Read LAYIDUKURA ZAN 6 Bible Online

ZAN 6 - LAYIDUKURA bible

ZAN 6

¹O kɔ, Yezu tɛmɛna Galile baa faan dɔ fɛ, min bɛ wele fana ko Tiberiyadi baa.

²Jamaba tugur'a kɔ bari u tun b'a ye n'a bɛ kabakow kɛ ka banabagatɔw kɛnɛya.

³O la, Yezu yɛlɛla ka sigi kulu dɔ kan, ale n'a ka kalandenw.

⁴O y'a sɔrɔ Hɔrɔnya nyanagwɛ tun surunyana, o min ye Zuwifuw ka nyanagwɛ ye.

⁵Yezu ko a bɛ filɛli kɛ, a ye jamaba natɔ ye a fɛ, a y'a fɔ Filipi ye ko: “Filipi, an bɛna taa dumuni san min k'a di jama nin ma waasa u bɛɛ ka se ka fa?”

⁶A kumana ten waasa ka Filipi kɔrɔbɔ le. N'o tɛ, ale tun bɛna min kɛ, a tun b'o lɔn.

⁷Filipi y'a jaabi ko: “Hali n'an taara deniye wari kɛmɛ fila buru san, u bɛɛ tɛna dɔɔni dɔɔni sɔrɔ.”

⁸Simɔn Piyɛri dɔgɔcɛ Andere n'o y'a ka kalandenw dɔ ye, ale y'a fɔ a ye ko:

⁹“Cɛdennin dɔ bɛ yan ni burukun duuru ni jigɛmisɛn deen fila ye. Nga o bɛ mun nya nunu ma?”

¹⁰Yezu y'a fɔ a ka kalandenw ye k'u k'a fɔ mɔgɔw ye u ka sigi. Biin tun ka ca o yɔrɔ la. U sigira, cɛɛw tun ye mɔgɔ waa duuru nyɔgɔn ye.

¹¹O tuma na, Yezu ye buru nunu ta ka barika la Ala ye k'u tilan mɔgɔw cɛ. A ye jigɛ nunu fana kɛ ten. U bɛɛ ye sɔrɔli kɛ fɔɔ ka wasa.

¹²U bɛɛ fara minkɛ, Yezu y'a fɔ a ka kalandenw ye ko: “Aw ye buru tɔɔ bɛɛ tɔmɔ a si kana cɛn.”

¹³O la, u ye buru tɔɔ cɛ ka segi tan ni fila fa n'o ye.

¹⁴Mɔgɔw y'o kabako nin ye minkɛ, u ko: “Kiraba min ka kan ka na dinyɛ na dɛ, nin yɛrɛ lo!”

¹⁵Nga, Yezu y'a lɔn k'u b'a fɛ k'ale minɛ ka sigi masaya la minkɛ, a dogora ka segi ka yɛlɛ kulu kan tugu a kelen.

¹⁶Tile banna, Yezu ka kalandenw jigira jida la.

¹⁷U ye kurun dɔ ta k'u kuun sin Kafaranamu faan fɛ. Suu tun kora ka ban nga Yezu tun ma kɔsegi u fɛ.

¹⁸Fɔnyɔba dɔ wilila, jii tora ka kurukuru.

¹⁹U tun ye kilo duuru walima wɔɔrɔ nyɔgɔn taama ka ban ni kurun ye. U ye Yezu taamatɔ ye jii kan ka gwɛrɛ u ka kurun na. U siranna kosɛbɛ.

²⁰Nga Yezu y'a fɔ u ye ko: “Aw kana siran, ne lo.”

²¹U k'u b'a ta dɔrɔn, u y'a ye k'u sera badagolo la u tun bɛ taara yɔrɔ min na.

²²O dugusagwɛ, ka jama to baa kɔ, u nana bɔ a kala ma ko kurun kelen dama le tun bɛ yen, kalandenw dɔrɔn le tun donna o kɔnɔ ka taa. Yezu tun ma taa n'u ye.

²³Matigi ye barika la Ala ye ka buru caya k'a di mɔgɔw ma yɔrɔ min na, kurun dɔw bɔra Tiberiyadi ka na se o yɔrɔ.

²⁴Jama nan'a ye ko Yezu n'a ka kalandenw si tɛ o kurun nunu kɔnɔ. O la, u donna u kɔnɔ ka taa Yezu yɔrɔ nyini Kafaranamu.

²⁵U taar'a ye baa kɔ tuma min na, u y'a nyininga ko: “Karamɔgɔ, i sera yan tuma jumɛn?”

²⁶Yezu y'u jaabi ko: “Tinyɛ tinyɛ na, ne b'a fɔ aw ye ko ne ye kabako minw kɛ aw nyana, aw tɛ ne yɔrɔ nyinina olu kɔsɔn, nga aw bɛ ne yɔrɔ nyinina bari aw ye buru sɔrɔ k'a nyimi fɔɔ ka fa a la.

