Read LAYIDUKURA ZAN 9 Bible Online

ZAN 9 - LAYIDUKURA bible

ZAN 9

¹Yezu tɛmɛtɔ ye cɛɛ dɔ ye min finyɛntɔman wolola.

²Kalandenw ye Yezu nyininga ko: “Karamɔgɔ, mun na cɛɛ nin finyɛntɔman wolola? Ale yɛrɛ ka kojugu kɔsɔn wa, walima a wolobagaw?”

³Yezu y'u jaabi ko: “Ale ka koo tɛ, a ka somɔgɔw fana ka koo tɛ. Nga nin kɛra, waasa Ala ka sebagaya ka yira o sababu la.

⁴Tile bɛ yen tuma min na, an ka kan ka n cibaga ka baara kɛ o waati la le. Yan ni dɔɔni, ni suu kora, baara tɛ se ka kɛ.

⁵Ka ne to dinyɛ nin na, ne le ye dinyɛ ka yeelen ye.”

⁶Yezu y'o kuma nunu fɔ ka ban minkɛ, a y'a daji tu duguma ka bɔgɔ nɔɔni n'o ye k'a mɔ finyɛntɔcɛ nyaa na

⁷k'a fɔ a ye ko: “Taa ko Silowe jii la.” (Silowe kɔrɔ ko ciraden.) Finyɛntɔ nin taara ko yen, a kɔsegitɔ, a tun bɛ yeli kɛra.

⁸A siginyɔgɔn minw tun y'a lɔn ka kɔrɔ saraka dali la, olu nan'a ye, u y'a fɔ ko: “Min tun bɛ sigi yan ka dalili kɛ ale tɛ wa?”

⁹Dɔw ko ale yɛrɛ lo. Dɔw ko ale tɛ, ko u bɔra nyɔgɔn fɛ le. Nga cɛɛ ko: “Ne yɛrɛ yɛrɛ lo.”

¹⁰U y'a nyininga ko: “Ɔnhɔn, i nyaa do yɛlɛla cogo di?”

¹¹A y'u jaabi ko: “U bɛ cɛɛ min wele ko Yezu, ale lo ye bɔgɔ kɛ ka n nyaa mɔ n'a ye ko n ka taa ko Silowe jii la. Ne taara ko, ne nyaa yɛlɛla.”

¹²U y'a nyininga ko: “A bɛ min?” A y'u jaabi ko ale m'a lɔn.

¹³Cɛɛ min tun ye finyɛntɔ ye, u y'ale minɛ ka taa n'a ye Farizinyɛw fɛ.

¹⁴K'a sɔrɔ lafinyɛlon tun lo Yezu ye bɔgɔ nɔɔni ka cɛɛ nyaa yɛlɛ n'a ye.

¹⁵Farizinyɛw fana ye cɛɛ nyininga ko a nyaa yɛlɛla cogo di. A y'u jaabi ko: “A ye bɔgɔ mɔ n nyaa na, n ye n nyaa ko, n bɛ yeli kɛ sisan.”

¹⁶Farizinyɛ nunu dɔw y'a fɔ ko: “Ale cɛtɔgɔ nin tɛ lafinyɛlon labato. O tuma na, a ma bɔ Ala fɛ.” Nga dɔw ko: “Kojugukɛla bɛ se ka kabako nin nyɔgɔn kɛ wa?” O yɔrɔ la, u daa fɔnna nyɔgɔn kɔ.

¹⁷U ye cɛɛ nyininga tugu ko: “Cɛɛ min y'i nyaa yɛlɛ wo, ele bɛ mun le fɔ a koo la?” A y'u jaabi ko: “Cɛɛ nin ye kira le ye.”

¹⁸O bɛɛ n'a ta, Zuwifuw ka nyamɔgɔw ma sɔn ka la a la ko cɛɛ nin tun ye finyɛntɔ ye ka kɔrɔ, fɔɔ u y'a ka somɔgɔw wele le.

¹⁹U y'a ka somɔgɔw nyininga ko: “Cɛɛ nin y'aw ka woloden ye wa? Aw ko a finyɛntɔman le wolola! A do kɛra di a bɛ yeli kɛ sisan?”

²⁰A wolobagaw y'u jaabi ko: “Anw kɔni y'a lɔn ko an deen lo, a fana finyɛntɔman le wolola.

