Read LAYIDUKURA ZAN 5 Bible Online

ZAN 5 - LAYIDUKURA bible

ZAN 5

¹O tɛmɛnin kɔ, Zuwifuw ka nyanagwɛ dɔ tun bɛ kɛra Zeruzalɛmu. Yezu taara yen.

²U bɛ don ni sagaw ye daa min fɛ dugu kɔnɔ, o gɛrɛfɛ, jii lɔyɔrɔ dɔ tun bɛ yen, u b'o yɔrɔ nin wele eburukan na ko Bɛtizata. U y'a yɔrɔ nin lɔ ka bolonda duuru kɛ a la.

³O bolon nunu kɔnɔ, banabagatɔw tun bɛ la yen caaman: finyɛntɔw, senkelenninw, ani murukuw. [U tun bɛ la yen ka jii magamagatuma kɔnɔ.

⁴Bari tuma dɔ, Matigi ka mɛlɛkɛ dɔ tun bɛ jigi ka jii lamaga. Ni banabagatɔ min kɔnna ka jigi jii la a maganin kɔ, o tigi bɛ kɛnɛya, hali n'a ka bana tun bɛ cogo o cogo.]

⁵Cɛɛ dɔ tun bɛ yen, ale saan bi saba ni seegi tun lo a ka bana na.

⁶Yezu ye cɛɛ lanin ye, k'a lɔn ko a banatuma mɛnna kosɛbɛ. Yezu ye cɛɛ nyininga ko: “I b'a fɛ ka kɛnɛya wa?”

⁷A y'a jaabi ko: “Matigi, mɔgɔ tɛ n fɛ n'a bɛ n ta ka n jigi jii la a magamagawaati la. Sanni ne b'a fɔ ko n bɛ dɛmɛdɛmɛ ka jigi, dɔ bɛ kɔn ka jigi ne nya.”

⁸Yezu y'a fɔ a ye ko: “Wili k'i ka dilan ta ka taama.”

⁹O yɔrɔnin bɛ, cɛɛ kɛnɛyara, a wilila k'a ka dilan ta ka to ka taama. O loon nin tun ye lafinyɛlon ye.

¹⁰O la, Zuwifuw ka nyamɔgɔw y'a fɔ cɛɛ ye ko: “Cɛɛ, bii ye lafinyɛlon ye, a ma daga k'i ka dilan ta ka taa.”

¹¹Nga a y'u jaabi ko: “Cɛɛ min ye ne kɛnɛya, ale le ko ne ka n ka dilan ta ka taa dɛ!”

¹²U y'a nyininga ko: “Jon le y'a fɔ i ye ko i k'i ka dilan ta ka taa?”

¹³Nga mɔgɔ min tun ye cɛɛ kɛnɛya, a tun m'o lɔn. Bari Yezu yɔrɔ tun janfara o yɔrɔ jama na.

¹⁴O kɔ, Yezu ye cɛɛ kunbɛn Alabatosoba kɔnɔ, a y'a fɔ a ye ko: “Ayiwa, i kɛnɛyara sisan, i kana kojugu wɛrɛ kɛ tugu waasa o sara kana juguya ni fɔlɔta ye.”

¹⁵Cɛɛ taar'a fɔ Zuwifuw ye ko a kɛnɛyabaga ye Yezu le ye.

¹⁶Kabini o tuma na, Zuwifuw tun bɛ Yezu darabɔ, bari a tun ye koo nin kɛ lafinyɛlon na le.

¹⁷Nga Yezu y'a fɔ u ye ko: “N Faa bɛ baara la halibi, o la, ne fana b'a kɛ.”

¹⁸O kama, Zuwifuw tun b'a nyini jagoya la janko k'a faga. Lafinyɛlon labatobaliya dama tun t'a kuun ye. Nga u ko a bɛ Ala wele ko ale Faa, ani ko a b'a yɛrɛ suma ni Ala ye.

¹⁹O la, Yezu ye kuma ta k'a fɔ u ye ko: “Tinyɛ tinyɛ na, ne b'a fɔ aw ye ko Deen tɛ se ka foyi kɛ a yɛrɛ ma. A b'a Faa ka kɛta le filɛ. Ni Faa ye fɛɛn o fɛɛn kɛ, Deen fana b'o nyɔgɔn kɛ.

²⁰Bari Deen koo ka di a Faa ye, o la a b'a ka koo kɛta bɛɛ yira a la. A bɛna dɔ wɛrɛw yɛrɛ yira a la minw bɛ tɛmɛ nunu kan fɔɔ aw yɛrɛ bɛna kabakoya.

²¹N Faa bɛ suuw kunun ka nii di u ma cogo min na, o cogo kelen na, a Deen fana bɛ nii di a diyanamɔgɔw ma.

