kuntigi ye kosɛbɛ.

³O cɛɛ ye Yezu koo mɛn minkɛ, a ye dugu cɛkɔrɔba damani ci a fɛ k'a dali ko a ka na ale ka jɔɔn kɛnɛya.

⁴Olu sera Yezu fɛ, u y'a dali k'a dali kosɛbɛ ko: “Cɛɛ nin ka kan n'i ka dɛmɛli ye,

⁵bari an ka siya koo ka di a ye. Ale le lɔra n'an ka Alabatoso lɔli musakaw ye.”

⁶O la, Yezu taara n'u ye. U surunyana sɔlidasi kuntigi nin ka soo la tuma min na, o cɛɛ y'a teriw dɔw ci k'u ka ta'a fɔ Yezu ye ko: “Matigi, i kana i yɛrɛ sɛgɛn, bari ne ka dɔgɔ i ka na fɔɔ ne ka soo.

⁷Ne y'a ye ko n ka dɔgɔ minkɛ, o le y'a to ne yɛrɛ ma taa i fɛ yen. Nga kuma kelen dama fɔ ne ka jɔɔn bɛna kɛnɛya,

⁸bari kuntigi dɔw bɛ ne fɛ, ne fana bɛ sɔlidasi dɔw kuun na. N bɛ se k'a fɔ kelen ye ko: ‘Taa yan fɛ.’ A bɛ taa. K'a fɔ dɔ wɛrɛ ye: ‘Na yan.’ A bɛ na. K'a fɔ n ka jɔɔn ye ko: ‘Nin kɛ ten.’ A b'o kɛ.”

⁹Yezu y'o kuma mɛn minkɛ, a kabakoyara. A y'a nyaa yɛlɛma k'a fɔ a nɔfɛmɔgɔw ye ko: “Ne b'a fɔ aw ye ko hali Isirayɛli mɔgɔw fɛ, ne ma mɔgɔ sɔrɔ min lara ne la ten fɔlɔ.”

¹⁰Sɔlidasi kuntigi nin ka ciraden nunu kɔsegira ka taa a sɔrɔ jɔɔn nin kɛnɛyara.

¹¹O kɔ, Yezu taara dugu dɔ la min tɔgɔ ko Nayin. A ka kalandenw ni jamaba tun taara n'a ye yen.

¹²U surunyana dugu donda la, u ye mɔgɔ dɔw kunbɛn n'u bɛ taara ni suu ye kaburutu la. Firiyamuso dɔ ka dencɛ kelenpe tun lo. Jamaba tun bɛ yen.

¹³Matigi ye muso nin ye minkɛ, a hinɛ donna a la kosɛbɛ. A y'a fɔ a ye ko a kana kasi tugu.

¹⁴O kɔ, a gwɛrɛla ka maga sukɛsu la. Suu tabagaw lɔra. Yezu y'a fɔ kanbelen suu ma ko a ka wili.

¹⁵Suu nin kununna, a wilila ka sigi k'a daminɛ ka kuma. Yezu y'a fɔ muso ye ko a k'a deen minɛ ka taa.

¹⁶Mɔgɔ bɛɛ kabakoyara, a tun bɛ Ala tando k'a fɔ ko: “Kiraba wilila an cɛma, Ala sɔnna k'a ka jama nyaa filɛ.”

¹⁷O kuma jɛnsɛnna Zude faan bɛɛ la, ani a lamini maraw bɛɛ la.

¹⁸Zan ka kalandenw ye Yezu ka koo kɛnin bɛɛ lakali a ye. O la, a y'a ka kalandenw mɔgɔ fila wele

¹⁹k'u ci Matigi Yezu fɛ ko u ka ta'a nyininga ko: “Ala ka Mɔgɔwolomanin min ka kan ka na, ele lo wa? Walima an ka kan ka mɔgɔ dɔ wɛrɛ kɔnɔ?”

