Read LAYIDUKURA KƐWALIW 20 Bible Online

KƐWALIW 20 - LAYIDUKURA bible

KƐWALIW 20

¹Mankanba nin nɔgɔyara tuma min na, Pɔli ye kalandenw bɛɛ lajɛn ka ladili d'u ma, k'u jaa gwɛlɛya. O kɔ, a ye sira nyini u fɛ, ka taa Maseduwani mara la.

²A y'o mara nin bɛɛ yaala ka to ka kalandenw ladi kosɛbɛ. A tora o la fɔɔ ka taa se Girɛsi mara la,

³ka kalo saba kɛ o yɔrɔ la. A bɔtɔ yen, a ko a bɛ kurun ta ka taa Siri mara la. A y'a mɛn ko Zuwifu nunu ye janfa siri a la k'u b'a faga. O la, a kɔsegira ka taa bɔ Maseduwani faan fɛ.

⁴Mɔgɔ minw tun b'a bilara sira, olu tɔgɔw filɛ: Piirusi dencɛ Sopatɔrɔsi ka bɔ Bere, ni Arisitaaki ani Segundusi ka bɔ Tesaloniki, Gayusi ka bɔ Dɛribe, ni Timote, ni Tisiki, ani Torofima ka bɔ Azi mara la.

⁵O jɛnkulu nin tun kɔnna ka sira ta anw nya, ka taa anw kɔnɔ Torowasi.

⁶Anw ye Buru funubali nyanagwɛ kɛ Filipi, ka sɔrɔ ka bɔ yen. An ye tile duuru kɛ jii kan ka sɔrɔ ka se an taamanyɔgɔnw fɛ Torowasi, ka tile wolonwula kɛ yen.

⁷Lɔgɔkun loon fɔlɔ, an lajɛnnin tun bɛ n'an bɛ dumuni senuman tilantilanna nyɔgɔn fɛ. Pɔli tun ka kan ka bɔ Torowasi o dugusagwɛ. O kama, a kumana ka mɛn fɔɔ ka se dugutilama. [18] [19]

⁸An tun lajɛnna sangaso min na, fitinɛ caaman mananin tun bɛ yen.

⁹Kanbelennin dɔ siginin tun bɛ fɛnɛtiri daa la, a tɔgɔ tun ko Etiiki. Pɔli ka kuma janyana minkɛ, sinɔgɔ ye kanbelen nin minɛ. Sinɔgɔ fɛ, a porokotora ka bɔ sangaso sabanan fɛnɛtiri daa la ka jigi duguma. U jigira k'a ta, o y'a sɔrɔ a sara.

¹⁰Pɔli jigira ka taa kanbelen suu ta a disi la k'a fɔ mɔgɔw ye ko: “Aw y'aw hakili sigi, a bɛ nii na.”

¹¹Pɔli yɛlɛla tuma min na, a ye dumuni senuman nin dɔ tigɛ k'a dumu, ka kuma daminɛ tugu fɔɔ ka dugu gwɛ, a sɔrɔla k'a ka sira minɛ.

¹²Kanbelen nin ka koo kɔni kɛra dususaalonko daan ye. U nisɔn diyaninba segira ni kanbelen ye u ka soo.

¹³An ye kurun ta ka bila Pɔli nya ka taa Asɔsi. An tun ka kan ka taa nyɔgɔn sɔrɔ yen k'ale Pɔli ta, bari a tun ko ale bɛ taa seen na.

¹⁴A sera Asɔsi tuma min na, an y'a ta, an taara Mitilɛni.

¹⁵O dugusagwɛ, an ye kurun ta ka se Siyo gɛrɛfɛ. O dugusagwɛ tugu, an sera Samɔsi, ka bɔ o yɔrɔ la ka taa lɔ Toroziyɔn, o kɔ, an ye tile ni suu kɛ ka sɔrɔ ka se Mile.

¹⁶Pɔli tun t'a fɛ ka mɛn Azi mara la, o kama, a tun t'a fɛ an ka tɛmɛ Efɛzi. A kɔrɔtɔnin tun bɛ ka se Zeruzalɛmu, waasa ka Pantekɔti nyanagwɛ kunbɛn yen.

¹⁷Pɔli tora Mile ka cira sama Efɛzi jama senuman ka cɛkɔrɔbaw ma k'u ka na.

¹⁸U nan'a fɛ, a y'a fɔ u ye ko: “Kabini ne seen donna Azi mara la yan, ne ye n yɛrɛ minɛ cogo min na, aw yɛrɛ b'o lɔn.

