Read LAYIDUKURA ZAN 14 Bible Online

ZAN 14 - LAYIDUKURA bible

ZAN 14

¹Yezu y'a fɔ a ka kalandenw ye ko: “Aw hakili kana nyagami. Aw lara Ala la, aw ye la ne fana na.

²Boon caaman bɛ n Faa ka luu kɔnɔ, n'o tɛ ne tun tɛn'a fɔ ko ne bɛ taa yɔrɔ labɛn aw ye.

³Ni n taar'a labɛn ka ban, ne bɛna kɔsegi ka na k'aw ta ka taa n'aw ye, janko ne bɛ yɔrɔ min na aw fana ka kɛ o yɔrɔ la.

⁴Aw bɛ ne taayɔrɔ sira lɔn.”

⁵Toma y'a fɔ a ye ko: “Matigi, an t'i taayɔrɔ lɔn, an fana bɛ kɛ di k'a sira lɔn?”

⁶Yezu y'a jaabi ko: “Ne le kɛra sira ye, ni tinyɛ, ani nii dibaga ye. Mɔgɔ si tɛ se n Faa fɛ ni ne sababu tɛ.

⁷Ni aw bɛ ne lɔn, aw bɛna n Faa fana lɔn, sisan aw yɛrɛ y'a lɔn ka ban, aw y'a ye fana.”

⁸Filipi y'a fɔ a ye ko: “I Faa yira an na, o b'an wasa.”

⁹Yezu y'a fɔ Filipi ye ko: “Ne bɛ n'aw ye kabini tumajan, o bɛɛ n'a ta e ma ne lɔn wa Filipi? Ni mɔgɔ min nyaa lara ne kan, o tigi ye n Faa fana ye, mun na e b'a fɔ ko ne ka n Faa yira aw la?

¹⁰I lanin t'a la ko ne ni n Faa bɛɛ ye kelen ye wa? Ne bɛ kuma minw fɔ, ne t'o fɔ ne yɛrɛ ma, n Faa min ni ne ye kelen ye, ale le b'a ka baara kɛ.

¹¹Aw ye la ne la, ne ni n Faa bɛɛ ye kelen ye. N'aw ma la ne ka kuma na, aw ka la a la kɛwali nunu kɔsɔn.

¹²Tinyɛ tinyɛ na, ne b'a fɔ aw ye ko mɔgɔ min lara ne la, o tigi bɛna se ka ne ka kɛwaliw nyɔgɔn kɛ. A yɛrɛ bɛna koo dɔw kɛ minw ka bon ni ne taw ye, bari ne bɛ taa n Faa fɛ.

¹³Aw mana fɛɛn o fɛɛn dali ne tɔgɔ la, ne bɛna o kɛ, janko ka bonya la Faa kan, a Dencɛ barika la.

¹⁴N'aw ye fɛɛn min nyini ne tɔgɔ la, ne bɛna o kɛ.

¹⁵“N'aw bɛ ne kanu, aw bɛna ne ka kuma labato.

¹⁶Ne bɛna n Faa Ala dali a bɛ dɛmɛbaga wɛrɛ ci aw ma, janko ale ka to ni aw ye tuma bɛɛ.

¹⁷Ale le ye Nii Senuman ye, Tinyɛtigi. Dinyɛ mɔgɔw tɛ se ka sɔn a ma bari u t'a yera, u fana m'a lɔn. Aw kɔni b'a lɔn, bari a bɛ n'aw ye, a bɛna sigi aw kɔnɔ.

¹⁸Ne tɛna aw to aw kelen na, ne bɛna segi ka na aw fɛ.

¹⁹Yan ni waati dɔɔni dinyɛ mɔgɔw tɛna ne ye tugu, nga aw bɛna ne ye. Ne bɛ nii na minkɛ, o la, aw fana bɛna to nii na.

²⁰O loon na, aw bɛn'a lɔn ko ne ni n Faa bɛɛ ye kelen ye, ko aw ni ne fana ye kelen ye.

²¹Mɔgɔ min ye ne ka kuma mɛn k'a labato, o tigi le bɛ ne kanu. Mɔgɔ min bɛ ne kanu n Faa fana bɛna o tigi kanu, ne fana bɛna o tigi kanu ka ne yɛrɛ yira a la.”

²²Zude, min bɛ danna Zuda Isikariyɔti la, ale y'a fɔ Yezu ye ko: “Matigi, a kɛra di n'i bɛna i yɛrɛ yira anw dama na n'i t'i yɛrɛ yira mɔgɔ tɔw la?”

²³Yezu y'a jaabi ko: “Ni mɔgɔ min bɛ ne kanu, o tigi bɛna ne ka kuma labato, n Faa bɛna o tigi kanu fana, anw bɛna na o tigi fɛ ka to n'a ye.

²⁴Mɔgɔ min tɛ ne kanu, o tigi fana tɛ ne ka kuma labato, aw bɛ kuma min mɛnna nin ye, o ma kɛ ne yɛrɛ ka kuma ye, nga n Faa min ye ne ci, ale ta lo.

²⁵Ne y'o koo bɛɛ fɔ aw ye ka ne to aw cɛma.

²⁶Nga dɛmɛbaga, min ye Nii Senuman ye, n Faa bɛna o min ci ne tɔgɔ la, ale bɛna aw kalan koo bɛɛ la, ani ne ye koo minw bɛɛ fɔ aw ye, a bɛna aw hakili jigi o bɛɛ la.

²⁷“Ne bɛ hɛrɛ le di aw ma, hɛrɛ min bɛ bɔ ne fɛ ne bɛ o le di aw ma, ne t'a dira i n'a fɔ dinyɛ mɔgɔw b'a kɛ cogo min na dɛ. Aw hakili kana nyagami, aw kana siran.

²⁸Aw y'a mɛn ka ban ne fɛ ko ne bɛ taa, o kɔ n bɛna kɔsegi ka na aw fɛ. N'aw tun bɛ ne kanu, aw tun bɛna nisɔndiya, bari ne bɛ taa n Faa fɛ, n Faa ka bon ni ne ye.

²⁹Ne y'o fɔ aw ye kabini sisan, n'o ma kɛ fɔlɔ, janko n'o kɛra tuma min na, aw ka la ne la.

³⁰K'a ta sisan ma ne tɛna kuma caaman fɔ n'aw ye tugu, bari dinyɛ nin kuntigi bɛ nana. A tɛ se ne kɔrɔ.

³¹Nga dinyɛ mɔgɔw ka kan k'a lɔn ko ne bɛ n Faa kanu, o la, a ye min fɔ ne ye, ne b'o le kɛ. Aw ye wili an ka bɔ yan.”