²⁰Olu sera Yezu fɛ k'a fɔ a ye ko: “Zan batizelikɛla y'an ci ko an ka na i nyininga ko Ala ka Mɔgɔwolomanin min ka kan ka na, ko ele lo wa? Walima an ka kan ka mɔgɔ dɔ wɛrɛ kɔnɔ?”

²¹O waati yɛrɛ la, Yezu ye banabagatɔ caaman kɛnɛya ka jinaw gwɛn ka bɔ mɔgɔw la, ka finyɛntɔ caaman nyaa yɛlɛ.

²²O kɔ, a ye ciradenw jaabi ko: “Aw ye min ye, ani aw ye min mɛn, aw ye taa o lakali Zan ye. Aw k'a fɔ a ye ko finyɛntɔw bɛ yeli kɛra, senkelenninw bɛ taama ka nya, kunatɔw bɛ kɛnɛyara, tulogwerenw bɛ mɛnni kɛra, suuw bɛ kununna, kibaru diman bɛ fɔra faantanw ye.

²³Ni mɔgɔ min ma tigɛ ne la, o tigi ye dubaden ye.”

²⁴Zan ka ciradenw taanin kɔ, Yezu y'a daminɛ ka kuma mɔgɔw fɛ Zan koo la. A y'u nyininga ko: “Aw tun taara mun le filɛ kongo kɔnɔ? Fɔnyɔ bɛ waga min lamaga wa?

²⁵Aw do taara mun le filɛ sa? Dakamana fani tigi wa? N'o lo, minw bɛ dakamana faniw don ka faama dumuni kɛ, olu bɛ sɔrɔ masaluw le kɔnɔ.

²⁶O tuma na, aw do taara mun le filɛ? Kira wa? Tinyɛ na, ne b'a fɔ aw ye ko a ka bon ni kira yɛrɛ ye!

²⁷A fɔra Ala ka kuma na ko: ‘Ayiwa, ne Ala bɛ n ka ciden ci i nya, waasa a k'i ka sira labɛn.’ ” Yezu ko: “O ciden nin ye Zan ye.

²⁸Ne b'a fɔ aw ye ko mɔgɔ si ma wolo dinyɛ na min kɛra mɔgɔba ye ka tɛmɛ Zan kan. Nga Ala ka mara kɔnɔ, mɔgɔ min lɔyɔrɔ ka dɔgɔ n'u bɛɛ ye, o tigi ka fisa ni Zan ye.

²⁹“Mɔgɔ minw ye Zan lamɛn, hali wusuruminɛlaw, u bɛɛ y'a lɔn ko Ala ka koo bɛɛ tilennin lo. O le y'a to u sɔnna Zan y'u batize.

³⁰Nga Farizinyɛw ni sariya karamɔgɔw ma sɔn Ala ka koo latigɛtaw ma. O la, u ma sɔn Zan k'u batize.”

³¹Yezu y'a fɔ tugu ko: “Ne bɛna bii mɔgɔw kɛnyɛ ni mun ye? U bɔnin bɛ mun fɛ?

³²U bɔnin bɛ denmisɛnw fɛ minw siginin bɛ kɛnɛba la ka to k'u kaan sara nyɔgɔn ma ko: ‘Anw ye fɔli kɛ aw ye, aw ma dɔɔn kɛ. Anw ye sanga dɔnkili la aw ye, aw ma kasi fana.’

³³Bari, Zan batizelikɛla nana, a tun tɛ dumuni kɛ, a tun tɛ duvɛn min. Aw ko a kuun tɛ yen.[1]

³⁴Mɔgɔ Dencɛ nana, a bɛ dumuni kɛ ka minni kɛ, aw ko: ‘Cɛɛ nin tɛ miiri foyi la ni dumuni ni minni tɛ. Wusuruminɛlaw ni kojugukɛla wɛrɛw ka teri lo.’

