Read LAYIDUKURA ZAN 12 Bible Online

ZAN 12 - LAYIDUKURA bible

ZAN 12

¹Hɔrɔnya nyanagwɛ tun tora tile wɔɔrɔ, Yezu taara Betani, Lazari ka dugu la a tun y'o min sanin kunun.

²O yɔrɔ la, u ye dumuni labɛn Yezu ye. Marita le tun bɛ dumuni dira u ma. Lazari fana tun bɛ dumunikɛlaw cɛma.

³Mariyamu ye daganin dɔ ta o fanin tun bɛ tulu kasadiman nyanaman na, min sɔngɔ ka gwɛlɛ kosɛbɛ. A y'o bɔn Yezu seenw kan ka tila k'a kunsigi kɛ k'a seenw jɔsi, soo bɛɛ fara a kasa la.

⁴Zuda Isikariyɔti, n'o ye kalandenw dɔ ye, ale min bɛn'a don bolo la, ale y'a fɔ ko

⁵mun na u ma tulu kasadiman nin feere deniye wari kɛmɛ saba la, janko k'o wari tilan faantanw cɛ.

⁶A tun y'o kuma nin fɔ, a ma kɛ ko faantanw makari le tun b'a la dɛ, nga soon tun lo. Ale le tun bɛ u ka wari mara, ni wari min dira a ma ko a k'a mara, a b'o dumu.

⁷Yezu y'a fɔ a ye ko: “Muso nin to nyasuma na, a ye tulu kasadiman nin kɛ ne kan, ne suu donlon kama.

⁸Aw bɛna to ni faantanw ye tuma bɛɛ, nga ne tɛna kɛ n'aw ye tuma bɛɛ la.”

⁹Zuwifuw caaman tun y'a mɛn ko Yezu bɛ Betani minkɛ, u y'a daminɛ ka na yen, u tun tɛ na Yezu dama kama nga Lazari fana kama, a tun y'o min kunun.

¹⁰O la, sarakalasebagaw y'a latigɛ ko Lazari fana ka kan ka faga.

¹¹Bari Lazari kɔsɔn Zuwifuw caaman bɔra olu kɔ ka la Yezu la.

¹²O dugusagwɛ, jamaba min tun nana nyanagwɛ nin na, olu y'a mɛn ko Yezu bɛ nana Zeruzalɛmu,

¹³u ye tenfuraburuw tigɛ ka bɔ ka ta'a kunbɛn, u tun bɛ pɛrɛn k'a fɔ ko: “An b'i tando! E min bɛ nana, Isirayɛli ka masacɛ, Matigi ka barika don i la.”

¹⁴Yezu ye faliden dɔ sɔrɔ ka yɛlɛ o kan i n'a fɔ a fɔra Ala ka kuma na cogo min na ko:

¹⁵“Zeruzalɛmukaw, aw kana siran, aw ka masacɛ filɛ a bɛ nana, a bɛ faliden kan.”

¹⁶O koo nin kɛtuma na, kalandenw tun ma kɔn k'o faamu, nga Ala ye Yezu bonya tuma min na, u hakili sɔrɔla ka jigi a la k'o kuma nunu tun sɛbɛnna ale le koo la. O fana le kɛra a ye.

¹⁷Yezu ye Lazari kunun k'a wele ka bɔ kaburu kɔnɔ jama min nyana, olu y'a koo fɔ mɔgɔw ye.

¹⁸Jama tun b'a kunbɛnna bari u tun y'a mɛn ko a y'o kabako kɛ.

¹⁹Farizinyɛw tora k'a fɔ nyɔgɔn ye ko u tɛna se ka foyi nya tugu, ko mɔgɔ bɛɛ le bɛ tugura a kɔ.

²⁰Girɛki dɔw tun nana nyanagwɛ nin seen fɛ janko u ka Ala bato.

²¹U taara Filipi fɛ ale min bɛ bɔ Bɛtisayida Galile mara la, k'a fɔ a ye ko: “N tericɛ, an b'a fɛ ka Yezu ye.”

²²Filipi taar'a fɔ Andere fana ye, u fila bɛɛ jɛnna ka ta'a fɔ Yezu ye.

²³Yezu y'u jaabi ko: “Mɔgɔ Dencɛ ka kan ka bonya sɔrɔ waati min na, o le sera sisan.

²⁴Tinyɛ tinyɛ na, ne b'a fɔ aw ye ko ni suman kisɛ ma don dugukolo la, a tɛ se ka buguya, nga n'a donna, o tuma na a bɛ se ka buguya.

²⁵Mɔgɔ min b'a fɛ k'a nii kisi, o tigi bɛna bɔnɔ, ni mɔgɔ min t'a nii jati dinyɛ kɔnɔ, o tigi bɛna hɛrɛ banbali sɔrɔ.

²⁶Ni mɔgɔ min b'a fɛ ka baara kɛ ne ye, o tigi ka tugu ne kɔ, ne bɛ yɔrɔ min na, ne ka baarakɛlaw fana bɛna kɛ o yɔrɔ le la. Ni mɔgɔ min bɛ baara kɛ ne ye, n Faa bɛna bonya la o tigi kan.