²²N Faa tɛna mɔgɔ si kiti. Bari a ye kitiko bɛɛ to a Deen bolo,

²³waasa bɛɛ k'a Deen bonya i n'a fɔ u bɛ Faa bonya cogo min na. Ni mɔgɔ min m'a Deen bonya, o tigi ma Faa fana bonya, o min y'a cibaga ye.

²⁴Tinyɛ tinyɛ na, ne b'a fɔ aw ye ko ni mɔgɔ min ye n ka kuma lamɛn ka la n cibaga la, o tigi ye hɛrɛ banbali sɔrɔ. A tɛna kiti, a niin bɔra saya la ka don hɛrɛ la ka ban.

²⁵Tinyɛ tinyɛ na, ne b'a fɔ aw ye ko waati dɔ bɛna se. A yɛrɛ sera ka ban. Suuw bɛna mɛnni kɛ n fɛ. N'u minw ye n ka kuma mɛn, Ala bɛna nii d'u ma.

²⁶N Faa ye nii tigi ye, o la, a ye nii diko see di a Dencɛ fana ma.

²⁷A ye kiti tigɛko see d'a ma, bari Mɔgɔ Dencɛ lo.

²⁸Ayiwa, o kana aw kabakoya. Waati dɔ bɛna se, suuw bɛna ne kaan mɛn.

²⁹U bɛna kunun. Minw tun bɛ nyuman kɛ, olu bɛna kunun ka sini hɛrɛ sɔrɔ. Kojugukɛlaw bɛna kunun kiti kama.

³⁰Ne tɛ se ka foyi kɛ n yɛrɛ ma. Ne bɛ min mɛn, ne bɛ kiti tigɛ ka kɛnyɛ n'o le ye. Ne ka kiti fana tilennin lo. Bari ne tɛ n yɛrɛ sago kɛra fɔɔ ne cibaga sago.”

³¹Yezu y'a fɔ ko: “N'a tun kɛra ko ne yɛrɛ le bɛ n yɛrɛ koo fɔra, o tinyɛ yɔrɔ tun tɛ lɔn.

³²Nga mɔgɔ wɛrɛ le ye ne seere ye. Ale bɛ min fɔ n koo la, o ye tinyɛ yɛrɛ le ye.

³³Aw tun ye mɔgɔw ci Zan fɛ k'a nyininga. A ye tinyɛ fɔ aw ye ne koo la.

³⁴A ma kɛ ko ne mako bɛ adamaden ka seereya la. Nga ne bɛ kuma ten waasa aw ka kisi.

³⁵Zan kɛra lanpan ye min bɛ yeelen bɔ. Aw tun b'a fɛ ka nisɔndiya a ka yeelen fɛ waatinin kɔnɔ.

³⁶Ayiwa, seere wɛrɛ bɛ ne la, min ka seereya ka bon ni Zan ta ye. N Faa ye baara minw di ne ma, ne bɛ olu minw kɛ, o le b'a yira ko Faa ye ne ci.

³⁷N Faa min ye ne ci, ale fana bɛ ne koo fɔ. Nga aw ma deli k'a ka kuma lamɛn, ani min b'a yira aw la, aw m'o lɔn.

³⁸A ka kuma sigiyɔrɔ tɛ aw dusu la fana, bari a ye min ci, aw lanin tɛ ale la.

³⁹Aw bɛ to ka Ala ka kuma kalan kosɛbɛ bari aw bɛ miiri ko aw bɛna sini hɛrɛ sɔrɔ o kalan fɛ. K'a sɔrɔ o sɛbɛ nunu bɛ ne le koo fɔ.

⁴⁰Aw do t'a fɛ ka la ne la waasa ka sini hɛrɛ sɔrɔ.

⁴¹Ne ka bonya sɔrɔ, o tɛ bɔ adamadenw fɛ.

⁴²Ne b'aw lɔn, aw tɛ Ala kanu sa.

⁴³Ne nana n Faa Ala tɔgɔ la, nga aw ma sɔn ne ma. Ni mɔgɔ dɔ nana a yɛrɛ tɔgɔ la sisan, aw bɛ sɔn ale ma.

⁴⁴Aw bɛ se ka la ne la cogo di? Aw minw b'aw ka bonya sɔrɔ aw adamaden nyɔgɔnw le fɛ, sanni aw k'o nyini Ala kelen fɛ.

⁴⁵Aw kan'a miiri ko ne lo bɛna aw jalaki kiti tigɛlon na n Faa nyakɔrɔ dɛ! Aw jalakibaga ye Musa le ye, aw y'aw jigi la ale min kan.

⁴⁶N'aw tun lara Musa la, aw tun bɛna la ne la. Bari Musa ye ne le koo fɔ a ka sɛbɛ kɔnɔ.

⁴⁷A ye min sɛbɛn, n'aw ma la o la, ne bɛ min fɔra, aw bɛna se ka la o la cogo di?”