Read LAYIDUKURA LUKA 8 Bible Online

LUKA 8 - LAYIDUKURA bible

LUKA 8

¹O kɔ, Yezu tun bɛ yaala duguba ni dugudenninw na ka waajuli kɛ ka Ala ka masaya kibaru diman koo fɔ. A ka kalanden tan ni fila tun bɛ n'a ye,

²ani muso damani fana, Yezu tun ye jina gwɛn ka bɔ o minw dɔw la, ka dɔw kɛnɛya: Mariyamu ka bɔ Magidala, Yezu tun ye jina wolonwula gwɛn ka bɔ o min na,

³ni Zaani min ye Erɔdi ka nafolokɔlɔsibaga Suza muso ye, ni Suzani, ani muso wɛrɛw, o minw tun bɛ Yezu n'a ka kalandenw dɛmɛ n'u bololafɛnw ye.

⁴Mɔgɔw tun bɛ bɔ duguw bɛɛ la ka taa Yezu sɛgɛrɛ. O la, a ye talen la jama ye ko:

⁵“Sɛnɛkɛla dɔ bɔra ka ta'a ka suman seri. K'a to serili la, kisɛ dɔw taara ben sira daa la. Tɛmɛbagaw y'u dɔn, kɔnɔw y'u kunu.

⁶Dɔw fana taara ben fara yɔrɔ la. U falenna dɔrɔn, nga u sara bari sumaya tun tɛ u kɔrɔ.

⁷Dɔw fana taara ben binjugu yɔrɔ la, u falenna, u ni biin wilila nyɔgɔn fɛ, biin y'u degun.

⁸Dɔ wɛrɛw fana taara ben dugukolonyuman na. U falenna ka wili ka kisɛ kɛ. Olu y'u nyɔgɔn kɛmɛ kɛmɛ sɔrɔ.” O kuma fɔnin kɔ, Yezu pɛrɛnna ko: “Mɔgɔ min b'a fɛ ka mɛnni kɛ, o k'a tulo malɔ ka nya.”

⁹Yezu ye talen min la, a ka kalandenw y'a nyininga o kɔrɔ la.

¹⁰A y'u jaabi ko: “Aw kɛra Ala ka masaya gundow lɔnbagaw ye. Nga a koo bɛ fɔ tɔw ye talen le la, waasa u filɛli kɛtɔ, u kana foyi ye, u mɛnni kɛtɔ, u kana foyi faamu.

¹¹“N ye talen min la, o kɔrɔ filɛ nin ye: Sumansi, o ye Ala ka kuma le ye.

¹²Mɔgɔ dɔw bɔnin bɛ sirada fɛ, kisɛ benna o yɔrɔ min na. U mana Ala ka kuma mɛn, Sutana bɛ na o kuma bɔ u kɔnɔ, janko u kana la a la ka kisi.

¹³Mɔgɔ dɔw fana bɔnin bɛ fara yɔrɔ fɔ. U mana kuma mɛn, u bɛ sɔn o ma ni nisɔndiya ye. U tɛ miiri o kuma na kosɛbɛ, u bɛ la o kuma na tumanin kelen dɔrɔn, ni gwɛlɛya nana, u bɛ ban o kuma na.

¹⁴Mɔgɔ dɔ wɛrɛw fana bɔnin bɛ binjugu yɔrɔ fɛ. Olu mana kuma mɛn, nin dinyɛ hami koow, ni nafolo koo, ni diyanakow b'o kuma nagasi fɔɔ nafa tɛ sɔrɔ a la.

¹⁵Dɔw fana bɔnin bɛ dugukolonyuman fɛ. Olu mana kuma mɛn, u b'a minɛ ni dusunyuman ye fɔɔ nafa bɛ sɔrɔ a la.”

¹⁶Yezu y'a fɔ tugu ko: “Mɔgɔ si tɛ lanpan mana k'a bila gongo jukɔrɔ walima kalaka jukɔrɔ. Nga o b'a bila fɛɛn dɔ kan, janko mɔgɔ minw bɛ don soo kɔnɔ, u ka yeli kɛ.

¹⁷“Fɛɛn o fɛɛn dogonin bɛ, o bɛɛ bɛna ye. Gundo si tɛ yen min tɛna bɔ kɛnɛ kan.

¹⁸“Aw k'aw ka mɛnni kɛcogo kɔlɔsi, bari mɔgɔ min bɛ koo mɛn k'a faamu, dɔ bɛna fara o ka lɔnniya kan, nga mɔgɔ min tɛ koo faamu, a bɛ miiri ko a bɛna min faamu, a tɛna o yɛrɛ faamu.”

¹⁹Yezu tun bɛ yɔrɔ min na, a baa n'a dɔgɔninw taara yen. Nga u tun tɛ sera ka gwɛrɛ Yezu la minkɛ jama kɔsɔn,

²⁰dɔ y'a fɔ a ye ko: “Karamɔgɔ, i baa n'i dɔgɔninw lɔnin bɛ kɛnɛma k'u mako b'i la.”

²¹Nga Yezu ye o tigi jaabi ko: “Mɔgɔ minw bɛ u tulo malɔ Ala ka kuma na k'a sira taama, olu le ye ne baa ni ne dɔgɔninw ye.”

²²Loon dɔ la, Yezu donna kurun kɔnɔ n'a ka kalandenw ye. A y'a fɔ u ye ko: “An ka taa baa kɔ.”

²³K'u to baa cɛma kurun boli la, Yezu sinɔgɔra. Fɔnyɔba dɔ wilila yen, fɔɔ kurun tun bɛ nyini ka fa jii la. U tun bɛ farati la.

²⁴O la, a ka kalandenw gwɛrɛl'a la k'a kunun k'a fɔ a ye ko: “Karamɔgɔ, karamɔgɔ, an halakitɔ filɛ.” Yezu wilila, a jamana fɔnyɔ ni jii kuun na. Fɔnyɔ lɔra, jii malara.

²⁵O kɔ, Yezu y'a fɔ a ka kalandenw ye ko: “Aw jigi bɛ min?” Kalandenw kabakoyara fɔɔ siranya donna u la n'u bɛ nyɔgɔn nyininga Yezu koo la ko: “Nin cɛɛ ye mɔgɔ sifa jumɛn ye ni fɔnyɔ ni baji yɛrɛ bɛ sɔn a ka kuma ma?”

²⁶Yezu n'a ka kalandenw sera Gadarekaw ka mara la. Baa ye o mara ni Galile mara daan bɔ nyɔgɔn na.

²⁷Yezu jigira ka bɔ kurun na dɔrɔn, cɛɛ dɔ nan'a kunbɛn, jinatɔ tun lo. Kabini tumajan, a tun tɛ fani don. A tun tɛ si dugu kɔnɔ tugu fɔɔ kaburutu la.

²⁸Cɛɛ ye Yezu ye minkɛ dɔrɔn, a kulera kosɛbɛ ka taa a kunbiri gwan Yezu kɔrɔ ka pɛrɛn ko: “Mun b'an cɛ, Setigi, Ala Dencɛ Yezu? Ne b'i dali, i kana ne tɔɔrɔ.”

²⁹Cɛɛ nin y'o fɔ, bari Yezu tun b'a fɔra ko jina ka bɔ a la. O jina nin tun b'a tɔɔrɔ tuma caaman, mɔgɔw tun b'a bolo n'a seenw bɛɛ siri ni jɔrɔkɔw ye k'a bila. Nga a tun bɛ to k'u tigɛtigɛ, jina bɛ taa n'a ye kongo kɔnɔ.

³⁰Ayiwa, Yezu ye cɛɛ nyininga ko a tɔgɔ bɛ di? A y'a jaabi ko Jinakulu. A y'o fɔ bari jina caaman tun b'a la.

³¹Jina nunu ye Yezu dali kosɛbɛ ko a kana olu gwɛn ka taa u nyagwanyɔrɔ la.

³²O y'a sɔrɔ lɛkuluba dɔ tun bɛ dumuni kɛra kulu kan. Jina nunu y'a nyini Yezu fɛ ko a k'a to u ka taa don o lɛɛw la. Yezu sɔnna o la.

³³Jinaw bɔra cɛɛ la ka taa don lɛɛw la. Lɛkulu bɛɛ girinna ka bɔ kulu kan ka taa ben baji la. U bɛɛ sara yen.

³⁴O lɛɛw dɛndɛbagaw y'o koo ye minkɛ, u bolila ka taa o kibaru fɔ dugu kɔnɔ ni dafɛ duguw la.

³⁵Koo min kɛra, mɔgɔw bɔra ka taa o filɛ. Jina tun bɛ cɛɛ min na ka kɔrɔ, u sera k'o nyamalɔnin siginin ye Yezu kɔrɔ ni fani b'a kaan na. U siranna kosɛbɛ.

³⁶Cɛɛ kɛnɛyara cogo min na, minw y'o ye, olu y'o lakali mɔgɔw ye.

