Read LAYIDUKURA ZAN 3 Bible Online

ZAN 3 - LAYIDUKURA bible

ZAN 3

¹Farizinyɛ dɔ tun bɛ yen, a tɔgɔ ko Nikodɛmu. Zuwifuw ka mɔgɔba dɔ tun lo.

²Ale nana Yezu sɔrɔ sufɛ k'a fɔ a ye ko: “Karamɔgɔ, anw y'a lɔn ko Ala le y'i ci. Bari i bɛ kabako minw kɛ, ni Ala tɛ e mɔgɔ min fɛ, e tɛ se k'o kɛ.”

³Yezu y'a fɔ a ye ko: “Tinyɛ tinyɛ na ne b'a fɔ i ye ko ni mɔgɔ min ma segi ka wolo tugu, o tigi tɛ se ka don Ala ka mara kɔnɔ.”

⁴Nikodɛmu ko: “Ni mɔgɔ kɔrɔla ka ban, o tigi bɛ se ka segi ka wolo tugu cogo di? A bɛ se ka segi ka don a baa kɔnɔ ka wolo tugu wa?”

⁵Yezu y'a jaabi ko: “Tinyɛ tinyɛ na, ne b'a fɔ i ye ko ni mɔgɔ min ma wolo jii, ani Nii Senuman barika la, o tigi tɛ se ka don Ala ka mara kɔnɔ.

⁶Mɔgɔ min wolola adamaden barika la, o tigi ye adamaden ye. Mɔgɔ min wolola Nii Senuman barika la, o tigi ye Ala deen ye.

⁷Ne y'a fɔ ko fɔɔ mɔgɔ ka segi ka wolo, e kan'a to o b'i dabari ban.

⁸Yɔrɔ min ka di fɔnyɔ ye, a bɛ taa o yɔrɔ la. I b'a mankan mɛn, i t'a bɔyɔrɔ n'a taayɔrɔ lɔn. Ala ka baara lo, adamaden tɛ se ka min faamu. Mɔgɔ min wolola Nii Senuman barika la, o fana bɛ ten.”

⁹Nikodɛmu y'a fɔ ko: “Uun! O koow bɛ se ka kɛ cogo di?”

¹⁰Yezu y'a jaabi ko: “I ye Isirayɛli karamɔgɔ dɔ ye, e ma o lɔn wa?

¹¹Tinyɛ tinyɛ na, ne b'a fɔ i ye ko an bɛ koo min lɔn, an b'o le fɔ. An ye koo min ye, an bɛ lɔ n'o le seereya ye. Aw do tɛ sɔn o ma.

¹²Ne bɛ dinyɛ koow fɔra aw ye, aw tɛ lara o la. Ni ne ye arijana koow fɔ aw ye, aw bɛna la o la cogo di?

¹³Mɔgɔ si ma yɛlɛ ka taa arijana na fɔɔ Mɔgɔ Dencɛ min bɔra o yɔrɔ la.

¹⁴“Ayiwa, Musa ye saa nigɛlaman kɔrɔ ta sanfɛ lɔgɔ kan cogo min na kongokolon kɔnɔ, fɔɔ Mɔgɔ Dencɛ fana kɔrɔ ka ta ten,

¹⁵waasa ni mɔgɔ min y'a jigi la a kan, o tigi ka hɛrɛ banbali sɔrɔ.

¹⁶Ala ye dinyɛ kanu haali, fɔɔ a y'a Deen kelenpe ci mɔgɔw ma, waasa ni mɔgɔ min y'a jigi la a kan, o tigi kana halaki, nga o ka hɛrɛ banbali sɔrɔ.

¹⁷Ala m'a Dencɛ ci dinyɛ na waasa ka mɔgɔw jalaki, nga waasa k'u kisi le.

¹⁸Ni mɔgɔ min y'a jigi la a kan, o tigi kisira kiti ma, nga ni min m'a jigi la a kan, o tigi jalakira ka ban bari a ma sɔn ka la Ala Dencɛ kelenpe nin na.

