Read LAYIDUKURA KƐWALIW 2 Bible Online

KƐWALIW 2 - LAYIDUKURA bible

KƐWALIW 2

¹Pantekɔti loon na, kalandenw bɛɛ lajɛnnin tun bɛ boon kelen na.

²Mankanba dɔ barila ka bɔ sankolo la. Mankan nin tun bɛ i n'a fɔ fɔnyɔba mankan. U tun bɛ boon min kɔnɔ, o bɛɛ fara mankan nin na.

³U ye fɛɛn dɔw ye i n'a fɔ tasuma, o tilantilanna ka jigi u kelen kelen bɛɛ kuun na.

⁴Nii Senuman jigira u bɛɛ kan, u y'a daminɛ ka siyakan wɛrɛw fɔ Nii Senuman barika la.

⁵O y'a sɔrɔ, Zuwifu minw tun bɛ siran Ala nya kosɛbɛ, olu caaman nanin tun bɛ Zeruzalɛmu, ka bɔ dinyɛ faan bɛɛ.

⁶U ye mankan mɛn minkɛ, u girinna ka taa yɔrɔ fa. U kabakoyara kosɛbɛ, bari Yezu ka cidenw tun bɛ kuma minw fɔra, u bɛɛ tun b'u ka kuma mɛnna u yɛrɛ ka kaan na.

⁷U kabakoyara fɔɔ k'a dama tɛmɛ n'u bɛ nyɔgɔn nyininga ko: “Mɔgɔ minw bɛ kumana wo, u bɛɛ tɛ Galilekaw ye wa?

⁸A do kɛra di n'an bɛɛ b'u ka kuma mɛnna an ka kaan na?

⁹An dɔw bɔra Pariti jamana na, dɔw bɔra Mɛdi, ni Elamiti, ni Mezopotami ani Zude. Dɔw bɔra Kapadɔsi, ni Pɔn, ni Azi,

¹⁰ni Firizi ani Panfili. Dɔw bɔra Ezipiti, ni Libi, ni Sirɛni faan fɛ ani Ɔrɔmuka minw bɛ yan.

¹¹Zuwifuw ani minw y'u yɛrɛ kɛ Zuwifuw ye, ani Kɛrɛtiw, ni Arabuw, ee! An bɛɛ bɛ Ala ka koba kɛninw mɛnna an ka kaan na!”

¹²O y'u kabakoya fɔɔ u hakili nyagamina n'u bɛ nyɔgɔn nyininga ko: “Nin kɔrɔ bɛ se ka kɛ mun ye?”

¹³Nga dɔw tun b'u lɔgɔbɔ ka to k'a fɔ ko: “Ayi! nunu fanin lo dɔrɔ la.”

¹⁴O tuma na, Piyɛri tora a tɔnyɔgɔn tan ni kelen nunu cɛma k'a kaan kɔrɔ ta ka kuma jama fɛ ko: “Aw Zuwifuw, ani aw minw bɛɛ siginin bɛ Zeruzalɛmu, a y'aw tulo malɔ ka nya ka n ka kuma lamɛn.

¹⁵Aw b'a fɔra cogo min na ko nunu fanin lo dɔrɔ la, u ma fa dɔrɔ la dɛ, bari tile ma gwan fɔlɔ.

¹⁶Nga kira Zowɛli tun ye kuma min fɔ, o le bɛ kɛra. A tun y'a fɔ ko:

¹⁷‘Ni laban tuma sera,’ Matigi ko ten, ‘N bɛna n ka Nii Senuman di mɔgɔ bɛɛ ma. Aw deen cɛman ni musomanw bɛɛ bɛna kɛ kiraw ye. Aw ka kanbelenninw bɛna yelifɛnw ye ka se ka n ka tinyɛ lɔn. Aw ka cɛkɔrɔbaw bɛna n ka koow faamu sigow seen fɛ.

¹⁸Tinyɛ na, n bɛna Nii Senuman di n ka baarakɛla cɛman ni musomanw bɛɛ ma o waati la. U bɛna kɛ kiraw ye.

¹⁹N bɛna kabakow kɛ sankolo la, ka taamasinyɛw kɛ dugukolo kan ni joli, ni tasuma ni sisi ye.

²⁰Tile tɛna ye, dibi bɛ don, kalo bɛna wulen i n'a fɔ joli. O bɛna kɛ sanni Matigi ka loon ka se. O loon nin ye lonba ye, a nyɔgɔn tɛ yen.

²¹O loon na, ni mɔgɔ o mɔgɔ lara Matigi la, o tigi bɛna kisi.’

²²“Ayiwa Isirayɛli jama, n bɛna kuma minw fɔ sisan, aw ye u lamɛn dɛ! Ala ye Nazarɛti Yezu ci aw fɛ, ka see d'a ma ka kabakow kɛ aw nyana. Aw yɛrɛ y'o lɔn.

²³Ala tun y'a ka koo latigɛ cogo min na, a kɛra ten fana. Aw y'a don kojugukɛlaw bolo janko u k'a faga, olu y'a gwengwen lɔgɔ kan k'a faga.

²⁴Nga Ala y'a kunun a faganin kɔ ka saya fanga ban, bari a tun man kan ka to saya bolo.

