Read LAYIDUKURA ZAN 18 Bible Online

ZAN 18 - LAYIDUKURA bible

ZAN 18

¹Yezu y'o kuma nunu fɔ ka ban tuma min na, a n'a ka kalandenw taara Sedirɔn kɔɔ kɔfɛ, nankɔ dɔ tun b'o yɔrɔ la, u donna o kɔnɔ.

²Zuda, min tun bɛn'a janfa, ale tun bɛ o nankɔ nin yɔrɔ lɔn, bari Yezu n'a ka kalandenw tun bɛ to ka nyɔgɔn lajɛn yen tuma caaman.

³Sarakalasebagaw kuntigiw ani Farizinyɛw ye Alabatosoba kɔlɔsibaga dɔw ni sɔlidasi dɔw ci. Zuda bilara u nya ka na, lanpan ni kala mananinw ani maramanfɛnw tun b'u fɛ.

⁴Koo minw tun bɛna kɛ, Yezu tun b'o bɛɛ lɔn minkɛ, a gwɛrɛla u la k'a fɔ u ye ko: “Aw bɛ jon le yɔrɔ nyinina?”

⁵U y'a jaabi ko Nazarɛti Yezu lo. Yezu y'a fɔ u ye ko: “Ne lo.” Zuda, min tun b'a donna mɔgɔjuguw bolo la, ale tun bɛ n'u ye.

⁶Yezu y'a fɔ u ye tuma min na ko: “Ne lo,” u girinna ka taa kɔfɛ, u bɛɛ benbenna duguma.

⁷O kɔ, a y'u nyininga tugu ko: “Aw bɛ jon le yɔrɔ nyinina?” U y'a jaabi ko Nazarɛti Yezu.

⁸Yezu y'a fɔ u ye ko: “Ne y'a fɔ aw ye ko ne lo. N'aw bɛ ne le yɔrɔ nyinina, aw ye nunu to olu bɛ taa.”

⁹A y'o kuma fɔ janko a tun ye kuma min fɔ o ka kɛ. A tun ko: “E tun ye minw bɛɛ di ne ma, ne ye olu bɛɛ mara, o si kunna ma cɛn.”

¹⁰Murujan tun bɛ Simɔn Piyɛri fɛ, a y'o bɔ ka sarakalasebagaw kuntigiba ka baaraden kinibolo tulo caron. O baaraden nin tɔgɔ tun ko Malikusi.

¹¹O la, Yezu y'a fɔ Piyɛri ye ko: “I ka murujan don a foroko la yen. N Faa ye tɔɔrɔ min latigɛ ne ye, ne bɛna ban o la wa?”

¹²Sɔlidasi nunu n'u ka kuntigi ani Alabatosoba kɔlɔsibagaw Zuwifuw nyamɔgɔw tun ye o minw ci, olu ye Yezu minɛ k'a siri.

¹³U taara n'a ye Anɛ fɛ, ale tun ye Kayifu birancɛ ye, Kayifu le tun kɛra sarakalasebagaw kuntigiba ye o saan na.

¹⁴Ale Kayifu le tun y'a fɔ Zuwifuw ye ko a ka fisa mɔgɔ kelen ka sa mɔgɔ bɛɛ kɔsɔn.

¹⁵Simɔn Piyɛri ni kalanden wɛrɛ tun tugura Yezu kɔ. Sarakalasebagaw kuntigiba tun bɛ o kalanden nin lɔn, ale ni Yezu donna sarakalasebagaw kuntigiba ka luu kɔnɔ.

¹⁶Nga Piyɛri tora luda la. Sarakalasebagaw kuntigiba tun bɛ kalanden min lɔn, ale kɔsegira ka bɔ ka kuma luda kɔlɔsibaga fɛ, Piyɛri donna.

¹⁷Muso min tun bɛ luda kɔlɔsira, ale y'a fɔ Piyɛri ye ko: “E fana tɛ cɛɛ nin ka kalanden dɔ ye fewu?” A y'o jaabi ko: “Ne t'u dɔ ye.”

¹⁸Baarakɛlaw ni sɔlidasiw tun ye tasuma mana luu kɔnɔ, bari nɛnɛ tun bɛ yen, u tun b'u yɛrɛ jara. Piyɛri fana tun lɔra u cɛma n'a b'a yɛrɛ jara.

¹⁹Sarakalasebagaw kuntigiba ye Yezu nyininga a ka kalandenw koo la ani a ka kalan koo la.

²⁰Yezu y'a jaabi ko: “Ne kumana mɔgɔw fɛ kɛnɛ kan, ne ye mɔgɔw kalan Alabatosow kɔnɔ ani Alabatosoba kɔnɔ, Zuwifu bɛɛ bɛ nyɔgɔn lajɛn o yɔrɔ minw na, ne ma foyi fɔ dogo la.