¹⁹Zuwifuw ye tɔɔrɔ ni dusukasi minw lase ne ma yan, ne y'o bɛɛ munyu ka to ka Matigi ka baara kɛ ni yɛrɛmajigi ye.

²⁰Fɛɛn minw bɛɛ tun bɛ se k'aw nafa, ne ma olu si dogo aw la. Ne y'o bɛɛ fɔ aw ye k'aw kalan n'o ye fana forobayɔrɔw la, ani aw ka soow kɔnɔ.

²¹N y'a fɔ Zuwifuw, ni siya wɛrɛw ye, k'u ka nimisa ka faran u ka kojuguw la, ka la an Matigi Yezu la, k'u nyasin Ala ma.

²²Ayiwa sisan, Nii Senuman bɛ ne jagoyara ka taa Zeruzalɛmu. Ne m'a lɔn fɛɛn min bɛna taa ne sɔrɔ yen.

²³N kɔni bɛ min lɔn, n mana se dugu o dugu la, Nii Senuman b'a fɔ ne ye ko u bɛna jɔrɔkɔ kɛ ne la, ko n bɛna tɔɔrɔ.

²⁴Ne ka bɔnɔ n nii na, o tɛ foyi ye ne nyana. A daan ye Matigi Yezu ye baara min don ne bolo, ne k'o kɛ ka ban. Fɔɔ ne ka se ka Ala ka makariko kibaru diman nin fɔ mɔgɔw ye le.

²⁵“Ayiwa, ne tɛmɛtuma na aw fɛ, ne ye Ala ka masaya koo fɔ aw ye. Ne do y'a lɔn sisan ko aw si nyaa tɛna la ne kan tugu.

²⁶O kama, ne b'a fɔ aw ye bii, ko ni aw dɔ nana halaki, o tɛ ne ka koo ye,

²⁷bari, ne ma Ala ka kolatigɛnin dogo aw la.

²⁸Aw ka janto aw yɛrɛ la. Nii Senuman ye jama min kalifa aw ma, aw ka olu fana kɔlɔsi. Aw ka Ala ka jama tilen, o minw kɛra Ala taw ye a Dencɛ ka saya sababu la.

²⁹Ne y'a lɔn ko ne taanin kɔ, mɔgɔ dɔw bɛna na don aw seen kɔrɔ ka fariya Ala ka jama ma i n'a fɔ suruku ka fari baa ma cogo min na.

³⁰Dɔw fana bɛna wili aw yɛrɛ cɛma ka to ka galon tigɛ, waasa ka kalandenw caaman sama ka tugu u yɛrɛ kɔ.

³¹Aw k'aw hakili to a la ko ne tun bɛ aw kelen kelen bɛɛ ladi ni nyaji ye loon o loon saan saba kɔnɔ. O tuma na, aw y'aw yɛrɛ kɔlɔsi.

³²“Ayiwa, sisan kɔni, ne b'aw kalifa Ala ma, k'aw ni a ka hɛrɛ kuma to nyɔgɔn fɛ, see bɛ ale min ye k'aw sabati, ka sininyasigi labɛn k'a bila a ka mɔgɔw bɛɛ ye.

³³Ne ma n nyaa bɔ aw si ka wari fɛ, walima sanu, walima fani fɛ.

³⁴Ne ni n taamanyɔgɔnw mako tun bɛ fɛɛn minw na, ne ye baara kɛ ni n bolo nunu ye k'olu sɔrɔ. Aw yɛrɛ b'o lɔn.

³⁵Ayiwa, ne y'a yira aw la cogo bɛɛ la ko an ka kan ka sɛgɛn ten, ka se ka dɛsɛbagatɔw dɛmɛ. O la, an hakili bɛ to Matigi Yezu yɛrɛ ka dalakuma nin na ko: ‘I ka mɔgɔ sɔn, duba b'o la ka tɛmɛ sɔrɔli kan.’ ”

³⁶Pɔli y'o kuma nunu fɔ ka ban minkɛ, u bɛɛ y'u kunbiri gwan ka Ala dali.

³⁷U kasira kosɛbɛ. U tora k'u bolo melekemeleke a kaan na k'a fo.

³⁸O kɔ, u taar'a bila sira kurun daa la. U bɛɛ dusu kasinin tun lo, bari a tun y'a fɔ u ye k'u si nyaa tɛna la ale kan tugu.