Read LAYIDUKURA ZAN 16 Bible Online

ZAN 16 - LAYIDUKURA bible

ZAN 16

¹“Ne ye o koo bɛɛ fɔ aw ye janko aw kunna kana cɛn.

²U bɛna aw gwɛn ka bɔ Alabatoso kɔnɔ, waati dɔ bɛna se, mɔgɔ minw bɛna aw faga, olu bɛna miiri k'u ye Ala sago le kɛ.

³U bɛna o baara sugu nunu kɛ bari u ma ne lɔn, u ma n Faa fana lɔn.

⁴Ne y'o koo fɔ aw ye janko, n'a waati mana se, aw hakili ka jigi a la ko ne tun y'o fɔ aw ye ka kɔrɔ. “Ne ma kɔn k'o fɔ aw ye kabini a daminɛ, bari ne tun bɛ n'aw ye.

⁵“Sisan ne bɛ taa ne cibaga fɛ, aw si ma ne nyininga ko ne bɛ taa min.

⁶Aw hakili nyagamina ne ka kuma nin kɔsɔn.

⁷Nga ne ye tinyɛ le fɔ aw ye. Aw kama lo ne bɛ taa, ni ne ma taa, Dɛmɛbaga tɛna na aw fɛ, nga ni ne taara, ne bɛn'a ci aw ma.

⁸Ni ale nana tuma min na, a bɛna kojuguko ni tilenninyako ani Ala ka kitiko gwɛya dinyɛ mɔgɔw ye, k'a yira u la ko u filila o koo nunu faan fɛ.

⁹Mun le ye u ka kojugu ye? U ma sɔn ka la ne la, o le ye u ka kojugu ye.

¹⁰Tilenninyako faan fɛ, u filila, bari ne bɛ taa n Faa fɛ aw tɛna ne ye tugu, o le bɛna n ka tilenninya yira.

¹¹Min ye kitiko ye, a bɛn'a yira u la ko Ala ye dinyɛ nin kuntigi kiti ka ban.

¹²Koo caaman bɛ ne fɛ k'o fɔ aw ye, nga aw tɛna se k'o bɛɛ faamu sisan.

¹³Nii Senuman min bɛ Ala ka tinyɛ yira mɔgɔw la, n'ale nana tuma min na, a bɛna to aw bɛ tinyɛ bɛɛ lɔn, bari a tɛna kuma a yɛrɛ barika la. Nga a mana fɛɛn o fɛɛn mɛn, ani koo min bɛɛ bɛna kɛ, a bɛna o fɔ aw ye fana.

¹⁴A bɛna bonya la ne kan, bari a mana fɛɛn min sɔrɔ ne fɛ, a bɛna o le fɔ aw ye.

¹⁵Fɛɛn min kɛra n Faa ta ye, o bɛɛ ye ne ta ye fana, o la ne y'a fɔ ko a mana fɛɛn min sɔrɔ ne fɛ, a bɛna o le fɔ aw ye.

¹⁶“Yan ni waati dɔɔni aw tɛna ne ye, o kɔ waati dɔɔni tugu aw bɛna tila ka ne ye.”

¹⁷A ka kalanden dɔw tun bɛ nyɔgɔn nyininga ko: “A tun b'a fɛ ka mun le fɔ an ye? Ko yan ni waati dɔɔni an tɛn'a ye, o kɔ waati dɔɔni tugu an bɛna tila k'a ye. A ko tugu ko ale bɛ ta'a Faa fɛ.”

¹⁸U y'a fɔ k'olu ma yan ni waati dɔɔni kɔrɔ faamu, a k'o kɔfɛ waati dɔɔni tugu. K'olu m'a lɔn n'a tun b'a fɛ ka fɛɛn min fɔ.

¹⁹Yezu tun y'a lɔn k'u b'a fɛ k'ale nyininga minkɛ, a y'a fɔ u ye ko: “Aw bɛ nyɔgɔn nyiningana ne ka kuma le kɔrɔ la wa? Ne y'a fɔ minkɛ ko yan ni waati dɔɔni aw tɛna ne ye, ani ko yan ni waati dɔɔni tugu aw bɛna ne ye.

²⁰Tinyɛ tinyɛ na, ne b'a fɔ aw ye ko, aw bɛna kasi fɔɔ ka kɛ makaritɔw ye, k'a sɔrɔ dinyɛ mɔgɔw bɛ nisɔndiya. Aw dusu bɛna kasi nga, aw ka dusukasi bɛna yɛlɛma ka kɛ nisɔndiya ye.

²¹Ni muso bɛ jigira deen na tuma min na, a nii bɛ tɔɔrɔ, bari a ka tɔɔrɔwaati le sera, nga n'a jigira ka ban, a hakili tɛ to o tɔɔrɔko la tugu deen sɔrɔko nisɔndiya fɛ.

²²Aw dusu kasinin bɛ sisan fana, nga an bɛna nyɔgɔn ye tugu, o tuma na aw bɛna nisɔndiya, mɔgɔ si tɛ se ka nisɔndiya nin cɛn aw fɛ.

²³O cogo la, o loon yɛrɛ la aw tɛna ne nyininga foyi si la tugu. Tinyɛ tinyɛ na, ne b'a fɔ aw ye ko ni aw ye fɛɛn dɔ dali n Faa fɛ ne tɔgɔ la, a bɛna o di aw ma.

²⁴Fɔɔ ka na se sisan ma aw ma foyi dali ni ne tɔgɔ ye fɔlɔ. Aw ka dalili kɛ, aw bɛna sɔrɔli kɛ, janko aw ka nisɔndiya ka dafa.

²⁵“Ne kumana aw fɛ talenw na, waati dɔ bɛ na se, ne tɛna kuma aw fɛ tugu talenw na, nga ne bɛna n Faa koo fɔ aw ye kumagwɛninw na.

²⁶O loon na, aw bɛna Ala dali ni ne tɔgɔ ye, nga ne m'a fɔ aw ye ko ne bɛn'a dali aw ye dɛ.

²⁷N Faa yɛrɛ fana b'aw kanu, bari aw ye ne kanu, ka la a la ko ne bɔra Ala fɛ.

²⁸Ne bɔra Faa fɛ ka na dinyɛ na, sisan fana ne bɛ segira n Faa fɛ tugu.”

²⁹A ka kalandenw y'a fɔ a ye ko: “Ɔnhɔn, sisan, e bɛ kuma gwɛnin fɔra an ye, i tɛ kumana an fɛ talen na tugu.

³⁰Sisan, an y'a lɔn ko i bɛ koo bɛɛ lɔn ka ban, bari hali ni mɔgɔ m'a kɔnɔnako fɔ i ye, i b'o lɔn. O le y'a to an lara a la ko i bɔra Ala fɛ.” [10]

³¹Yezu y'u jaabi ko: “Aw lara ne la sisan wa?

³²Ayiwa, waati dɔ bɛna se, o waati nin yɛrɛ sera ka ban, aw bɛɛ bɛna boli k'aw yɛrɛ nyini, ka ne kelen to, nga ne tɛna to n kelen bari n Faa bɛ ni ne ye.

³³Ne y'o fɔ aw ye janko aw ka to ni ne ye ka hɛrɛ sɔrɔ. K'aw to dinyɛ kɔnɔ, dusukasi le bɛ aw kan, nga aw k'aw jaa gwɛlɛya, ne ye see sɔrɔ dinyɛ kan ka ban.”