Read LAYIDUKURA ZAN 13 Bible Online

ZAN 13 - LAYIDUKURA bible

ZAN 13

¹Hɔrɔnya nyanagwɛ tun ma se fɔlɔ, Yezu tun y'a lɔn ko ale ka bɔwaati sera dinyɛ na ka ta'a Faa fɛ. A ka mɔgɔ minw tun bɛ dinyɛ na, olu koo tun ka di a ye, a y'u kanu fɔɔ ka taa se a daan na.

²K'u to dumuni na, ale n'a ka kalandenw, o y'a sɔrɔ Sutana tun ye Simɔn deen Zuda Isikariyɔti kɔnɔ fa ka ban ni Yezu janfako ye.

³Yezu tun y'a lɔn ko a Faa ye koo bɛɛ don ale bolo, ani ko ale bɔra Ala fɛ, ani a ka kan ka taa Ala fɛ tugu,

⁴a wilila ka bɔ dumuni kunna k'a ka foroca bɔ, ka fani wɛrɛ ta k'a cɛɛ siri n'o ye.

⁵O kɔ, a ye jii don minan dɔ kɔnɔ, k'a daminɛ ka to k'a ka kalandenw seen ko, ka to k'o fani kɛ k'u jɔsi.

⁶A sera Simɔn Piyɛri ma tuma min na, Piyɛri y'a fɔ a ye ko: “Matigi, ele bɛna ne seen ko wa?”

⁷Yezu y'a jaabi ko: “Ne bɛ koo min kɛra ten, e t'o faamuna sisan, nga kɔfɛ, i bɛna o faamu.”

⁸Piyɛri y'a fɔ a ye ko: “E tɛna ne seen ko abada!” Yezu y'a fɔ a ye ko: “Ni ne ma i seen ko, i tɛna niyɔrɔ sɔrɔ ne fɛ.”

⁹A y'a fɔ Yezu ye ko: “A kana dan ne seen dama ma, nga ne bolo ni n kuun fana ko.”

¹⁰Yezu y'a fɔ a ye tugu ko: “Ni mɔgɔ min kora ka ban, o tigi mako t'a la ka ko tugu fɔɔ k'a seen dama le ko, bari a fari saniyanin lo ka ban. Aw gwɛnin lo, nga aw bɛɛ tɛ.”

¹¹Mɔgɔ min tun bɛn'a don mɔgɔjuguw bolo, a tun b'o tigi lɔn. O le y'a to a ko: “Aw bɛɛ gwɛnin tɛ.”

¹²A y'u seen ko ka ban tuma min na, a y'a ka faniw ta k'o don ka sigi dumuni kunna tugu k'a fɔ u ye ko: “Ne ye koo min kɛ aw ye, aw y'o faamu wa?

¹³Aw bɛ ne wele ko karamɔgɔ ani Matigi, o bɛnnin lo, bari ne y'o le ye.

¹⁴Ni ne ye aw seen ko, ne min ye aw ka Matigi ni karamɔgɔ ye, aw fana ka kan ka nyɔgɔn seen ko.

¹⁵Ne y'o kɛ janko k'o nyayira aw la. Ne ye fɛɛn min kɛ aw ye, aw k'o nyɔgɔn kɛ aw mɔgɔnyɔgɔnw ye.

¹⁶Tinyɛ tinyɛ na, ne b'a fɔ aw ye ko baaraden man fisa n'a ka kuntigi ye, walima ciden man fisa n'a cibaga ye.

¹⁷Sisan aw y'o koo lɔn, n'aw y'o koo nin kɛ, aw dagamuna.

¹⁸Ne tɛ kumana aw bɛɛ koo la dɛ, ne ye minw woloma ne bɛ olu lɔn, nga min fɔra Ala ka kuma na, fɔɔ o ka kɛ. A ko: ‘Min tun bɛ dumuni kɛ ni ne ye, ale le wilila ne kama.’

¹⁹Ne bɛ kɔn k'o fɔ aw ye yan n'o ka se, janko n'o kɛra loon min na, ne ko ne ye min ye, aw ka la a la ko ne ye o le ye.[7]

²⁰Tinyɛ tinyɛ na, ne b'a fɔ aw ye ko ni mɔgɔ min ye ne ka ciden minɛ ka nya, o tigi ye ne le minɛ ka nya. Ni min ye ne minɛ ka nya, o tigi fana ye ne cibaga le minɛ ka nya.”

