Read LAYIDUKURA KƐWALIW 12 Bible Online

KƐWALIW 12 - LAYIDUKURA bible

KƐWALIW 12

¹O waati la, masacɛ Erɔdi ye Krista kɔmɔgɔ dɔw minɛ k'u tɔɔrɔ.

²A ye Zan kɔrɔcɛ Yakuba kuun tigɛ.

³A y'a ye k'o diyara Zuwifuw ye minkɛ, a ye Piyɛri fana minɛ. (O kɛra Buru funubali nyanagwɛ waati la.)

⁴Piyɛri minɛnin kɔ, Erɔdi ye sɔlidasikulu naani bila a kɔlɔsili la, kulu kelen kelen bɛɛ mɔgɔ naani naani. Erɔdi tun ko ni Hɔrɔnya nyanagwɛ tɛmɛna, a tun bɛna bɔ ni Piyɛri ye k'a kiti jama nyana.

⁵Ka Piyɛri datugunin to kaso la, Ala ka jama kɔni tun bɛ Ala dalila a ye dɔrɔn.

⁶Erɔdi tun bɛna Piyɛri kiti sini nyɔgɔn. Sufɛ Piyɛri tun bɛ sinɔgɔra sɔlidasi fila cɛma, jɔrɔkɔw tun donnin b'a la, k'o siri sɔlidasi nunu na. O y'a sɔrɔ kɔlɔsilikɛbaga dɔw fana tun bɛ daa la.

⁷O tuma na Matigi ka mɛlɛkɛ dɔ donna, o yɔrɔnin bɛ, kasobon kɔnɔna bɛɛ sinna ka kɛ yeelenba ye. Mɛlɛkɛ ye Piyɛri gosi a gɛrɛn na ko a ka wili joona. Jɔrɔkɔ nunu tigɛra ka bɔ a bolow la o yɔrɔnin bɛ.

⁸Mɛlɛkɛ y'a fɔ a ye ko a k'a cɛɛ siri k'a ka sanbara don. Piyɛri sɔnna k'o kɛ. Mɛlɛkɛ y'a fɔ a ye tugu k'a ka fani don ka tugu ale kɔ.

⁹A bɔra ka tugu mɛlɛkɛ kɔ. O koo min tun bɛ kɛra, Piyɛri tun ma la a la k'o ye tinyɛ ye. A nyana ko ale bɛ sigora le.

¹⁰U nana tɛmɛ kɔlɔsilikɛbaga fɔlɔw, ni filananw na, nigɛkon bɛ daa min na n'o sinnin bɛ dugu kɔnɔna ma, u sera o ma, a yɛlɛla a yɛrɛ ma. U bɔra, u taara se sirakun dɔ la, mɛlɛkɛ tununa Piyɛri la.

¹¹Piyɛri hakili y'a sɔn tuma min na, a y'a fɔ ko: “Sisan, ne y'a lɔn ko tinyɛ lo Matigi y'a ka mɛlɛkɛ dɔ ci ka na ne bɔsi Erɔdi la, ka ne kisi Zuwifuw daa ma.”

¹²Mɔgɔw bɛ Zan min wele ko Mariki, Piyɛri nyaa yɛlɛla, a taara o bamuso ka soo. Mɔgɔ caaman lajɛnnin tun bɛ yen n'u bɛ Ala dalila.

¹³A ye bolonda kɔkɔ, sunguru dɔ tɔgɔ ko Ɔrɔdi, ale taar'a filɛ.

¹⁴A ye Piyɛri kumakan lɔn. Nisɔndiya fɛ, a yɛrɛ ma daa yɛlɛ, a bolila ka ta'a fɔ soo kɔnɔ mɔgɔw ye ko Piyɛri bɛ bolonda la.

¹⁵U ko a ma: “Faa le b'i la wa?” O bɛɛ n'a ta, sunguru nin ma sɔn. U ko n'o lo, Piyɛri jaa lo.

¹⁶Piyɛri kɔni tora ka daa kɔkɔ dɔrɔn. U dɛsɛra ka taa daa yɛlɛ, k'a ye ko Piyɛri lo. U ma la a la ni tinyɛ lo.

¹⁷Piyɛri y'a bolo kɛ k'u ka je. U jera, Matigi y'a bɔ kaso la cogo min na, a y'o bɛɛ nyafɔ u ye. O kɔ, a y'a fɔ u ye k'u ka taa o kibaru fɔ Yakuba, ni kalanden tɔw ye. A y'o fɔ ka ban, a bɔra ka taa yɔrɔ dɔ la.

¹⁸Dugu nana gwɛ, a kɛra hakilinyagami ye sɔlidasiw fɛ. Piyɛri kɛra cogo min na, u m'a lɔn.

¹⁹Erɔdi ye mɔgɔw bila ka Piyɛri yɔrɔ nyini ka dɛsɛ. A nana dɛsɛ ka kasobon daa kɔlɔsibagaw le kiti, o kɔ, k'u ka u faga. O bɛɛ kɔ, ale Erɔdi bɔra Zude ka taa tile fila kɛ Sezare.

²⁰Kɛlɛjugu dɔ tun bɛ Erɔdi ni Tiri ni Sidɔnkaw cɛ. Olu bɛnna a la k'u bɛ taa Erɔdi dali. O la, u ye Erɔdi ka sibon labɛnbaga kɛ u teri ye fɔlɔ, o tɔgɔ tun ko Bilasitusi. U ka sɔrɔ ka taa bɛɛn nyini. Fɔɔ bɛɛn tun ka nyini bari olu ka jamana ka balofɛn caaman tun bɛ bɔ Erɔdi ka jamana le kɔnɔ.

²¹Erɔdi tun ye loon min sigi o bɛɛn nin kuma kama, o nana se. Erɔdi y'a ka masafaniw don ka na sigi a ka masasigilan kan ka kuma daminɛ.

²²Mɔgɔw tora ka pɛrɛn ko: “Nin tɛ mɔgɔ kumakan ye, batofɛn kumakan lo.”

²³Erɔdi sɔnna u y'a bonya i n'a fɔ Ala minkɛ, o le y'a to Matigi ka mɛlɛkɛ dɔ nan'a gosi. Tumu donna a la, a sara.

²⁴Ala ka kuma kɔni tun bɛ jɛnsɛn ka taa dɔrɔn.

²⁵Cii min tun donna Barinabasi ni Sɔli bolo k'a kɛ Zeruzalɛmu, u tilara o la tuma min na, u kɔsegira Antiyɔsi. U kɔsegitɔ, u taara ni Zan ye, o bɛ min wele ko Mariki.