Read LAYIDUKURA KƐWALIW 21 Bible Online

KƐWALIW 21 - LAYIDUKURA bible

KƐWALIW 21

¹An y'an yɛrɛ sɔrɔ ka bɔ u bolo tuma min na, an donna kurun kɔnɔ ka tilen Kɔsi, o dugusagwɛ, an taara Orodɛsi, ka bɔ yen ka taa Patara.

²An ye kurun dɔ sɔrɔ yen min tun bɛ taara Fenisi jamana na. An donna o kɔnɔ

³ka se Sipɔrɔ masurun na, an tun b'a dugukolo yera yɛrɛ, an tɛmɛna a worodugu nyafan fɛ, k'an kuun sin Siri jamana ma. An taara bɔ Tiri, kurun kɔnɔna minanw tun ka kan ka jigi o yɔrɔ la.

⁴An ye kalanden dɔw sɔrɔ o yɔrɔ la, an ye tile wolonwula kɛ ni olu ye. Nii Senuman barika la, olu tun b'a fɔ Pɔli ye ko a kana taa Zeruzalɛmu.

⁵O bɛɛ n'a ta, an ye lɔgɔkun kelen nin kɛ ka ban tuma min na, an y'an ka sira ta. Cɛɛw, musow fara denmisɛnw kan, u bɛɛ y'an bila sira. An taamana ka bɔ dugu banakɔ ka se kɛnɛba dɔ la bada la. An bɛɛ y'an kunbiri gwan yen, ka Ala dali.

⁶O kɔ, an ye foliw didi nyɔgɔn ma, olu segira soo, anw ye kurun ta.

⁷An bɔra Tiri, ka taa Potolemayisi, k'o yɔrɔ kalandenw fo. An ye tile kelen kɛ olu fɛ yen.

⁸O dugusagwɛ, an bɔra k'an kuun la Sezare kan. An sera yen, an jigira kibaru diman fɔbaga Filipi fɛ. Cidenw tun ye mɔgɔ wolonwula minw woloma, olu kelen tun lo.

⁹Sunguru mɔgɔ naani tun b'a fɛ. Olu bɛɛ tun ye kiraw ye.

¹⁰An ye tile damani kɛ yen, kira dɔ bɔra Zude mara la ka na an sɔrɔ yen, a tɔgɔ tun ko Agabu.

¹¹A nana an sɔrɔ yen minkɛ, a ye Pɔli ka cɛsirilan ta k'a yɛrɛ seen n'a bolow siri n'a ye, k'a fɔ ko: “Mɔgɔ min ta ye cɛsirilan nin ye, Zuwifuw bɛn'a tigi minɛ k'a siri ten Zeruzalɛmu k'a don siya wɛrɛw bolo. Nii Senuman le ko ten.”

¹²Anw n'o yɔrɔ mɔgɔw ye kuma nin mɛn ten minkɛ, an ye Pɔli dali kosɛbɛ ko a kana taa Zeruzalɛmu.

¹³Nga a y'an jaabi ko: “Mun na aw bɛ kasira ten, n'aw b'a fɛ ka ne jigi tigɛ? Ka ne siri, o tɛ foyi ye ne fɛ. Ne ka sa yɛrɛ, Matigi Yezu kɔsɔn Zeruzalɛmu, ne labɛnnin lo o kama.”

¹⁴An dɛsɛra a kɔrɔ minkɛ, an ko Matigi b'a fɛ ka min kɛ, a k'o kɛ.

¹⁵O tile damani tɛmɛnin kɔ, an y'an yɛrɛ labɛn ka taa Zeruzalɛmu.

¹⁶Sezare kalanden dɔw taara an bila sira ka jatigila di an ma. An tun jigira fɔlɔ kalandenw dɔ fɛ min tɔgɔ ko Munazɔn, Sipɔrɔka tun lo.

¹⁷An sera Zeruzalɛmu minkɛ, kalandenw y'an kunbɛn ka nya ni nisɔndiya ye.

¹⁸O dugusagwɛ, Pɔli taara n'an ye Zaki ka soo. An taar'a sɔrɔ Ala ka jama ka cɛkɔrɔbaw bɛɛ tun lajɛnnin bɛ yen.

¹⁹A ye foli di u ma ka ban tuma min, Ala y'a dɛmɛ ka koo minw bɛɛ kɛ siya wɛrɛw cɛma, a y'o bɛɛ lakali u ye kelen kelen.

²⁰A lamɛnbagaw bɛɛ ye barika la Ala ye. O kɔ, u y'a fɔ a ye ko: “Pɔli, i nyaa b'a la ko Zuwifuw caaman bɛ yan minw kɛra an kretinyɛw ye. U bɛ Musa ka sariyaw labato kosɛbɛ.

²¹Mɔgɔw bɛ min ;nunu;nunu i koo la, u y'o mɛn. Mɔgɔw ka fɔ la, ko i b'a fɔra Zuwifuw ye, minw siginin bɛ jamana kɔ kan siya wɛrɛw cɛma, k'olu kana u deenw kɛnɛkɛnɛ, k'u kana Musa ka sariyasigininw labato. Ko i b'u bali ka landaw labato.