¹⁹U jalakira ka ban bari yeelen bɔra dinyɛ mɔgɔw ye. O bɛɛ n'a ta, dibi koo diyara u ye ka tɛmɛ yeelen kan. Bari u ka kɛwaliw man nyi.

²⁰O ye wajibi ye, bari yeelen koo man di kojugukɛla ye, a bɛ siran k'a ka kɛwaliw kɛ kɛnɛ kan, bari, u bɛna ale ye.

²¹Nga mɔgɔnyuman b'a ta kɛ yeelen na, waasa mɔgɔw k'a ka kɛwalinyumanw ye, a b'o minw kɛ Ala sago la.”

²²O tɛmɛnin kɔ, Yezu n'a ka kalandenw nana to Zude mara la. A tun bɛ mɔgɔw batize.

²³Zan fana tun bɛ mɔgɔw batizera Ayinɔn, o ni Salimu man jan. Jii tun ka ca o yɔrɔ la. Mɔgɔw tun bɛ na batize yen.

²⁴O y'a sɔrɔ u tun ma Zan minɛ k'a don kaso la fɔlɔ.

²⁵Loon dɔ la, sɔsɔli wilila Zan ka kalanden dɔw ni Zuwifu dɔ cɛ ka taa saniyako faan fɛ ka kɛnyɛ ni landa ye.

²⁶U taara Zan sɛgɛrɛ k'a fɔ a ye ko: “Karamɔgɔ, cɛɛ min tun bɛ n'i ye Zurudɛn baa kɔfɛ dɛ, fɔɔ e tun y'o min koo fɔ, a b'a la fana ka mɔgɔw batize, bɛɛ bɛ taara ale kɔ.”

²⁷Zan y'u jaabi ko: “Adamaden tɛ se ka foyi sɔrɔ ni Ala m'a d'a ma.

²⁸Ne y'a fɔ tuma min na ko ne tɛ Ala ka Mɔgɔ wolomanin nin ye, ko ne cira a nya le, aw ye ne seerew ye.

²⁹Kɔnyɔmuso ye kɔnyɔcɛ ta le ye. Nga kɔnyɔcɛ tericɛ bɛ lɔ gɛrɛfɛ le, ka to ka mɛnni kɛ a fɛ. A nisɔn bɛ diya bari a bɛ mɛnni kɛra kɔnyɔcɛ fɛ. O nisɔndiya nyɔgɔn le bɛ n na. N nisɔn ka di kosɛbɛ.

³⁰Wajibi lo, ale ka kunkɔrɔta sɔrɔ, ne ka dɔgɔya.

³¹“Mɔgɔ min bɔra sankolo la, o tigi bɛ fɛɛn bɛɛ kunna. Min bɛ dugukolo kan, o ye dinyɛ mɔgɔ le ye, o bɛ dinyɛ koow le fɔ. Mɔgɔ min bɔra arijana na,

³²a ye min ye, ka min mɛn, a b'o le fɔ. Nga adamadenw tɛ sɔn o le ma.

³³Ni mɔgɔ min lara a ka kuma fɔninw na, o tigi b'a yira ko Ala ye tinyɛtigi ye.

³⁴Ala ye mɔgɔ min ci, o tigi bɛ Ala ka kuma yɛrɛ le fɔ bari Ala bɛ Nii Senuman d'a ma, daan tɛ o min dili la.

³⁵Faa b'a Deen kanu fɔɔ a ye fɛɛnw bɛɛ don a bolo.

³⁶Ni mɔgɔ min y'a jigi la Ala Deen kan, o tigi ye hɛrɛ banbali sɔrɔ ka ban. Nga ni mɔgɔ min ma sɔn k'a jigi la a Deen kan, o tigi tɛna sini hɛrɛ sɔrɔ, Ala bɛn'a tɔɔrɔ kosɛbɛ.”