Read LAYIDUKURA KƐWALIW 15 Bible Online

KƐWALIW 15 - LAYIDUKURA bible

KƐWALIW 15

¹Mɔgɔ dɔw nana Antiyɔsi ka bɔ Zude mara la k'a fɔ kalandenw ye ko n'u ma kɛnɛkɛnɛ i n'a fɔ Musa y'a fɔ cogo min na, k'u tɛna se ka kisi.

²Mankanba wilila o mɔgɔw ani Pɔli ni Barinabasi nunu cɛ. U ye nyɔgɔn sɔsɔ kosɛbɛ. O kɔ, u y'a ;naniya ko Pɔli, ni Barinabasi, ani Antiyɔsi kalanden dɔw ka taa Zeruzalɛmu ka koo nin nyafɔ cidenw, ni Ala ka jama nyamɔgɔw ye.

³Ala ka jama min tun bɛ Antiyɔsi, olu y'u dɛmɛ o taamako nin na kosɛbɛ. U taatɔ, u ye Fenisi, ni Samari mara cɛɛ tigɛ. Siya wɛrɛw lara Ala la cogo min na, u tora k'o lakali o yɔrɔ kalandenw ye ka to ka taa. O kibaruya ye olu bɛɛ dusu diya.

⁴U sera Zeruzalɛmu, o yɔrɔ kalandenw n'u ka nyamɔgɔw ani cidenw y'u kunbɛn. Ala y'u dɛmɛ ka min bɛɛ kɛ, u y'o nyafɔ.

⁵Nga, kalanden minw tun ye Farizinyɛw ye ka kɔrɔ, u dɔw wilila k'a fɔ ko wajibi lo siya wɛrɛw ka kɛnɛkɛnɛ, ani u ka Musa ka sariya labato.

⁶O tuma na, cidenw ni Ala ka jama nyamɔgɔw ye nyɔgɔn ye ka koo nin jatiminɛ.

⁷U ye nyɔgɔn sɔsɔ ka mɛn. O kɔ, Piyɛri wilila k'a fɔ ko: “N badenw, aw y'a lɔn ko Ala tun ye ne woloma aw cɛma kabini a daminɛtuma, ka kibaru diman fɔ siya wɛrɛw ye, janko u bɛ la a la.

⁸Ala min bɛ mɔgɔ bɛɛ kɔnɔnako lɔn, a sɔnna ka Nii Senuman jigi olu kan i n'a fɔ a jigira anw kan cogo min na.

⁹A ma danfara kɛ an Zuwifuw ni olu cɛ, bari u lara a la minkɛ, a y'u dusu saniya o lanaya kɔsɔn.

¹⁰Mun le do y'a to sisan aw bɛ Ala darabɔ? Bari aw bɛ doni lara kalandenw kuun na k'a sɔrɔ anw, n'an faaw fanga ma se min kɔrɔ k'a ta.

¹¹O yɛrɛ ka bɔ a la, anw, ni olu, an bɛɛ lanin b'a la, ko Ala y'an kisi Matigi Yezu le barika la.”

¹²O tuma na, jama bɛɛ jera fana ka Barinabasi ni Pɔli lamɛn. Ala y'u dɛmɛ ka kabako ni taamasinyɛ minw kɛ siya wɛrɛw fɛ yen, u y'o bɛɛ lakali u ye.

¹³U kumana ka ban tuma min na, Zaki ye kuma ta k'a fɔ ko: “N badenw, aw ye ne lamɛn.

¹⁴Kabini a daminɛ, Ala y'a mako don siya wɛrɛw la cogo min na, Simɔn y'o nyafɔ sisan. Ala ye siya dɔ woloma u cɛma k'o kɛ a tɔgɔla ta ye.

¹⁵Koo min kɛra, o ni kiraw ka kuma bɛɛ bɛnna. Bari a fɔra Ala ka kuma na ko:

¹⁶‘Ne Matigi bɛna segi ka na nin kɔ, ka Dawuda ka soo lɔ kura ye. N bɛn'a ka tomo wili.

¹⁷O la, mɔgɔ tɔw bɛna ne Matigi yɔrɔ nyini, ɔnhɔn, siyaw bɛɛ, minw bɛɛ ka kan ka ne bato. Ne Matigi min bɛ n ka ;naniyakow bɛɛ kɛ, ne le ko ten,

¹⁸bari o koo lɔnnin lo kabini fɔlɔ.’

¹⁹“O kama, ne Zaki ka miiri la, siya wɛrɛ minw bɛ sɔnna Ala ka koow ma, an man kan ka koo gwɛlɛman la u kan.

²⁰An ka sɛbɛ ci u ma k'a fɔ u ye k'u kana josɔnsogo nyimi, u k'u yɛrɛ tanga kakalaya ma, sogo min kaan ma tigɛ u kana o nyimi, u kana sogo joli dumu.