²¹Yezu y'o kuma nunu fɔ ka ban dɔrɔn, a hakili nyagamina kosɛbɛ, a y'a fɔ ko: “Tinyɛ tinyɛ na, ne b'a fɔ aw ye ko, aw dɔ bɛna ne don mɔgɔjuguw bolo.”

²²Kalandenw tora ka nyɔgɔn filɛfilɛ, u tun m'a lɔn ko a bɛ kumana mɔgɔ min koo la.

²³Kalanden nunu cɛma, min koo tun ka di Yezu ye kosɛbɛ, ale tun siginin b'a gɛrɛfɛ.

²⁴Simɔn Piyɛri y'a bolo kɛ k'a fɔ ale ye ko a k'a nyininga ni mɔgɔ min koo lo.

²⁵O kalanden nin y'a yɛrɛ jɛngɛn ka taa Yezu faan fɛ, k'a nyininga ko: “Matigi, jon lo?”

²⁶Yezu y'a jaabi ko: “Ne bɛna lɔgɔma nin sun naan na k'a di mɔgɔ min ma, o lo.” A ye lɔgɔma nin sun naan na k'a di Simɔn deen Zuda Isikariyɔti ma.

²⁷A ye lɔgɔma nin di tuma min na, o waati yɛrɛ la Sutana y'a daminɛ ka baarajugu kɛ Zuda dusu la. Yezu y'a fɔ a ye ko: “E b'a fɛ ka fɛɛn min kɛ, i ka banba k'o kɛ sa.”

²⁸Kalanden tɔw si ma kuma nin kuun lɔn.

²⁹Dɔw tun b'a miiri ko Yezu y'a fɔ a ye ko a ka u ka makoyafɛn dɔ san nyanagwɛ kama, walima ko a ka taa fɛɛn dɔ di faantanw ma, bari ale le tun ye u ka warimarabaga ye.

³⁰Zuda y'o lɔgɔma nin minɛ k'a dumu ka ban tuma min na dɔrɔn, a wilila ka bɔ, o y'a sɔrɔ suu tun kora kosɛbɛ.

³¹Zuda bɔra ka ban dɔrɔn, Yezu y'a fɔ ko: “Sisan kɔni Mɔgɔ Dencɛ ye bonya sɔrɔ, Ala fana ye bonya sɔrɔ a barika la.

³²Ni Ala ye bonya sɔrɔ a barika la, Ala fana bɛna kɛ a bɛ bonya sɔrɔ, a bɛna o kɛ hali sisan yɛrɛ.

³³Ne deenw, ne bɛ n'aw ye yan ni waati dɔɔni dɔrɔn. O kɔ, aw bɛna ne yɔrɔ nyini. Ne tun kɔnna k'a fɔ Zuwifuw ye cogo min na ko u tɛna se ka na ne taayɔrɔ la, ne b'o kelen le fɔ aw fana ye.

³⁴“Ne bɛ cikura di aw ma ko: aw ka nyɔgɔn kanu, ne ye aw kanu cogo min na, aw fana ka nyɔgɔn kanu ten.

³⁵Mɔgɔ bɛɛ bɛn'a lɔn o seen fɛ ko aw kɛra ne ka kalandenw ye, ni aw bɛ nyɔgɔn kanu.”

³⁶Simɔn Piyɛri y'a nyininga ko: “Matigi, i bɛ taa min?” A y'a jaabi ko: “Ne bɛ taa yɔrɔ min na, e tɛ se ka tugu ne kɔ ka taa o yɔrɔ la fɔlɔ, nga yan ni waati dɔ, e bɛna se ka tugu ne kɔ.”

³⁷Piyɛri y'a fɔ a ye tugu ko: “Mun na ne tɛ se ka tugu i kɔ sisan? Ne bɛna n nii d'i kɔsɔn.”

³⁸Yezu y'a jaabi ko: “I bɛna i nii di ne kɔsɔn. Nga tinyɛ tinyɛ na, ne b'a fɔ i ye ko yan ni dondo ka kasi, i bɛn'a fɔ sinyɛ saba ko e tɛ ne lɔn.”