²⁷Aw kana baara kɛ dumuni tolita kɔsɔn dɛ! Nga dumuni min tɛ cɛn, aw ye baara kɛ o le kɔsɔn, o min bɛ sini hɛrɛ di. O dumuni nin, Mɔgɔ Dencɛ bɛna o d'aw ma. A Faa Ala y'a ka taamasinyɛ bila ale kan.”

²⁸U y'a nyininga ko: “An ka kan ka mun le kɛ, waasa ka Ala sago kɛ?”

²⁹Yezu y'u jaabi ko: “Ala ye min ci, fɔɔ aw ka la ale la. O le ye Ala sago ye.”

³⁰Olu y'a nyininga ko: “I bɛ se ka kabako jumɛn kɛ k'a yira an na, waasa an bɛ la i la? I bɛna mun kɛ?

³¹An faaw ye maanɛ dumu kongokolon kɔnɔ, i n'a fɔ a fɔra Ala ka kuma na cogo min na ko: ‘A ye dumuni di u ma, o min bɔra sankolo la.’ ”

³²Yezu y'a fɔ u ye ko: “Tinyɛ tinyɛ na, ne b'a fɔ aw ye ko min ye dumuni di aw ma ka bɔ sankolo la, o tɛ Musa ye. N Faa le b'a yɛrɛyɛrɛ di aw ma ka bɔ sankolo la.

³³Bari Ala bɛ dumuni min di, o bɔra sankolo la min bɛ nii kura don dinyɛ mɔgɔw la.”

³⁴U y'a fɔ Yezu ye ko: “Matigi, to k'o dumuni nin di an ma tuma bɛɛ kɛ!”

³⁵Yezu ko u ma: “Ne le ye dumunifɛn ye min bɛ nii kura don mɔgɔ la. Ni mɔgɔ min sɔnna ne ma, kɔngɔ t'o tigi minɛ tugu. Ni min lara ne la, minnɔgɔ t'o tigi minɛ tugu.

³⁶Ne tun kɔnna k'a fɔ aw ye, aw y'a ye nga aw ma la ne la.

³⁷Ni n Faa ye mɔgɔ o mɔgɔ di ne ma, o bɛna la ne la, ne fana tɛna ban o tigi la.

³⁸Ne bɔra sankolo la ka na dinyɛ na n cibaga sago kɛli kama, n'o tɛ ne ma na n yɛrɛ sago kama.

³⁹Ne cibaga sago ye jumɛn ye? A ye mɔgɔ minw di ne ma, ne kan'a to u si ka tunu. Nga ko ne k'u bɛɛ kunun dinyɛ labanlon na.

⁴⁰N Faa ko ni mɔgɔ o mɔgɔ ye ne ye k'a jigi la ne kan, k'o tigi bɛna sini hɛrɛ sɔrɔ. Ne fana bɛn'a kunun labanlon na.”

⁴¹K'a ta o tuma na, Zuwifuw tora ka ;nunu;nunu a koo la, bari a tun ko ale ye dumunifɛn ye min bɔra sankolo la.

⁴²U tora k'a fɔ ko: “O tuma na Yusufu dencɛ Yezu tɛ wa? An b'a faa lɔn, k'a baa lɔn! A bɛ se k'a fɔ sisan cogo di ko ale bɔra sankolo la?”

⁴³Yezu ye kuma ta tugu k'a fɔ u ye ko: “Aw ye ;nunu;nunu dabila aw ni nyɔgɔn cɛ.

⁴⁴Mɔgɔ si tɛ se ka sɔn ne ma ni n Faa sababu tɛ. Ne fana bɛna o tigi kunun labanlon.

⁴⁵A sɛbɛnnin bɛ kiraw ka kitabuw kɔnɔ ko: ‘Ala bɛna u bɛɛ ladi.’ Ayiwa, mɔgɔ o mɔgɔ ye mɛnni kɛ Faa Ala fɛ ka sɔn a ta ma, olu bɛɛ bɛ la ne la.

⁴⁶Mɔgɔ si nyaa ma deli ka la Faa Ala kan, fɔɔ min bɔra a fɛ ka na, ale lo y'a ye.

⁴⁷Tinyɛ tinyɛ na, ne b'a fɔ aw ye ko ni min lara ne la, o tigi ye hɛrɛ banbali sɔrɔ.

⁴⁸Ne ye dumunifɛn ye min bɛ hɛrɛ banbali di mɔgɔw ma.

⁴⁹Aw faaw ye maanɛ dumu kongokolon kɔnɔ, u bɛɛ ma sa wa?

⁵⁰Nga dumuni min bɛ bɔ sankolo la, ni min y'o dumu, o tigi tɛ sa abada.

⁵¹“Dumuni nyanaman min bɔra sankolo la, ne lo. Ni min y'o dumu, o tigi bɛ to nii na tuma bɛɛ. Ne bɛna dumuni min di, o ye ne fari yɛrɛ le ye. Ne bɛ n yɛrɛ di waasa dinyɛ ka se ka hɛrɛ banbali sɔrɔ.”

⁵²Zuwifu nunu tora ka nyɔgɔn sɔsɔ kosɛbɛ ka to k'a fɔ ko: “Nin bɛ se k'a fari di anw ma cogo di k'a dumu?”

⁵³O tuma na, Yezu y'a fɔ u ye ko: “Tinyɛ tinyɛ na, ne b'a fɔ aw ye ko n'aw ma Mɔgɔ Dencɛ farisogo dumu k'a joli min, aw tɛna hɛrɛ banbali sɔrɔ.

⁵⁴Ni mɔgɔ min ye ne farisogo dumu ka ne joli min, o tigi bɛna hɛrɛ banbali sɔrɔ, ne b'o tigi kunun labanlon na.

⁵⁵Bari ne farisogo ye dumunifɛnsɛbɛ ye, ne joli ye minnifɛnsɛbɛ ye.

⁵⁶Ni mɔgɔ min ye ne farisogo dumu ka ne joli min, ne bɛ to o tigi fɛ, o tigi fana bɛ to ne fɛ.

⁵⁷N Faa ye ne ci, ale ye nii tigi ye, ne bɛ nii na ale barika la, o cogo la, ni min ye ne sɔrɔ dumuni ye, o tigi fana bɛna to nii na ne barika la.

⁵⁸Dumuni min bɔra sankolo la, ne lo. Aw faaw ye dumuni min kɛ kongokolon kɔnɔ, u bɛɛ nana sa, ne ta n'o tɛ kelen ye. Ni min ye ne ta nin dumu, o tigi bɛ to nii na tuma bɛɛ.”

⁵⁹Yezu ye mɔgɔw kalan ni kuma nunu ye Alabatoso dɔ kɔnɔ Kafaranamu.

⁶⁰O kuma nunu mɛnnin kɔ, a ka kalandenw caaman y'a daminɛ k'a fɔ ko: “A ka kuma nunu ka gwɛlɛ dɛ! Jon bɛ se ka sɔn o ma?”

⁶¹Yezu y'a lɔn ko a ka kalandenw bɛ ;nunu;nununa a ka kuma koo la minkɛ, a y'u nyininga ko: “O ka gwɛlɛ aw fana ma wa?

⁶²Aw bɛna kɛ cogo di n'aw ye Mɔgɔ Dencɛ yɛlɛtɔ ye a bɔyɔrɔ la?

⁶³Nii Senuman le b'a to mɔgɔ bɛ barika sɔrɔ, n'o tɛ n'a danna farisogo ta ma, o tɛ foyi ye. Ne ye kuma minw fɔ aw ye, o bɛ bɔ Nii Senuman fɛ ka nii don mɔgɔ la.

⁶⁴Nga dɔw bɛ aw cɛma minw tɛ lara ne la.” Kabini koow daminɛwaati la, Yezu tun b'o tigiw lɔn. Min tun bɛn'a don mɔgɔjuguw bolo fana, a tun b'o fana lɔn ka ban.

⁶⁵Yezu y'a fɔ tugu ko: “O le y'a to ne tun y'a fɔ aw ye ko mɔgɔ si tɛ se ka sɔn ne ma ni n Faa sababu tɛ.”

⁶⁶Kabin'o tuma, a ka kalandenw caaman segira kɔ, u tun tɛ tugura a kɔ tugu.

⁶⁷O la, a y'a ka ciden tan ni fila nunu nyininga ko: “Aw fana b'a fɛ ka taa wa?”

⁶⁸Simɔn Piyɛri y'a jaabi ko: “An bɛna taa jon fɛ? Mɔgɔ bɛ hɛrɛ banbali sɔrɔ ele ka kuma barika la.

⁶⁹Anw kɔni lara e la, an y'a lɔn fana ko i ye Ala ka mɔgɔnyuman ye a ye min ci.”

⁷⁰Yezu y'a fɔ u ye ko: “Ne m'aw mɔgɔ tan ni fila woloma wa? O bɛɛ n'a ta, mɔgɔ kelen b'aw cɛma min ye Sutana ye.”

⁷¹O kuma nin tun sinnin bɛ Simɔn Isikariyɔti deen Zuda le ma, ale min tun ye ciden tan ni fila nunu dɔ ye, min tun bɛna Yezu don mɔgɔjuguw bolo.