³⁷O la, u bɛɛ y'a nyini Yezu fɛ ko a ka bɔ u ka mara la, bari a siranya bonyana u fɛ. Yezu donna kurun kɔnɔ ko a bɛ taa,

³⁸cɛɛ y'a nyini a fɛ ko ni ale bɛ se ka taa n'a ye. Nga Yezu y'a jaabi ko:

³⁹“Segi ka taa i ka soo, Ala ye koba min kɛ i ye, i ka o bɛɛ lakali.” Yezu ye koba min kɛ cɛɛ ye, a taara o koo lakali dugu bɛɛ kɔnɔ.

⁴⁰Yezu kɔsegira ka bɔ baa kɔ tuma min na, mɔgɔw bɛɛ y'a kunbɛn ni nisɔndiya ye, bari u bɛɛ tun b'a makɔnɔna.

⁴¹O tuma na, cɛɛ dɔ sera min tɔgɔ ko Zayirisi. Alabatoso kuntigi tun lo. A taar'a kunbiri gwan Yezu kɔrɔ, k'a dali ko a ka sabali ka taa ale fɛ a ka soo,

⁴²bari ale denmuso man kɛnɛ, ko a bɛ nyini ka sa, k'o denmuso nin dɔrɔn le ye ale deen ye. Deen nin sii tun bɛ saan tan ni fila nyɔgɔn. Yezu taatɔ o yɔrɔ la, mɔgɔw tun b'a digidigi fɔɔ k'a degun.

⁴³O y'a sɔrɔ, muso dɔ tun b'u cɛma, min ka koli tun tɛ banna n'a kɛra a ma bana ye kabini saan tan ni fila. A bololafɛn bɛɛ banna, bari a tun taara furakɛla caaman fɛ. Nga a ka bana ma nɔgɔya.

⁴⁴A gwɛrɛla Yezu la jama cɛma ka maga a ka fani dakun na a kɔfɛ. O yɔrɔnin bɛ, a ka koli lɔra.

⁴⁵Yezu ye nyiningali kɛ ko: “Jon magara ne la?” Mɔgɔ si ma sɔn k'a fɔ ko ale lo. Piyɛri ye kuma ta k'a fɔ ko: “Karamɔgɔ, i nyaa b'a la ni mɔgɔw b'i digidigira fɔɔ k'i degun.”

⁴⁶Nga Yezu ko: “Mɔgɔ dɔ magara ne la, bari ne y'a lɔn ko ne ka fanga ye kabako dɔ kɛ sisan.”

⁴⁷Muso nin y'a lɔn ko koo nin tɛna se ka dogo tugu minkɛ, a yɛrɛyɛrɛtɔ taar'a kunbiri gwan Yezu kɔrɔ. A magara a la kuun min na, ani a kɛnɛyara yɔrɔnin kelen cogo min na, a y'o bɛɛ lakali Yezu ye mɔgɔw bɛɛ nyana.

⁴⁸Yezu y'a fɔ a ye ko: “N balimamuso, i lara ne la minkɛ, i kisira, taa hɛrɛ la.”

⁴⁹Ka Yezu to o kuma na, mɔgɔ dɔ bɔra kuntigi Zayirisi ka soo ka na a fɔ a ye ko: “I denmuso banna, kana karamɔgɔ sɛgɛn tugu.”

⁵⁰Yezu y'o kuma mɛn minkɛ, a y'a fɔ Zayirisi ye ko: “I kana siran, la ne la dɔrɔn, i denmuso nii bɛna segi a ma.”

⁵¹U sera Zayirisi ka soo tuma min na, Yezu ma sɔn mɔgɔ si ka don n'a ye boon kɔnɔ fɔɔ Piyɛri, ni Zan, ni Zaki, ani sungurunin faa n'a baa dɔrɔn.

⁵²Mɔgɔw bɛɛ tun bɛ mankanci ani kule la sungurunin ka saya koo la. Yezu y'a fɔ u ye ko: “Aw kana kasi, sungurunin ma sa, nga a bɛ sinɔgɔra le.”

⁵³Mɔgɔw y'a lɔn ko sungurunin sara tinyɛ na minkɛ, u yɛlɛla Yezu ma.

⁵⁴Yezu donna ka sungurunin suu minɛ a bolo ma k'a fɔ a ye ko: “Sungurunin, wili.”

⁵⁵O yɔrɔnin bɛ, deen nii segira a ma, a wilila. Yezu y'a fɔ u ye ko u ka dumuni d'a ma.

⁵⁶Deen wolobagaw kabakoyara kosɛbɛ. Nga Yezu y'a fɔ u ye k'a gwɛlɛya ko u kana o koo nin nyafɔ mɔgɔ si ye.