Read LAYIDUKURA ZAN 19 Bible Online

ZAN 19 - LAYIDUKURA bible

ZAN 19

¹Pilati ye Yezu di ko u k'a bugɔ.

²Sɔlidasiw ye ;nɔni tigɛ k'o meleke k'o kɛ i n'a fɔ masafugulan ye, k'o biri a kuun na, ka fani wuleman don a kaan na,

³ka to ka gwɛrɛ k'a fɔ a ye ko a ni sɛ Zuwifuw ka masacɛ, u tun bɛ to k'a bugɔ.

⁴Pilati kɔsegira ka bɔ tugu k'a fɔ Zuwifuw ye ko ale bɛna bɔ n'a ye kɛnɛma janko u k'a faamu ko ale ma jalakiyɔrɔ ye cɛɛ nin na.

⁵Yezu bɔra kɛnɛma tuma min na, o ;nɔni fugulan tun birinin bɛ a kuun na, ani faniwulen nin fana tun donnin bɛ a kaan na. Pilati y'a fɔ Zuwifuw ye ko: “Aw ka cɛɛ filɛ.”

⁶Sarakalasebagaw n'u ka mɔgɔw y'a ye dɔrɔn, u y'a daminɛ ka pɛrɛn ko: “A ka gwengwen lɔgɔ kan! A ka gwengwen lɔgɔ kan!” Pilati y'a fɔ u ye ko: “Aw yɛrɛ k'a minɛ ka gwengwen, ne kɔni ma jalakiyɔrɔ si ye a la.”

⁷Zuwifu nunu y'a fɔ ko sariya bɛ olu fɛ, k'olu ka sariya la a ka kan ka faga, bari a y'a yɛrɛ kɛ Ala Deen ye.

⁸Pilati y'o kuma mɛn tuma min na, a siranna kosɛbɛ.

⁹A kɔsegira ka don ka Yezu nyininga ko a bɔra min. Nga Yezu m'a jaabi.

¹⁰Pilati y'a fɔ a ye ko: “I tɛ ne jaabi wa? I m'a lɔn ko ne bɛ se k'i gwengwen lɔgɔ kan wa, walima k'i labila wa?”

¹¹Yezu y'a jaabi ko: “See min bɛ i fɛ k'a yira ne la, i m'o sɔrɔ i yɛrɛ ma, Ala le ye o see di i ma, o la do, mɔgɔ min ye ne don i bolo, o tigi le ye kojuguba kɛ ka tɛmɛ e kan.”

¹²Pilati y'o kuma mɛn dɔrɔn, a tun bɛ cogo nyinina ka Yezu labila, nga Zuwifuw tora ka pɛrɛn ko: “N'i y'a bila, i tɛ Ɔrɔmu masacɛ teri ye tugu. Bari mɔgɔ min b'a yɛrɛ kɛ masa ye, o tigi bɛ wili masacɛ le kama.”

¹³Pilati y'o kuma nunu mɛn tuma min na, a ko u ka bɔ ni Yezu ye luu kɔnɔ ka ta'a sigi kiti tigɛyɔrɔ la, min dilanna ni kabakuru ye n'a bɛ wele Gabata eburukan na.

¹⁴O tun ye Hɔrɔnya nyanagwɛ labɛnlon ye. Tilegwan tuma na, Pilati y'a fɔ Zuwifuw ye ko: “A ye aw ka masacɛ filɛ.”

¹⁵Nga u y'a jaabi ko a ka faga, a ka faga lɔgɔ kan! Pilati y'a fɔ u ye ko: “Ne k'aw ka masacɛ faga lɔgɔ kan wa?” Sarakalasebagaw y'a jaabi ko masacɛ wɛrɛ tɛ olu fɛ Ɔrɔmu masacɛ kɔ.

¹⁶A ye sira di k'u ka taa Yezu gwengwen lɔgɔ la, u y'a minɛ ka taa n'a ye.

¹⁷Yezu y'a ka gwengwenlɔgɔ ta. U taara se yɔrɔ dɔ la min tɔgɔ ko Kungolo yɔrɔ la, u b'a wele eburukan na ko Gɔligota.

¹⁸O yɔrɔ la, u y'a gwengwen ani mɔgɔ fila wɛrɛ fana, kelen a kinibolo fɛ, kelen a numanbolo fɛ, Yezu tora cɛmancɛ la.

¹⁹Pilati tun ye sɛbɛ dɔ kɛ k'o gwengwen Yezu kuun sanfɛ, a sɛbɛnnin tun bɛ ko: “Nazarɛti Yezu, Zuwifuw ka masacɛ”.

²⁰Zuwifu caaman tun ye o sɛbɛ nin kalan, bari Yezu tun gwengwenna yɔrɔ min na, o yɔrɔ tun man jan dugu la, ani o kuma nin tun sɛbɛnna eburukan na, ni latɛnkan na, ani girɛkikan na.

²¹Sarakalasebagaw y'a fɔ Pilati ye ko a kan'a sɛbɛn “Zuwifuw ka masacɛ”, nga a k'a sɛbɛn ko “Cɛɛ nin ko ale ye Zuwifuw ka masacɛ ye”.

