Read LAYIDUKURA ZAN 11 Bible Online

ZAN 11 - LAYIDUKURA bible

ZAN 11

¹Cɛɛ dɔ tun bananin bɛ Betani, Mariyamu n'a kɔrɔmuso Marita ka dugu kɔnɔ, a tɔgɔ ko Lazari.

²Ale Mariyamu le tun ye tulu kasadiman bon Matigi seen kan ani k'a kunsigi kɛ k'a jɔsi, ale balimacɛ Lazari le tun man kɛnɛ.

³U ye mɔgɔ bila ka ta'a fɔ Yezu ye ko: “Matigi, i tericɛ man kɛnɛ.”

⁴Yezu y'u ka kuma mɛn ka ban tuma min na, a y'a fɔ ko: “Bana nin ma kɛ a faga ta ye, nga a kɛra janko bonya ka la Ala n'a Dencɛ kan.”

⁵Marita, n'a dɔgɔmuso, ni Lazari koo tun ka di Yezu ye.

⁶A ye Lazari ka bana koo mɛn tuma min na, a tun bɛ yɔrɔ min na, a ye tile fila kɛ yen.

⁷O kɔ, a y'a fɔ a ka kalandenw ye k'u ka to u bɛ kɔsegi Zude mara la.

⁸A ka kalandenw y'a fɔ a ye ko: “Karamɔgɔ, Zuwifuw tun b'a fɛ k'i bon ni kabakuru ye a ma mɛn, e do ko an ka segi ka taa Zuda mara la.”

⁹Yezu y'u jaabi ko: “Lɛrɛ tan ni fila tɛ tile kelen kɔnɔ wa? Ni mɔgɔ min bɛ taama tilefɛ, a tɛ talon, bari a bɛ yeli kɛ tile barika la,

¹⁰nga, ni mɔgɔ dɔ bɛ taama sufɛ, a bɛ talon, bari yeelen tɛ yen.”

¹¹O kuma bɛɛ fɔnin kɔ, a y'a fɔ u ye ko: “An ka tericɛ Lazari bɛ sinɔgɔra, nga ne bɛ ta'a kunun.”

¹²Kalandenw y'a fɔ a ye ko: “Matigi, n'a bɛ sinɔgɔra, o kɔrɔ ko a bɛna kɛnɛya.”

¹³Yezu tun bɛ kumana Lazari ka sayako le la, nga kalandenw tun b'a miiri ko a tun bɛ kumana sinɔgɔ yɛrɛ koo la.

¹⁴O kɔ, Yezu y'a fɔ k'a gwɛ u ye ko: “Lazari sara.

¹⁵Ne tun tɛ yen minkɛ, o diyara ne ye, aw kɔsɔn, janko aw ka se ka jigi sɔrɔ. An ka ta'a fɛ.”

¹⁶O la, Toma min tɔgɔ ko Filanin, ale y'a fɔ kalanden tɔ nunu ye k'u k'a to u bɛ taa yen u bɛɛ ka sa nyɔgɔn fɛ.

¹⁷Yezu sera tuma min na, o y'a sɔrɔ Lazari suu tun ye tile naani kɛ kaburu la.

¹⁸Betani ni Zeruzalɛmu furancɛ tun tɛ tɛmɛ kilo saba nyɔgɔn kan.

¹⁹Zuwifu caaman tun taara Betani janko u ka se ka Marita ni Mariyamu jigi tugu u balimacɛ ka sayako la.

²⁰Marita y'a mɛn tuma min na ko Yezu bɛ nana, a taar'a kunbɛn. O y'a sɔrɔ Mariyamu tun siginin bɛ soo kɔnɔ.

²¹Marita y'a fɔ Yezu ye ko: “Matigi, ni e tun bɛ yan ne balimacɛ tun tɛna sa.

²²Nga hali sisan ne lanin b'a la ko e mana fɛɛn o fɛɛn dali Ala fɛ, a bɛna o kɛ e ye.”

²³Yezu fana y'a fɔ a ye ko: “I balimacɛ bɛna kunun.”

²⁴Marita y'a fɔ a ye fana ko: “Ne y'a lɔn ko a bɛna kunun dinyɛ labanlon na.”

²⁵Yezu y'a fɔ a ye ko: “Ne le bɛ suuw kunun, ne bɛ nii di, ni mɔgɔ min lara ne la hali n'o tigi sara a bɛna kunun.

²⁶Ani ka mɔgɔ o mɔgɔ to nii na, n'a lara ne la, a tɛna sa fewu. I lara o la wa?”

²⁷A y'a jaabi ko: “Ɔnhɔn Matigi, ne lanin b'a la ko ele le ye Ala ka Mɔgɔ wolomanin nin ye, Ala Dencɛ, min ka kan ka na dinyɛ na.”

²⁸A y'o kuma nunu fɔ ka ban dɔrɔn, a taara Mariyamu wele dogo la k'a fɔ ale ye ko: “Karamɔgɔ nana, a ko i ka na.”

²⁹Mariyamu y'o mɛn dɔrɔn, a sinna ka wili ka taa Yezu fɛ.

³⁰O y'a sɔrɔ Yezu tun ma don dugu kɔnɔ fɔlɔ, nga Marita tun y'a kunbɛn yɔrɔ min na, a tun bɛ o yɔrɔ la yen halibi.

