Read LAYIDUKURA KƐWALIW 18 Bible Online

KƐWALIW 18 - LAYIDUKURA bible

KƐWALIW 18

¹O kɔ, Pɔli bɔra Atɛni ka taa Korɛnti.

²A ye Zuwifu dɔ kunbɛn yen, min tɔgɔ ko Akilasi, a tun bɛ bɔ Pɔn mara la, o n'a muso, ale tɔgɔ ko Pirisiye. U bɔtɔ tun lo Itali jamana na bari Ɔrɔmu masacɛ Kulodi tun y'a ;naniya ta ka Zuwifuw bɛɛ gwɛn ka bɔ Ɔrɔmu dugu kɔnɔ. Pɔli sigira u fɛ ka jɛn n'u ye,

³ka to ka baara kɛ nyɔgɔn fɛ, bari u bɛɛ tun ye fanibugudilanbagaw ye. [17]

⁴Lafinyɛlon o lafinyɛlon, Pɔli tun bɛ mɔgɔw waaju Alabatoso kɔnɔ. A tun bɛ jija waasa ka se Zuwifuw ni girɛkiw kɔrɔ.

⁵Silasi ni Timote nunu nana yen ka bɔ Maseduwani tuma min na, Pɔli y'a ka baara bɛɛ kɛ Yezu koo fɔli dama ye, k'a yira Zuwifuw la ko Yezu le ye Ala ka Mɔgɔwolomanin ye.

⁶Zuwifuw tun tɛ sɔnna Pɔli ka kuma na. U tora k'a nɛni. O la, Pɔli tora k'a bolo furanfuran k'a fɔ u ye ko: “N daa t'aw ka koo la tugu. N'aw halakira sini, o y'aw ka kunko ye. Ne kɔni niin t'o la tugu. Ayiwa, ne bɛna taa siya wɛrɛw le waaju sisan.”

⁷A bɔra yen ka taa jigi cɛɛ dɔ fɛ min tɔgɔ ko Titusi Zusitusi. Ale tun bɛ to ka Ala bato. A ka soo gunnin tun bɛ Alabatoso la.

⁸O Alabatoso kuntigi tɔgɔ tun ko Kiripusi, ale n'a ka somɔgɔw bɛɛ lara Matigi la. Korɛntika minw tun bɛ Pɔli lamɛn, u caaman lara Matigi la, u batizera.

⁹Loon dɔ, Matigi y'a yɛrɛ yira Pɔli la sufɛ k'a fɔ a ye ko: “Pɔli, i kana siran. To ka n koo fɔ dɔrɔn.

¹⁰Bari ne bɛ n'i ye. Mɔgɔ si tɛna se ka kojugu kɛ i la, bari ne ka mɔgɔw ka ca dugu nin kɔnɔ.”

¹¹Pɔli tora yen ka mɔgɔw kalan Ala ka kuma na saan kelen ni kalo wɔɔrɔ.

¹²Galiyɔn tun ye Akayi mara ka masacɛlankan ye tuma min na, Zuwifuw wilila Pɔli kama. U y'a minɛ ka taa n'a ye kititigɛlaw fɛ

¹³k'a fɔ yen ko: “Cɛɛ nin b'a fɛ ka mɔgɔw bila Ala batocogokura la min n'a ka sariya tɛ bɛn.”

¹⁴Pɔli tun b'a fɛ ka dɔ fɔ o kuma nin na, ni Galiyɔn ye kuma ta k'a fɔ Zuwifuw ye ko: “N'a tun kɛra ni cɛɛ nin tun ye kojuguba dɔ kɛ, ne tun bɛn'a sɔn aw Zuwifuw ka kuma nin na.

¹⁵Nga nin ye Zuwifuw dama ka koo ye, bari aw bɛ nyɔgɔn sɔsɔra kalanko ni tɔgɔ koow ani sariya koow le la. Aw y'o nyanabɔ aw ni nyɔgɔn cɛ. Ne tɛ se ka o koo nunu nyɔgɔn kiti tigɛ.”

¹⁶A y'u gwɛn ka bɔ kiti tigɛyɔrɔ la.

¹⁷Sɔsitɛni tun ye Alabatoso kuntigi ye o waati la. U jɛnna a kan k'a lamaga kititigɛlaw nyana. Nga Galiyɔn ma foyi fɔ.

¹⁸Pɔli tora Korɛnti ka waatijan kɛ. O kɔ, a ye sira nyini o yɔrɔ kalandenw fɛ, ale ni Akilasi n'a ka muso Pirisiye ye kurun ta k'u kuun sin Siri jamana ma. U sera Sankere tuma min na, u y'a kuun li, bari a tun y'a daa di Ala ma.

¹⁹U sera Efɛzi tuma min na, Pɔli y'a taamanyɔgɔnw to yen ka ta'a kelen Alabatoso kɔnɔ ka baro kɛ ni Zuwifuw ye.

²⁰Olu y'a nyini a fɛ ko a ka lafila kɛ olu fɛ. A ma sɔn o la.

²¹Nga a ye sira sɔrɔ u fɛ tuma min na, a y'a fɔ u ye ko ni Ala sɔnna, ale bɛna segi ka na u filɛ. O kɔ, a bɔra Efɛzi, ka kurun ta.

²²A sera Sezare tuma min na, a taara bɔ Zeruzalɛmu k'o yɔrɔ jama senuman fo. A sɔrɔla ka bɔ o yɔrɔ la ka taa Antiyɔsi.

²³A ye waati dɔɔni kɛ yen. O kɔ, a bɔra ka Galati ni Firizi mara nunu yaalayaala k'a ka kalandenw ladi k'u jaa gwɛlɛya.

²⁴Zuwifu dɔ nana Efɛzi, a tɔgɔ tun ko Apolɔsi, a wolola Alɛkisandiri. A daa tun ka di kosɛbɛ, a tun bɛ Ala ka kuma lɔn.

²⁵A kalannin tun lo Matigi ka sira koo la dɔɔni fana. A tun bɛ mɔgɔw kalan Yezu koo la ni timinadiya ye, k'a sɔrɔ a tun bɛ Zan ka batizeli koo dɔrɔn le lɔn.

²⁶A hakili sigininba ye kuma daminɛ Alabatoso kɔnɔ. Akilasi ni Pirisiye nunu y'a lamɛn ka ban tuma min na, u y'a wele u danna. A tun tɛ min lɔn Ala ka sira koo la, u y'o fɔ a ye k'a gwɛ.

²⁷Apolɔsi tun b'a fɛ k'a kuun sin Akayi minkɛ, Efɛzi kalandenw ye sɛbɛ ci u badenw ma yen, ko ni Apolɔsi sera yen, k'u k'a minɛ ka nya. A sera o yɔrɔ la tuma min na, a ye dɛmɛ don u ye kosɛbɛ Ala barika la.

²⁸A bolo lanin tun bɛ Ala ka kuma kan kosɛbɛ. O sababu fɛ, a tun bɛ Zuwifuw ka kuma kɔɔ kari jama nyana ko Yezu le ye Ala ka Mɔgɔwolomanin ye, ko Zuwifuw filinin lo.