²¹Bari, kabini fɔlɔfɔlɔ, dugu kelen kelen bɛɛ la, mɔgɔw bɛ sɔrɔ Alabatosow kɔnɔ n'u bɛ Musa ka sariya sɛbɛ kalan k'a kɔrɔ fɔ mɔgɔw ye lafinyɛlon bɛɛ la.”

²²O tuma na, kretinyɛw bɛɛ sɔnna. Cɛkɔrɔbaw ni cidenw bɛnna a la, k'u bɛna mɔgɔw bɔ u cɛma ka fara Pɔli ni Barinabasi kan ka taa Antiyɔsi. U ye Zude, min bɛ wele ko Barisabasi, ani Silasi bɔ. U fila bɛɛ tun ye kantigiw ye kalandenw cɛma.

²³U ye sɛbɛ min don olu bolo, a sɛbɛnnin tun b'o la ko: “Aw kalanden minw tɛ Zuwifuw ye n'aw siginin bɛ Antiyɔsi, Siri jamana na, ani minw bɛ Silisi jamana na, aw baden cidenw, ni cɛkɔrɔbaw b'aw fo.

²⁴“An y'a mɛn ko mɔgɔ dɔw bɔra anw fɛ Zeruzalɛmu, ka taa aw hakili nyagami ni kuma fu ye, k'a sɔrɔ an m'u ci.

²⁵O kama, anw bɛnna a la, ka ciradenw bɔ k'u fara an teri Barinabasi ni Pɔli kan k'u ci aw fɛ.

²⁶U tun bɛ nyini ka bɔnɔ u nii na an Matigi Yezu Krista ka baara kɔsɔn.

²⁷An bɛ min fɔ aw ye sɛbɛ nin kɔnɔ, an ye Zude ni Silasi ci aw fɛ waasa aw k'o kuma kelen nin mɛn olu fana daa la.

²⁸“Anw ka ;naniya, ani Nii Senuman ta bɛɛ bɛnna kelen ma ko an tɛna koo gwɛlɛman nyini aw fɛ, fɔɔ ni min ye wajibi ye.

²⁹Ayiwa, aw kana josɔnsogo nyimi, aw kana sogo joli dumu, sogo min kaan ma tigɛ, aw kana o nyimi, aw k'aw yɛrɛ tanga kakalaya ma. N'aw ye nunu bɛɛ labato, aw ka kɛwali bɛna nya. Ala k'an bɛn.”

³⁰U ye sira di ciraden nunu ma tuma min na, u taara Antiyɔsi. U sera yen, u ye kalandenw bɛɛ lajɛn ka sɛbɛ nin don u bolo.

³¹U y'a kalan. A kɔnɔnakuma y'u bɛɛ nisɔn diya ka jagwɛlɛya d'u ma.

³²Zude ni Silasi tun ye kiraw ye fana. U ye baro diman kɛ ni kalandenw ye fɔɔ ka mɛn, ka dɔ fara u ka jagwɛlɛya kan.

³³Zude ni Silasi ye tile damani kɛ yen, u sɔrɔla ka sira d'u ma, janko u ka segi u cibagaw fɛ, ka duba kɛ u ye ko Ala ka se n'u nyuman ye. [

³⁴Na Silasi y'a ;naniya ta ko ale bɛna to Antiyɔsi yen. Zude kelen taara.]

³⁵Pɔli ni Barinabasi kɔni tora Antiyɔsi. Olu ni mɔgɔ wɛrɛw tun bɛ tɔw kalan ani ka to ka Matigi ka kibaru diman fɔ u ye.

³⁶Waati dɔ tɛmɛnin kɔ, Pɔli y'a fɔ Barinabasi ye ko: “An ye Matigi ka kuma fɔ mɔgɔw ye dugu minw bɛɛ la, an ka taa u bɛɛ yɔrɔ filɛ n'u ka koo bɛ cogo min na.”

³⁷Barinabasi tun b'a fɛ ko Zan ka taa n'u ye, u b'o min wele ko Mariki.

³⁸Nga, o tun man di Pɔli ye ko bari ale Zan Mariki tɔgɔla nin tun faranna olu la Panfili jamana na, a ma sɔn ka baara nin laban n'u ye.

³⁹Pɔli ni Barinabasi ye nyɔgɔn sɔsɔ kosɛbɛ. A laban, u faranna nyɔgɔn na. Barinabasi ye Mariki minɛ, u ye kurun ta ka taa Sipɔrɔ.

⁴⁰Pɔli fana, ale ye Silasi ta. Kalandenw y'u kalifa Matigi ma ka ban tuma min na, u taara.

⁴¹U ye Siri ni Silisi jamana yaala ka to k'o yɔrɔ kalandenw ladi k'u jaa gwɛlɛya.