²⁵Masacɛ Dawuda yɛrɛ tun y'a fɔ ale koo la ko: ‘Matigi bɛ ne fɛ tuma bɛɛ, a bɛ ne fɛ minkɛ, o le y'a to fɛɛn si tɛ se ne kɔrɔ.

²⁶O kama ne nisɔn diyanin bɛ ka to ka dɔnkili la. Bari ne bɛna layɔrɔnyuman sɔrɔ.

²⁷Ne y'a lɔn ko e tɛna sɔn ka ne to saya bolo. Ne min ye i ka baarakɛlatilennin ye, i tɛn'a to ne suu bɛ toli.

²⁸I ye hɛrɛ sira don ne seen kɔrɔ, ne bɛna to nisɔndiya la tuma bɛɛ i nyakɔrɔ.’ ”

²⁹Piyɛri taara ni kuma ye nya ko: “N badenw, ne ka kan ka an bɛmacɛ Dawuda ka koo nyafɔ aw ye ka gwɛ. Ayiwa, a sara, u y'a suu don, halibi a suturayɔrɔ lɔnnin lo.

³⁰Dawuda tun ye kira ye. A tun y'a lɔn ko Ala y'a latigɛ ko a bɛn'a ka deenw dɔ sigi a nɔɔ na masaya la.

³¹A tun kɔnna ka Ala ka Mɔgɔwolomanin kununko lɔn, o la a y'a fɔ ko n'a sara, ko a suu tɛna toli.

³²Ayiwa, Ala ye Yezu kunun a sanin kɔ, anw kɔni y'a ye.

³³A y'a wele k'a sigi a yɛrɛ kɔrɔ masaya la. A tun y'a daa di ko a bɛna Nii Senuman ci. A y'o sɔrɔ a Faa fɛ k'o ci anw ma. Aw b'o le ka sebagaya kuma mɛnna, ani k'a seko ye.

³⁴Masacɛ Dawuda ma yɛlɛ sankolo la, nga a tun ye Krista koo fɔ ko: ‘Matigi Ala y'a fɔ ne ka Matigi ye ko a ka sigi ale gɛrɛfɛ masaya la,

³⁵ko fɔɔ a k'a jugu cɔnkɔn fɔlɔ.’

³⁶Ayiwa, aw Isirayɛli jama, aw k'a faamu bɛrɛbɛrɛ ko aw ye Yezu min faga lɔgɔ kan, Ala y'a le lo woloma k'a kɛ an Matigi ye.”

³⁷Jama ye Piyɛri ka kuma nunu lamɛn minkɛ, u hakili nyagamina. U ye Piyɛri n'a tɔnyɔgɔn cidenw nyininga k'u ka kan ka mun kɛ.

³⁸Piyɛri y'u jaabi ko: “Aw ye nimisa ka faran aw ka kojuguw la, an b'aw batize Yezu Krista tɔgɔ la janko aw ka yafa sɔrɔ. O la, aw bɛna Nii Senuman sɔrɔ,

³⁹bari Matigi y'o layidu ta aw, n'aw deenw le ye, ani Matigi an ka Ala bɛna mɔgɔ minw wele ka bɔ yɔrɔjan.”

⁴⁰Piyɛri y'a fɔ u ye fana ko: “Haya! Aw ye jija k'aw ka kɛwaliw yɛlɛma janko aw ni mɔgɔjugu nunu kana kɛ kelen ye.” A ye kuma wɛrɛw fɔ k'u jaa gwɛlɛya.

⁴¹Olu lara Piyɛri ka kuma na o tuma na. U y'u batize. Minw farala kalandenw kan o loon na, u tun bɛ mɔgɔ waa saba bɔ.

⁴²Kalandenw tun bɛ taa cidenw ka kalan lamɛn tuma bɛɛ. U tun bɛ jɛn k'u ka koo bɛɛ kɛ balimaya la. U tun bɛ dumuni senuman[2] tilantilan nyɔgɔn fɛ, ka Ala dali.

⁴³Cidenw tun bɛ kabako caaman kɛ, o siranya tun ye mɔgɔ bɛɛ minɛ.

⁴⁴Mɔgɔ minw bɛɛ tun lara Yezu la, u tun jɛnnin bɛ k'u ka fɛɛn bɛɛ kɛ foroba ye,

⁴⁵k'u bololafɛnw ni u ka forow feere k'o sɔngɔ tilan ka kɛnyɛ n'u kelen kelen bɛɛ ka makoyako ye.

⁴⁶U tun bɛ taa Alabatosoba kɔnɔ loon o loon ka Ala bato. U tun bɛ dumuni senuman tilantilan nyɔgɔn fɛ soo kɔnɔ, ka to ka dumuni kɛ ni nyɔgɔn ye nisɔndiya la. U si tun t'u yɛrɛ bonya.

⁴⁷U tun bɛ Ala tando, mɔgɔ bɛɛ tun b'u filɛ ni nyanyuman ye. Mɔgɔ minw tun ka kan ka kisi, Matigi tun bɛ olu ladon jɛnkulu nin kɔnɔ loon o loon. Yezu ka cidenw tun b'o nyɔgɔn kɛ i n'a fɔ Yezu tun y'a fɔ u ye cogo min na.