²²Ayiwa, an bɛna mun kɛ? Siga t'a la, u bɛn'a mɛn ko i nana.

²³O tuma na, an bɛna min fɔ i ye, sɔn k'o kɛ. Cɛɛ naani bɛ yan dadili juru bɛ minw na.

²⁴I ka taa n'u ye ka fara u kan aw bɛ saniyali sarakaw bɔ. E yɛrɛ ka lɔ n'a kunko ye, waasa u ka se k'u kuunw li, u ka dalilu juru ka ban. O la, mɔgɔw bɛn'a lɔn ko kuma min bɛ ;nunu;nununa i koo la, k'o tɛ tinyɛ ye. U bɛn'a lɔn ko i fana bɛ Musa ka sariyaw labatora.

²⁵Siya wɛrɛ minw lara Yezu la, olu ta, an tun ye sɛbɛ ci u ma k'an ka ;naniyata fɔ u ye: k'u kana josɔnsogo nyimi, ani sogo min kaan ma tigɛ, k'u kana sogo joli dumu, ko u k'u yɛrɛ tanga kakalaya ma.”

²⁶O dugusagwɛ, Pɔli taara ni mɔgɔ nunu ye. A farala u kan ka saniyali landa kɛ. O kɔ, a taara Alabatosoba kɔnɔ k'o saniyali labanlon fɔ, u kelen kelen bɛɛ ka saraka ka kan ka bɔ o loon min na.

²⁷Saniyali min bɛ kɛ tile wolonwula minw kɔnɔ, o daa tun bɛ nyini ka fa. Azi mara Zuwifu dɔw nana Pɔli ye Alabatosoba kɔnɔ, u ye jama kɔnɔnasu ka bila Pɔli la, u y'a minɛ.

²⁸U tun b'a la ka pɛrɛn ko: “Aw ye nya an ma Isirayɛli jama! Cɛɛ min bɛ to ka Isirayɛlidenw mafinyɛya yɔrɔ bɛɛ la, a filɛ nin ye. A bɛ to k'an ka sariyaw n'an ka Alabatosoba nin tɔgɔjugu fɔ mɔgɔ bɛɛ ye. O bɛɛ kɔ, a donna ni siya wɛrɛw ye a kɔnɔ k'o yɔrɔ senuman nin nɔgɔ.”

²⁹Tinyɛ na, u kɔni tun ye Pɔli ni Efɛzika Torifini ye nyɔgɔn fɛ dugu kɔnɔ. U y'a miiri ko a donna n'a ye Alabatosoba kɔnɔ.

³⁰Mankan bonyana fɔɔ ka se dugu faan bɛɛ la. Mɔgɔw girinna ka bɔ faan bɛɛ. U ye Pɔli sama ka bɔ n'a ye k'a daaw tugu.

³¹U tun bɛ Pɔli fagayɔrɔ nyinina minkɛ, dɔw taar'a fɔ sɔlidasi kuntigi ye ko dugu nyagaminin lo.

³²O yɔrɔnin bɛ, ale y'a ka sɔlidasi dɔw cɛ ka girin ka se o yɔrɔ la. Jama ye sɔlidasiw nanin ye minkɛ, u ye Pɔli bugɔli dabila.

³³O tuma na, sɔlidasi kuntigi gwɛrɛla ka Pɔli minɛ, ko a ka sɔlidasiw k'a siri ni jɔrɔkɔ fila ye. O kɔ, a ye nyiningali kɛ ko yala jon lo, ani ko a ye mun kɛ.

³⁴Mɔgɔw tora ka pɛrɛn, bɛɛ n'a ka fɔta. Sɔlidasi kuntigi tun tɛ sera ka foyi faamu minkɛ, a ko sɔlidasiw ka taa ni Pɔli ye u ka yɔrɔ la kaan kɔnɔ.

³⁵U sera yɛlɛyɛlɛnanw ma tuma min na, sɔlidasiw dɛsɛra le ka Pɔli nyun jama ka fariya kɔsɔn,

³⁶bari u bɛɛ tun b'a la ka pɛrɛn sɔlidasiw kɔfɛ ko: “Aw y'a faga! Aw y'a faga!”

³⁷U tun bɛ nyini ka don ni Pɔli ye kaan kɔnɔ tuma min na, Pɔli y'a nyininga ko: “Yala a daganin bɛ n ka kuma i fɛ wa?” Sɔlidasi kuntigi y'a jaabi ko: “I bɛ girɛkikan mɛn wa?

³⁸Yala, Ezipiti kanbelen min kɛra sababu ye kɔsa nin na jama murutira fɔɔ a taara ni kɛlɛden waa naani ye a fɛ kongo kɔnɔ, e tɛ o ye wa?”

³⁹Pɔli y'a jaabi ko: “Ne ye Zuwifu ye ka bɔ Tarisi, Silisi mara la. N ka dugu tɛ dugudogonin ye. Ne b'i dali, a to n bɛ dɔ fɔ jama ye.”

⁴⁰Sɔlidasi kuntigi ye sira d'a ma. O la, a lɔra yɛlɛyɛlɛnan nunu kan k'a bolo kɛ ko mɔgɔw ka je. Mɔgɔw jera tuma min na, a kumana u fɛ eburukan na ko: