Read LAYIDUKURA ZAN 7 Bible Online

ZAN 7 - LAYIDUKURA bible

ZAN 7

¹O kɔ, Yezu tora ka Galile mara yaalayaala. A tun t'a fɛ ka taa Zude mara yaala, bari o yɔrɔ Zuwifuw tun b'a fɛ k'a faga.

²O bɛɛ n'a ta, Zuwifuw ka Sumanladon nyanagwɛ tun surunyana ka ban,

³a dɔgɔninw y'a fɔ a ye ko: “Bɔ yan ka taa Zude, waasa i ka kalandenw k'i ka kabako kɛtaw ye fana.

⁴N'i b'a fɛ mɔgɔw k'i lɔn, e t'i ka kɛwaliw kɛ dogo la. I bɛ kabakow kɛ cogo min na, taa i yɛrɛ yira dinyɛ na.”

⁵O y'a sɔrɔ a dɔgɔninw yɛrɛ tun ma la a la.

⁶Yezu y'u jaabi ko: “Ne ka waati ma se ban. Aw kɔni, waati bɛɛ ka nyi aw fɛ.

⁷Adamadenw kɔni tɛ se k'aw kɔniya. Nga u bɛ ne kɔniya, bari ne bɛ to k'a fɔ ko u ka kɛwaliw ka jugu.

⁸Aw yɛrɛ ka taa o nyanagwɛ nin na, ne kɔni tɛna taa, bari ne ka waati ma se fɔlɔ.”

⁹A y'o kuma nunu fɔ ka ban, a tora Galile yen.

¹⁰Nga a dɔgɔninw taanin kɔ nyanagwɛ la Zude, a fana ye sira ta, a ma sɔn mɔgɔ k'a ye. A taara yen dogo la.

¹¹Zuwifuw tun bɛ Yezu yɔrɔ nyinina nyanagwɛ tuma na. U tun b'a fɔ ko: “A yɛrɛ bɛ min le sa?”

¹²Mɔgɔw tun bɛ nyɔgɔn sɔsɔra kosɛbɛ a koo la. Dɔw ko mɔgɔnyuman lo, nga dɔw ko jama kunnacɛnbaga lo.

¹³Nga mɔgɔ si tun tɛ se k'a koo fɔ u kuun fɛ ten, bari u tun bɛ siran Zuwifuw ka nyamɔgɔw nya.

¹⁴K'u to nyanagwɛ la a tile naaninan loon nyɔgɔn, Yezu taara Alabatosoba kɔnɔ k'a daminɛ ka mɔgɔw kalan.

¹⁵Zuwifuw kabakoyara kosɛbɛ, u tora k'a fɔ ko: “A kɛra cogo di ka lɔnniya sɔrɔ ten, a do ma kalan mɔgɔ si fɛ.”

¹⁶Yezu y'u jaabi ko: “Ne bɛ mɔgɔw kalan koo minw na, u ma bɔ ne fɛ, u bɔra ne cibaga le fɛ.

¹⁷Mɔgɔ min b'a fɛ ka Ala sago kɛ, o tigi bɛn'a lɔn ko ne ka kalan bɛ bɔ Ala fɛ, ko ne yɛrɛ ka kuma tɛ.

¹⁸Mɔgɔ min b'a yɛrɛ koo fɔ, o b'a yɛrɛ tandoyɔrɔ le nyini. Nga min b'a cibaga koo fɔ, janko ka bonya l'a kan, ale ye tinyɛfɔla ye, dibidibi foyi t'o tigi ka kuma na.

¹⁹Musa le ma sariya di aw ma wa? K'a sɔrɔ aw si t'o sariya labato. Mun na aw b'a fɛ ka ne faga?”

²⁰Mɔgɔw y'a jaabi ko: “E ye jinatɔ le ye. Jon le b'a fɛ k'i faga?”

²¹Yezu y'u jaabi ko: “Ne ye koo kelen kɛ, o y'aw bɛɛ dabari ban.

²²Musa ye kɛnɛkɛnɛ sariya fɔ aw ye (k'a sɔrɔ a ma daminɛ ale ma dɛ, nga a bɔra an faaw le fɛ.) Ayiwa, aw bɛ deenw kɛnɛkɛnɛ lafinyɛlon na.

²³Ka mɔgɔ kɛnɛkɛnɛ lafinyɛlon na, n'o tɛ Musa ka sariya cɛn, mun na aw bɛ dimi ne kɔrɔ ko ne ye mɔgɔ kɛnɛya lafinyɛlon na?

²⁴Aw kana koo yeta dama filɛ ka mɔgɔ jalaki. Nga, aw k'o kɛ ni tilenninya ye.”

²⁵Zeruzalɛmuka dɔw tun b'a fɔra ko: “U tɛ cɛɛ nin le fagayɔrɔ nyinina wa?

²⁶A do ye n'a bɛ kumana kɛnɛ kan u do tɛ foyi fɔra a ye. Yala an ka siya nyamɔgɔw y'a lɔn sisan ko ale le ye Ala ka Mɔgɔ wolomanin nin ye wa?

²⁷Anw kɔni bɛ nin bɔyɔrɔ lɔn. K'a sɔrɔ ni Ala ka Mɔgɔ wolomanin nin nana, mɔgɔ tɛn'a bɔyɔrɔ lɔn.”

