Read LAYIDUKURA KƐWALIW 13 Bible Online

KƐWALIW 13 - LAYIDUKURA bible

KƐWALIW 13

¹Kira ni karamɔgɔw tun bɛ Ala ka jama cɛma Antiyɔsi. Olu tun ye: Barinabasi, ni Simiyɔn, u b'ale min wele ko Nizɛri, ani Lusiyusi ka bɔ Sirɛni, ni Manayɛn, o min ni Erɔdi ye denmisɛnya kɛ nyɔgɔn fɛ. Sɔli ka fara u kan.

²K'u to suun ni Ala batoli la loon dɔ, Nii Senuman y'a fɔ u ye ko: “Ne ye n bolo la Barinabasi ni Sɔli kan baara min kama, aw k'u fila bɔ danna waasa u k'o kɛ.”

³U ye suun don, ka Ala dali, o kɔ, u y'u bolo lala Barinabasi ni Sɔli kuun na, u sɔrɔla ka taa Matigi ka baara la.

⁴Nii Senuman ye Barinabasi ni Sɔli bila cidenya la. Olu taara Selesi, u bɔra o yɔrɔ la ka baa tigɛ ka taa dugukolonin dɔ la kɔgɔji cɛma min tɔgɔ ko Sipɔrɔ.

⁵U bɔra yen ka na se Salaminɛ, u ye Ala ka kuma fɔ Zuwifuw ka Alabatosow kɔnɔ. Zan Mariki tun bɛ n'u ye ka to k'u dɛmɛ.

⁶U y'o dugukolo nin cɛtigɛ fɔɔ a daan na ka taa bɔ dugu dɔ kan, o min tɔgɔ ko Pafɔsi. Jinamoricɛ dɔ tun bɛ yen, o tɔgɔ ko Barizezu, ko ale ye kira ye. Zuwifu tun lo.

⁷A tun bɛ masacɛlankan ka luu kɔnɔ, n'o tɔgɔ tun ko Serijusi Pɔlusi, o tun ye hakilitigi ye. O tun ye Barinabasi ni Sɔli wele, bari a tun b'a fɛ u bɛ Ala ka kuma fɔ a ye.

⁸Jinamoricɛ Barizezu, n'u b'a tɔgɔ wele ko Elimasi, girɛkikan na, wilila ka muruti Barinabasi ni Sɔli ma. A tun t'a fɛ masacɛlankan k'a jigi la Yezu kan.

⁹O tuma na, Sɔli, n'u b'a wele fana ko Pɔli, Nii Senuman jigira ale kan, a ye jinamoricɛ filɛ,

¹⁰k'a fɔ a ye ko: “E ye mɔgɔjugu ni galontigɛla ye, Sutana mɔgɔ, konyuman y'i tana ye. E b'a fɛ tuma o tuma ka Matigi ka koo kɛtaw nagasi.

¹¹O la do, Matigi b'a ka sebagaya yira i la sisan yɛrɛ. Ayiwa, i bɛna kɛ finyɛntɔ ye fɔɔ waati dɔ, i tɛna tile ye n'i nyaa ye.” O yɔrɔnin bɛ Elimasi nyaa dibira ka kɛ finyɛntɔ ye. A tora ka munumunu faan bɛɛ, janko ka mɔgɔ nyini min bɛn'a bolo minɛ ka taa n'a ye soo.

¹²Ayiwa, koo min kɛra, masacɛlankan y'o ye, an'a ye kuma min mɛn Matigi koo la, a kabakoyara haali. A sɔnna k'a jigi la Matigi kan.

¹³Pɔli n'a taamanyɔgɔn ye kurun ta ka taa nya, ka baa tigɛ ka se Pɛrize, Panfili jamana na. K'u to o yɔrɔ la, Zan Mariki kɔsegira Zeruzalɛmu.

¹⁴Olu kɔni tora Pɛrize ka taa nyafɛ ka se Antiyɔsi, min bɛ Pisidi jamana na. Lafinyɛlon sera, u taara don Alabatoso kɔnɔ ka sigi.

¹⁵O yɔrɔ mɔgɔw dɔ ye sariya sɛbɛ ni kiraw ka sɛbɛ kalan ka ban, Alabatoso nyamɔgɔw y'a fɔ Pɔli ni Barinabasi ye ko: “Ni kuma dɔ b'aw fɛ k'a lase jama ma k'u ladi, kuma b'aw bolo.”

