Read LAYIDUKURA KƐWALIW 24 Bible Online

KƐWALIW 24 - LAYIDUKURA bible

KƐWALIW 24

¹Ayiwa, tile duuru tɛmɛnin kɔ, sarakalasebagabaw kuntigiba Ananiyasi ni cɛkɔrɔba damani nana Sezare. Cɛɛ kumalɔnbagaba dɔ tun b'u fɛ, o tɔgɔ tun ko Tɛritilusi. U taara masacɛ ka lasigiden fɛ waasa ka Pɔli jalaki.

²U ye Pɔli wele ka bɔ. Tɛritilusi ye kuma daminɛ, a ko lasigiden ma: “Lasigidennyuman, an bɛ hɛrɛba min na jamana kɔnɔ bii, e le barika lo. E ka hakilitigiya baara kɔsɔn, yɛlɛmani caaman kɛra.

³An b'o hɛrɛ min sɔrɔ yɔrɔ bɛɛ ni tuma bɛɛ, an b'i walenyuman lɔn o la, kɔrɔ Felikisi.

⁴An ka kuma kuntaga man jan, o la ne b'i dali, e ka sabali ka mɛnni kɛ an fɛ dɔɔni.

⁵“Ayiwa, an y'a ye ko cɛɛ nin kɛra i n'a fɔ fɔnyɔbana. A bɛ Zuwifuw kuun gosi nyɔgɔn na dinyɛ faan bɛɛ. Nazarɛtika ka diinakura nyamɔgɔ dɔ lo.

⁶A tun b'a fɛ k'an ka Alabatosoba nɔgɔ yɛrɛ, o le y'a to an y'a minɛ. [A tun b'a fɛ k'a kiti ka kɛnyɛ n'an ka sariya ye,

⁷nga sɔlidasi kuntigi Liziyasi nan'a bɔsi an bolo fanga na

⁸ko a jalakibagaw ka na ele fɛ.] N'i ye ale Pɔli yɛrɛ nyininga, a bɛn'a jalakikun fɔ i ye, i bɛn'a lɔn ko an bɛ min fɔra, ko tinyɛ lo.”

⁹Zuwifu nunu ye cɛɛ ka kuma tintin ko tinyɛ yɛrɛ lo.

¹⁰Lasigiden ye sira di Pɔli ma ko a ka kuma. O la, Pɔli ye kuma ta k'a fɔ ko: “Ayiwa, ne y'a lɔn ko ele Felikisi le ye an ka jamana ka kititigɛbaga ye kabini saan damani. O la, ne tɛna siran ka n ka kuma fɔ.

¹¹I bɛ se ka nyiningali kɛ k'a lɔn ko tinyɛ lo, bari a ma tɛmɛ tile tan ni fila kan fɔlɔ, ne tun taara Zeruzalɛmu ka Ala bato.

¹²A mɔgɔ tɛ yen min bɛ se k'a disi gosi k'a fɔ ko a ye ne ye sɔsɔli la ni mɔgɔ dɔ ye Alabatosoba kɔnɔ walima Alabatosow dɔ kɔnɔ, walima dugu kɔnɔ. N ma kɛ sababu ye ka mɔgɔw bila nyɔgɔn na fana.

¹³Mɔgɔ nunu ko ne ye min kɛ, fɛɛn min b'a yira ko tinyɛ lo, u k'o fɔ.

¹⁴Ayiwa, ne kɔni bɛ min lɔn, o filɛ nin ye: Olu k'o sira nin tɛ siranyuman ye, ne bɛ baara kɛra an bɛmaw ka Ala ye ka kɛnyɛ n'o sira ye. Min bɛɛ fɔra sariya la, ani kiraw ye minw sɛbɛn, ne b'o bɛɛ labato.

¹⁵Ne ni olu bɛɛ jigi bɛ Ala kan ko a bɛna mɔgɔnyumanw ni mɔgɔjuguw bɛɛ kunun dinyɛ labanlon.

¹⁶O kama ne banbanin lo, n ka kɛ mɔgɔ kɔnɔgwɛnin ye Ala ni mɔgɔw nyana.

¹⁷“Ne ye saan damani kɛ n tun tɛ Zeruzalɛmu. O kɔ, n segira ka na dɛmɛfɛn di n ka siya ma, ani ka saraka bɔ Ala ye.

¹⁸O waati la, dɔw ye ne ye Alabatosoba kɔnɔ, nga mankan tun tɛ ne ni mɔgɔ si cɛ, ne tun bɛ n yɛrɛ saniyara le.

¹⁹Zuwifu dɔw tun bɛ yen ka bɔ Azi mara la. Olu le tun ka kan ka kɛ yan ka ne jalaki n'o y'a sɔrɔ ni ne ye koo kɛ.

²⁰Walima, minw bɛ yan n'u tun bɛ ne kitiyɔrɔ la Zeruzalɛmu, u k'a fɔ ni jalakiyɔrɔ tun sɔrɔla n na.

²¹N tun pɛrɛnna sinyɛ kelen, k'a fɔ ko: ‘Suuw kununko kama lo aw bɛ ne kitira bii kɛ.’ K'o niin bɔ a la, n ye mun kɛ?”

²²Felikisi tun bɛ koo caaman faamu sira nin koo la minkɛ, a y'a fɔ u ye ko: “Ni sɔlidasi kuntigi Liziyasi nana yan tuma min na, ne bɛna koo nin nyafilɛ.”

²³A y'a fɔ Pɔli kɔlɔsibaga ye ko a ka taa ni Pɔli ye i n'a fɔ kasoden, nga ko a k'a to a bɛ lafiya sɔrɔ. Ko a kana Pɔli ka mɔgɔw si bali k'a dɛmɛ.

²⁴Tile damani tɛmɛnin kɔ, Felikisi n'a muso Durusiyi nana. A muso tun ye Zuwifu ye. U ko ka Pɔli wele, a ka dɔ fɔ ale ye Yezu Krista ka koo la.

²⁵Pɔli kumana ka taa tilenninyako faan fɛ, ni yɛrɛminɛko, ani Ala ka kiti nata faan fɛ minkɛ, Felikisi siranna kosɛbɛ, a y'a fɔ Pɔli ye ko: “A ka nyi ten, taa, n bɛna i wele.”

²⁶Felikisi tun b'a miiri ko Pɔli bɛna na wari di ale ma, o kama a tun bɛ Pɔli wele filafila ka baro kɛ n'a ye.

²⁷O cogo la, saan fila tɛmɛna, mɔgɔ wɛrɛ nana Felikisi nɔɔ ta lasigidenya la. O tigi tɔgɔ tun ko Pɔsiyusi Fɛsitusi. Felikisi tun b'a fɛ ko Zuwifuw k'ale tɔgɔnyuman fɔ minkɛ, a taara ka Pɔli to kaso la.