Read LAYIDUKURA KƐWALIW 22 Bible Online

KƐWALIW 22 - LAYIDUKURA bible

KƐWALIW 22

¹“N faaw, ani ne balimaw, n bɛna min fɔ sisan waasa ka n yɛrɛ koo gwɛ aw ye, aw k'aw tulo malɔ o la ka nya.”

²U y'a ye ko Pɔli bɛ kumana u fɛ eburukan na minkɛ, yɔrɔ sumana tɛtɛtɛ fɔɔ ka nya.

³“Ne ye Zuwifu ye, n wolola Tarisi, Silisi mara la, nga n lamɔna dugu nin kɔnɔ yan. Gamaliyɛli le ye n kalan kosɛbɛ an faaw ka sariyaw la. N ka Alako tun tɛ tolonkɛko ye, i n'a fɔ aw fana ta bɛ cogo min na bii.

⁴Ne tun bɛ sirakura nin taamabagaw tɔɔrɔ, ka dɔw faga, cɛɛ fara musow kan, ne tun b'u minɛ ka jɔrɔkɔ kɛ u la, k'u don kaso la.

⁵Sarakalasebagaw kuntigiba ni cɛkɔrɔbaw ka jɛnkulu bɛ se k'a fɔ ni galon lo, ni tinyɛ lo. Loon dɔ la, ne ye sɛbɛ sɔrɔ olu fɛ ko n ka ta'a di an baden Zuwifuw ma Damasi, ka Yezu kɔmɔgɔw minɛ yen ka na n'u ye Zeruzalɛmu k'u tɔɔrɔ.

⁶“Ka n to sira kan, n tun surunyana Damasi la tilegwan fɛ, yeelenba dɔ bɔra sanfɛ ka na ne lamini.

⁷N bɔra ka ben, kumakan dɔ bɔra, o ko n ma: ‘Sawuli, Sawuli, mun na i bɛ ne tɔɔrɔla ten?’ [20]

⁸Ne ye kumakan nin jaabi ko: ‘E ye jon ye?’ Kumakan nin ko: ‘Ne ye Nazarɛti Yezu ye, i bɛ n tɔɔrɔla.’

⁹N taamanyɔgɔn nunu kɔni tun ye yeelen nin ye nga u ma kumakan nin mɛn.

¹⁰Ne ko: ‘N ka kan ka mun kɛ Matigi?’ A ye ne jaabi ko: ‘Wili ka taa Damasi, e ka kan ka min kɛ, u bɛna o fɔ i ye.’

¹¹Yeelen nin bonya kojugu fɛ, n nyaa bɔsira n na, n taamanyɔgɔnw le ye n bolo minɛ ka taa Damasi.

¹²“Cɛɛ dɔ tun b'o yɔrɔ la, a tɔgɔ tun ko Ananiyasi, a tun bɛ Ala ka sariyaw labato kosɛbɛ, a tɔgɔnyuman tun bɛ Zuwifuw bɛɛ daa la o yɔrɔ la.

¹³Ale nana ne sɔrɔ, k'a fɔ ne ye ko: ‘N teri Sawuli, i nyaa ka yɛlɛ.’ O yɔrɔnin bɛ ne nyaa yɛlɛla.

¹⁴A y'a fɔ ne ye ko: ‘An faaw ka Ala y'i woloma k'i kɛ a ta ye, janko i k'a sago lɔn, i nyaa ka la a ka Mɔgɔnyuman kan, ka mɛnni kɛ ale yɛrɛ daa la,

¹⁵bari a b'a fɛ ko i nyaa ye min ye, an'i tulo ye min mɛn ale fɛ, i ka kɛ ale seere ye k'o lakali mɔgɔw bɛɛ ye.

¹⁶Ayiwa, i bɛ mun le kɔnɔ tugu? Wili an b'i batize i ka kojuguw ka yafa ale Yezu barika la.’

¹⁷“Ayiwa, ne tun segira ka na Zeruzalɛmu. Ka ne to Ala dali la loon dɔ Alabatosoba kɔnɔ, ne ye fɛɛn dɔ ye.

¹⁸Matigi tun lo, a y'a fɔ n ye ko: ‘Teliya ka Zeruzalɛmu dugu bila, bari i bɛ min lase mɔgɔw ma ne koo la, u tɛna la o la.’

¹⁹Ne y'a jaabi ko: ‘Matigi, u b'a lɔn ko ne tun bɛ taa Alabatosow kɔnɔ k'i kɔmɔgɔw minɛ ka taa u don kaso la ka dɔw bugɔbugɔ ni golokamiw ye.

²⁰I tericɛ Etiyɛni ka fagatuma na, ne tun b'u fɛ, o tun diyara n ye fana. Ne le tun y'a fagabagaw ka faniw minɛ.’

²¹A y'a fɔ ne ye ko ale bɛna ne ci ka taa yɔrɔjan siya wɛrɛw fɛ.”

²²Jama ye Pɔli lamɛn fɔɔ ka na se o kuma nunu ma minkɛ, u pɛrɛnna ka to k'a fɔ ko: “O mɔgɔ sifa nunu ka kan ka faga, a man kan ka to nii na.”

²³Mankan bonyana, u tora k'u ka faniw fili sanfɛ, ka to ka buguri cɛ k'a fili sanfɛ.

²⁴Ayiwa, sɔlidasi kuntigi y'a fɔ k'u ka don ni Pɔli ye a ka yɔrɔ la kaan kɔnɔ, k'u k'a bugɔ, waasa a ka jama murutikun fɔ.

²⁵U ye Pɔli siri k'u bɛn'a bugɔ tuma min na, a y'a fɔ o sɔlidasiw kuntigi ye ko: “Sira dinin b'aw ma waasa ka Ɔrɔmuka bugɔ ka sɔrɔ a ma kiti wa?”

²⁶Sɔlidasi kuntigi nin y'o mɛn minkɛ, a taara o nyafɛ sɔlidasi kuntigiba ye ko cɛɛ nin ye Ɔrɔmuka ye.

²⁷O fana nana Pɔli nyininga ko: “I ye Ɔrɔmuka ye tinyɛ na wa?” Pɔli y'a jaabi ko ɔnhɔn.

²⁸Sɔlidasi kuntigiba ko ale ye wariba le sara ka sɔrɔ ka jati Ɔrɔmuka ye. Pɔli y'a jaabi ko ale ye Ɔrɔmuka ye kabini a wololon.

²⁹O tuma na, mɔgɔ minw tun ka kan k'a bugɔ, olu bɛɛ y'a ye k'a to yen. Sɔlidasi kuntigiba nin kɔni y'a lɔn ko ale ye Ɔrɔmuka le siri ten minkɛ, a siranna kosɛbɛ.

³⁰Dugu gwɛra, Zuwifuw bɛ Pɔli jalakila kuun min na, sɔlidasi kuntigi nin tun b'a fɛ k'o lɔn. O la, a y'a fɔ sarakalasebagaw ni Zuwifuw ka kititigɛlaw bɛɛ ye k'u ka nyɔgɔn lajɛn, ko ale bɛna Pɔli d'u ma u k'a kiti. O la, a ye Pɔli foni ka ta'a d'u ma.