¹⁶Pɔli wilila k'a bolo kɛ k'u ka je. A ye kuma daminɛ ko: “Isirayɛlidenw, ani aw siya wɛrɛ minw bɛɛ bɛ siran Ala nya, aw ye mɛnni kɛ.

¹⁷Ala y'an Zuwifuw bɛmaw koo diya a yɛrɛ ye. A y'a kɛ u buguyara Ezipiti jamana na. O kɔ, a y'a ka setigiya yira, a y'an bɛmaw bɔ o yɔrɔ la.

¹⁸K'u to kongo kɔnɔ, a y'u mako nya yen fɔɔ saan bi naani nyɔgɔn.

¹⁹O kɔ, a ye siya wolonwula halaki Kanaan jamana na, ka olu ka dugukolo di an bɛmaw ma.

²⁰O koo nunu bɛɛ kɛra saan kɛmɛ naani ni bi duuru nyɔgɔn kɔnɔ. O bɛɛ kɔ, a sɔrɔla ka nyamɔgɔw bɔ u cɛma, a kɛra o cogo la fɔɔ ka na se kira Samuyɛli ka waati ma.

²¹Nga waati dɔ nana se, u k'olu bɛ masa fɛ. Ala ye Kiisi dencɛ Sawuli kɛ u ka masa ye fɔɔ saan bi naani. A buruju tun bɔra Bɛnzamɛn la.

²²Ala ye masaya bɔ ale bolo, ka Dawuda kɛ u ka masa ye. Ala tun y'a fɔ Dawuda koo la ko: ‘Zese dencɛ Dawuda koo diyara ne ye, ale bɛna ne sago bɛɛ kɛ ka nya.’

²³Ala ye Dawuda deen dɔ lawili k'a kɛ Isirayɛlidenw kisibaga ye. O ye Yezu ye. Ala yɛrɛ tun y'a daa di o koo la.

²⁴Sanni Yezu ka na, Zan ye wango la ka mɔgɔw labɛn k'u ka nimisa ka faran u ka kojuguw la ka batize.

²⁵Zan tun bɛ nyini ka tilan a ka baara la tuma min na, a tun b'a fɔra mɔgɔw ye ko: ‘Aw b'a miiri ko ne ye mɔgɔ min ye, ne tɛ o ye, bari ale bɛna na ne kɔ, ne ka dɔgɔ k'a ka sanbara bɔ a seen na.’

²⁶“Ayiwa, n badenw, aw minw buruju bɔra Ibrayima na, ani aw siya wɛrɛ minw bɛɛ bɛ siran Ala nya, Ala ka hɛrɛ sɔrɔ kuma nin ye an le ta ye.

²⁷Zeruzalɛmukaw ni dugu nyamɔgɔw ma Yezu nakun lɔn dinyɛ na, u y'a jalaki waasa kiraw ye min fɔ o ka kɛ, o min bɛ kalan lafinyɛlonw na.

²⁸Yezu ye koo min kɛ n'o tun b'a fagakun bɔ, o ma sɔrɔ. O bɛɛ n'a ta, u y'a nyini Pilati fɛ ko a ka kan ka faga.

²⁹Koo min bɛɛ tun sɛbɛnna Yezu koo la, u y'o bɛɛ kɛ ka ban tuma min na, u y'a jigi ka bɔ lɔgɔ la k'a sutura kaburu dɔ kɔnɔ.

³⁰Nga Ala y'a kunun.

³¹Minw tun y'a bila sira ka bɔ Galile mara la ka taa Zeruzalɛmu, a kununnin kɔ, a y'a yɛrɛ yira olu la tile damani kɔnɔ. Olu le fana kɛnin bɛ o koow seerew ye Isirayɛli jama nyana.

³²“Anw fana b'o kibaru diman nin fɔ aw ye ko Ala tun y'a daa di an bɛmaw ma koo min na,

³³ko a y'o koo nin kɛ an ye sisan, an minw y'u ka deenw ye, bari, a ye Yezu kunun a sanin kɔ. O cogo la a sɛbɛnnin bɛ Ala tando dɔnkili filanan kɔnɔ ko: ‘I ye ne dencɛ ye, ne kɛra i faa ye bii.’

