Read LAYIDUKURA KƐWALIW 3 Bible Online

KƐWALIW 3 - LAYIDUKURA bible

KƐWALIW 3

¹Loon dɔ, Piyɛri ni Zan tun bɛ taara Alabatosoba kɔnɔ wulafɛ batoli la.

²Cɛɛ dɔ tun bɛ yen, a murukunin tun lo kabini a wolotuma. Mɔgɔw tun b'a ta ka ta'a bila loon o loon Alabatosoba daa dɔ la, u b'o min wele ko Daa cɛnyuman, janko a ka saraka dali donbagaw fɛ.

³A ye Piyɛri ni Zan ye tuma min na, u tun bɛ nyini ka don Alabatosoba kɔnɔ. A ye saraka dali u fɛ.

⁴Piyɛri ni Zan ye cɛɛ filɛ, k'a fɔ a ye ko: “An filɛ ka nya.”

⁵A y'a nyaa basanin to u kan, a ka miiri la ko a bɛna fɛɛn dɔ sɔrɔ u fɛ.

⁶Nga Piyɛri y'a fɔ a ye tugu ko: “Sanu tɛ n fɛ, wari tɛ n fɛ, nga fɛɛn min bɛ n fɛ, ne b'o le d'i ma: Nazarɛti Yezu Krista tɔgɔ barika la, wili ka taama.”

⁷Piyɛri y'a minɛ a kinibolo ma k'a lawili. O yɔrɔnin kelen, cɛɛ seenw kɛnɛyara, a senfasaw ye barika sɔrɔ.

⁸A panna ka cun! A taamana ka don n'u ye Alabatosoba kɔnɔ. A tora ka taama ka panpan, ka barika la Ala ye.

⁹Mɔgɔ bɛɛ y'a taamatɔ ye ka to ka Ala tando.

¹⁰U y'a lɔn ko ale le tun bɛ sigi Alabatosoba Daa cɛnyuman kɔrɔ ka saraka dali. O ye mɔgɔw kabakoya ka dama tɛmɛ fɔɔ k'u hakili nyagami.

¹¹Cɛɛ ma sɔn ka bɔ Piyɛri ni Zan kɔ, mɔgɔw hakili nyagaminin girinna k'u lamini yɔrɔ dɔ la, u b'o min wele ko Solomani ka bolonda.

¹²Piyɛri y'o ye minkɛ, a y'a kaan to ko: “Jama, koo min kɛra ten wo, mun na o b'aw kamanagwan k'aw nyaa coron anw na ka kɛ i n'a fɔ anw ka sebagaya le ye cɛɛ kɛnɛya, walima an ka Ala nyasiranya kɔsɔn le?

¹³Nga an bɛma Ibrayima, ni Isiyaka, ni Yakuba ani an faaw bɛɛ ka Ala le ye nɔɔrɔ la a Sagokɛla Yezu kan, aw banna ale min na k'a don mɔgɔjuguw bolo. Pilati tun b'a fɛ k'a bila, aw ko fewu.

¹⁴Aw banna Mɔgɔsɛbɛ ni Mɔgɔnyuman na, ale min y'a yɛrɛ di Ala ma a sagokɛ kɔsɔn. Aw banna ale la ko fɔɔ Pilati ka mɔgɔfagala dɔ le labila.

¹⁵O la, mɔgɔw bɛ hɛrɛ sɔrɔ min barika la, aw y'a to u y'o faga, nga Ala y'a kunun. Anw y'a ye.

¹⁶An y'an jigi la Yezu kan minkɛ, o le y'a to a ye cɛɛ nin kɛnɛya, aw nyaa b'o min na, aw b'a lɔn fana ka kɔrɔ. Tinyɛ na, anw lara Yezu la minkɛ, o le y'a kɛnɛya aw nyakɔrɔ ten.

¹⁷“Sisan n badenw, ne y'a lɔn ko aw, n'aw ka nyamɔgɔw ye koo nin kɛ, sabu aw tun m'a lɔn.

¹⁸N'o tɛ Ala tun y'a fɔ a ka kiraw ye kabini fɔlɔ, ko a bɛna mɔgɔ min woloma k'a bila ka na, k'o bɛna tɔɔrɔ. A do kɛra ten.

¹⁹O tuma na sa, aw ye nimisa ka faran aw ka kojuguw la ka segi Ala ma, janko a ka yafa aw ma.

²⁰Aw k'a kɛ ten, o la, yɛlɛmani bɛna don, lafiya bɛna sɔrɔ. O seen fɛ Ala bɛna segi k'a ka Mɔgɔwolomanin Yezu ci aw ma tugu, i n'a fɔ a y'a latigɛ cogo min na.

²¹Nga sanni o waati ka se, a siginin bɛna to Ala kɔrɔ fɔlɔ yan ni yɛlɛmani bɛ don dinyɛ koow bɛɛ la, ka kɛnyɛ ni Ala ka kiraw ka kuma ye, o min fɔra kabini tumajan.

²²Musa tun kɔnna k'a fɔ ko: ‘Matigi Ala bɛna kira dɔ lawili aw cɛma min bɛna kɛ i n'a fɔ ne Musa. A mana kuma o kuma fɔ aw ye, aw k'o bɛɛ labato.

²³Ni mɔgɔ min banna ka mɛnni kɛ o kira nin fɛ, o tigi bɛna halaki.’

²⁴Kira minw tɛmɛna ka kɔrɔ, k'a ta Samuyɛli ma, ani minw tugura a kɔ, olu bɛɛ fana y'an ka bii tile koo fɔ ka tɛmɛ.

²⁵Aw ye kiraw ka deenw ye. Ala tun ye layidu ta aw faaw ye Ibrayima barika la, aw y'o deenw ye. A tun ko: ‘I deen sababu la, mɔgɔ bɛɛ bɛna duba sɔrɔ.’

²⁶Ala y'a Sagokɛla ci aw le ma fɔlɔ, janko a ka duba kɛ aw kelen kelen bɛɛ ye ka aw faran ka bɔ aw ka kɛwalijuguw la.”