²¹Mun na i bɛ ne nyininga o koo la? Mɔgɔ minw tun ye ne lamɛn i ka olu nyininga ne ye fɛɛn min fɔ, u b'o lɔn.”

²²Yezu ye o kuma fɔ dɔrɔn, sɔlidasicɛ dɔ y'a tulo ci, k'a fɔ a ye ko: “E bɛ sarakalasebagaw kuntigiba le jaabi ten wa?”

²³Yezu y'a fɔ o sɔlidasicɛ ye ko: “Ni ne ye kumajugu fɔ, i ka ne ka kuma nin juguyayɔrɔ fɔ. N'o tɛ, mun na i bɛ ne bugɔ?”

²⁴Anɛ y'a sirinin to k'a ci sarakalasebagaw kuntigiba Kayifu ma.

²⁵O y'a sɔrɔ, Simɔn Piyɛri tun b'a yɛrɛ jara tasuma kɔrɔ. Dɔ y'a fɔ a ye ko: “E fana tɛ a ka kalandenw dɔ ye fewu?” Piyɛri ko ale tɛ dɔ ye fewu.

²⁶Piyɛri tun ye sarakalasebagaw kuntigiba ka baaraden min tulo kelen caron Yezu minɛtuma na, ale balimacɛ dɔ y'a fɔ Piyɛri ma ko: “Ne m'i ye nankɔ kɔnɔ ni Yezu ye wa?”

²⁷Piyɛri y'a fɔ tugu ko ale t'a lɔn. O yɔrɔnin bɛ dondo kasira.

²⁸O kɔ, u bɔra ni Yezu ye Kayifu fɛ ka taa n'a ye, lasigiden ka luu kɔnɔ. O y'a sɔrɔ dugu tun gwɛra. U yɛrɛ ma sɔn ka don luu kɔnɔ, janko u kana u yɛrɛ nɔgɔ ka kɛnyɛ ni landa ye, u ka se ka Hɔrɔnya nyanagwɛ dumuni dumu.

²⁹Pilati bɔra ka taa u fɛ k'u nyininga ko: “Aw bɛ cɛɛ nin jalaki mun le kama?”

³⁰U ye Pilati jaabi ko: “N'a tun ma kɛ kojugukɛla ye, an tun tɛn'a minɛ ka na n'a ye e fɛ.”

³¹O la, Pilati y'a fɔ u ye ko u k'a minɛ ka taa n'a ye k'a kiti u yɛrɛ ma ka kɛnyɛ ni Zuwifuw siya ka sariya ye. U ye Pilati jaabi ko sira ma di u ma ka mɔgɔ faga.

³²Nin bɛɛ kɛra janko Yezu tun y'a ka sayako fɔ cogo min na, o ka kɛ.

³³Pilati donna luu kɔnɔ ka Yezu wele k'a nyininga ko: “E le ye Zuwifuw ka masacɛ ye wa?”

³⁴Yezu y'a jaabi ko: “Nin kuma bɔra e yɛrɛ le la wa? Walima i y'o mɛn mɔgɔ dɔw le fɛ?”

³⁵Pilati y'a jaabi tugu ko: “Ne ye Zuwifu ye wa? E ka siya n'u ka sarakalasebagaw kuntigiw le nana n'i ye ne fɛ, i ye mun le kɛ?”

³⁶Yezu y'a jaabi ko: “Ne ka masaya ma kɛ dinyɛ nin ta ye. Ni ne ka masaya tun kɛra dinyɛ ta ye, ne ka kɔmɔgɔw tun bɛna kɛlɛ kɛ ne kɔsɔn, janko Zuwifuw kana ne minɛ, nga ne ka masaya tɛ nin dinyɛ ta ye.”

³⁷Pilati y'a fɔ a ye ko: “E ye masa ye kɛ?” Yezu y'a jaabi ko: “Ele le b'a fɔra ko ne ye masa ye. Ne wolola o le kama. Ne nana dinyɛ na janko ka tinyɛ fɔ. Mɔgɔ o mɔgɔ, min lɔnin bɛ tinyɛ kan, o tigi bɛ mɛnni kɛ ne fɛ.”

³⁸Pilati y'a fɔ a ye ko: “Mun le ye tinyɛ ye?” Pilati y'o kuma fɔ ka ban tuma min na, a kɔsegira ka bɔ Zuwifuw fɛ, k'a fɔ u ye ko: “Ne ma jalakiyɔrɔ ye cɛɛ nin na.

³⁹Nga a do kɛra delinako ye aw fɛ ne bɛ to ka mɔgɔ kelen labila aw ye Hɔrɔnya nyanagwɛ la, aw b'a fɛ ne ka Zuwifuw ka masacɛ le labila wa?”

⁴⁰U tora ka pɛrɛn ko: “Ayi, kana ale bila, nga i ka Barabasi labila.” K'a sɔrɔ Barabasi tun ye benkannikɛla ye.