³⁵Nga mɔgɔ minw sɔnna Ala sago ma, olu ye joo di Ala ma a ka hakilitigiya baara kɔsɔn.”

³⁶Farizinyɛ dɔ ye Yezu wele dumuni na. Yezu taara o ka soo ka sigi dumuni na.

³⁷O dugu nin na, muso kojugukɛla dɔ tun bɛ yen. A y'a mɛn ko Yezu bɛ dumuni na farizinyɛ nin ka soo minkɛ, a taara ni daga cɛnyumannin dɔ ye. O daga nin tun dilannin bɛ ni kabakuru dɔ ye min bɛ wele alabatiri. A fanin tun bɛ tulu kasadiman na.

³⁸A sera minkɛ, a birila Yezu seen kunna ka kasi daminɛ. A kasira fɔɔ a nyaji ye Yezu seen nyigi. O kɔ, a y'a kunsigi kɛ k'o jɔsi n'a b'o saalon. Ka tilan ka tulu kasadiman bɔn u kan.

³⁹Farizinyɛ min tun ye Yezu wele dumuni na y'o ye minkɛ, a y'a fɔ a yɛrɛ kɔnɔ ko: “Ni cɛɛ nin tun kɛra kira sɛbɛ ye, a tun bɛn'a lɔn ko muso min bɛ magara a la, ko mɔgɔnyuman tɛ, nga ko kojugukɛla lo.”

⁴⁰O la, Yezu ye kuma ta k'a fɔ a ye ko: “Simɔn, kuma bɛ n fɛ k'a fɔ i ye.” Simɔn y'a jaabi ko: “Karamɔgɔ, a fɔ.”

⁴¹Yezu ko: “Cɛɛ dɔ ka juru tun bɛ mɔgɔ fila dɔ la. Kelen ka juru tun ye deniye wari kɛmɛ duuru, tɔ kelen ta tun ye deniye wari bi duuru.

⁴²U fila si tun tɛ sera k'u ka juru sara minkɛ do, cɛɛ y'u wele k'a fɔ u ye ko: ‘Ne yafara aw ma juru nunu koo la.’ ” O kɔ, Yezu ye Simɔn nyininga ko o cɛɛ koo bɛna diya jurumantigi fila nunu jumɛn ye ka tɛmɛ?

⁴³A y'a jaabi ko: “Ne ka miiri la, min ka juru tun ka ca.” Yezu ko: “I ye tinyɛ fɔ.”

⁴⁴O kɔ, Yezu y'a nyaa yɛlɛma k'o muso nin filɛ ka sɔrɔ k'a fɔ Simɔn ye ko: “I nyaa bɛ muso nin na kɛ, ne nana i ka soo, i ma senkoji di ne ma. Nga ale ye ne seen ko n'a nyaji ye k'a jɔsi n'a kunsigi ye.

⁴⁵I ma ne fo ka n fari saalon, nga ale, kabini ne nana i fɛ, a ma ne seen saalon dabila.

⁴⁶I ma tulu bɔn ne kuun na, nga ale ye tulu kasadiman le bɔn ne seen kan.

⁴⁷O kama, kanuyasɛbɛ min b'a dusu la, ne b'a fɔ i ye k'o kɔsɔn, a ka kojuguw bɛɛ yafara a ma. U ma mɔgɔ min ka kojuguw bɛɛ yafa, kanuyasɛbɛ tɛna kɛ o dusu la.”

⁴⁸O kɔ, Yezu y'a fɔ muso nin ye ko: “Ne y'i ka kojuguw yafa.”

⁴⁹Yezu ni minw tun bɛ dumuni na nyɔgɔn fɛ, olu y'a daminɛ k'a fɔ u kɔnɔ ko: “Nin ye jon ye fɔɔ a bɛ kojuguw yafa mɔgɔ ma?”

⁵⁰Nga Yezu y'a fɔ muso nin ye tugu ko: “I lara ne la minkɛ, i kisira, taa hɛrɛ la.”