Read LAYIDUKURA ZAN 20 Bible Online

ZAN 20 - LAYIDUKURA bible

ZAN 20

¹Lɔgɔkun loon fɔlɔ, Mariyamu ka bɔ Magidala wilila sɔgɔmada joona fɛ, mɔgɔ tun tɛ yeli kɛ kosɛbɛ fɔlɔ, ka taa kaburu yɔrɔ la, a taar'a sɔrɔ kabakuru tun tɛ kaburu daa la tugu.

²A kɔsegira ka boli ka na Simɔn Piyɛri ni kalanden dɔ nin fɛ, o min koo tun ka di Yezu ye. A y'a fɔ olu ye ko: “U ye Matigi suu bɔ kaburu kɔnɔ, an m'a bilayɔrɔ lɔn.”

³Piyɛri ni kalanden dɔ nin bɔra ka taa kaburu yɔrɔ la.

⁴U mɔgɔ fila ye boli ta nyɔgɔn fɛ, nga kalanden dɔ nin seen teliyara ka tɛmɛ Piyɛri ta kan, ale kɔnna ka se kaburu daa la.

⁵A y'a kuun biri ka filɛli kɛ kaburu kɔnɔ ka fani nunu bilanin ye, nga a ma don.

⁶Simɔn Piyɛri sera dɔrɔn, a donna kaburu kɔnɔ, a ye fani nunu ye duguma,

⁷u tun ye fani min meleke Yezu kuun na, ale melekenin tun lo ka bila danna, a tun ma fara fani dɔ nin kan.

⁸Kalanden min kɔnna ka se, ale fana donna kaburu kɔnɔ, a y'u bɛɛ ye, a lar'a la.

⁹O y'a sɔrɔ, min tun fɔra Ala ka kuma na Yezu ka kununko la, u tun ma o faamu fɔlɔ.

¹⁰Kalanden nunu kɔsegira ka taa u ka yɔrɔ la.

¹¹Nga Mariyamu lɔnin tora kɛnɛma kaburu daa la n'a bɛ kasira. K'a to kasi la, a ko a bɛ biri ka filɛli kɛ kaburu kɔnɔ.

¹²A ye mɛlɛkɛ fila ye ni fani gwɛman b'u kaan na, u tun siginin bɛ Yezu suu layɔrɔ la. Kelen tun sigira a kuun layɔrɔ la, kelen b'a seen layɔrɔ la.

¹³Mɛlɛkɛ nunu y'a nyininga ko: “Muso, mun na i bɛ kasira?” A y'u jaabi ko: “Dɔw ye ne Matigi suu ta ka bɔ a layɔrɔ la, ne m'a lɔn u y'a bila yɔrɔ min na.”

¹⁴K'a to o kuma na, a ko a bɛ yɛlɛma ka filɛ, a ye Yezu lɔnin ye, nga a tun m'a lɔn ko ale lo.

¹⁵Yezu y'a fɔ a ye ko: “Muso, mun na i bɛ kasira? I bɛ jon le yɔrɔ nyinina?” Mariyamu tun bɛ miiri ko nankɔ kɔlɔsibaga lo, o la a y'a fɔ a ye ko: “Baba, ni ele le y'a ta, e k'a bilayɔrɔ fɔ n ye n bɛ ta'a ta.”

¹⁶Yezu y'a wele ko: “Mariyamu!” A y'a nyaa yɛlɛma, k'a fɔ Yezu ye eburukan na ko: “Arabuni,” o kɔrɔ ko karamɔgɔ.

¹⁷Yezu y'a fɔ a ye ko: “I kana maga ne la, bari ne ma yɛlɛ n Faa fɛ fɔlɔ, nga i ka taa ne balimaw fɛ, k'a fɔ u ye ko ne bɛ yɛlɛ n Faa, ni n ka Ala fɛ, a fana y'aw Faa n'aw ka Ala ye.”

¹⁸Mariyamu ka bɔ Magidala taara kalandenw fɛ, k'a fɔ u ye ko ale ye Matigi ye, ko a ye nin le fɔ ale ye.

¹⁹O loon kelen wulafɛ, o min tun ye lɔgɔkun daminɛlon ye, Zuwifuw nyasiranya kɔsɔn, kalandenw tun bɛ boon min kɔnɔ, u tun y'o daaw tugu k'u sɔgɔ. K'o daa nunu sɔgɔnin to, Yezu donna ka lɔ u cɛma k'a fɔ u ye ko: “Hɛrɛ ka kɛ aw ye.”

²⁰K'a to o kuma na, Yezu y'a tigɛ n'a gɛrɛn yira u la. Kalandenw ye Yezu lɔn tuma min na, u nisɔn diyara kosɛbɛ.

²¹Yezu y'a fɔ u ye tugu ko: “Hɛrɛ ka kɛ aw ye. N Faa ye ne ci cogo min na, ne fana bɛ aw ci o cogo kelen le la.”

²²A ye o kuma nunu fɔ ka ban tuma min na, a y'a dafinyɛ kɛ u kan k'a fɔ u ye ko: “Nii Senuman ka to aw fɛ.

²³Aw mana mɔgɔ minw ka kojuguw yafa, o tigiw ka kojugu bɛna yafa, aw mana ban ka minw ta yafa, o tigiw ta fana tɛna yafa.”

²⁴Yezu tun nana kalandenw fɛ tuma min na, Toma min bɛ wele Filanin, ni ale tun ye kalanden tan ni fila nunu dɔ ye, ale tun tɛ yen.

²⁵Kalanden tɔw nan'a fɔ a ye k'olu ye Matigi ye. Nga a y'a fɔ u ye ko n'ale ma puwɛnti nɔɔ ye a tigɛ la, k'a bolokɔni don o woo la, k'a don a gɛrɛn ta la, ko ale tɛna la o la.

²⁶O loon nyɔgɔn tugu, Yezu ka kalandenw tun bɛ soo kɔnɔ, o loon na Toma tun bɛ n'u ye. U tun ye daaw bɛɛ tugu k'o sɔgɔ, o bɛɛ n'a ta, Yezu nana don ka lɔ u cɛma k'a fɔ u ye ko: “Hɛrɛ ka kɛ aw ye.”

²⁷O kɔ, a y'a fɔ Toma ye ko: “N tigɛ mɔmɔ k'a filɛ, an'i bolo don n gɛrɛn na, i kana sigasiga tugu, nga i ka la ne la.”

²⁸Toma y'a fɔ a ye ko: “Ne Matigi ni n ka Ala!”

²⁹Yezu y'a fɔ a ye ko: “I ye ne ye, o le y'a to i lar'a la. Mɔgɔ minw ma ne ye, ani u fana bɛ la a la, dagamu ye olu le ta ye.”

³⁰Yezu ye kabako caaman wɛrɛw kɛ a ka kalandenw nyana, minw ma se ka sɛbɛn yan.

³¹Nga minw sɛbɛnna, olu sɛbɛnkun ye nin ye, janko aw ka se ka l'a la ko Yezu ye Ala ka Mɔgɔ wolomanin nin ye, Ala Dencɛ, n'aw lara o la, aw ka se ka hɛrɛ banbali sɔrɔ a barika la.