³¹Zuwifu minw tun bɛ ni Mariyamu ye soo kɔnɔ k'a jigi tugu, olu y'a ye a sinna ka wili ka bɔ dɔrɔn, olu tugura a kɔ. U tun b'a miiri ko a bɛ taara kaburu yɔrɔ la ka kasi.

³²Mariyamu sera Yezu fɛ dɔrɔn, a y'a kunbiri gwan Yezu kɔrɔ k'a fɔ a ye ko: “Matigi, ni e tun bɛ yan, ne balimacɛ tun tɛna sa.”

³³Yezu y'ale ni Zuwifuw kasitɔ ye, o y'a dusu cɛn, u makari y'a minɛ.

³⁴A y'u nyininga ko: “Aw y'a suu don yɔrɔ jumɛn?” U ko: “Matigi, na i bɛ taa o yɔrɔ filɛ.”

³⁵Yezu kasira.

³⁶O kɔsɔn Zuwifu minw tun bɛ yen olu y'a fɔ ko a koo tun ka di a ye dɛ.

³⁷Nga dɔw y'a fɔ ko: “Ale min tun ye finyɛntɔ nyaa yɛlɛ, a tun tɛ se ka Lazari kisi saya ma wa?”

³⁸Yezu dusu cɛnna tugu, a taara kaburu yɔrɔ la. Kaburu nin tun ye farawo ye, u ye kabakuru kɛ k'a datugu.

³⁹Yezu y'a fɔ ko u ka kabakuru bɔ kaburuda la. Cɛɛ min banna, ale balimamuso Marita y'a fɔ a ye ko: “Matigi, a kasa ka kan ka bɔ sisan, bari a suu donna bii y'a tile naani ye.”

⁴⁰Yezu y'a fɔ a ye ko: “Ne tun m'a fɔ i ye ko n'i lara a la ko i bɛna Ala ka sebagaya ye wa?”

⁴¹U ye kabakuru bɔ yen, o kɔ Yezu y'a nyaa kɔrɔ ta sanfɛ k'a fɔ ko: “N Faa, ne bɛ barika la i ye bari i ye ne jaabi.

⁴²Ne y'a lɔn ko i bɛ ne jaabi tuma bɛɛ, nga ne kumana ten janko mɔgɔ minw bɛ ne lamini, olu ka la a la ko ele le ye ne ci.”

⁴³A y'o kuma fɔ ka ban tuma min na, a pɛrɛnna ko: “Lazari, wili ka bɔ.”

⁴⁴Lazari min tun sara, a kununna ka bɔ kaburu la. Fani melekenin tun b'a bolo n'a seen na, ani dɔ tun kɛnin bɛ k'a nyaa siri. Yezu y'a fɔ u ye ko: “Aw k'a foni k'a to a bɛ taa.”

⁴⁵Zuwifu minw tun nana Mariyamu fɛ, u ye Yezu ka koo kɛnin ye minkɛ, u caaman lara a la.

⁴⁶Nga dɔw taara Farizinyɛw fɛ, Yezu ye koo min kɛ, k'o lakali u ye.

⁴⁷Sarakalasebagaw ni Farizinyɛw ye nyɔgɔnye kɛ k'a fɔ ko: “An bɛna mun le kɛ? Bari cɛɛ nin bɛ kabako caaman kɛ.

⁴⁸N'an y'a to n'a taara nya, mɔgɔ bɛɛ bɛna la a la, o seen fɛ, Ɔrɔmukaw bɛna na k'an ka yɔrɔ senuman[6] n'an ka siya halaki.”

⁴⁹Sarakalasebagaw kuntigiba min tun bɛ yen o saan na, a tɔgɔ ko Kayifu, ale y'a fɔ u ye ko: “Aw tɛ foyi faamu.

⁵⁰Aw fana m'a lɔn ko mɔgɔ kelen ka sa jama kɔsɔn janko an ka siya bɛɛ kana halaki, k'o ka fisa wa?”

⁵¹O kuma nin ma bɔ a yɛrɛ la, o saan nin na, ale le tun ye sarakalasebagaw kuntigiba ye, a tun ye kiraya kuma le fɔ ten ko Yezu ka kan ka sa Zuwifu siya kɔsɔn.

⁵²O fana tun tɛ kɛ u ka siya dama kɔsɔn, nga Ala deenw minw jɛnsɛnnin bɛ, a ka se k'olu kori nyɔgɔn na.

⁵³Kabini o loon u bɛnn'a la ko u bɛn'a faga.

⁵⁴O le kɔsɔn Yezu taara dugudennin dɔ la min tɔgɔ ko Efarayimu. A n'a ka kalandenw tora o yɔrɔ la. A tun tɛ sɔn ka taa Zuwifuw cɛma tuma bɛɛ.

⁵⁵O waati la Zuwifu ka Hɔrɔnya nyanagwɛ loon tun sera ka ban. A tɔɔ tun tora tile damani, mɔgɔ caaman tun bɛ bɔ kongo duguw la ka na Zeruzalɛmu janko k'u yɛrɛ saniya ka kɛnyɛ n'u ka landa ye.

⁵⁶Olu tun bɛ Yezu yɔrɔ yaalala. K'u to Alabatosoba kɔnɔ, u b'a fɔra nyɔgɔn ye k'o tuma na, a tɛna na nyanagwɛ nin na wa?

⁵⁷Sarakalasebagaw ni Farizinyɛw tun y'a fɔ ko ni mɔgɔ min ye Yezu yɔrɔ lɔn, k'u k'a yɔrɔ yira olu la, u bɛ ta'a minɛ.