²⁸O y'a sɔrɔ Yezu tun bɛ mɔgɔw kalanna Alabatosoba kɔnɔ, a y'u jaabi ko: “Tinyɛ na, aw bɛ ne lɔn, aw bɛ n bɔyɔrɔ fana lɔn! K'a sɔrɔ ne ma na n yɛrɛ ma. Ne cibaga ye tinyɛtigi ye, aw tɛ ale lɔn.

²⁹Nga ne bɛ ale lɔn bari n bɔra ale le fɛ, ale fana le ye ne ci.”

³⁰O tuma na, u tun b'a fɛ k'a minɛ, nga mɔgɔ si ma se ka maga a la, bari a ka waati tun ma se fɔlɔ.

³¹O bɛɛ n'a ta, jama cɛma, caaman lara a la, u tora k'a fɔ ko: “Ni Ala ka Mɔgɔ wolomanin nin nana tuma min na, yala a bɛna kabako dɔ wɛrɛw kɛ ka tɛmɛ cɛɛ nin ta kan wa?”

³²Mɔgɔw tun bɛ Yezu koo ;nunu;nununa jama cɛma fɔɔ ka ta'a bila Farizinyɛw tulo la. Olu ni sarakalasebagaw kuntigiw ye Alabatosoba kɔlɔsibagaw ci k'u ka taa Yezu minɛ.

³³Yezu y'a fɔ jama ye ko: “Waati dɔɔni le tora ne bɛna min kɛ n'aw ye, o kɔ, ne bɛ segi n cibaga fɛ.

³⁴Aw bɛna ne yɔrɔ nyini ka dɛsɛ, aw tɛna ne ye. Bari ne bɛna to yɔrɔ min na, aw tɛna se ka na yen.”

³⁵Zuwifuw tora k'a fɔ u ni nyɔgɔn cɛ ko: “Nin bɛna se ka taa yɔrɔ jumɛn n'anw bɛn'a yɔrɔ nyini ka dɛsɛ? An ka siya minw jɛnsɛnnin bɛ siya wɛrɛw cɛma, a bɛna taa olu le fɛ ka siya wɛrɛw kalan wa?

³⁶A y'a fɔ ko an bɛna ale yɔrɔ nyini ka dɛsɛ ko an tɛna ale ye. Ani ko ale bɛna to yɔrɔ min na ko an tɛna se ka taa yen. O kɔrɔ ye mun ye?”

³⁷Sumanladon nyanagwɛ labanlon na, n'o y'a lonba ye, Yezu lɔra k'a fɔ jama ye ko: “Ni minnɔgɔ bɛ mɔgɔ min na, o tigi ka na ne fɛ ka jii min.

³⁸Ni mɔgɔ min lara ne la, o tigi kɔnɔ bɛna kɛ jinyuman buyiyɔrɔ ye i n'a fɔ a fɔra Ala ka kuma na cogo min na.”

³⁹Mɔgɔ minw bɛna la a la, olu bɛna Nii Senuman min sɔrɔ, a tun bɛ kuma o le koo la ten. Nii Senuman tun ma di fɔlɔ bari Yezu tun ma bonya sɔrɔ fɔlɔ.

⁴⁰Dɔw ye Yezu ka kuma nunu mɛn minkɛ, u tora k'a fɔ jama cɛma ko: “Tinyɛ na, nin le ye kiraba nin ye.”

⁴¹Dɔw ko: “Ala ka Mɔgɔ wolomanin lo.” Nga dɔw ko: “A ka kan ka bɔ Galile wa?

⁴²A ma fɔ Ala ka kuma na ko Ala ka Mɔgɔ wolomanin buruju bɛna bɔ masacɛ Dawuda la wa? N'o ka dugu ye Bɛtilehɛmu ye.”

⁴³Jama daa fɔnna nyɔgɔn kɔ ten Yezu kɔsɔn.

⁴⁴U dɔw tun b'a fɛ k'a minɛ, nga o si ma se ka maga a la.

⁴⁵Alabatosoba kɔlɔsibagaw nunu kɔsegira ka taa sarakalasebagaw kuntigiw ni Farizinyɛw fɛ. U y'u nyininga ko: “Mun na aw ma na n'a ye?”

⁴⁶U y'u jaabi ko: “Ii! Mɔgɔ ka kuma tɛ nya ka tɛmɛ nin ta kan!”

⁴⁷Farizinyɛw y'u nyininga ko: “Aw fana y'a to a sera aw kɔrɔ kɛ?

⁴⁸An ka siya nyamɔgɔw walima Farizinyɛw cɛma, jon le lar'a la?

⁴⁹Ni jama nin tɛ, olu tɛ Musa ka sariya lɔn do! U danganinw lo.”

⁵⁰Nikodɛmu min tun taara Yezu fɛ loon dɔ, n'ale ye Farizinyɛ nunu dɔ ye, ale y'a fɔ ko:

⁵¹“Ka kɛnyɛ ni sariya ye, an bɛ se ka mɔgɔ jalaki n'a tigi darakan ma mɛn wa? N'a ka kɛwali ma lɔn wa?”

⁵²U y'ale jaabi ko: “E fana ye Galileka ye wa? Ala ka kuma sɛgɛsɛgɛ kosɛbɛ, i bɛn'a ye ko kira si tɛ bɔ Galile mara la.” [

⁵³Mɔgɔ nunu bɛɛ tɛmɛna k'u ka soo siraw ta.