Read LAYIDUKURA KƐWALIW 26 Bible Online

KƐWALIW 26 - LAYIDUKURA bible

KƐWALIW 26

¹O tuma na, Agiripa y'a fɔ Pɔli ye ko kuma b'a bolo. Pɔli y'a bolo wili k'a fɔ ko:

²“Masa Agiripa, ne b'a fɔ ko ne dagamuna bari ne sera ka lɔ ele nyafɛ bii ka n ka koow nyafɔ i ye. Zuwifuw ye minw bɛɛ fɔ ka la ne kan, n bɛna o nyafɔ i ye.

³N dagamuna bari e b'an Zuwifuw ka landaw bɛɛ lɔn, sɔsɔli minw b'an cɛ Alasira koo la, i b'o bɛɛ lɔn. O la, ne b'i dali e ka munyu ka ne lamɛn.

⁴“Ayiwa, Zuwifuw bɛɛ bɛ ne taamacogo lɔn ka bɔ n ka dugu la, ani Zeruzalɛmu kabini ne kanbelenman tuma.

⁵An ka Alasira la, Farizinyɛw le ka Alabatocogo ka gwɛlɛ. Olu yɛrɛ b'a lɔn a mɛnna ko ne tun ye Farizinyɛ;nana ye. N'o ye tinyɛ ye walima ni galon lo, u bɛ se k'a fɔ.

⁶Ala y'a daa di an faaw ma koo min na, ne jigi b'o kan minkɛ, o kama lo ne bɛ kitira bii.

⁷An ka siya bɛɛ jigi b'a kan ko Ala y'a daa di koo min na k'o bɛna kɛ. O kama u jijanin bɛ ka to ka Ala bato suu fara tile kan. Masa Agiripa, o jigi min bɛ ne fɛ, o kama Zuwifuw bɛ ne jalakira.

⁸Aw Zuwifuw bɛ se k'a fɔ cogo di ko Ala tɛ se ka suuw kunun?

⁹“Ne kɔni tun y'a miiri ko ne tun ka kan ka koo bɛɛ kɛ waasa Nazarɛti Yezu tɔgɔ ka tunu.

¹⁰Ne tun y'o baara daminɛ Zeruzalɛmu. Ne yɛrɛ tun ye mɔgɔ caaman minɛ k'u don kaso la, bari sarakalasebagaw tun y'o see di ne ma. O kasoden nunu fagako tun ka di ne ye fana.

¹¹Tuma caaman, ne tun bɛ taa u tɔɔrɔ Alabatosow kɔnɔ, ka caaman wajibiya k'a fɔ k'u ma la Yezu la. Dimi kɔsɔn, n tun bɛ taa hali dugu wɛrɛw la k'ale Yezu kɔmɔgɔw tɔɔrɔ yen.

¹²“Ayiwa, o cogo la, ne tun bɛ taara Damasi loon dɔ la. Sarakalasebagaw le tun y'o sira di ne ma.

¹³Masa Agiripa, ka ne to sira kan tilegwan fɛ, ne ye yeelenba dɔ bɔtɔ ye sanfɛ ka na ne ni n taamanyɔgɔnw bɛɛ lamini. Yeelen nin tun ka bon ka tɛmɛ.

¹⁴An bɛɛ benna. Ne ye kumakan dɔ mɛn eburukan na ko: ‘Sawuli, Sawuli, mun na i bɛ ne tɔɔrɔla ten? A ka gwɛlɛ i ma ka kogo bugɔ.’

¹⁵Ne ye kumakan nin jaabi ko: ‘E ye jon ye?’ A ko: ‘Ne ye Yezu ye n'i bɛ n tɔɔrɔla.

¹⁶Nga, wili ka lɔ i seen kan. Ne ye n yɛrɛ yira e la waasa e ka kɛ ne ka baarakɛla ye, n ye koo min yira i la, i k'o lakali mɔgɔ tɔw ye, ani e bɛna min ye kɔfɛ fana, i k'o bɛɛ lakali.