²⁷“Sisan ne nii tɔɔrɔnin lo, ne bɛna mun le fɔ? N Faa, k'a fɔ ko i ka ne kisi nin waati tɔɔrɔ ma wa? Nga ne nakun le y'o ye.

²⁸N Faa, i k'i yɛrɛ tɔgɔ bonya!” O waati yɛrɛ la, kumakan dɔ bɔra sankolo la, k'a fɔ ko: “Ne y'a bonya, ne fana bɛna tila k'a bonya tugu.”

²⁹Jama min tun bɛ yen olu y'a fɔ ko saan le pɛrɛnna, dɔw y'a fɔ ko mɛlɛkɛ dɔ le kumana a fɛ.

³⁰Yezu y'a fɔ u ye tugu ko: “Kumakan min mɛnna o ma kɛ ne kɔsɔn dɛ, a kɛra aw le kɔsɔn.

³¹Dinyɛ kitiwaati sera sisan sisan yɛrɛ, dinyɛ nin kuntigi bɛna gwɛn ka to kɛnɛma.

³²Ne kɔni, ni ne kɔrɔ tara sanfɛ tuma min na, ne bɛna mɔgɔ bɛɛ sama ka na ne fɛ.”

³³A tun b'a yɛrɛ ka saya cogo koo le fɔra o kuma nin na.

³⁴Jama y'a fɔ a ye ko: “An y'a mɛn sariya la ko Ala ka Mɔgɔ wolomanin nin bɛna to yen kudayi, e do y'a fɔ cogo di ko Mɔgɔ Dencɛ kɔrɔ ka kan ka ta sanfɛ? Jon le ye o Mɔgɔ Dencɛ ye?”

³⁵Yezu y'u jaabi ko: “Yeelen b'aw cɛma yan ni dɔɔni halibi. Tuma min na o yeelen b'aw cɛma, aw ka banba ka taama o yeelen nin na, janko suu kana ko ka bali aw la, bari mɔgɔ min bɛ taama dibi la o tigi t'a taayɔrɔ lɔn.

³⁶Tuma min na yeelen b'aw cɛma, aw k'aw jigi la a kan, janko aw ka se ka kɛ mɔgɔ kɔnɔgwɛninw ye.” Yezu y'o kuma nunu fɔ u ye ka ban tuma min na, a bɔra u cɛma ka ta'a yɛrɛ dogo u la.

³⁷Yezu ye kabako caaman kɛ u nyana, o bɛɛ la u ma la a la.

³⁸O cogo la kira Ezayi ye kuma min fɔ o kɛra, a tun ko: “Matigi, jon le lara an ka fɔta la? Matigi y'a ka sebagaya yira jon na?”

³⁹U tun tɛ se ka la a la kuun min na, Ezayi y'o fɔ fana, a ko:

⁴⁰“Ala y'u kɛ finyɛntɔw ye janko u kana yeli kɛ. A y'u kɛ hakilitanw ye janko u kana faamuli kɛ, ka yɛlɛma k'u nyaa sin a ma, a k'u kɛnɛya.”

⁴¹Ezayi y'o kuma fɔ bari a tun ye Yezu ka nɔɔrɔ ye, o la a kumana ale koo la.

⁴²O bɛɛ n'a ta kuntigi caaman lara a la, nga Farizinyɛw nyasiran kɔsɔn u tun tɛ sɔn k'u yɛrɛ yira, bari u tun bɛ siran ko u bɛna u nii bɔ Alabatoso koo la.

⁴³Bari u mako tun bɛ adamaden ka bonya la ka tɛmɛ Ala ta kan.

⁴⁴O tuma na Yezu pɛrɛnna ko: “Ni mɔgɔ min lara ne la, o tigi ma la ne dama na, nga Ala min ye ne ci a lara ale la,

⁴⁵ani mɔgɔ min ye ne ye o tigi ye ne cibaga fana ye.

⁴⁶Ne nana dinyɛ na i n'a fɔ yeelen, janko mɔgɔ o mɔgɔ lara ne la o tigi kana to dibi kɔnɔ.

⁴⁷Ni mɔgɔ min ye ne ka kuma mɛn, n'a ma sɔn k'o labato, a ma kɛ ko ne le b'o tigi kitira dɛ, bari ne ma na janko ka adamadenw kiti, nga waasa k'o kisi.

⁴⁸Mɔgɔ min banna ne la ani a ma sɔn ne ka kuma na, o tigi kitibaga bɛ yen, ne ye kuma min fɔ, o le bɛn'a tigi kiti dinyɛ labanlon na.

⁴⁹Ne ma kuma ne yɛrɛ ma, nga n Faa min ye n ci ka na, ne ka kan ka kuma minw fɔ, ale le y'o fɔ ne ye.

⁵⁰Ani ne b'a lɔn ko hɛrɛ banbali bɛ sɔrɔ o kuma barika la. O le y'a to n Faa ye koo nunu fɔ ne ye cogo min na, ne fana b'o fɔ ten.”