²²Pilati y'a fɔ u ye ko ale ye min sɛbɛn ka ban, ko ale y'o sɛbɛn.

²³Sɔlidasiw ye Yezu gwengwen ka ban tuma min na, u y'a ka faniw tilan sigiyɔrɔ naani, u bɛɛ kelen kelen n'u ta. O kɔ, u y'a ka foroca ta, kalannɔ tun tɛ min na,

²⁴k'a fɔ nyɔgɔn ye ko: “An kan'a faran, an ka kala bon n'a bɛna kɛ mɔgɔ min ta ye, o ka lɔn.” O kɛra janko min fɔra Ala ka kuma na, o ka kɛ. A ko: “U ye ne ka faniw tilan nyɔgɔn cɛ, ani u ye kala bon ka sɔrɔ ka ne ka foroca di a sɔrɔbaga ma.” Sɔlidasiw y'o le kɛ. [11]

²⁵Yezu bamuso, n'a bamuso dɔgɔmuso, ani Kulopasi ka muso Mariyamu, ni Magidala Mariyamu olu lɔnin tun bɛ Yezu ka gwengwenlɔgɔ gɛrɛfɛ.

²⁶Yezu y'a bamuso, n'a ka kalanden dɔ nin ye, o min koo tun ka di a ye, u tun bɛ nyɔgɔn kɔrɔ. A y'a fɔ a bamuso ye ko: “Muso, i deen filɛ nin ye.”

²⁷O kɔ, a y'a fɔ kalanden nin fana ye ko: “I bamuso filɛ nin ye.” K'a ta o waati ma, kalanden nin y'a ladon a fɛ.

²⁸O bɛɛ kɛnin kɔ, Yezu tun y'a lɔn ko koo bɛɛ dafara, ani janko min fɔra Ala ka kuma na o ka kɛ, a y'a fɔ ko: “Minnɔgɔ bɛ ne la.”

²⁹Daga dɔ tun bɛ yen, min fanin bɛ kumuji la. Dɔ ye fuu ta k'o don kumuji nin na, k'a siri kalajan dɔ la, k'o wili k'a gwɛrɛ Yezu daa la.

³⁰Yezu ye kumuji nin nɛnɛ tuma min na, a y'a fɔ ko: “Koo bɛɛ dafara.” O kɔ, a y'a kuun biri duguma, a nii bɔra.

³¹O kɛra Hɔrɔnya nyanagwɛ labɛnlon na minkɛ, Zuwifuw tun bɛ siran ko mɔgɔ minw tun gwengwenna, ko u suuw kana to lɔgɔ kan fɔɔ ka se lafinyɛlon ma, o lafinyɛlon ni tɔ nunu fana tun tɛ kelen ye. O la, u taar'a nyini Pilati fɛ, ko a ka sira di u ka mɔgɔ nunu seenw karikari k'u jigi ka bɔ yen.

³²Sɔlidasiw nana ka mɔgɔ kelen nin seenw kari, ka kelen dɔ nin fana ta kari.

³³U sera Yezu ma, u y'a ye ko a sara ka ban, o la, u ma ale seen kari tugu.

³⁴Nga sɔlidasicɛ kelen y'a gɛrɛn sɔgɔ ni taman ye, joli ni jii bɔra ka woyo.

³⁵Mɔgɔ min y'o ye ale le b'o seereya fɔra, ani a ka seereya ye tinyɛ ye. A fana lanin b'a la, ko ale bɛ min fɔ, k'o ye tinyɛ ye, janko aw fana ka se ka la a la.

³⁶O koo bɛɛ kɛra, janko min fɔra Ala ka kuma na o ka kɛ. A ko: “A kolo si tɛna kari.”

³⁷A fɔra Ala ka kuma na fana ko: “U ye min sɔgɔ u bɛna ale filɛ.”

³⁸O koo bɛɛ kɛra ka ban tuma min na, Yusufu min tun bɔra Arimate, ale fana tun ye Yezu ka kalanden ye dogo la, bari a tun bɛ siran Zuwifuw nya. Ale taara Yezu suu dali Pilati fɛ, Pilati ye sira d'a ma, a nana ka Yezu suu jigi ka bɔ lɔgɔ kan.

³⁹Nikodɛmu min tun taara Yezu fɛ loon dɔ sufɛ, ale fana nana ni tulu kasadiman nyagaminin ye, o min tun bɛ se kilo bi saba ma.

⁴⁰U ye Yezu suu meleke fani na, ani ka wusulan kɛ a kan ka kɛnyɛ ni Zuwifuw ka suu doncogo ye.

⁴¹Yezu tun gwengwenna yɔrɔ min na, nankɔ dɔ tun bɛ o yɔrɔ la. Kaburukura dɔ tun b'o kɔnɔ, mɔgɔ si suu tun ma don ka ye o kɔnɔ fɔlɔ.

⁴²U ye Yezu suu don o kaburu nin le kɔnɔ, bari Zuwifuw tun bɛ lafinyɛlon labɛnna, ani kaburu nin fana yɔrɔ tun ka surun.