¹⁷Ne bɛna i kisi Zuwifuw, ni siya wɛrɛw ma. Bari ne b'a fɛ k'i ci olu le fɛ,

¹⁸k'u nyaa yɛlɛ ka dibidibikow dabila, k'u sama ka bɔ Sutana bolo k'u nyasin Ala ma. N'u lara ne la, Ala bɛna yafa u ma ka sigiyɔrɔ d'u ma a ka mɔgɔw cɛma.’

¹⁹“Ayiwa masa Agiripa, Ala y'o min fɔ ne ye, ne ma se k'a sɔsɔ.

²⁰Ne y'a daminɛ ka Damasikaw waaju fɔlɔ, ani Zeruzalɛmukaw, ka Isirayɛli jamana bɛɛ waaju, ani siya wɛrɛw. N y'u waaju k'a fɔ u ye k'u ka kan ka nimisa ka faran u ka kojuguw la ka segi Ala ma, ka kɛwalinyumanw kɛ minw b'a yira k'u sɔnna.

²¹O kama lo Zuwifu dɔw nana n sɔrɔ Alabatosoba kɔnɔ ka n minɛ, u tun b'a fɛ ka ne faga.

²²Nga Ala ka dɛmɛli sababu la, halibi ne bɛ yen, ka se ka tinyɛ fɔ setigiw ni faantanw ye. Kiraw ni Musa nunu tun y'a fɔ ko min bɛna kɛ, ne ma dɔ fɔ ka tɛmɛ olu ta kan.

²³U ko Ala ka Mɔgɔwolomanin bɛna tɔɔrɔ ka sa, ko ale le bɛna kɛ suu fɔlɔ ye ka kunun ka an Zuwifuw ka siya, ani siya tɔw kisi.”

²⁴Ka Pɔli to a ka kuma nyafɔ la, Fɛsitusi pɛrɛnna a kan ko: “E kuun tɛ yen wa? I ye kalan kɛ fɔɔ ka taa kɛ fatɔ ye kɛ!”

²⁵Pɔli y'a jaabi ko: “Kɔrɔ Fɛsitusi, faa tɛ n na. N bɛ kuma minw fɔra, tinyɛ kumaw lo. Fatɔ kumaw tɛ.

²⁶Ne b'o koow fɔra masa min ye, o b'a lɔn, hali a kelen ma dogo a ma, n lanin b'o la. Bari o koow ma kɛ yɔrɔdogonin na.

²⁷Masa Agiripa, e lanin bɛ kiraw ka kuma fɔninw na wa? Ne y'a lɔn ko i lanin b'u la.”

²⁸Agiripa ko a ma: “E b'a miiri ko i bɛna ne kɛ Krista ka mɔgɔ ye waatisurun kɔnɔ ten wa?”

²⁹Pɔli y'a jaabi ko: “A kɛra waatisurun ye wo, a kɛra waatijan ye wo, ne kɔni b'a nyini Ala fɛ, a kana dan e kelen ma dɛ, nga minw bɛɛ bɛ ne lamɛnna bii, ko ne bɛ cogo min na ten, aw bɛɛ ka kɛ o cogo la. Nga jɔrɔkɔ kana kɛ aw la.”

³⁰Masacɛ wilila, ani lasigiden, ni Berenisi ani mɔgɔ minw bɛɛ tun siginin bɛ ni olu ye.

³¹U taara kɔfɛ ka to k'a fɔ nyɔgɔn ye ko: “Cɛɛ nin ma fɛɛn kɛ n'a ka kan ka faga walima ka kaso kɛ min kama.”

³²Agiripa y'a fɔ Fɛsitusi ye ko: “Cɛɛ nin ko Ɔrɔmu masacɛ niin ka don koo nin na minkɛ, n'o tɛ, a ka kan ka labila.”