³⁴Ala tun kɔnna k'a fɔ ko a bɛn'a kunun a sanin kɔ. Ko a tɛna sa tugu abada. A y'o fɔ ko: ‘N tun ye hɛrɛ banbali min layidu ta Dawuda ye, n bɛna o di aw ma tinyɛ tinyɛ na.’

³⁵O le y'a to a sɛbɛnnin bɛ fana Ala ka kuma yɔrɔ wɛrɛ la ko: ‘I tɛn'a to i ka baarakɛlatilennin suu bɛ toli.’

³⁶“K'a sɔrɔ, Dawuda ka tile la, a ye Ala sago kɛ. O kɔ, a sara, u y'a suu don a bɛmaw sudonyɔrɔ la. A suu tolila.

³⁷Nga, Ala ye Yezu kunun a sanin kɔ, ale suu ma sɔrɔ ka toli.

³⁸Ayiwa, n badenw, aw k'a lɔn ko kojugu yafako min kuma bɛ lasera aw ma, o bɛ kɛra Yezu le barika la. K'a sɔrɔ aw ma se k'o yafa nin sɔrɔ Musa ka sariya labatoli barika la.

³⁹Nga mɔgɔ o mɔgɔ mana la Yezu la, ale barika la, o tigi bɛna kɛ jalakibali ye.

⁴⁰O tuma na, aw k'aw yɛrɛ kɔlɔsi janko kiraw ye min fɔ, o kana aw sɔrɔ, ko:

⁴¹‘Aw, yɛrɛbonyalaw, aw ye filɛli kɛ, kabakoya ka dama tɛmɛ. N bɛna koo dɔ kɛ aw nyana, ni mɔgɔ b'o lakali aw ye, aw tɛna la o la.’ ”

⁴²U bɔra Alabatoso kɔnɔ ka ban, mɔgɔw ye Pɔli ni Barinabasi dali, ko lafinyɛlon nata, k'u ka segi kuma kelen nin kan.

⁴³Jama jɛnsɛnnin kɔ, Zuwifuw caaman, ani minw tuubira ka kɛ Zuwifuw ye, olu caaman tugura Pɔli ni Barinabasi kɔ. Pɔli ni Barinabasi y'u ladi k'u ka jija k'u jigi la Ala kan a ka nɛɛma barika la.

⁴⁴Lafinyɛlon dɔ wɛrɛ nana se, dugu mɔgɔw bɛɛ taara lajɛn waasa k'u tulo malɔ Ala ka kuma na.

⁴⁵Zuwifuw ye nin ye dɔrɔn, o kereya y'u minɛ. U y'a daminɛ ka Pɔli sɔsɔ, ka to k'a nɛni.

⁴⁶Pɔli ni Barinabasi hakili sigininba y'a fɔ u ye ko: “Ala ka kuma ka kan ka fɔ aw Zuwifuw le ye fɔlɔ. Nga aw do bɛ banna a la, o b'a yira ko aw man kan ni sini hɛrɛ ye. N'o lo, an b'an nyasin siya wɛrɛw ma,

⁴⁷bari, Matigi y'o le fɔ ko: ‘Ne ye i kɛ kɛnɛ ye siya wɛrɛw nyakɔrɔ, waasa i ka taa fɔɔ dinyɛ faan bɛɛ ka hɛrɛ sɔrɔ kuma lase.’ ”

⁴⁸Siya wɛrɛ minw tun bɛ yen, olu nisɔn diyara kosɛbɛ, k'a daminɛ ka Ala tando. Minw tun ka kan ni sini hɛrɛ ye, olu bɛɛ lara Matigi la.

⁴⁹O cogo la, Matigi ka kuma yiriwara o mara bɛɛ la.

⁵⁰Muso kantigi minw tun bɛ Ala bato, Zuwifuw wilila ka olu ni dugu nyamɔgɔw kɔnɔnasu k'u bila Pɔli ni Barinabasi la. O y'u tɔɔrɔ, k'u gwɛn ka bɔ u ka mara la.

⁵¹U bɔtɔ, Pɔli ni Barinabasi y'u seen furanfuran ka buguri bɔ u seen na[9] ka taa Ikɔniyɔmu.

⁵²Kalanden minw tora u kɔfɛ, Nii Senuman tun b'u fɛ, u nisɔn tun ka di.