²¹A nyaa yɛlɛko, an tɛ dɔ lɔn o la. Aw b'a yɛrɛ nyininga o koo la, denmisɛn tɛ, a ka kan ka se k'o nyafɔ aw ye.”

²²A wolobagaw kumana ten, bari u tun bɛ siran u ka siya nyamɔgɔw nya. Bari, u tun bɛnnin b'a la ko ni mɔgɔ o mɔgɔ y'a fɔ ko Yezu ye Ala ka Mɔgɔ wolomanin nin ye, k'o tigi seen tɛna don Alabatoso kɔnɔ tugu.

²³O kama, a wolobagaw y'a fɔ k'u k'a yɛrɛ nyininga, ko denmisɛn tɛ.

²⁴Farizinyɛw ye cɛɛ wele tugu k'a fɔ a ye ko: “Anw y'a lɔn ko i nyaa yɛlɛbaga nin ye kojugukɛla ye. Tinyɛ fɔ an ye Ala kama.”

²⁵A y'u jaabi ko: “Ne kɔni m'a lɔn ni kojugukɛla lo dɛ! Ne bɛ koo kelen dama lɔn, ne tun ye finyɛntɔ ye, nga sisan ne bɛ yeli kɛ.”

²⁶U y'a nyininga ko: “A ye mun le kɛ i la? A y'i nyaa yɛlɛ cogo di?”

²⁷Cɛɛ y'u jaabi ko: “Ne tun kɔnna k'o nyafɔ aw ye, aw m'aw tulo malɔ n fɛ. Mun na aw b'a fɛ k'o kuma kelen nin lamɛn tugu? Kɔni aw fana t'a fɛ ka kɛ a ka kalandenw ye dɛ!”

²⁸Farizinyɛw y'a daminɛ ka cɛɛ nɛni, u y'a fɔ a ye ko: “E le y'a ka kalanden ye. Anw kɔni ye Musa ka kalandenw ye.

²⁹An y'a lɔn ko Ala kumana Musa fɛ. Nga nin do, an m'a lɔn a bɛ bɔ yɔrɔ min na.”

³⁰Cɛɛ y'a fɔ u ye ko: “Aa, nin le ye kabako nin ye. Aw m'a bɔyɔrɔ lɔn k'a sɔrɔ a ye ne nyaa yɛlɛ.

³¹An kɔni b'a lɔn ko Ala tɛ kojugukɛla ka dalili jaabi. Nga mɔgɔ min bɛ siran Ala nya n'a b'a sago kɛ, a b'ale le jaabi.

³²An m'a mɛn ka ye fɔlɔ ko mɔgɔ min finyɛntɔman wolola, ko dɔ y'o nyaa yɛlɛ.

³³Ni cɛɛ nin tun ma bɔ Ala fɛ, a tun tɛna se ka foyi kɛ.”

³⁴U y'a fɔ a ma ko: “Ele bɛ kojugu la kabini e wolotuma, e bɛ na lɔ yan ko i b'an kalan!” U y'a gwɛn ka bɔ kɛnɛma.

³⁵Yezu y'a mɛn k'u y'a gwɛn minkɛ, a nan'a kunbɛn, a y'a nyininga ko: “I bɛ la Mɔgɔ Dencɛ la wa?”

³⁶Cɛɛ y'a jaabi ko: “Kɔrɔ, jon lo, waasa ne ka l'a la?”

³⁷Yezu ko: “I y'a ye ka ban. Ale le bɛ kumana i fɛ ten jaati.”

³⁸Cɛɛ ko: “Ne lara e la Matigi.” A y'a kunbiri gwan Yezu kɔrɔ.

³⁹O kɔ, Yezu ko: “Ne nana dinyɛ nin na kiti le kama. O la, minw nyaa tɛ yeli kɛ, olu nyaa ka yɛlɛ. Minw bɛ yeli kɛ, olu ka finyɛn.”

⁴⁰Farizinyɛ minw tun bɛ n'a ye o yɔrɔ la k'a ka kuma nin mɛn, olu y'a nyininga ko: “Anw fana ye finyɛntɔw ye wa?”

⁴¹Yezu y'u jaabi ko: “N'aw tun finyɛnnin lo, kojugu tun tɛna sɔrɔ aw kan. Nga aw b'a fɔ minkɛ ko aw bɛ yeli kɛ, o kama, aw ka kojugu b'aw kan.”